Éxodo 3 - Kashibo-Kakataibo Biblia

Nukën ꞌIbu Diosan Moisés ain anën kuëan bana

¹ Moisésnën ka aín kuku Jetró ꞌikëbi Reuel kakinribi anëkë uni an ꞌarakakë ovejakama bërúanxuankëxa, a unix ka sacerdote Madián kakë me anu ꞌikë ꞌiakëxa, achúshi nëtën ka anu uni ꞌikëma menu aín kukun ñuina ꞌarakakëkama buani kuankëxa, kuanx ka Diosan bashi kakë chairukë anu bëbakëxa ax ka Horeb kakë ꞌiakëxa.

² Anuax ka Nukën ꞌIbun ángel tsi rëkirukësa ꞌinun mërakëxa, mëratika i muxañu pëñanakëkë a nëbëtsinuax ꞌiakëxa, ꞌia Moisésnën upíokin iskëxbi ka i pëñanakëkë rëkirukë ax këñutima usabi ꞌikë isakëxa.

³ Usai ꞌia iskin ka sinánkëxa: “¡Uisa ñu kara usaía ꞌikë ux ꞌikën! Usai ꞌia kana ñu iskëma ꞌain, kana isi kuanti ꞌain, uisa kupín kara i pëñanakëkë ux nëmëtibi këñutima kixun.”

⁴ Sinánbiani kuankian ꞌurama obianiabi ka Nukën ꞌIbun Moisés i pëñanakëkë rëkirukë a mëuxun kuëëankëxa: —¡Moisés! ¡Moisés! —Kakian aín anën kuënkëxun ka ënu kana ꞌai ꞌËn ꞌIbu —kixun Moisésnën kakëxa.

⁵ Usakian kakëxun ka Diosanribi kakëxa: —ꞌUramaira ukin kamina ꞌë chichabëtsintima ꞌain, ꞌianan kamina min taxaka a ëchiti ꞌain anu ꞌëx ꞌikë me ënëx ka upíira ꞌikën.

⁶ Kakin ka ësokinribi kakëxa: —ꞌËx kana min chaitiokë aín Dios ꞌain ꞌimainun kana Abraham, Isaac Jacob akaman rabia Dios a ꞌain. Usakian kakëxun kuati ka Moisés aín chupan Dios istisamatani rakuë́ti bëmápuakëxa,

⁷ ꞌaínbi ka Nukën ꞌIbun: —Asérabi kana ꞌën unikama Egipto menuax tëmëraia isan. ꞌËn kana an bërúanxun ñu mëëmikë unikama ꞌucha kupían tëmëraia kuan, ꞌimainun kana asérabi ꞌën upíokin uisai kara atux tëmëraia kixun ꞌunan.

⁸ Usa ꞌain kana ꞌënbi a isi ubuan, egipcio unikaman ꞌaisamaira okin tëmëramia kana chikinuxun ꞌain. Ënë menua chikínbiankin kana atu me chaiira ꞌimainun upíira anua ꞌaisamaira ñuina xuma ꞌianan a piti ꞌitsaira ꞌimainun buna rëpa ꞌumpax iskësaira ꞌikë anu buánti aín. A mex ka anua cananeobë, hititas, amorreos, ferezeos, heveos ꞌimainun jebuseos unikama ꞌikë anu kana buánti ꞌain.

⁹ Ka kuat, ꞌënbi kana egipcio unibunëan ꞌaisamaira okin tëmëramikin Israel unikama ꞌatima oia isan.

¹⁰ Usa ꞌain kamina, mi kuanun mëníokati ꞌain, ꞌën kana faraónnu kuantanun mi xuti ꞌain, usa ꞌain kamina ꞌën uni Israelkama Egipto menua chikini kuanti ꞌain.

¹¹ Ësokian kakëxunbi ka Moisésnën Dios kakëxa: —¿ꞌËx karana añu ꞌain? ¿Añu ꞌixun karana anu kuanxun faraón Egiptonu ꞌikë Israel unibu chikinuxun kai kuanti ꞌain?

¹² Ësai kia ka Diosan kakëxa: —ꞌËx kana mibë ꞌiti ꞌain, ënëx ka ami unántiokin ꞌënbi mi xukë ꞌiti ꞌikën: Egipto menua ꞌën unikama chikínkë ꞌain kamina kamaxunbi mikaman ënë menuxun ꞌë rabiti ꞌain.

¹³ ꞌAínbi ka Moisésnën kakëxa: —Asabi ka ꞌaínbi ka anu kuantankëxun ꞌën Israel unibu: Mitsun chaitiokë kaman Diosan ka mitsunu ꞌë xuaxa kixun, kakëxunbi ka atun ꞌë ñukáti ꞌikën: ¿Uisa kara aín anë ꞌik? Ësakin ñukákëxun, ¿karana ꞌën uisakin kati ꞌain?

¹⁴ ꞌImainun ka Diosan kakëxa: —ꞌËx kana axa nëtë́timoi tsókë a aín. Usa ꞌain kamina israel unibu kati ꞌain: ꞌËnbi kana atunu mi xuti kixun kamina kati ꞌain.

¹⁵ Kanan ka ësokinribi Diosan Moisés kakëxa: —Ënëx ka ꞌën anë uínsarabi nëtë́tima a ꞌikën, ënëx ka ꞌën anë uínsaran nëtënbi xënibua ꞌaínbi këñutima a ꞌikën. ꞌËx kana mitsun chaitiokëkama Abraham, Isaac, Jacob, akaman Dios a ꞌain, an ka mitsu kanun ꞌë xuaxa. ꞌËn anë ënëx ka këñutima a ꞌikën; ënëx ka ꞌën anë axa xënibua ꞌaínbi nëtë́tima a ꞌikën.

¹⁶ Usa ꞌain kamina bënë́kiani kuantankëxun, Israel uni apankama timëtankëxun kai kuanti ꞌain: Nukën ꞌIbu min chaitiokëkaman Dios, ꞌimainun Abraham, Isaac Jacob akaman Dios an ka ꞌëmi chikirakëkin ësokin ꞌë kaxa, ꞌënbi kana Egiptonu ꞌikë unikaman mitsu ꞌatimaira oia isan kixun ka ꞌë kaxa.

¹⁷ ꞌImainun ka ësokinribi ꞌë kaxa, an isa Egipto me anuaxmi tëmërakankë ënua mitsu chikínbiankin anua cananeos, hititas, amorreos, ferezeos, heveos ꞌimainun jebuseos; unikama ꞌikë me anu mitsu buánti ꞌikën, ax ka me achúshi anua ñuinanën xumañukama a ꞌimainun a piti ñu ꞌitsaira ꞌianan ñu ꞌaisamaira ꞌikë a ꞌikën.

¹⁸ Uni apan kaman ka min kakëxun kuati ꞌikën; usa ꞌain kamina atubë mix Egiptonu ꞌikë ꞌapu a isi kuanti ꞌain, iskin kamina kati ꞌain: Nukën ꞌIbu hebreos unikaman Dios, an ka ꞌëmi chikirakëkin ꞌë kaxa. Usa ꞌain kamina, nu anu uni ꞌikëma menu kuantanun xuti ꞌain, rabë́ ꞌimainun achúshi nëtë ꞌikiani kuantankëxun, ñuina xaroxunkin Nukën ꞌIbu Dios rabitanun kamina nu xuti aín.

¹⁹ ꞌAínbi kana ꞌën upíokin ꞌunan, Egiptonu ꞌikë ꞌapun ka min aintsikama kuantanun xutima ꞌikën, usai ꞌiabi kana ꞌën mitsua xunun sinánmiti ꞌain.

²⁰ Usa ꞌaínbi kana ꞌëx kushiira ꞌixun ꞌën kushi ismikin egipcio unikama bamamikin atun isama ñu ꞌati ꞌain, usakin ꞌakin kana anun rakuë́ti ñu uínsaranbi a menuxun isama ñu ꞌati ꞌain; ꞌakëbëtan ka mikama anuaxmi kuantanun ꞌain menua faraónën mitsu chikínti ꞌikën.

²¹ ꞌAnan kana Israel unikama aín menuax chikitia egipcio unibunën kuania atun ñu ꞌitsaira ꞌinainshinun sinánmiti aín; usakian ꞌinánkëx ka mëkëinshi kuanima ñuñuira kuankanti ꞌikën.

²² Usa ꞌain ka achúshi achúshi xanun, a rapasu ꞌikë ꞌimainun bëtsi xanukama atubë tsókë aribi aín ñua ꞌinánun ñukati ꞌikën, ñukákin ka upíirabu manë ꞌakë a ꞌimainun kuri ꞌakë akama ꞌimainun chuparibi a atun tuá bëbu ꞌimainun xanukamaribi pañumiti ñukati ꞌikën, ñukákëxun ka xanukaman ñuñakima mitsu aín ñu ꞌinainshiti ꞌikën, usakin kamina mikaman ñuñuma ꞌitánun egipcio unibu atun ñu kupíikëira ꞌimainun upíirabu a bikuanti ꞌain.