Éxodo 12 - Kashibo-Kakataibo Biblia

Usakian Pascua nëtë ꞌati ñuikin Israel unikama Diosan ka bana

¹ Nukën ꞌIbun ka abë banakin Moisés ꞌimainun Aarón, Egipto menuxun ësokin kakëxa:

² Ënë ꞌuxë ka bëtsi ꞌuxësama mitsunan ꞌiti ꞌikën, ꞌimainun ka anun baritia bënánu ꞌirukë ꞌuxë ꞌiti ꞌikën.

³ Ësokin kamina kamabi Israel unikama kati ꞌain: Ënuax mapai rabë́ nëtë ënë ꞌuxë ꞌirukëbëtan ka unin an ꞌarakakë carnero ꞌaíma ꞌain, cabra achúshi achúshi uni kamaxunbi bëti ꞌikën.

⁴ ꞌImainun ka uix kara ꞌitsamashi aín xubunu ꞌia an këñukin ñuina nami pisama ꞌain ka, xubu ꞌibun a ꞌurama ꞌikë uni kuëntankëxun abë timë́xun piti ꞌikën, uiti uni kara tupuntankëxun ka atun piti sënë́nbi ꞌinánti ꞌikën.

⁵ A ñuinakamax ka aín bënë achúshi baritiañu ꞌaish, uisaibi ꞌikëma aín upíira ꞌiti ꞌikën, a kamina carnero bëna ꞌakima cabra bëna ꞌati ꞌain.

⁶ Usa aín ka a ñuina ënë ꞌuxë catorce nëtë ꞌitamainun bërúankë ꞌiti ꞌikën, ꞌimainun ka a nëtë ꞌikëbëtan achúshi achúshi Israel unibunën xupibukëbëtan rëti ꞌikën.

⁷ Rëkin ñuina aín imi bitankëxun kamina mitsun xubu anuxumi nami pikë aín xëkuënu ꞌikë i, anun atsínkiantinu a unántiokin shiti aín.

⁸ ꞌAnan kamina aín nami a imë́ ñunantankëxun anun chamiti ñu këñuma ꞌakë pán ꞌimainun pëi mukakëñun piti ꞌain.

⁹ ꞌImainun kamina achúshi aín sanirabi paxa pianan ꞌaruxun pitima ꞌikën. Kamabi ñuinanën maxká ꞌain taë ꞌimainun aín puku akamaribi ka tsinu xuikë ꞌiti ꞌikën,

¹⁰ ꞌimainun kamina ëmëishi ꞌanuxun tëxëokinma ankëkinshi piti ꞌain. Pianan kamina ꞌain tëxëkëkama a këñukin xaroti ꞌain.

¹¹ Ënë nëtëx ka anun kamabi Dios kikë ꞌati ꞌën mitsu kakë ꞌikën, usa aín kamina bërámashi mitsun chupa pañuanan mitsun taxaka tañuanan kuantishi ꞌixun bënë́kinshi mitsun tsati mëtikixun piti ꞌain, ꞌanan kamina Pascua kakë nëtë Nukën ꞌIbu rabikin ñuina nami xaronan a piti ꞌakë a piti ꞌain.

¹² A imë́ kana ꞌëx kamabi Egipto menu inúkin kamabi egipcio unikaman xubunua aín rëkuë́n bëchikë ꞌanan a unikaman ñuinanën rëkuë́n tuákama ñumiti ꞌain, ꞌëx kana Dios a ꞌain. ꞌImainun kana Egiptonu ꞌikë unikaman rabikë dios ꞌatima oti ꞌain. ꞌËx mitsun ꞌIbu ꞌaish kana ësai kin.

¹³ Ñuinakan imi ax ka anúnmi mitsun xubu xëkuë anumi ꞌikë a ꞌunántiokin shiti ꞌiti ꞌikën. Usakin ꞌakin ꞌën egipcio unikaman rëkuë́n bëchikëkama këñúmikëbëbi ka mitsun bëchikëkama achúshirabi bamatima ꞌikën, imin xubu xëkuë shikë a isi ꞌëx amotan inúkëbë ka këñutima ꞌikën.

¹⁴ Ënëx ka anëtë sinankinmi mitsun ꞌë rabikin achúshi fiesta chaiira ꞌati ꞌikën. Usa ꞌain ka ënë bana kikësabiokin ënkinma aín papakaman ꞌásabiokin mitsun bëchikëkaman a sinánkin ꞌati ꞌikën.

¹⁵ Ënë nëtë inúkin kamina anun chamiti ñu këñuma ꞌakë pán mapai achúshi ꞌimainun rabë́ nëtë sënë́nmikin piti ꞌain; usa ꞌain ka a nëtë ꞌikëbëtan uix kara anun pán chamiti ñu aín xubunu nankë ꞌikë an aín xubunua bixun niti ꞌikën. Uin kara ënë bana tankima anun chamiti ñu këñun ꞌakë pán mapai achúshi ꞌimainun rabë́ nëtë ënën, pia ax ka Israel unikaman a rapasu ꞌimikima chikínkë ꞌiti ꞌikën.

¹⁶ Usa ꞌain kamina a nëtë ꞌirutabakëbëmi timë́kë, a nëtën timëkamë ꞌëoxun mapai achúshi ꞌimainun rabë́ nëtë sënë́nmi timë́xun ꞌë rabiti aín. A nëtëkaman ka Israel unikaman aín ñu mëi kuankima, aín piti achúshi achúshi unin a fiesta ꞌakin piti ꞌati ꞌikën.

¹⁷ Anun chamiti ñukëñunma pán ꞌati nëtë ꞌikëbëtan kamina mitsun a nëtë sinánkin kamaxunbi timë́xun achúshi fiesta ꞌakin ꞌë rabiti ꞌain, a nëtëx ka anun ꞌën mitsu Egipto menua chikían nëtë ꞌiti ꞌikën. Usa ꞌain ka ënë bana kikësabiokin ënkinma mitsun ꞌásabiokin min bëchikë ꞌimainun min babakaman a sinánti ꞌikën.

¹⁸ Mitsun kamina anun pán chamiti këñuma ꞌakë a pikin catorce nëtë sënë́nkë a ñantabukëbëtan, pikin taëoëxanxun kamina a ꞌuxënbi veintiuno nëtë ñantabukëbëtan sënë́onti ꞌain.

¹⁹ Usa ꞌain ka akëñun pán chamiti ñu, mapai achúshi ꞌimainun rabë́ nëtë mitsun xubunu ꞌitima ꞌikën, uin kara anun pán chamiti ñu këñun ꞌaxun pán pia ax ka Israel unikama ꞌimainun bëtsi menu ꞌikë ꞌaíshbi atubë tsókë atúxribi ka chikínkë ꞌiti ꞌikën.

²⁰ Usa ꞌain kamina, anun pán chamiti ñukëñun ꞌakë a nëtën pitima ꞌain. Uinu karamina mitsux tsotin anuxunbi kamina, anun chamiti këñuma ꞌakë pán piti ꞌain.

²¹ Usa aín ka Diosan kakësabiokin Moisésnën Israel uni ꞌain kushikama kamiakëxa, kamikëxa aia ka kakëxa: Anu rikianxun kamina Israel unikama mitsun kamaxunbia achúshi achúshi papan carnero bakë bërí kanikë achúshi achúshi unin aín aintsikamabëtan Pascua nëtë inúkin piti rëti bënun kamina kati aín.

²² Rëkin kamina xampa chami aín imi biti ꞌain. Bitankëxun kamina sëbunkin hisopo kakë ro pëñan aribi biti ꞌain. Bixun kamina ñuina imi ami chabóxun anun kamabi mitsun xubu xëkuë ꞌimainun itáribi anun ꞌunánti okin shiti ꞌain. Usakin ꞌatankëx kamina pëkaratisama ꞌain mitsun xubunuax chikítima anu pain ꞌiti ꞌain.

²³ Usokin ꞌakë ka Nukën ꞌIbun egipcio unikaman rëkuë́n bëchikë bamatanun këñumi inúkinbi xubu xëkuë imin shikë isi ka a ꞌurama oíma amotan kuainti ꞌikën. Usa ꞌain ka Nukën ꞌIbun an uni bamamitia xukë aín ángel mitsun xubunu atsínun ꞌimitima ꞌikën.

²⁴ Ënëx ka mitsun a tanti bana ꞌikën, ꞌimainun mitsun rëbúnki kamanribi xënibua ꞌaínbi tanti bana ꞌën ꞌinánkë ꞌikën.

²⁵ Usa ꞌain kamina Nukën ꞌIbun ax kikësabiokin mitsu ꞌinánti me anu kuanx anu tsókinbi ax kikësabiokin ënë fiesta, kamabi baritia ꞌirukëbëtan ꞌai ami sinánti ꞌain.

²⁶ Usakin ꞌaia ka mitsun bakë bëchikëkaman ënë ñu iskin mitsu ñukati ꞌikën: ¿Añu ꞌanux karanuna ësai timë́ti ꞌain?

²⁷ kixuan mitsu ñukákëxun kamina kati ꞌain: Ënë ñuinanëx ka Pascua inúkin xaronan, Nukën ꞌIbu rabikin ꞌakë ꞌikën. Ënë nëtën ka Egipto mekama oi kuankin egipcio unikaman rëkuë́n bëchikëkama bamamikinbi, Israel unikaman xubu isi a ꞌurama oíma a uri inúkin Egiptonu ꞌikë nun aintsikama uisabi okima ië́miakëxa. Usakin atun kaia Moisés sënë́nkëbëishi ka Israel unikama rantinpuruni tsóbukin Dios rabiakëxa,

²⁸ usai pain ꞌikiani kuantankëxun ka kamabi ñu usakin ꞌanúan Nukën ꞌIbun Moisés ꞌimainun Aarón kakësabiokin ꞌakankëxa.

Unin rëkuë́n bëchikëkama ñua bana

²⁹ A imë́ naëx ka Nukën ꞌIbun egipcio unikaman rëkuë́n bëchikëkama këñumiakëxa faraónën rëkuë́n bëchikë aín papa ꞌikësaribitia ꞌapu ꞌiti aribi amiakëxa, ꞌimainun ka sipunu ꞌikë unin rëkuë́n bëchikë kamakëñunbi ꞌain ñuinanën rëkuë́n tuákamaribi këñumiakëxa.

³⁰ Usai ꞌikëbë ka ñantan ꞌapu faraónbë an ñu ꞌaxunkë unikama ꞌimainun kamabi unikamax niruakëxa, nirui ka ꞌaisamaira unikamax nitë́xëti ini kamabi Egipto menuax anun paëi rarumakëxa. Usai ꞌikëbë ka uinu ꞌikë xubunubi unin rëkuë́n bakë bëchikë bamakëmama ꞌaíma ꞌiakëxa.

³¹ Usaia ꞌikëbëtan ka a ꞌimë́bi ꞌapu faraónën Moiséskëñun Aarón kamiakëxa, kamikëxa aia ka kakëxa: —Ënuax kamina mitsux ꞌën unikama ëbiani, Israel unikama ubani kuanti ꞌain. Kuanxun kamina a rabikatsimi kikankë mitsun ꞌIbu rabi kuanti ꞌain.

³² Kuankin kamina mitsun oveja, vacakama kamabi buani, uisakiani kaina kuainsatani usakiani kuanxun kamina mitsun, Dios ñukákin ꞌëribi ñukáxuni kuanti ꞌain.

³³ Usakin katankëxun ka egipcio unikaman aín menuaxisa kuantanun kixun Israel unikama bënëakëxa, kamabi uníxa këñutisa sinánkin.

³⁴ Usa ꞌain ka Israel unibunën anun pán chamiti ñukëñunma tunküakin ꞌakë harina, ami chë́katia ꞌakë i pará akëñunbi, ain chupan maranbunkin nëaxun papiakëxa.

³⁵ ꞌAnan ka Moisésnën kakësabiokin, egipcio unikama ain kuri ꞌakë ñu ꞌimainun manë uxua ꞌakë ꞌimainun chuparibi ñukákankëxa.

³⁶ Ñukatia ka Nukën ꞌIbun egipcio unikaman upíokin nuibakin Israelkaman ñukákëxun, ñu ꞌinaíshinun kixun sinánmiakëxa, usakin aín ñukama ꞌinántankëxun ka egipcio unibunën Israel unikama kuantanun xuakëxa.

Israel unibu Egipto menuax chikia bana

³⁷ Usa ꞌain ka Israelkama Ramsés kakë ëma anuax taën kuani Sucot kakë ëma anu kuankëxa. Usa ꞌaish ka xanu ꞌimainun uniakë xukama ꞌakëñuma tupúnkëx, seiscientos mil uni axa suntáruisa uni kamaishi ꞌiakëxa.

³⁸ Kuankëbë ka atubë bëtsi bëtsi menu ꞌikë unikamaxribi kuankëbë ꞌaisamaira uni kuankin atun ꞌarakakë ñuina ovejakama vacakama buánkëxa.

³⁹ Usai kuanuxun atun ñu mënioi ka anúan aín piti ꞌatibi ꞌaíma ꞌiakëxa, egipcio unibunëan aín menuax kuantanun chikínkëx, usokëx kuankin ka anun chamiti ñu këñuma ꞌakë harina Egipto menuxuan mëníokin maranbunkë kachakëma a xuiakëxa.

⁴⁰ Usa ꞌain ka Israel unibu cuatrocientos treinta baritia Egipto menu pain tsóti në́a ꞌiakëxa,

⁴¹ ꞌimainun ka anúan cuatrocientos treinta baritia, aín chaitiokëkama Egipto menu tsónux bëba a nëtë sënë́nkë a nëtënbi ka Israel unibu atún ꞌIbun a menua chikíankëxa.

⁴² A imë́ ka Nukën ꞌIbun Egipto menua atu chikinuxun bëruanëakëxa. Usa ꞌain ka Nukën ꞌIbun a sinánkin a ꞌimë́ ꞌikëbëtan Israel unikaman aín chaitiokëkaman ꞌasábi okin aín rëbúnkikamanribi Nukën ꞌIbu rabikin kamabi baritian usaribi okin ꞌuxkinma a imë́ bërúankëxa.