Éxodo 20 - Kashibo-Kakataibo Biblia

Ax kikësabi oi ꞌiti mapai rabë́ banakama Diosan ꞌinan

¹ Ësai ka Dios kamabi ënë banakama ñui kiakëxa:

² ꞌËx kana min ꞌIbu Dios an, Egipto menuxun tëmërakin ñu mëëiabi mitsu chikían a ꞌain.

³ Usa ꞌain kamina bëtsi dios ꞌë isa kixun rabikinma ꞌëshi mitsun Dios ꞌikë rabikanti ꞌain.

⁴ Usa ꞌain ka uisa ñubi ꞌanan, a rabinuxun unisa okin ñu unionan, naí manámia ꞌikë ñubi tankin ꞌatima ꞌikën, ꞌianan ka me ꞌukëmëu ꞌikë ñubi tankin ꞌanan parúmpapa ꞌukëmëu ꞌikë menu ꞌikë akama tankin ꞌatima ꞌikën.

⁵ Usakin ꞌatankënxun ka a ñukamaribi ami ñanákin rabitima ꞌikën, ꞌëx kana atun Dios ꞌain, ꞌianan kana ꞌëx nishi kian an ñu ꞌatima ꞌatishi kuëënkë aín, bëchikëkama ꞌimainun aín baba aín bëchikënën bëchikë akama ꞌatimokin tëmëranun ꞌimiti ꞌain,

⁶ ꞌaínbi kana an ꞌëx kikësabiokin ꞌakë unikama a xënibua ꞌaínbia aín rëbúnki kamax ax kikësabira oi ꞌiti bana a ꞌaia nuibati ꞌain.

⁷ Min Dios ꞌikë min rabiti ꞌikë ꞌë sinanimabi kamina ꞌën anë ñui kitima ꞌain. Ax ꞌën anë ñui ꞌatimati banakë ax ka ꞌatima okë ꞌiti ꞌikën.

⁸ Anun ñu mëëtima nëtë axa bëtsi nëtë kamasama ꞌain kamina a nëtë ꞌikëbëtan ꞌëshi rabiti ꞌain.

⁹ Mapai achúshi ꞌimainun achúshi nëtë ꞌimikin kamina anun uisa ñu mëëti karamina ꞌaisatani anun kamabi ñu ꞌati ꞌain,

¹⁰ ꞌaínbi ka mapai achúshi ꞌimainun achúshi nëtë ꞌiónx pë́karakë anun ñu mëëtima nëtë ꞌikë anun kamina ꞌë rabiti ꞌain. A nëtën kamina añu ñu mëëtibi ꞌatima ꞌain, mitsun bëchikëkama, min bëchikë xanu, min ñumëmikë uni, an mi ñu ꞌaxunkë xanu, min ñuina, ꞌimainun min xubunu ꞌikë bëtsi menu ꞌikë uni akamanbi ka añu ñubi ꞌatima ꞌikën.

¹¹ ꞌËn kana mapai achúshi ꞌimainun achúshi nëtë ꞌimikin ꞌëx min ꞌIbu ꞌixun naí ꞌimainun me parúmpapa kamabi anu ꞌikë ñukama uniokën, usakin uniotankëx kia ꞌain ka siete nëtë ꞌikëbë anun uni tantiti ꞌikën, usai ꞌikin kana a upíokin sinánxuni a nëtëx ka bëtsi nëtësama upíira nëtë ꞌiti ꞌikë kiax kana kiakën.

¹² Min papan bana kuanan kamina min titan banaribi kuanti ꞌain. Usai ꞌi kamina ꞌëx mitsun Dios ꞌixun ꞌinánkë me anu xënibua. ꞌAínbi tsóti ꞌain.

¹³ Bëtsi uni kamina ꞌaisa tantima ꞌain.

¹⁴ Uni itsin xanu kamina aín nami ꞌatima ꞌain.

¹⁵ Unin ñu kamina mëkamatima ꞌain.

¹⁶ Mibë ꞌikë unimi kamina ami këmëi banatima ꞌain.

¹⁷ Bëtsi unin xubu ꞌimainun anu ꞌikë aín ñukama kamina minan ꞌinun bisatantima ꞌain: usa ꞌixun kamina aín xanu an ñu mëëxunkë uni ꞌimainun an ñu ꞌaxunkë xanu aribi kuëëntima ꞌain, ꞌimainun kamina an ꞌarakakë ñuinakama, vaca ain asno akamaribi bisatantima ꞌain.

Dios mi Israel unikama rakuëa bana

¹⁸ Kamabi israel unikaman ka kaná banakë a kuanan manë banañu bana okë aribi bana oia kuakëxa, kuanan ka mëríru mëriruia ꞌikë a isanan aín bashinua kuin këxtuira ꞌibúkin mapuruia isakëxa; isi rakuë́ti ka aín bashi ꞌura atux ꞌiakëxa.

¹⁹ Usai ꞌikëbë rakuë́kin ka Moisés kakankëxa: —Min ishi kamina nu kati ꞌain; ꞌaínbi ka Diosax nukamabë banatima ꞌikën, nux këñutima kupín.

²⁰ Ësai kiabi ka Moisésnën kakëxa: —Rakuë́axma ka ꞌik. Dios ax ka asérabi karanuna ami rakuë́ti ax kikësabi oi ami ꞌuchaima isnuxun nu tani uaxa.

²¹ Usakin kakëxa Israel unikama bashi ꞌura ꞌimainun ka Moisés amiribishi anua kuin këxtuira tunan ꞌikë anu Diosbë banai mapërakëakëxa.

Uisakin kara anuxun ñuina xaroti ꞌati ꞌikë kixun Diosan ka bana

²² Aín bashinu kuankë ka Nukën ꞌIbu Diosan Moisés ësakin kakëxa: Israel unibu kamina ësakin kati ꞌain: Mitsúnbi kamina uisai karana ꞌëx naíkamë ꞌëonuax banaia kuan.

²³ Uisaxunbi kamina rabinuxun kuri ꞌanan manë uxua ꞌatankëxun ꞌë ꞌakësa okin uniotankëxun a rabitima ꞌain.

²⁴ Anuxun ñuina xaroti achúshi ꞌakin kamina mebi chaiorukin ꞌati ꞌain, ꞌatankëxun kamina ꞌë rabikin achúshi fiesta ꞌakin mitsun ꞌarakakë ñuina rëtankëxun ꞌaímai këñutanun mitsun ꞌucha kupín ꞌanan anuxun ñuina xaroti ꞌain. Usakin ꞌaia kana ꞌën upíokin sinánxunkin uinu ꞌikë menuxunbi kara aín ñuina ꞌëmi sinánkin xara oia a menuxun ꞌakinti ꞌain.

²⁵ ꞌImainun ka anuxun ꞌë rabiti maxá ꞌaisatankin aín ꞌipitiu manë xëtokën ramënioxun ꞌatima ꞌikën, usokin ꞌaxun ꞌakëxbi ka anuxun ñuina xaroti ꞌakë ax ꞌaisama ꞌiti ꞌikën.

²⁶ ꞌIanan ka anuxun ꞌë rabiti ꞌakë ax tapitiñu okin ꞌakëma ꞌiti ꞌikën, anun kuaruia mitsun nami bëtsi unin istima kupí.