Éxodo 10 - Kashibo-Kakataibo Biblia

Champun ñu ꞌapákëkama këñua bana

¹ Usa ꞌain ka Nukën ꞌIbun Moisés kakëxa: —Faraón kamina isi kuanti ꞌain, ꞌën kana a ꞌimainun an ñu ꞌaxunkë aín unikama këñunbi aín sinan iruaranun ꞌimian, usakin kana ꞌën kushin ñu ꞌai kixuan isnun kana uínsaranbi atun iskëma ñu ꞌati aín,

² usakin ꞌën ꞌaia isá ꞌixun kamina min bakë bëchikëkama ꞌimainun min xutakama ñuixunti ꞌain, uisakin karana ꞌën egipcio unibumi kuaikin atun uínsaranbi isama ñu chaiirabu ꞌën kushínbi ꞌakë kixun. Usakin ꞌën ꞌakë, ꞌain kamina ꞌëx kana asérabi Nukën ꞌIbu ꞌai kixun mitsun ꞌunánti ꞌain.

³ Usa ꞌain ka Moisés ꞌimainun Aarónën anu kuanxun ꞌapu faraón kakëxa: —Ësai ka hebreos unikaman Dios kiaxa: ¿Uínsaran kaina ꞌëx kana Diosmi rakuë́timami kikë a ëni ꞌëmi rakuë́ti ꞌain? ꞌËn unikama kamina, ꞌë rabi kuantanun xuti ꞌain;

⁴ minmi ꞌën kakëxunbi ꞌën unibu xukëbëtama kana, imë́ishibi kamabi min me tsitsiruia champu uninun ꞌimiti ꞌain,

⁵ usakin unimikëx ꞌaisamaira ꞌixun nuturukëx ka me istisama ꞌiti ꞌikën. An ka anu pakëkin matsin këñukinbi tëxëokë mitsun ñu ꞌapákë pikin këñuti ꞌikën, ꞌimainun ka kamabi ni pëi ninu ꞌikë kamaribi piti ꞌikën.

⁶ ꞌIanan ka min xubunu ubakiruanan, an mi ñu ꞌaxunkë unikama atun xubunuribi ꞌianan kamabi egipcio unikaman xubunuribi ꞌiti ꞌikën. Uínsaran nëtënbi ka ësai ñu ꞌia min papan min xutan nux unitisama ꞌaínbi isama ꞌikën. Ësai banatankëx ka Moisés ꞌimainun Aarón faraónën xubunuax kuainakëkiani kuantankëx chikíakëxa.

⁷ Usakin kabiani kuankëbëtan ka an ñu mëëxunkë unikaman faraón kakëxa: —¿Urainra kara ënë unikaman nu ësokin ꞌatima oti ꞌik? Usa ꞌain kamina mix ꞌapu ꞌixun atun Dios rabia kuantanun xuti ꞌain. ¿Mix ꞌapu ꞌixunbi karamina kamabi Egipto me ka ꞌatimatia kixun isiman?

⁸ Usakian aín unikaman kakëxun ka faraónën Moisés ꞌimainun Aarón amiribishi kamiakëxa, kamikëxa anu ꞌaia ka ësokin kakëxa: —Asabi ka, mitsun Dios rabi kamina kuanti ꞌain. ꞌAínbi kamina kuanuxupan uikamax kara mibë kuania ꞌë kati ꞌain.

⁹ Ësokian kakëxunbi ka Moisésnën kakëxa: —Nu kamáxbi kananuna nun Dios rabi kuanti ꞌain. Kuankin kananuna uni apan ꞌimainun bënábu kamabi ënkinma nun bëchikë xanu nukëbënë ꞌimainun nun ꞌarakakë ñuina kamabi buani kuaxun kananuna achúshi fiesta chaiira ꞌakin Nun ꞌIbu rabi kuanti ꞌain.

¹⁰ Kixun kakëxunbi ka ꞌapu faraónën kakëxa: —¡ꞌËn kana asérabi mitsun mi ꞌatimakin sinania ꞌunan, këmëkiani kamina kuainsatankanin! ¿Mitsun kaina sinanin min ꞌIbu kara mitsubë kuanti ꞌikë kixun, ꞌimainun karana mitsun bëchikëkama buanimi kuantanun xuti ꞌain?

¹¹ Mitsun sinánkë usa ka ꞌitima ꞌikën. Usa ꞌain kamina uni apan kamáxëshi mitsun ꞌIbu rabi kuanti ꞌain, usakin ꞌati kamina kuëënkanin. Usakin katankëxun ka faraónën ꞌain unikama aín xubunua Moiséskëñun Aarón chikínun ꞌamiakëxa.

¹² ꞌAínbi ka ësakin Nukën ꞌIbun Moisés kakëxa: —Min pëñan manámi okin kamina min tsatin Egipto me kamami okin sananti ꞌain, champu ꞌaisamaira unia kamabi ënë menu ꞌikë ñu ꞌapákë matsin titan ꞌakin tëokë abi këñui unitanun ꞌimiti ꞌain.

¹³ Kakëxuan Moisésnën aín tsati Egipto me kamami okin sanan bëkinkëbëtan, ka Nukën ꞌIbun abu bari urukë amixun Egipto menu suñu bëkinun ꞌimiakëxa, usai ka achúshi nëtë ꞌimainun achúshi imë́ bëquinëakëxa. A pëkarakëbë ka amiaxa bari urukë amiax bëkikin suñun ꞌaisamaira champu bënë́kë isi egipcio unikama ratuakëxa,

¹⁴ usai ꞌikin ka champun kamabi Egipto me tsitsiarakë ꞌiakëxa. Uinsaranbi ka usai ꞌiama ꞌikën, ësai ka amiribishi champu a nëtë́an ꞌikësai ꞌitëkënuxuma ꞌaia,

¹⁵ ꞌain ka me istisama ꞌitánun ankëkin tsitsiruakëxa, usa ꞌixun ka champun kamabi me tsitsirukin ñu ꞌapákë ꞌain pëchi ꞌimainun aín bimiñu ꞌimainun ni matsin titan ꞌakin tëokë akamabi këñuakëxa. Usakian ꞌakëx ka pëi paxa achúshirabi iskëma Egipto menu: ꞌimainun ninubi pëi paxa ꞌaíma ꞌiakëxa.

¹⁶ Usakian akëbëtan ka ꞌapu faraónën Moisés ꞌimainun Aarón bënëtia unun kamiakëxa, kamikëxa aia ka ësakin kakëxa: —ꞌËx kana min ꞌIbu Dios ami ꞌuchanan mitsumiribi ꞌuchan,

¹⁷ ꞌaínbi kamina ashikin ꞌëx mimi ꞌuchakë ënë ꞌëbë mëníonankin min Dios ꞌëribi ñukáxunti ꞌain, ñukákin kamina champu ꞌaisamaira ënë kara nëtë́mitima ꞌikë ñukáti ꞌain, nun ñu ꞌapákëkama ka ꞌaisamaira okin këñuia usa aín.

¹⁸ Ësakian kakëx ꞌapu faraónën xubunuax chikítankëxun ka Moisésnën champu nëtëminun Nukën ꞌIbu ñukákëxa.

¹⁹ Usakian ñukákëxun ka Nukën ꞌIbun abu bari kuabúkë amiaxa bëkikë a buinakin amo bëkinun ꞌimikëxun ka suñun champu kamabi Egipto menua achúshirabi bërutanuma parúmpapa xónsa kakë anu punun sinanxuankëxa.

²⁰ Usakin ꞌakinbi ka Nukën ꞌIbun ꞌapu faraónën aín nuitu iruarakin Israel unibu xuxuma ꞌanun sinánmiakëxa.

Nëtë bë́ankia ñuikë bana

²¹ Usa ꞌain ka faraónëan Israel unibu xuisamaira tankëbëtan Nukën ꞌIbun Moisés kakëxa: —Kamabi Egipto mea bëánkitanun kamina min mëkën manámi mëshpakin naí mëtunti aín, usakinmi ꞌakëbë ka bëánkibukë ax mëkënan mëëtisa këxtuira ꞌiti ꞌikën.

²² Kakëxuan Moisésnën aín mëkën manámi sanani mëshpakëbëishi ka kamabi Egipto menu bëánkibukë chaiira ꞌiakëxa,

²³ usaía rabë́ ꞌimainun achúshi nëtë me bëánkikë ꞌain ka uinu ꞌikë uníxbi a rapasu ꞌikë uni isi kuainima ꞌianan uíxbi niama ꞌikën. Usai anu ꞌikëbëbi ka anua israel unibu ꞌikë, aín xubukama xabá ꞌiakëxa.

²⁴ Usai ꞌikëbëtan ka faraónën Moisés kamikëx aia kakëxa: —Mitsun ꞌIbu rabi kamina kuanti ꞌain, kuani kamina mitsun bëchikë mitsun xanu buani kuanti aín, ꞌaínbi kamina mitsun ꞌarakakë vaca, ꞌimainun ovejakama buántima ꞌain.

²⁵ ꞌAínbi ka Moisésnën kakëxa: —Min kamina usai kikínma min ñuina ꞌarakakë, Nukën ꞌIbu Dios rabikinu rëtankëxun xaraoi kuanun nu ꞌinánti aín, mixmi nun ñuina buánti kuëënkëbëma ka Dios rabikin a ꞌati ñuina ꞌaíma ꞌiti ꞌikën.

²⁶ Usa aín kananuna nun ñuina kamabëbi kuanti aín, nun kananuna ꞌunánima uiti ñuinaira karanuna Nukën ꞌIbu rabikin rënuxun kaisti ꞌai kixun. Anuxun nun rabiti anu bëbakëmapain ꞌixun kananuna ꞌunánima añu ñu xarokin karanuna nun Nukën ꞌIbu rabiti ꞌai kixun.

²⁷ Usai kikëbëtanbi ka Nukën ꞌIbun ꞌapu faraón ashikin aín nuitu iruaranun sinánmiakëxa, sinánmikëxun ka Israel unikama kuantanun xuama ꞌikën.

²⁸ Usai ꞌibi sinanakin ka faraónën Moisés kakëxa: —Ënuax kamina kuanti ꞌain, kuantankëx kamina ꞌë isi utëkënti sinántima ꞌain, uínsaran kaina ꞌutëkëni anun kana ꞌën suntárukaman mi ꞌanun ꞌamiti ꞌain.

²⁹ Kia ka Moisésnën kakëxa: —Asabi ka min kamina ësakin nu kain. Amiribishi kana ꞌën min bëmánan istëkënuxuma ꞌain.