Éxodo 17 - Kashibo-Kakataibo Biblia

Diosan ꞌimikëx maparanuax ꞌumpax chikia bana

¹ Anu uni ꞌikëma me Sin kakë anu pain bëbax ꞌibaëxanx, ka kamabi Israel unikamax achúshi nëtën uiti ꞌura kuanun kara Nukën ꞌIbun kaia ꞌati ꞌurabi kuani ꞌikiani kuankëxa. Kuani ka Refidim kakë me anu bëbakankëxa, bëbanbi ka atun xëati ꞌumpax anu ꞌaíma ꞌain,

² shiman këñutisatankin Moisés ñukákin ësokin kakëxa: —Kananuna shiman, këñutisa tanin nu kamina ꞌumpax xëanun ꞌinánti ꞌain, kixun kakëxun ka Moisésnën kakëxa. —¿Uisati karamina mitsun ësakin ꞌë kain? ¿Mitsux karamina Diosmi sinanima ami manuan? —Kixun ka Moisésnën atu kakëxa.

³ Kakëxunbi ka ñunshinakëkin Israel unikaman shiman bamatisaira tankin ami nishkin Moisés kakankëxa: —¿Ësokin ꞌanuxun karamina nu Egipto menua chikínbëtsinkin ënu bëan? ¿Uisoti karamina nun bëchikë ꞌimainun nun ñuina kamakëñunbi shiman bamaminuxunbi nu chikían?

⁴ Usakian kakëxun ka Moisésnën ꞌakinun kixun Nukën ꞌIbu ñukákin kakëxa: —¿Añu karana ꞌën ënë unikamabëtan ꞌati ꞌain? Atun ꞌë maxaxan ꞌakin rëkanti ka ꞌuramara ꞌikën, kixun ka Moisésnën kakëxa.

⁵ Kakëxun ka Nukën ꞌIbun Moisés kakëxa: —Israel unikaman kushi ꞌitsamashi kabiani kamina abë mix pain rëkuë́nkiani kuati ꞌain. Kuani kamina min tsati anúnmi ꞌumpax bëráma rishkikë a buani kuanti ꞌain.

⁶ ꞌËn kana Horeb kakë bashi anuxun mi kaini kuanti ꞌain, usa ꞌain kamina anu bëbakin min tsatin mapara taxkai kuanti ꞌain. Taxkakëbëshi ka anuax ꞌumpax chikiti shakibutia ka unikaman xëati ꞌikën. Usakian kakëx kuanxun ka Moisésnën abëa kuankë Israel ain kushikaman ismainunbi aín tsatin mapara taxkakëxa,

⁷ usakin ꞌatankëxun ka Moisésnën anua ꞌikë me a Meribá kakin anëakëxa, anuaxa Israel unibu Diosmi ꞌatimai banakë ꞌikë ka usakin anëakëxa, anëanan ka Masá kakinribi anëakëxa, ax ka nu kara Diosan ꞌakinti ꞌikë kixun sinánkima Israel unibunën ꞌatima okin sinánkë kupín ka usakin anëakëxa, ¿Nubë kara Nukën ꞌIbu ꞌikën nubëma kara Dios ꞌik?

Amalecita unibubë Israel unibu ꞌakanan

⁸ Usaxa Refidim kakë menu israel unibu buküanbi ka amalecita unikamax atubë ꞌakanani uakëxa.

⁹ Usai atubë ꞌakanani aia kuakin ka Moisésnën an ꞌakinkë uni Josué a kakëxa: —Bërí kamina uni ax ꞌakanainsabi kaisti ꞌain, kaisbiani kuanx kamina amalecita uni kamabë ꞌakanani kuanti ꞌain. ꞌËx kana imëishi pëkarakëbë kuantakëx aín bashi mapërakëtankëx anuxun ꞌën tatsi anun Diosan ñu ꞌanun kakëxun ꞌakë ënë manámi okin tuíanx nitsi kuanti ꞌain.

¹⁰ Usakian Moisésnën kakëxun ka an kakësabiokin Josuénën ꞌakëxa, ꞌaika anuax Amalecita unikamabë ꞌakananux anuaxa ꞌiti anu rikiankëxa. Anu kuantamainun ka Moisés, Aarón ꞌimainun Hur ax aín bashi anu mapërakëakëxa.

¹¹ Usa ꞌain ka Moisés pënchati nikëbëtan Diosan ꞌakinkëxun israel unibunën amalecitakama abë ꞌakanankin ñusma okëxa; ꞌaínbi ka Moisésnën aín pëñan meu okëbëtan amalecita unibunën abë ꞌakanankin Israel unikama ñusma okëxa.

¹² ꞌAkananmainun ka Moisés pëntununia Aarón ꞌimainun Hur kakë an anua Moisés tsóti maxáx cha achúshi nanxuankëxa. Naxuntankëxun ka bëtsían amoxun aín pëñan tuimainun bëtsínribi amoxun aín pëñan tuinxuankëxa. Usokin ꞌakëxa Moisésnën pëñan manámi ꞌimainun ka bari kuabutamainun ꞌakanankëxa,

¹³ ꞌakanankin ka Josuénën abë ꞌakanankin amalecita unibu aín manë xëtokën këñukin ꞌakëxa.

¹⁴ Usakian ꞌakë ka Nukën ꞌIbun Moisés kakëxa: —Ënuax mitsux ꞌakanankë ënë kamina achúshi kirikanu a sinántiokin kuënëoti ꞌain; ꞌimainun kamina Josuéribi kati ꞌain, ꞌën kana amiribishia uínbi sinántëkëntimokin amalecita unikama manumiti ꞌain.

¹⁵ Anu ka Moisésnën achúshi ñu anuxun Nukën ꞌIbu rabikin ñuina xaroti ꞌakëxa, ꞌatankëxun Diosan aín kushin nu ꞌakinkëxun kananuna ax numi nishkë unikama këñukin ꞌa kixun kakin anëakëxa,

¹⁶ anëtankëx ka ësai kiakëxa: Nukën ꞌIbun aín kushi ꞌë ꞌinánkëxun kana Amalecita unikama abë ꞌakanankin ꞌan. Usa ꞌain ka Israel unikaman Nukën ꞌIbumi katamëti ënkinma numi nishkë unikaman rëbunki ami rakuë́kinma abë ꞌakanankin ꞌakëbë Nukën ꞌIbu nubëbi ꞌiti ꞌikën.