Éxodo 19 - Kashibo-Kakataibo Biblia

Anu uni ꞌikëma me Sinaí kakë anu israel unikama bëba

¹ Anúan Egipto menuax kuankë rabë́ ꞌimainun achúshi ꞌuxë inúkëbë ka israel unibu Sinaí kakë aín bashi ꞌurama bëbakëxa.

² Anua ꞌikë Refidim, anuax kuanx ka anu uni ꞌikëma me Sinaí kakë bashi anubi bëbatankëx anu ꞌiakëxa.

³ Anuax ka achúshi nëtën Moisés aín bashi anu uni ꞌikëma Sinaí kakë anu Diosbë bananux mapë́rakëakëxa, mapërakëtia ka aín bashi chairui sënë́nkë anuxun Nukën ꞌIbun kuëankëxa: —Kuënkin ka Moisés ësokian Jacobnën rëbúnki Israel unikama kanun kakëxa.

⁴ Mitsúnbi kamina isan ꞌën karana uisokin egipcio unibu tëmëramikin ꞌa kixun, ꞌimainun kamina uisobëtsinkin karana ꞌëx anu ꞌikë ënu mitsubëa kixun, ꞌën kana tëtëkamë ꞌëon aín tuá nuanmikin aín pëchin bëaraxun buankësa usaribi obëtsinkin bëruinra oxun mitsu bëan.

⁵ Usa ꞌain kana ꞌën kakësabiokin kamabi ñu ꞌatëkënkëbë achúshi ñu ꞌati sinanin, bëtsi unikamaxribi ka ꞌënan ꞌikën, ꞌaínbi kamina mitsuxira ꞌën unibu ꞌain, kamabi mex ka ꞌënan ꞌikën.

⁶ Usa ꞌixun kamina mitsun ꞌën kuëënkësabi okin ꞌai kuni ꞌënan ꞌiti ꞌain, usa ꞌixun kamina achúshi ëma bëtsi ëmakamasama ꞌixun ꞌëshi rabinun, sacerdotekama ꞌikësaribiti ꞌiti ꞌain, ësakin kamina Israel unikama kati ꞌain.

⁷ Ësakian Diosan kakëx kuanxun ka Moisésnën, Israel unibu aín kushikama timëtankëxun Nukën ꞌIbu usakin kanun kakë bana kamabi ñuixuankëxa.

⁸ Ñuixunkëxun kuati ka Israel unikama kamáxbi sharati kikankëxa: —Uisai ꞌinun kara Nukën ꞌIbu kiaxa usaibi kananuna ꞌiti ꞌain. Ësaia unikama kikëbëtan ka Moisésnën usaía unikama kikë a ñuikin Nukën ꞌIbu kai kuankëxa,

⁹ kuankë ka Nukën ꞌIbun Moisés kakëxa: —Ka kuat, ꞌëx kana kuin këxtuira nëbëtsinuax mimi mërati ꞌain, anuax ꞌëx mibë banaia ꞌën bana kuati ka unikama mibëbi ꞌianan mix kamina asérabi ꞌën uni ꞌai kikanti ꞌikën. Usakian kakëxun ka Moisésnënribi unikama kikë ñuikin Nukën ꞌIbu katëkëankëxa,

¹⁰ kakëxun ka Nukën ꞌIbun Moisés kakëxa: —Anu kuanxun kamina Israel unikama ꞌë rabinuxa bërí ꞌianan imë́ishi mëníokanun kai kuanti ꞌain. Kanan kamina atun chupa upíokin chukanun kati ꞌain,

¹¹ usakin ꞌai mëníokakë ꞌain kana ꞌëx rabë́ ꞌimainun achúshi nëtë ꞌikëbë kana ꞌëx aín bashi Sinaí kakë anu ubuti ꞌain, kamabi Israel unibunëan ꞌë istánun.

¹² Usa ꞌain kamina bashi tanain buinarakin ꞌunánti ꞌoti ꞌain, anúan unikama inútisama okin. ꞌImainun kamina unikama ësokin kati ꞌain, uinu ꞌikë uníxbi ka aín bashi mapërakëtima ꞌikën, ꞌimainun ka anu unántiokin sënë́onkë a ꞌurama kuantima ꞌikën, uix kara a ꞌuruma kuania ax ka bamakë ꞌiti ꞌikën.

¹³ Usa ꞌain ka uínbi axa ñunshikiani bashi tanain kuankë a mëëtima ꞌikën, ax ka maxaxan ꞌanan masibunën ꞌakë ꞌiti ꞌikën. ꞌËn kana ꞌunanima uix kara ꞌunántiokë a inui kuania ax ka uni ꞌimainun ñuinanëxbi bamakë ꞌiti ꞌikën. Usa ꞌain ka ui unikamax kara aín bashi mapërakëtisa tania ax carnero mancha banoia kuati aín bashinu mapërakëti ꞌikën.

¹⁴ Ësakin Diosan kakëx aín bashinuax taramëbutankëxun ka Moisésnën usakian Diosan a rabinux usai ꞌiti banakama ñuixunkin kamabi Israel unibu kakëxa. Kakëxun ka kamabi unin aín chupa chukakëxa,

¹⁵ ꞌimainun ka Moisésnën ësakin kakëxa: —Upiti mëníokanan kamina rabë́ ꞌimainun achúshi nëtë ꞌitamainun mitsun xanu aín nami ꞌatima ꞌain.

¹⁶ Usokian kakë rabë́ ꞌimainun achúshi nëtë sënë́nkëbëa a pë́karakë ꞌain ka kanákamë ꞌëo sharakirumainun nëtë kuin këxtuira an aín bashi mapuakëxa. Mapukë a mëuküaxa kushiira ꞌinun aín manë banañu banaia kuati ka kamabi Israel unikamax aín ꞌikënuaxbi rakuë́ti bërëkankëxa.

¹⁷ Usaia ꞌikëbëtan ka Moisésnën kamabi Israel unikama aín ꞌikënua chikínbiankin uankëx ka aín bashi Sinaí kakë a tanain sëtëakëxa anuaxa Diosbë mërananti anu.

¹⁸ Usakëbë ka kamabi aín bashi Sinaí anua Nukën ꞌIbu ubúkë ain meuküax tsi rëkirukë kuinsa ꞌinun tëxëkiruakëxa. Usaia ꞌikëbë ka aín bashikamaxribi munuma shaíkiakëxa.

¹⁹ Usaia ꞌimainun ka aín manë bana okë a munu paian bania kuakëxbi amiribi amiribi ꞌi kushiira ꞌinun banakëxa; banamainun ka Diosan abë banakin Moisés kaná banakësai banakin kakëxa.

²⁰ Usai abë banakin ka Nukën ꞌIbu Sinaí kakë bashi chairukë anu ubuxun Moisés mapërakënun kixun kakëxa. Kakëx ka Moisés mapërakëakëxa,

²¹ mapërakëkë ka Nukën ꞌIbun Moisés ësakin kakëxa: —Kuabutankëxun kamina unikama kati ꞌain, anu sënë́onkin ꞌunántiokë a chichaxuma ꞌanan ka ꞌë iskatsikixun sinánbëtsini ukantima ꞌikën, ꞌë iskatsikiax aí ka atúxbi bamati ꞌikën.

²² ꞌImainun ka axa sacerdote ꞌiti unikama axribi ꞌë ꞌurama uisatani aín ꞌucha mëníokakë ꞌiti ꞌikën, usai ꞌikëma ꞌaish ka ꞌë ꞌurama ai atúxribi bamakë ꞌiti ꞌikën.

²³ Kixuan kakëxun ka Moisésnën Nukën ꞌIbu kakëxa: —Mix kamina kian unikamax ka aín bashi Sinaí kakë a mapërakëtima ꞌikën, usa ꞌain kamina anu ishia bërúnun ꞌunántionun kian ax ka minanshi ꞌikë kixun unikama kanun kamina kian.

²⁴ ꞌAínbi ka Nukën ꞌIbun Moisés kakëxa: —Aín bashinuax kuabútëkënxun kamina Aarón biti ꞌain, bitsini kamina abë mapë́rakëtëkënti ꞌain. Mitsux mapërakëtëkën maínun ka sacerdote ꞌimainun unikamaxribi ꞌunántiokë a inui anu ꞌëx ꞌikë ënu mapërakëkatsi kixun sinani ꞌutima ꞌikën, usai ꞌiabi kana ꞌën bamamiti ꞌain.

²⁵ Usakian kakëx ka Moisés anuax taramëbutëkëankëxa, taramëbutëkënxun ka Israel unikama Diosan kakë banakama ñuixunkin kakëxa.