Éxodo 32 - Kashibo-Kakataibo Biblia

¹ Usai Moisés aín bashinu kuanxbi panáirakëbëtan ka Israel unibunën anu rikianxun Aarón kakëxa: —Moisésnën ka nu Egipto menua chikínbëtsinkin bëaxa. ꞌAínbi kananuna uisai kara ꞌiaxa kixun ꞌunanima, usa ꞌain kamina achúshi dios an nu bërúanxun buánti ꞌaxúnti ꞌai kixun ka kakankëxa.

² Kakëxun ka Aarónën atu asabi ka kixun kakëxa: —Mitsun xanukama ꞌimainun min bëchikë bëbu min bëchikë xanu akamaxa pabinu paruntamëkë kuri ꞌakë akamina timëbëtsinkin ꞌë bëxúnti ꞌain.

³ Ësakian Aarónën kakëxun ka kamabi Israel unikaman, aín pabinu pañukë kuri ꞌakë a timëbiankin Aarón buánxuankëxa,

⁴ buánxunkëxun timëxun ka kurikama charokëxa, charatia ka vaca bëna tankin i ꞌakë anu ꞌaruakëxa, ꞌarukëxa xëntsai ꞌikë ax ꞌiruia ka manë xëta okë cincel anun ramëniokin vacabi ꞌinun upíokin mëníokëxa. Mëníotankëxun ka atu ꞌinánkëx ka Israel unikamax kiakëxa: —Ënëx ka dios an Egipto menua nukama chikínbëtsinkin bëkë a ꞌikën.

⁵ Usai kia kuankin ka Aarónën vaca bakë tankin ꞌakë kuri a maxá bukunrukin ꞌatankëxun anu nitsíankëxa, nitsintankëx ka unikama kai munuma banai kuëníshkin atu kakëxa: —Imë́ishi kananuna Nukën ꞌIbu rabikin achúshi fiesta ꞌati ꞌain.

⁶ Ësakian koonkë pëkarakëma ꞌaínshi nirutankëxun ka kamaxunbi atun ñu ꞌatima ꞌai ꞌuchakë kupí Dios ñuina rëxun ꞌaímai këñutanun xaroxuankëxa. Usakin pain ꞌatankëxun ka kamabi Israel unikaman timëkamë ꞌëoxun bukubuxun pianan xëakëxa. Usakin xëatankëx ka raírinëx ransakëxa.

⁷ Atúxa usai ꞌikëbëtan ka Nukën ꞌIbun Moisés kakëxa: —Ënuax kuabutankëxun kamina Egipto menuami bëkë unikaman ka ꞌatima ñu ꞌai ꞌuchakin ꞌën kakë bana a kuaisama tanxa isi kuanti ꞌain.

⁸ Bënëkinshi ka atun usai ꞌiti ꞌën kakë banakama manuxun bëtsi ñu ꞌaxa. ꞌAkin ka vaca bakë tankin ꞌakë kuri unioxa, usakin ꞌaxun ñuina xaroxunkin rabi ka ësai kia: Ënëx ka Israel unibunën dios an nu Egipto menua bëkë a ꞌikën kiax ka kikanxa.

⁹ Ësakinribi ka Nukën ꞌIbun Moisés kakëxa: —ꞌËnbi kana uisa kara ënë unikama ꞌikë kixun ꞌunan, usa ꞌixun ka ꞌën bana kuakinma atun nuitu iruaratia.

¹⁰ ¡Usa ꞌain kamina atumi nishkin këñunun ꞌë ënti ꞌain, bërí kana xuamati atumi nishin usa ꞌain kana atu këñuti ꞌain! ꞌAínbi kana min rëbúnki kamaxa ꞌuakamë ꞌëotanun ꞌimiti ꞌain.

¹¹ Ësai nishi kiabi ka abë banakin Moisésnën Dios ësokin kakëxa: ¿Nukën ꞌIbu uisoti karamina min unibu Egipto menua min kushínbi chikínbëtsinkin bëtankëxun min ami nishkin këñuti ꞌain?

¹² ¿Uisoti karamina egipcio unibunëxa mi ñui Diosan ka anu uni ꞌikëma menuxun këñuminuxun Israel unikama ënua chikínbiankin uanxa kinun këñumiti ꞌain? Usa aín kamina nishkinbi; Israel unikama këñútimi sinánkë a ënti ꞌain.

¹³ Min uni ꞌiakama Abraham, Isaac ꞌimainun Jacob akama kaimi kia bana akamina sinánti ꞌain, ꞌën kana min rëbúnkinëxa naínu ꞌikë ꞌispa tupuribi ꞌitánun, ꞌuákamë ꞌëomikin ꞌën mi ñuixunkë mekama min rëbúnki ꞌinánti ꞌain kixun kamina atu kakën.

¹⁴ Ësakian Moisésnën kakëxun ka sinanakin Nukën ꞌIbun Israel unikama këñunun ꞌimiama ꞌikën.

¹⁵ Usa ꞌain ka Moisés aín bashinuax utëkënkin maxá pará rabë́ Diosanbia aín bana amo rabë́bi kuënëoxun usai ax kikësa oí ꞌiti bana ꞌinánkë a bëi uakëxa.

¹⁶ Ax ka Diosanbi ꞌakë ꞌiakëxa ꞌimainun ka Diosanbia amo rabë́bi usaía ax kikësabi oi ꞌiti bana kuënëokë ꞌiakëxa.

¹⁷ Usai abë ukin an pain kuankin ka Josuénën Moisés kakëxa: —ꞌAisamaira uni ꞌakanani ꞌikësa ꞌinun anu ꞌikë anuax sharatia kana kuatin.

¹⁸ ꞌAínbi ka Moisésnën kakëxa: —ꞌËn kuakëx ka bëtsi kanantankëx kuëëni sharati ꞌikëma ꞌikën, ꞌimainun ka abë ꞌakanankin bëtsin kanánkëx masá nuituti sharati ꞌikëma ꞌikën, ꞌën kuakëx ka uni paë́ax sharákësari ꞌia.

¹⁹ Usaia anuax ꞌikankë anu bëbakinbi ka Moisésnën unikaman vaca bakë kuri ꞌakë a rabia ꞌaisamaira sharati ransaia isakëxa, isi xuamati atumi nishkin ka Moisésnën maxá parusha rabë́ tuinbëtsinkë a bashi tanain tukibutanun niakëxa;

²⁰ nikinshi ka vaca bakë tankin kuri ꞌakë a bitankëxun tsinu ꞌaruakëxa, ꞌarukëxa ꞌaímai xarátia ka bitankëxun putuakin rëankëxa, rëxun ka putuakë a ꞌumpaxnu mëskútanun sakakëxa; sakatankëxun ka Israel unikama kakëxa bërí kamina ënë ꞌumpax xëakanti ꞌain kixun kakëxun ka xëakankëxa.

²¹ Usakin ꞌamitankëxun ka Moisésnën Aarón ami nishkin usakian ꞌakë a ñuikin kakëxa: —¿Añu kara ënë unikaman mibëtan, minmi ꞌaisamaira okin ꞌuchaminun ꞌax?

²² Kakëxun ka Aarónën kakëxa: —ꞌËmi kamina xuamati nishtima ꞌain. Minbi kamina ꞌunan ënë unikamax ka ꞌatima ñuishi ꞌati kuëënia.

²³ Usa ꞌixun ka atunbi ꞌë kaxa: Kamina achúshi dios an nu rëkuë́nxun buánti ꞌaxúnti ꞌain, kananuna ꞌunanima an nu Egipto menua chikinbëtsinki bëkë Moisés kara uisai ꞌiaxa kixun.

²⁴ Ësakian kakëxun kana ꞌën: Kamaxunbia atun kuri timëbëtsinkin ꞌë bëxunun kan, kakëxuan bëia kana tsi rëkirukënu purua purukëx ka charati achúshi ¡vaca bakë́sa ꞌinun ꞌiaxa kixun ka paránkin kakëxa!

²⁵ Usaia ꞌikë Moisésnën iskëxbi ka Israel unikama atúxbi bërúankakëmasa ꞌaish paë́nkë ꞌikëa ami nishkë unin uxun ami kuainuxun ꞌaisa ꞌiakëxa, Aarónën upíokin bërúankëma ꞌaish ka usai ꞌiakëxa,

²⁶ usai ꞌikë isi anúan atun ꞌikënu atsínkanti bai ꞌipitiu nirakëkin ka atu kakëxa: —Uikamax kara Nukën ꞌIbu kuëënkësabi oí ꞌia, akamax ka ꞌëbë timë́ti ꞌikën. Kiaxa kikëbë ka kamabi Levitas unikamax Moisés anu ꞌikë anu timë́akëxa.

²⁷ Timë́kë ka atu Moisésnën kakëxa: —Ësai ka Israel unibunën Dios kiaxa: Mikaman achúshi achúshinën kamina mitsun manë xëtokë bibiani anumi ꞌikënu kuantankëxun, xëkuëtibi nirakëkin min aintsi ꞌibu an ñu ꞌatima ꞌakë ꞌanan bëtsi unikamaribi ꞌanan min ꞌunánkë ꞌimainun axa mi rapasu ꞌikë kamaribi ꞌati ꞌain.

²⁸ Ësakian kakëxun ka Levitas unibunën Moisésnën kakësabiokin ꞌakëxa, a nëtënbi ka tres mil uni ꞌakëxa.

²⁹ Usakin ꞌakë ka Moisésnën kakëxa: —Bërí ka Nukën ꞌIbun mitsu upíokin sinánxuanan sacerdote kamasa ꞌinun ꞌimia, mitsúnbi kamina bëtsían aín bëchikëbi ꞌamainun raírinën aín xukë́n ꞌibubi ꞌan. Usa ꞌain ka bërí Nukën ꞌIbun mitsu upíokin sinánxunti ꞌikën.

³⁰ Usakin ónkë pëkarakëbëtan ka Moisésnën unikama kakëxa: —Mitsux kamina ꞌatima ñuira ꞌai chaiira ꞌuchakan, usa ꞌain kana aín bashi mapërakëtankëx Diosbë banai kuanti ꞌain, mitsux ꞌuchakë kupín kara uisokin Nukën ꞌIbun ꞌë kaia kuati kuanti ꞌain.

³¹ Usokin atu kabiani amiribishi anua ꞌikë anu mapërakëtankëxun ka Moisésnën Nukën ꞌIbu ësokin kakëxa: —Asérabi ka unikaman chaiira ꞌuchakin vaca bakë́sa okin kuri unioxa a ka Israel unikaman aín dios isa kixun kaxa.

³² ꞌAínbi kana ꞌën atun ꞌuchami tërënxunun mi ñukáxuni uan; atun ꞌuchakë ¡tërëntisama tankin kamina ꞌë ꞌati ꞌain ꞌanan kamina ꞌën anë kirikanu kuënëokë aribi tërënti ꞌain!

³³ Kiabi ka Nukën ꞌIbun kakëxa: —Uikamax kara ꞌëmi ꞌuchaxa aín anë kamaishi kana kirikanua tërënti ꞌain.

³⁴ Usa ꞌain kamina ënë unikama a me ꞌinánnuxun mi kakë anu uanti ꞌain. ꞌËn ángel kana an mi rëkuë́n obianun xuti ꞌain. ꞌImainun kana uínsaran kara uni ꞌaisamaira tëmëramiti nëtë ꞌia a nëtën, kana atun ꞌucha kupín ꞌën ꞌaisamaira tëmëramikin ꞌatima oti ꞌain.

³⁵ Usakin kakëxa Moisés aín bashinuax kuan ka Nukën ꞌIbun achúshi ꞌinsín a unikamanu xuakëxa, Aarónëan vaca bakë́sa okin ꞌakë kuri rabikë kupín ka Diosan ꞌatima okëxa.