Éxodo 15 - Kashibo-Kakataibo Biblia

Moisés Dios rabi kanta bana

¹ Usa ꞌain ka Moisés ꞌimainun israel unibunën ain ꞌIbu Dios a rabi ami kantakin kakëxa: ꞌËn ꞌIbu Dios rabi kana ami kantati ꞌain, an ka ꞌën iskëma ñu ꞌakin parúmpapanu kamabi caballo ꞌimainun anu ꞌikë unikama nanë́miaxa.

² ꞌËx ami kantaia ka kuatia, an ka ꞌë kushionan ië́miaxa, ax ka Dios ꞌën a rabiti ꞌikën. Ax ka ꞌën papan Dios ꞌikën, usa ꞌikë kana asábi ka kakin rabiti ꞌain.

³ Nukën ꞌIbu ax ka ꞌakanankë unisamaira ꞌikën, ¡usa ꞌaish ka Nukën ꞌIbu ax ain anëira ꞌikën!

⁴ Usa ꞌixun ka Nukën ꞌIbun parúmpapanu faraónën suntárukama, anun nikë caballonëan nirinkë akama këñunbi nanë́miaxa; ¡Nanë́mianan ka suntárunën kushi ain upíbu parúmpapa xónsa kakë anu nanë́miaxa!

⁵ Usai ꞌia kamabi atux maxá ꞌikësai parúmpapa nëbëtsi nanëtia ka baka panarabëkë an biranakin mapuaxa.

⁶ ꞌËn ꞌIbu, min mëkën mëkeu kushiira ꞌixun kamina, an nu ꞌakatsi ꞌikë unikama këñuan.

⁷ Mix kushiira ꞌaish atumi nishkin kamina an mimi ꞌati makin sinánkë; unikamax basi chushikë në́nkësarishi bakan këñukëx ꞌinun ꞌimian.

⁸ Suñumi kushiira bëkimikëbë ka parúmpapa panárabëti amo rabë́ chairuaxa; chairui ka baka ain nëbë́tsin bëchunkë shaíkima anubi ꞌiaxa.

⁹ Ax numi nishkë unikaman ka sinánkë ꞌiaxa: Uinua karanuna nukúti ꞌain, anua nukui kuanuxun kananuna nuiti ꞌain, nukuxun ꞌatankëxun ain ñukama bitankëx kananuna mëtikananti ꞌain. Usakin ꞌax kananuna asábi ꞌiti ꞌain, nun manë xëtokë a bikin anun ꞌakin kananuna atu këñuti ꞌain.

¹⁰ ꞌAínbi kamina atu suñu kushiira bëkimikin parúmpapanu nanënun ꞌimian, usai ꞌi ka baka kushiira nëbë́tsin manë ꞌië́ nanë́kësa ꞌinun nanë́axa.

¹¹ ꞌËn ꞌIbu, ¡uinu ꞌikë bëtsi diosaxbi ka mibë sënënima! ¡Uixi ka misaribi chaiira ꞌianan upíira ꞌixun ñu ꞌatima ꞌai ꞌuchakëma ꞌaíma ꞌikën! ¡Min kamina a iskëma ñu ꞌanan ami rakuë́ti ñuribi ꞌain! ¡Usa ꞌikë kananuna mishi rabiti ꞌain!

¹² Min kamina min kushínbi. Egiptonu ꞌikë unikama bakan mapukin këñunun ꞌamian.

¹³ Min kamina min unikama ꞌitsaira nuibatin, usa ꞌixun kamina min kushi chaiira ꞌixun nukama ië́mikin ꞌakian; usa ꞌain kamina anuxun mi rabiti xubu anuxun rabikë ꞌiti ꞌain.

¹⁴ Usai nux kuania kuati ka bëtsi bëtsi menu ꞌikë unikama rakuëtan bamai bërëti ꞌikën, usai ꞌikëbë ka filisteo unikamaxribi aín sinan bëtsi sinani rakuë́ti ꞌikën,

¹⁵ usaía ꞌimainun ka Edomnën suntárunën kushikamaxribi ain ratúkënainshi uinkasmakësa tani ꞌiti ꞌikën, ꞌimainun ka Moabnën ꞌapukamaxribi aín ratúkënëinshi bërëti ꞌikën, usai ꞌimainun ka cananeo unikamaxribi bëráma ꞌiásai kushima aín sinan nëtë́ti rakuë́ti ꞌikën.

¹⁶ Mix kamina Nun ꞌIbu ꞌain, atux ka ratuti ꞌikën, ꞌimainun ka rakuëkanti ꞌikën, atúxa kuainima maxá ꞌikësai bukunun min kushínbi ꞌiminun kana mi kain, usa ꞌain kamina min unikama inútamainun bërúanti ꞌain, nukamax kananuna min unibu ꞌain.

¹⁷ Mix kamina Nun ꞌIbu ꞌain, minbi kamina upíira me anu nux ꞌitimi kaískë anu nu buánti ꞌain, anu xënibua ꞌaínbi nux tsónun kamina kaisakën, minbi kamina anuxun mi rabiti xubu ꞌati sinánxuankën.

¹⁸ ¡Nun ꞌIbu mix kamina ꞌapuira ꞌaish uínsaranbi këñutima oi tsoti oi uniakën!

María Diosmi kanta bana

¹⁹ Faraónën suntárukama anúan ꞌakanankë caballonën nikinkë akama ꞌimainun anuaxa ꞌakanankë atun caballo akamabëbi kuani parúmpapa nëbëtsin ꞌikianiabi ka israel unikaman ꞌIbun baka atu mapumiakëxa, usai ꞌimainun ka Israel unibunëx parúmpapa tëarabëti me ëskikë anun kuankësa kiani shitákëxa.

²⁰ Usai ꞌikëbëtan ka an bana ñuikë María, Aarónën chirabakën, aín manë sharíkati bitsi sharíkai ransakëxa, ransakëbë a kamabi xanukamaxribi atun manë sharíkati bitsi a nuibiani abë ransakëxa,

²¹ usai ꞌikin ka Maríanën kamabi xanu Dios rabi kantanun ka ukan kixun kai: Nun ꞌIbu rabi ësai kantai kiakëxa, an ka nu ië́mikin nun iskëma ñu ꞌakin faraónën suntárukama aín caballonu ꞌikëkama parúmpapanu nanë́miaxa.

ꞌUmpax muka ꞌia ñuikë bana

²² Usakin Dios pain an ië́mikëxun rabitankëx sënë́nkë ka Moisésnën israel unikama xónsa kakë parúmpapa kuëbí anuxun kabiankin tsuákarubiankin buánkëxa. Buánkëx ka anu uni ꞌikë me aín rëbumi kikiani kuankëxa, usai kuanika rabë́ ꞌimainun achúshi nëtë ꞌikiani kuankinbi ka a xëati ꞌumpax mërama ꞌikën.

²³ Usai kuani ka Mará kakë me anu bëbakëxa, bëbakin anua ꞌikë ꞌumpax xëanuxun tankinbi ka muka ꞌikë a ꞌumpax xëama ꞌikën. Usa ꞌikë ka israel unibunën a me Mará kakin anëakëxa, (ax ka muka ki kikë bana ꞌikën).

²⁴ Usa ꞌain ka Israel unibunëx ñukákanani Moisésmi ꞌatimati banai tsuákirui kanankëxa: ¿Añu ꞌumpax karanuna xëati ꞌain?

²⁵ Usai ami ꞌatimai banakania kuakin ka Moisésnën Nukën ꞌIbu isa ꞌakinun kixun ñukákëxa, ñukákëxun ka Diosan Moisés i pëñanakëkë men menkikë a ismiakëxa. Ismikëxun aín pëñan tsasikin bixun ka Moisésnën ꞌumpax nu niakëxa, nikëbëshi ka muka ꞌumpax ax xëatisabi ꞌinun aín muka nëtë́akëxa. Anuxun ka Nukën ꞌIbun israelita unibu tankëxa, tankin ka uisai kara ꞌia isnuxun achúshi bana usaía atux ꞌiti ꞌinánkëxa.

²⁶ ꞌInánkin ka kakëxa: ꞌËx mitsun Dios ꞌixun kana ësokin mitsun kain, ꞌën kuëënkësa okin ꞌanan, ꞌën mi kakë ënë bana tankin ax kikësabiokin ꞌakëbëtan kana, uisa ñubi an mikama ꞌatima onun egipcio unikamanu xukësokin xutima ꞌain, ꞌëx kana Nukën ꞌIbu an mitsu uisaibi ꞌitima okin bërúankë a ꞌimainun, uinu kaina kuani anuabi mitsu ꞌën uni ꞌikë bërúanti a ꞌain.

²⁷ Ësakian Diosan kakëx kuanx ka Elim kakë, anua mapai rabë́ ꞌimainun rabë́ xëxá upíira shióbumainun setenta xëbin, ꞌikë a baka ꞌurama anu ꞌi bërúakëxa.