Éxodo 16 - Kashibo-Kakataibo Biblia

Diosan maná kakë piti ꞌinan bana

¹ Usai Elim kakë anu pain ꞌitankëx anuax kuanx ka kamabi Israel unibu anu uni ꞌikëma me Sin kakë anu bëbakëxa, a mex ka Elim kakë anua naësa xëbinamë ꞌëo ꞌikë Sinaínën nëbëtsi rabë́ okë ꞌiakëxa. Anúan Egiptonuax chikíkë a ꞌuxë rabë́ ꞌirukë anun quince nëtë ꞌikëbë ka bëbakëxa.

² Usa ꞌain ka anu uni ꞌikëma menuax Israel unibu Moiséskëñun Aarón kuami kikankëxa.

³ Ki ka ësai kanankëxa: Mitsun kamina anu uni ꞌikëma menuax numin ꞌi tëmërai këñunun nukama bëan, uisati kara Nukën ꞌIbun nu Egipto menuaxbi këñunun nu ꞌimikëma ꞌikën, anuxun kananuna ꞌakëñuma pananx tsókima kënti buákakin ꞌarukë puchákin nami nun kuëënkësa okin piakën.

⁴ Ësai kia kuankin ka Nukën ꞌIbun Moisés kakëxa: —ꞌËn kana atúan pinun naínu ꞌikë piti ꞌaisamaira ꞌinánti ꞌain. Usa ꞌain ka unin kamabi nëtën ain piti biti ꞌikën, aín xubunuax chikixun ka achúshi nëtën pitibëtan sënënbi biti ꞌikën. Uin kara ꞌëx kikësabiokin ꞌaia isanan kana uin kara ꞌaima isti ꞌain.

⁵ Mapai achúshi ꞌimainun achúshi nëtë ꞌikëbëtan ka unin, ain xubunuxuan rabë́ nëtën pitibëtan sënë́nbi biti ꞌikën, bikin ka achúshi nëtë́an bikë a inumikin biti ꞌikën.

⁶ Usakian Diosan kakëxun ka Moisés ꞌimainun Aarónën Israel unibu kakëxa: —Ënë xupibukëbëtan kamina Nukën ꞌIbunbi ka Egipto menua chikínbëtsinkin mitsu bëaxa kixun ꞌunánti ꞌikanin,

⁷ ꞌanan kamina imë́ishi pëkarakëbëtan ka Nukën ꞌIbun ain kushin usakin ñu ꞌaia kixun mitsun isti ꞌain; an ka mitsun ꞌatimai ami banakankëxun kuaxa. ¿Uisa kupín karamina mitsun nux karanuna ui ꞌai kixun ꞌunánima banain?

⁸ Katankëxun ka Moisésnën ësakinribi katëkëankëxa: —Ënë xupibukëbëtan kamina ami piti nami Nukën ꞌIbun mitsu ꞌinánmainun biti ꞌain, bionxun kamina pëkarakëma ꞌaínshi pánribi biti ꞌain, an ka mitsúxmi ami ꞌatimati banakëxun kuaxa. Uisa kupín, ¿Ui karanuna nux ꞌain? Mikamax kamina numi ꞌatimai banakëma ꞌain. Nukën ꞌIbumi kamina ꞌatimai banan.

⁹ Usakin atu katankëxun ka Moisésnën Aarón kakëxa: —Kamabi Israel unibu kamina Nukën ꞌIbu kakëxun kuati timë́nun kati ꞌain, an ka atúxa a ñui ꞌatimai banaia kuaxa.

¹⁰ Kixuan Aarónën atu kakëxun kuakian Israel unikaman bukuxun anu uni ꞌikëma me au bësukin iskankëxbi ka bënëtishi nëtë kuinsa mëuxuan, Nukën ꞌIbun ain kushin barin ꞌakësamaira okin pë́kakëx ichutia iskankëxa.

¹¹ Iskëbëtan ka Nukën ꞌIbun Moisés kakëxa:

¹² —ꞌËn kana Israel unibu ꞌë ñui ꞌatimai banaia kuan. Usa ꞌain kamina ësokin a unikama kati ꞌain: Xupibukëbëtan kana a piti nami mitsu ꞌinánti ꞌain. ꞌImainun kana ënë pëkarakëbëtan anun puchakimi pikanun pán mitsu ꞌinánti ꞌain. Usakin ꞌakin kamina ꞌëx kana min Dios ꞌai kixun ꞌunánti ꞌain.

¹³ Usa ꞌain ka a nëtë ñantabukëbë, ꞌumpanxonëmë ꞌëo anua atux ꞌikë, aín xubunubi rikuatsiankëxa, a pëkarakëbëtan iskëxbi ka anua atux ꞌikë kuainakëkë sënë́nbi nibitan chabónëkë ꞌiakëxa.

¹⁴ Usa ꞌain ka nibí ëski ain kuin nirukëbëtan iskinbi ka ñu upíira ꞌatsa putu menu rëukukë iskësa anu uni ꞌikëma menu ꞌiakëxa.

¹⁵ Usai ñu ꞌia iskëma ꞌaish ka Israel unibu ratuti kanankëxa: “¿Añu kara ënëx ꞌik?” Kananiabi ka Moisésnën kakëxa: Ënëx ka Nukën ꞌIbun mitsu piti ꞌinánkë pán a ꞌikën.

¹⁶ Ësokin ꞌën mitsu kanun ka Nukën ꞌIbu kiaxa: Usa ꞌain kamina mitsu achúshi achúshinën uiti karamina kuëëni ꞌati bikanti ꞌain, ꞌimainun ka uiti uni kara aín xubunu ꞌia abëtan pitibëtan sënë́inshi bikanti ꞌikën, bikin ka achúshi achúshi unin xampa achúshi bikaskin bianan rabë́ xampa bikinbi a inumikin cha bitima ꞌikën.

¹⁷ Usakin ka Israel unikaman Diosan kakësabiokin ꞌakëxa. ꞌAkin ka bëtsin bëtsín chabimainunbi, raírinënribi chukúmashi biakëxa,

¹⁸ bikin ka uiti cha biti kara sinánkë ꞌikë ꞌati chabi biakëxa; usakin bikëx ka an chabikë ainan tëxëima ꞌianan an chukúma bikë ainanribi aín piti sënë́nbi ꞌiakëxa. Usakin bikin ka kamaxunbi atun pitibëtan sënë́nbi bikankëxa.

¹⁹ Usakin ꞌakania ka Moisésnën kakëxa: —Uínbi ka imë́ishi pinuxun tëxëoxun nantima ꞌikën.

²⁰ Ësakian kakëxunbi ka Israel unikama raírinën Moisésnën kakë bana tankima aín piti pëkarakëbëtan pikatsi kixun sinánkin tëxëokëxa; usokëxbi ka xënai chë́ki pisiakëxa. Usakian ꞌan ka Moisés ꞌitsaira atumi nishakëxa.

²¹ Usai ꞌia unánxun ka achúshi achúshi unin pëkarakëma ꞌaínshi, urukian barin xarokëxa chë́kikëmashi aín piti sënë́nbi biakëxa.

Diosan mapai achúshi ꞌimainun rabë́ nëtë ꞌikëbëa tantiti ꞌinan bana

²² Usa ꞌain ka mapai achúshi ꞌimainun achúshi nëtë ꞌikëbëtan atun xampa buákakin rabë́ nëtë sënën piti kamabi unin rabë́ ꞌimainun rabë́ xampa biakëxa, usakian Israel unibunën akëbëtan ka aín kushi achúshi achúshinëx ratúkiani anu kuanxun Moisés ñuixuankëxa,

²³ ñuixunkëxun ka Moisésnën kakëxa: —Asérabi ka ësai Nukën ꞌIbu kiaxa: Imë́ishi ka sábado nëtë ꞌia, ax ka achúshi nëtë anun ñu mëëima ꞌianan, anun Nukën ꞌIbu rabiti nëtë ꞌikën. Usa ꞌain kamina imë́ishi piti ꞌati sinánxun bëríbi ꞌaruti a ꞌaruanan xuiti a xuiti ꞌain, ꞌaxun kamina tëxëokë a imë́ishi ꞌati mëníokin nankanti ꞌain.

²⁴ Ësakin Moisésnën kakëxuan an kakësabiokin imë́ishi pinuxun noonkë ax ka xënai pisianan uisaibi ꞌiama ꞌikën.

²⁵ Usa ꞌain ka Moisésnën kakëxa: —Bërí ka anun ñu mëëkinma Nukën ꞌIbu rabiti nëtë ꞌikën. Usa ꞌain kamina ëmanua mitsun piti bitsi kuankinma tëxëonan mi noonkë ashi pikanti ꞌain, ënë nëtën kamima a ñu ñubi barikinbi mërakantima ꞌain.

²⁶ Bërí kamina mikaman mapai achúshi ꞌimainun achúshi nëtë sënë́nmikin mitsun piti biti ꞌain, ꞌaínbi kamina uínsaranbi anun ñu mëëtima nëtën mitsun piti bitima ꞌain.

²⁷ Usakian Moisésnën kakëxbi ka raíri unikamax anun tantiti sábado nëtë ꞌaínbi aín piti bari kuanxunbi añu ñubi mërama ꞌikën.

²⁸ Atux usai ꞌia iskin ka Nukën ꞌIbun Moisés kakëxa: —¿Uínsaran kaina mitsux ꞌën bana kuaisama tanan ꞌën ꞌunánmikësabi oi ꞌiti ꞌain?

²⁹ Min kamina kati ꞌain, ꞌëx Nukën ꞌIbu ꞌixun kana achúshi nëtë anúan tantiti nëtë ꞌinan, usa ꞌain kana mapai achúshi ꞌimainun achúshi nëtë anunbi rabë́ nëtë ꞌimikin piti ꞌinánti ꞌain. Usa ꞌain ka uíxbi a nëtën aín xubunuax kuaintima ꞌikën.

³⁰ Usakian kakëx ka mapai achúshi ꞌimainun rabë́ nëtë ꞌikëbë kamabi unix kuainima tantiakëxa.

³¹ Usa ꞌain ka Israel unibunën bikin a piti maná kakin anëakëxa. Ax ka uxua ꞌaíshbi cilantro kakë ñu bëru uxua usa ꞌaish, buna rëpakëñun mëskuxun pán pikësa ꞌiakëxa.

Diosan maná kakë piti chukúmashi mëníokin nanun ka

³² Nëtë itsin ka Moisésnën ësakin Israel unikama kakëxa: —Nukën ꞌIbu ka ësokin ꞌanun kiaxa, xampa rabë́ buákakin bitankëxun kamina mitsun rëbúnkinëan ësa ñu ka nun chaitiokëkaman anu uni ꞌikëma menuxun Nukën ꞌIbun Egipto menua chikínbiankin buánkëxun piakëxa kixuan isnun nanti ꞌain.

³³ Usakin atu pain katankëxun ka Moisésnën Aarónribi ësokin kakëxa: —Achúshi ñutë bitankëxun kamina anu rabë́ litro maná nanti ꞌain. Usakin ꞌaxun kamina anuxun Dios rabiti ꞌakë anu nanti ꞌain, anu nan ꞌikë ka nun rëbúnki kamanribi anua isti ꞌikën.

³⁴ Aarónën ka Diosan Moisés kakësabiokin, tasánu ꞌaruxun bunántisa kurin ratakakakë anu ꞌaruti mëníokin nankëxa, ax ka Diosan atubëtan këñutimokin ꞌakë achúshi ñu anu nankë ꞌiti ꞌikën.

³⁵ Usakian ꞌan ka Israel unibunën cuarenta baritia ꞌimikin manáishi pií anua me sënënakëkë anu uni tsóti pëukukë anu bëbakin maná piakëxa, ax ka Canaán kakë me sënëni kuainakëkë anu ꞌiakëxa.

³⁶ (Maná tupunkin ka Israel unikaman ñutë chanua ꞌikë veinte litrosa maná a achúshi xampami rabë́ litrosa ꞌitánun tupuankëxa.)