Éxodo 24 - Kashibo-Kakataibo Biblia

Këñutima okin achúshi ñu israel unikamabëtan mënio ꞌá ñui Nukën ꞌIbu kitëkëan bana

¹ Usa ꞌain ka Nukën ꞌIbun Moisés kakëxa: —Aín bashinu mapërakëtëkëni kamina Aarón, Nadab, Abihú ꞌimainun Israel uni, aín kushibu setenta bëi anu ꞌëx ꞌikë ënu uti ꞌain; ꞌaínbi kamina ꞌuramaira obëtsinima ꞌuriaxëshi atun bëmánanën me tikai tsóbukanun kati ꞌain.

² Mix xëshi kamina anu ꞌëx ꞌikë ënu uti ꞌain; umainun ka raíri axa mibë ukë unikamax ꞌë ꞌuramaira utima ꞌikën, ꞌianan ka raíri unikama mibë mapërakëtima ꞌikën.

³ Ësakin Diosan kakëx kuanxun ka Moisésnën kamabi Israel unikama Nukën ꞌIbu kakë banakama ñuixuankëxa: —Ñuixunkëx ka asábi ka usa ꞌain kananuna kamaxunbi Nukën ꞌIbun kikësabiokin ꞌati ꞌain, kiax kikankëxa.

⁴ Usa ꞌain ka Moisésnën Nukën ꞌIbun kakësabiokin kamabi bana kuënëokëxa, kuënëoxun ka pëkarakëma ꞌaínshi nirutankëxun, anuxun a rabiti achúshi ñu aín bashi tanain ꞌamiakëxa, ꞌatankëxun ka a rapasu mapai rabë́ ꞌimainun rabë́ maxax nankëxa, a ka Jacobnën bakë bëchikëkama ꞌia ami sinánkin nankëxa.

⁵ ꞌAtankëxun ka Moisésnën Israel uni bënábu raíri an vaca rëtankëxun Nukën ꞌIbu rabikin ꞌaímai këñutanun unikaman ꞌucha kupí xaronan, ñuina xaronun ꞌamiakëxa.

⁶ ꞌAmikëxuan rëtia ka xampami Moisésnën aín imi ꞌitsamashi bitankëxun chukúmashi xampa itsimi manitankëxun, anun anuxun ñuina xaroti ꞌakë a anskakëxa.

⁷ ꞌAtankëxun ka Moisésnën anua usaía atux ꞌiti bana kuënëokë kirika bitankëxun kamabi unían kuamainun isakëxa isia kuati ka kikankëxa: —Asabi ka añu ꞌaxúnun kara Nukën ꞌIbu kia a kananuna ꞌati ꞌain.

⁸ Usakin katankëxun xampa itsinu ꞌikë imi a bitankëxun unikamami okin anskai ka Moisés kiakëxa: —Ënë imi mitsumi anskakë ënëx ka Nukën ꞌIbun achúshi ñu mitsubëtan mëníokë ax ka asérabi ꞌiti ꞌikë kixun ꞌakë ꞌikën, usa ꞌain kamina ënë bana kikësabiokin ꞌai aín uni ꞌiti ꞌain.

⁹ Usokin ꞌatankëx ka Moisés, Aarón, Nadab, Abihú ꞌimainun setenta Israel uni aín kushibu bibiani amiribishi aín bashinu mapërakëtëkëankëxa.

¹⁰ Anuxun ka axa mapë́rakëkëkama atuinshi Israel unikaman Dios isakëxa: Iskin ka anua nikë ax upíira ꞌaish chabáchabákikë zafiro kakë a naí kuman bëtsi iskësa ꞌikë isakëxa.

¹¹ Usa ꞌia iskëxunbi ka Diosan Israel uni aín kushikama a uisabi oma ꞌikën, uisabi okëxma ka anuxun pianan xëatankëx atux ubútëankëxa.

Moisés aín bashi Sinaí kakë anu ꞌia bana

¹² Nukën ꞌIbun ka Moisés amiribishi katëkëankëxa: —ꞌËx anu ꞌikë ain bashi anu mapërakëtankëxun kamina anuxun ꞌë kaínti ꞌain, anuxun kana maxá pará okin ꞌakë rairi anu ax kikësoi ꞌiti bana ꞌimainun a tanti bana anu kuënëokë, anua Israel unibunën uisa ñu kara ꞌati ꞌikë uisa ñu kara ꞌatima ꞌikë a ꞌunánti mi ꞌinánti ꞌain.

¹³ Usakian kakëx ka Moisés nirukiani aín bashi Sinaí kakë anu an ꞌakinkë Josué a uani kuankëxa.

¹⁴ Kuanux pain mëníokakin ka Israelnën kushikama kakëxa: —Ënuxun kamina nux utamainun kainkanti ꞌain, ënu ka Aarón ꞌimainun Hur mitsubë bërútia a kamina uisai ñu kara ꞌikëbëtanbi an mitsu mëníoxunun kati ꞌain.

¹⁵ Usakin kabiani ka Moisés aín bashi manan kuankëxa, kuankë ka kuinan aín bashi këñunbi mapuakëxa.

¹⁶ Mapukëbë ka aín bashi Sinaí kakë anua Nukën ꞌIbun kushi ubuti ichutia atun iskankëxa, iskëbëtan ka mapai achúshi ꞌimainun achúshi nëtën kuinan mapukë ꞌiakëxa. Mapukë ꞌain ka anuxun achúshi nëtë ꞌitëkënkë anun mapai ꞌimainun rabë́ nëtë ꞌikëbëtan Moisés kuin mëuxun Nukën ꞌIbun kuëankëxa.

¹⁷ Usakin ꞌamainun ka Israel unikama ismainunbi ain bashi chairukë anu tsi rëkirukënëan ñu nënkësa ꞌinun ꞌia iskankëxa.

¹⁸ Iskëbë ka Moisés aín bashinu ꞌibúkë kuin anun atsínkiani mapërakëakëxa, mapërakëtankëx ka anu cuarenta nëtë ꞌimainun cuarenta imë́ ꞌiakëxa.