Éxodo 1 - Kashibo-Kakataibo Biblia

Egipto menuaxa Israel unibu tëmëra ñuikë bana

¹ Ënëx ka Israel unibunën anë axa Jacobë Egipto menu bëba akama ꞌikën, a unikamax ka achúshi achúshinëx aín aintsikama ꞌimainun aín xanu, aín bëchikë kamabëbi kuankëxa:

² Ax ka ꞌiakëxa, Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad ꞌimainun Aser.

⁵ Usa ꞌain ka Jacobnën rëbúnkikamax tupúnkëx setenta uni ꞌiakëxa. Ax pain kuan ꞌaish Josénëx Egipto menu tsótan.

⁶ Usa ꞌain ka José ꞌimainun aín xukë́nkamax, a menu pain tsótankëx ñuakëxa;

⁷ ꞌaínbi ka Israel unikama atun ꞌaisamaira ꞌinun Egipto menuxunbi bëchipakëxa, usa ꞌaish ka atux ꞌaisamaira ꞌinun ꞌuakamë ꞌëoi kushiirabu ꞌiakëxa. Usa ꞌain ka atu xëshi a menu ꞌuakamë ꞌëokëxa.

⁸ Usai ꞌitsa baritia anu Israel unikama tsókë ꞌaínbi ka Egipto menu bëtsi ꞌapu faraón kakin anëkë an José isama anu ꞌiakëa, usa ꞌixun ka a ëmanu ꞌikë aín aintsikama kakëxa:

⁹ Mitsúnbi kamina ꞌunanin Israel unikamax ka ꞌaisamaira ꞌinun ꞌuakamë ꞌëoia usa ꞌaish ka nubë sënë́nma ꞌianan kushiirabu ꞌikën;

¹⁰ usa ꞌain kananuna uisa karanuna ënë unikama oti ꞌain kixun isti ꞌain, nuxnu ꞌakanankëbë atuma abë nux ꞌakanankë bëtsi unikamabë amikatamëxun nu ꞌabiani ënë menuax abákania usa ꞌain.

¹¹ Usakin sinánxun ka Egiptonu ꞌikë ꞌapun an ñu mëëia bërúanxun israel unikama timëti uni anëakëxa, anëkëxun ka a unikaman ꞌaisamaira okin ñu mëëmiakëxa. Usakin ñu mëëmikin ka Pitón ꞌimainun Ramsés kakë ëma aribia ꞌanun ꞌamiakëxa, ax ka anua Egiptonu ꞌikë ꞌapun, anu piti bukúnti ꞌamikë ꞌiakëxa.

¹² ꞌAínbi ka ꞌitsaira ꞌatima okankëxbi atiainra, ꞌaisamaira ꞌinun ꞌuakamë ꞌëokëxa. Usai ꞌikëbë ka egipcio unikamax atumi ꞌitsaira rakuë́akëxa.

¹³ Usa ꞌain ka egipcio unikaman Israel unibu ꞌaisamaira okin ñu mëëmikin tëmëramiakëxa.

¹⁴ Tëmëramikin ka ꞌaisamaira ñu mënun ꞌamikin ami xuamati nishkin atu mëakëxa, ꞌimainun ka me tëi ladrillo ꞌati mëskuti ꞌamianan, atun naënu ꞌikë ñu mëëtiribi ꞌamiakëxa. ꞌAmikin ka Israel unikama atun ꞌatimaira okin tëmëramiakëxa.

Egipto menu ꞌikë ꞌapu Israel unibunën bëbu bëchikë bakënia ꞌamiti kia bana

¹⁵ Usa ꞌain ka Egipto menu ꞌikë ꞌapu ax Sifrá kakë ꞌimainun Puá kakë abë banakëxa, ax ka hebrea xanukama an nachikitia ꞌakinkë xanu rabë́ ꞌiakëxa:

¹⁶ —Min hebrea xanukama bakënun ꞌakinkë ꞌixun kamina isti ꞌain, uisa tuá kara nachikitia xanu ꞌimainun kara bëbu tuá ꞌia kixun. Xanu ꞌikë kamina kanitanun ënti ꞌain, bëbu tuá ꞌia ¡kamina ꞌati ꞌain!

¹⁷ Usakian kakëxunbi ka an nachikitia xanukama ꞌakinkë Sifrá ꞌimainun Puá an Diosmi rakuë́kin ꞌapu faraónën kakësabiokin akinma bëbu tuákama kanitanun ëankëxa.

¹⁸ Usoia kuakin ka ꞌapu faraónën a xanu rabë́ kamiakëxa: —Kamikëxa anu kuankë ka ësokin kakëxa. ¿Uisa kupín kaina bëbu tuákama kanitanun ënin?

¹⁹ Ësokian ñukákëxun ka kakëxa: —Hebrea xanukamax ka egipcia xanusama ꞌikë kixun xanu rabë́ an kakëxa. Usa ꞌaish ka atux kushiirabu ꞌaish nukamax nachikiminux nukukë ꞌaímabi atux pain bakënkë ꞌia kixun.

²⁰ Usai ka Israel unikama ꞌaisamaira ꞌinun ꞌuakamë ꞌëokëxa, ꞌianan ka ꞌaisamaira ꞌinun kamabi nëtën ꞌuákamë ꞌëoi kushiirabu ꞌiakëxa.

²¹ Usaia ꞌiabi ka Diosmi rakuë́kin an xanu bakëmikë rabë́ an tuapatia aín aintsikamabëbi ꞌuakamë ꞌëonun ëankëxa.

²² Usaia ꞌikëbëtan a kuëënkinma faraónën, aín unikama kakëxa: Kamina Israel bëbu tuá bakënia bakami niti ꞌain, nianan kamina xanu tuakamaishi kania ꞌuakamë ꞌëotanun ënti ꞌain.