Éxodo 2 - Kashibo-Kakataibo Biblia

Moisés bakë́an ñuikë bana

¹ Achúshi uni Israelnën rëbúnki Leví kakë uni ax ka, aín aintsikaman bëchikë achúshi xanubë biranankë ꞌiakëxa,

² an ka biranantankëxun achúshi bëbu tuá ꞌitánun tuakëxa, tuatankëxun ka upíira ꞌikë nuibakin, aín xubunu rabë́ ꞌimainun achúshi ꞌuxë ꞌimikin unëakëxa;

³ unëkëxia kani aín xubunu unëtisama ꞌikë ka, achúshi tasá basion xo ꞌatankëxun anun ꞌumpax atsintisama okin, ꞌain xabankëkama i bëpín asfalto anun xarabëtan bëtastankëxun, aín namë́nu a tuá ꞌaruakëxa; ꞌarubianxun ka Nilo kakë baka kuëbía kookë basion xo chaxkë́bu a tëmú bëspúnkin nankëxa;

⁴ nantankëxun ka bëbu tuára aín chirabakë kakëxa, uisai kara min rarëbakë ꞌia kamina ꞌurama kuankinmabi isti ꞌain.

⁵ Usakian ꞌakë ꞌaínbi ka a nëtë xupibukëbë Egiptonu ꞌikë ꞌapun bëchikë xanu chipash ꞌimainun an ñu ꞌaxunkë xanukama nashi kuankëxa, kuantankëx baka kuëbí nikinbi ka xanu achúshinën, basion xo chaxkë́bu bakanua kookë tëmú bëspúkë tasá mërakëxa. Usakin mërakin ka an ñu ꞌaxunkë xanu achúshi tasá a bitánun kixun xuakëxa.

⁶ Xukëxun bitsínkin bëia baakakinbi ka a ꞌukëmëuküaxa tuá inia kuakëxa, kuatika ka ꞌapun bëchikë ꞌitsaira nuibati kiakëxa: —Ënë tuakëx ka Israel unikaman bëchikë ꞌikën.

⁷ Usa ꞌain ka mërakëbë a bërúain nitsaxbi ukin aín chirabakën ꞌapu faraónën bëchikë kakëxa: —¿Mi hebrea xanu achúshi an ënë tuá xuma ꞌamikin, kanioxunun barixunti karamina kuëënin?

⁸ Kakëxun ka faraónën bëchikënën kakëxa: —Kamina achúshi xanu bariti ꞌain kixun. Usakian kakëx ka xanu chipash ax a tuákën titanubi abákiani kuankëxa,

⁹ kuanxun kakëxa aia ka faraónën bëchikënën kakëxa: —Ënë tuá kaina ꞌë kanioxunkin bërúanxuntima ꞌain, bërúankin kanioia kana mi kupíoti ꞌain. Usokian kakëxun ka aín titan bërúankin kanionuxun a tuára biakëxa,

¹⁰ bixun kaniokëxa kani chaia ka xuma ꞌakë ënia ꞌain titan faraónën bëchikë ꞌinánkëxa, ꞌinánkëxun ka aín tuása ꞌikë kaniokëxa kaniokin ka. “ꞌËn kana tuá bakanua bian kixun sinánkin Moisés kakin anëakëxa.”

Moisés Egiptonuax Madián kakë menu abáti kuan bana

¹¹ Usai anuax kani aín baritia sënëni ka Moisés faraónën xubunu ꞌiakëxa, anuax ka achúshi nëtën aín aintsi ꞌimainun aín kaibu kamaribi isi kuankëxa, Egiptonu ꞌikë unikaman ꞌaisamaira okin ñu mëëmia ꞌunánkë ꞌaish. Usakin ꞌunánx kuankinbi ka egipcio uni achúshinëan aín aintsi achúshi mëía mërakëxa.

¹² Mërakin ka unin karaisa isima kixun isbëkinkin isakëxa, iskëxunbia uínbi isiama okin anun rabanan në́ëkin ka aín aintsi an mëëkë egipcio uni ꞌaxun masinu maíankëxa.

¹³ Usakin ꞌoonx pëkarakëbë kuantëkënkinbi ka hebreo uni rabëtax mëëanania mërakëxa. Mërakin ka an bëtsi mëëkë uni a kakëxa: —¿Uisa kupín kaina min aintsibëbi mëëananin?

¹⁴ Usakian kakëxunbi ka an bëtsi mëkë hebreo unin kakëxa: —¿Uin kara mi nun ꞌapu ꞌianan nun kushi ꞌinun mi ꞌimiax? ¿Min kaina egipcio unimi ꞌakësokin ꞌë ribi ꞌati sinanin? Ësokian kakëxun kuati ka Moisés rakuë́akëxa, rakuë́kin ka ꞌën egipcio uni rëonkë a ka ꞌunánxa kixun sinánkëxa.

¹⁵ Usakian Moisésnën egipcio uni achúshi rëkë a ka faraónën ñuikania kuakëxa, kuaxun ka Moisés aribi ꞌati barimiakëxa; ꞌaínbi ka a bana kuabiani Madián kakë me anu tsóti kuani abákëxa. Usai abáx bëbatankëx ka anua ꞌumpax bikë kini achúshi rapasu tanti tsóakëxa.

¹⁶ Anu ka Reuel kakë Madiánu ꞌikë sacerdote ꞌiakëxa, ax ka mapai achúshi ꞌimainun rabë́ bëchikë xanu chipashñu ꞌiakëxa. A nëtën ka xanu chipashkama atux anua ꞌumpax biti kininua ꞌumpax bixun anua ñuinakaman ꞌumpax xëakëkama a uakaxun aín papan ovejakama ꞌumpax xëami kuankëxa,

¹⁷ ꞌaínbi ka an ñuina bërúankë unikaman anua mërakin xanu chipashkama anuaxa kuantanun kixun kakëxa. Usakin kakëbëbi nirukin ka Moisésnën atun rabanan unikama kakin xanukama ꞌain ñuina ꞌumpax ꞌamiakëxa.

¹⁸ Usakian atun ñuinakama ꞌumpax xëamikëbë ka usai ꞌikëxmabi bënëtishi anua aín papa ꞌikë anu kuankëxa, kuania ka aín papan atu ñukákëxa: —¿Uisa kupín kaina usai ꞌikëxmabi bënëtishi rikuatsinin?

¹⁹ Kixuan kakëxun ka a xanukaman kakëxa: —Achúshi egipcio unin ka nunun rabanan në́kin an ñuina bërúankë unikaman kaiabi kaxun, nun ñuinakama ꞌumpax bixun xëamiaxa.

²⁰ Ësakian kakëxun ka Reuelnën kakëxa: —¿Uinu kara a uni ꞌik? ¿Uisa kupín kaina bëkinma ashira ëbëtsian? ¡piia unun ka kuëëntan!

²¹ Kakëx kuanxua aín bëchikënën bëkë ka, aín papa Jetrónën aín xubunu ꞌinun kixun Moisés kakëxa, kakëxun ka asábi ka kana min xubunu ꞌi bërúti ꞌai kixun Moisésnën kakëxa. Usai abë basipain ꞌiaka aín bëchikë Séfora aín xanu ꞌiti ꞌinánkëxa,

²² ꞌinánkëxun ka Moisésnën ami achúshi okin bëchixun Guersón kakin anëakëxa, anëtankëx ka kiakëxa: ꞌËx kana achúshi uni bëtsi menu ꞌikë ꞌaish ënë menu ꞌikë unin bëchikëma ꞌain.

²³ Usa ꞌain ka ꞌitsa baritia ꞌinúkëbë Egiptonu ꞌikë ꞌapu ñuakëxa. Ñuanka, Israel unibunëx ꞌaisamaira ñu mëëmikëx uisa kupín kara ësokinra nu ñu mëëmia kiax kikankëxa. Ësaia kikania ka Diosan kuakëxa.

²⁴ Usai atux kia kuakin ka Diosan achúshi ñua Abraham, Isaac ꞌimainun Jacob akamabëtan ꞌa a sinánkin ꞌakiankëxa.

²⁵ Usaia ꞌaisamaira tëmërai kia kuakin ka Diosan uisaira kara atux tsótia kixun ꞌunánkin ꞌakinti sinánkëxa.