Éxodo 14 - Kashibo-Kakataibo Biblia

Israel unibu parúmpapa xónsa shitá bana

¹ Ësokinribi ka Nukën ꞌIbun Moisés abë banakin kakëxa:

² Ësokin kamina israel unikama kati ꞌain, kuantëkëntankëxa Pi-hahirot bëtanain Migdol ꞌimainun parúmpapan nëbëtsionkë Baal-sefón kakë ëma a bëtanain. Anuxun aín chupa këxtú xubusa okin ꞌatankëxa parúmpapa kuëbí anu bukubunun kamina kati ꞌain.

³ Usaími mitsux ꞌikëbëtan ka ꞌapu faraónën sinánti ꞌikën: israel unikamax ka uimiu kara kuanti ꞌikë kixun ꞌunánima anu uni ꞌikëma menuax kuaínbëkini nitsia kixun.

⁴ ꞌAínbi kana ꞌënbi faraón aín sinán iruarakin, aín suntárukama mitsux kuania nuitanun xunun sinánmiti ꞌain; usakin ꞌaiabi kana ꞌën faraón këñunbi aín suntárukama ꞌën kushi ismiti ꞌain, ꞌimainun ka egipcio unikaman ꞌëx kana kamabi unikaman ꞌIbuira ꞌain kixun ꞌunánti ꞌikën. Usakin ka israel unikama ꞌakëxa.

⁵ Usaia atux ꞌimainun ka Egiptonu ꞌikë ꞌapun Israel unikama ka abatia kixun chaniokania kuakëxa. Usakin chanioia kuati ka ꞌapu faraón ꞌimainun an ñu ꞌaxunkë aín unikama atumi sinani kánani kiakëxa: ¿Uisoti karanuna israel unibu kuantanun xuan, uin kara bërí nukama ñu mëëxunti ꞌik?

⁶ Usai pain kanantankëxun ka faraónën aín suntárukama caballonën nikinkë akama mëníonun ꞌamiakëxa, ꞌamitankëx ka aín suntárukama buani kuankëxa.

⁷ Kuankin ka seiscientos caballonën nikinkë anuaxa ꞌakanankë aín upíirabu bianan kamabi caballonën nikinkë Egiptonu ꞌikë buánkëxa, anun ka suntárunën kushikama achúshi achúshinëx kuankëxa.

⁸ Nukën ꞌIbun aín sinan iruaranun ꞌimikëxun ka faraónën aín suntárukamabëtan, Israel unikama kuania nuiakëxa; Diosan aín kushínbi chikinkëx kuaniabi ka usakin ꞌakëxa.

⁹ Nuibiani kuani ka egipcio suntárukama, raírinëx caballonën nikinkë anun kuanmainun raírinëxribi ain caballo anuaxa ꞌakanankë anúnribi kuankin israel unikama nuibianxun nuküakëxa, parúmpapa kuëbí anua Pi-hahirot ꞌimainun Baal-sefón kakë ëma a ꞌukëmanan atun chupa xubusa okin ꞌax anu bukukëbi nuküakëxa.

¹⁰ Atu nukui kuania faraón ꞌimainun egipcio suntárukama ꞌaisamaira kiania ꞌurakëo isi ka Israel unibu ratuti ꞌitsaira rakuë́akëxa, rakuëkin ka munuma banakin Nukën ꞌIbu atu ꞌakinun kixun ñukákankëxa.

¹¹ Ñukákin ka Moisésribi ësokin kakëxa: —¿Uisati karamina anuaxbi bamanuma Egipto menua nu chikínbëtsinkin anu uni ꞌikëma me ënuax bamanun nu bëan? ¿Añu kupín kaina nu ësokin ꞌan? ¿Uisa kupín kaina nu Egipto menua chikían?

¹² Ësai ꞌiti ꞌunánxun kananuna Egipto menuxun mi kan: Ënuxunbi egipcio unibu ñu mëëxunun kamina nu ënti ꞌain. ¡Usa ꞌain kananuna tëmërakinbi atu ñu mëëxuni anu uni ꞌikëma menuax bamai utima ꞌian!

¹³ Usai kikaniabi ka Moisésnën kakëxa: —Kamina rakuë́kantima ꞌain. Mitsun kamina ꞌatima okin sinánkima chuámashirua tankin bëría Nukën ꞌIbun mitsu ꞌiëminuxun ñu ꞌaia isti ꞌain, uínsaranbi kamina egipcio unikama amiribishi bërími iskankësa okin istëkënxuma ꞌain.

¹⁴ Mitsux kamina ꞌatimakin sinani bënëtima ꞌain, Nukën ꞌIbun ka ënë ñukama mitsu mëníoxunti ꞌikën.

¹⁵ Usa ꞌain ka Nukën ꞌIbun Moisés kakëxa: —¿Uisoti kaina min ꞌë ꞌakinun kixun kain? Israel unikama kamina rakuë́tima abi kuanun kati ꞌain.

¹⁶ Min kamina min tsati bikin parúmpapa paná rabëtanun amiokin sananti ꞌain, anúan israel unibu kuantanua me rakati ëskitanun.

¹⁷ ꞌËn kana egipcio unikama aín sinan iruarakin mitsu kuania nuinun ꞌamiti ꞌain; usai ꞌia kana ꞌën kushi ismikin ꞌapu faraón aín suntárukama ꞌimainun kamabi aín caballonën nikinkë anuaxa ꞌakanankë a kamakëñunbi uisa kushiñu karana ꞌëx ꞌai kixun isnun ismiti ꞌain.

¹⁸ Usakin ꞌën kushi ismikin ꞌapu faraón kamabi aín suntáru ꞌimainun aín caballonën nikinkë anúan ꞌakanankë a kamakëñunbi ꞌakë ꞌain ka egipcio unibunën ꞌëx kana asérabi Israel unibunën ꞌIbu ꞌai kixun ꞌunánti ꞌikën.

¹⁹ Usai israel unibu kuani parúmpapa abu kikiani kuankëbë ka Diosan ángel rëkuë́nkiankë ax atu kaxú tsianakëxa, tsianakëbë ka usaribiti nëtë kuin rëkuë́nkiankë axribi suntárukama a bëarati Israelkama kaxú tsianakëxa.

²⁰ Usakian nëbëtsi rabë́ okin kuinan pë́kakëx ka israel unikamax xabánu ꞌiakëxa, ꞌimainun ka egipcio suntárukama ax imë́nu ꞌixun iskasmakin a imë́ israel unikama nukunun nukumiama ꞌikën.

²¹ Usa ꞌain ka Moisésnën aín tatsi bikin Nukën ꞌIbun kakësabiokin parúmpapami okin sanankëxa, usokëbëtainshia Diosan ꞌimikëx ka amiaxa bari urukë amiax a imë́ suñu kushi bëquinëakëxa. Usai ꞌikëbë ka parúmpapa nëbëtsi baka ënanani amo rabë́ chaiira ꞌinun panárabë́akëxa. Usakin Nukën ꞌIbun ꞌimikëbë ka me ëski rakakëxa,

²² usai baka panárabëti amo rabë́ chairui mëmiu ꞌianan mëkeu ꞌi me ëskikëbë ka anun israel unikama sikarakëkankëxa.

²³ Usai ꞌikëbë ka kamabi caballonuax ꞌakanani kuankë ꞌimainun faraónën suntárukama ꞌimainun atun caballonën nikinkëkama an atu kaxú ꞌatsinkiani kuankin parúmpapa nëbëtsin obiankin nuibiankëxa;

²⁴ ꞌaínbi ka pëkarakuatsínkëbëtan Nukën ꞌIbun egipcio suntárukama nëtë kuin tsi rëkirukësa anuxun iskin aín caballonën nikinkë akamaxa chakanani masónanun ꞌimiakëxa;

²⁵ usaia ꞌinun ꞌimikian Diosan atun caballonën nikinkëkaman taë menu takáshki ëchikibunun ꞌimikëbë ka egipcio suntárukama kuankasmakëxa. Usai ꞌikëbë ka egipcio suntárukama munuma sharati kikankëxa: —Israel unikama ëbiani kuanun ka kuan, atun ꞌIbun ka anun rabanan në́kin nu ꞌatimoia.

²⁶ ꞌAínbi ka Nukën ꞌIbun Moisés kakëxa: —Parúmpapami oi ka mëshpat, amiribishi timë́ti biranankian ꞌumpaxan egipcio suntárukama atun caballonën nikinkë ꞌimainun axa caballonuax ꞌakanankë akama këñunbi mapui baka rakarakëtëkëntanun.

²⁷ Ësakin Diosan kakëxun ka Moisésnën aín tsati bikin parúmpapa mi mësukin sanankëxa, sanankëbë ka pëkarakuatsínkëbë ꞌumpax anua rakákë anubi rakarakëtëkëankëxa. Usai ꞌikëbë abánux kuainiabi ka egipcio suntárukama parúmpapa rakarakëtëkënkin mapuakëxa, usakin ka Nukën ꞌIbun atu bakan këñunun ꞌamiakëxa.

²⁸ Usai amiribishi anuaxa panárabëti ëskikë anubi rakarakëtëkënkin ka ꞌumpaxan, aín caballonën nikinkë a ꞌimainun aín caballokama këñunbi israel unibu nuibiani parúmpapa nëbëtsin kikianiabi, achúshira faraónën suntárubi ië́tanuma nanë́mikin këñumiakëxa.

²⁹ Usai ꞌikëbëbi ka israel unikama anun kuanun parúmpapa tëarabëti me ꞌinun ëskikë anun sikarakëakëxa usai ꞌi ka ꞌumpax kuëtú ꞌikësai amorabë́ chairui bëtsi mëmiu ꞌimainun bëtsi mëkëu ꞌiakëxa.

³⁰ Usakin ka a nëtëkaman Nukën ꞌIbun israel unibu, egipcio unibunën ꞌanuxun nuibianiabi ië́miakëxa, ië́mikëxun ka israelkaman kamaxunbi egipcio suntárukama bakan këñúkë parúmpapa kuëbí bëspúbëspuabu isakëxa.

³¹ Usakian Nukën ꞌIbun ain kushin Egiptonu ꞌikë unikama ꞌaia isi ka israel unibu Nukën ꞌIbu rabi, ami katamëti rantinpuruni tsóbuti ꞌianan Moisésnën kakësabiokin aín bana kuakankëxa.