Esdras 7 - Kashibo-Kakataibo Biblia

Esdras ꞌimainun abëtan ñu mëëkë Israel unikama Jerusalénnu bëba ñuikë bana

¹ Bëtsi ñu kamapain Artajerjes Persianu ꞌikë ꞌapu ꞌinúkë ꞌain ka achúshi uni Esdras kakë anu ꞌiakëxa, ax ka ënë unikaman rëbúnkin ꞌiakëxa, Zeraías. Azarías ꞌimainun Hilquías

² Salum, Sadoc, ꞌimainun Aítub,

³ Amarías, Asarías ꞌimainun Meraiot,

⁴ Zeraías, Uzí, Buquí,

⁵ Abisúa, Finees, Eleazar ꞌimainun ka ax pain sacerdote ꞌikë Aarón akama ꞌiakëxa.

⁶ Esdras ënëx ka achúshi sacerdote an upíira okin ꞌunánkin Diosan ꞌamikëxun Moisésnën kuënëomia bana ꞌunánkë ꞌiakëxa, usa ꞌikëa Diosan ꞌakinia ka ꞌapu Artajerjesnën kuëënkin an ñukákësabi okin kamabi ñu ꞌaxuankëxa. Ësokin pain ñu ꞌaia ꞌunánxua ꞌapun xukëx ka Babilonia menuax Esdras kuankëxa,

⁷ kuankëbë ka Jerusalénnu raíri Israel kama ꞌimainun sacerdote, levita unikama ꞌianan axa kantati ꞌunánkëkama ꞌianan an xëkuë bërúankëkama ꞌimainun anuxun Dios rabiti xubunuxun an ñu mëëkë unikama atúxribi rikiankëxa, ꞌapu Artajerjes mapai achúshi ꞌimainun rabë́ baritia ꞌapu ꞌain ka usai kuankëxa.

^8-9 Kuanx ka Esdras Diosanbia ꞌakinkëx Jerusalénnu bëbakëxa, mapai achúshi ꞌimainun rabë́ bari anun ꞌapu Artajerjes ax ꞌapu ꞌikë ꞌaia ꞌuxë ꞌirutabai nëtë ꞌirutabakë ꞌain, mapai achúshi ꞌuxëribi ꞌirukë ꞌain anun nëtë ꞌirutabakë a barinbi ka Babilonianuax Jerusalénnu ai chikíkankë ꞌiakëxa.

¹⁰ ꞌImainun ka Esdrasnën upíokin a tanti Diosan bana a ꞌunánkin, Israel unikaman ribia a tanti banakama ꞌimainun ax kikësabi ꞌiti bana ꞌunánun ꞌamiakëxa.

¹¹ Ënëx ka kirika kuënëo ꞌain kata itsia ꞌapu Artajerjesnën Esdras sacerdote an ñu ꞌunánkë a ꞌinan ꞌikën, an ka kamabi usaía Israel unikama ꞌiti bana ꞌunánkë ꞌiakëxa:

¹² Usa ꞌain ka Artajerjes uisa kara ax ꞌikë kixun kakin Esdras, sacerdote an ñu uni ꞌunánmitia, Dios naínu ꞌikë anbi a tanti aín banakama ꞌunánmikë a kuënëoxunkin kirikanu ësokin kakëxa.

¹³ ꞌËx kana ꞌapu ꞌaish kian kamabi Israel unikama ax ënë menu ꞌikëkama ax ka uix kara Jerusalénnu kuainsatania ax mibë kuanti ꞌikën, kuankëbë ka levita ꞌimainun sacerdotekamaxribi kuainsa tani kuanti ꞌikën.

¹⁴ ꞌËn kana ꞌën unikama mapai achúshi ꞌimainun rabë́ këñun Judá ꞌimainun Jerusalénnuxun kara Diosan bana min ꞌunánmikësabi okin ꞌanan a tanti bana kikësabiokin ꞌakania isi kuantanun mi këñun xuti ꞌain.

¹⁵ Usa ꞌain kana kuankimi uantanun ꞌën unikamabëtan kuri ꞌimainun manë uxua ꞌakë kuríki, ꞌëx ꞌapu ꞌixun Israel unibunën Dios ꞌinainshitisa tankë ënë Jerusalénnu ꞌikë anuxun a rabiti xubu anu nani kuanti ꞌain,

¹⁶ ꞌimainun kamina kamabi manë uxua ꞌakë kuríki ꞌimainun, uiti ꞌitsa kuri karamina Babilonianu ꞌikë ëmakamanuxun ꞌinánkëxun bianan, unikaman sacerdotekamaribi atux kuëënxun Jerusalénnu ꞌikë anuxun Dios rabiti xubunu buánti nankankë aribi uanti ꞌain.

¹⁷ Buánkë a kuríkinën kamina vaca bërí kanikë aín bënë, ꞌimainun carnero bërí kanikë akama anun maruti ꞌain, maruxun kamina akama këñun trigo a ꞌimainun uvas baka akama Jerusalénnu ꞌikë anuxun Dios rabiti anua ꞌikë anuxun xaronun ꞌinánti ꞌain.

¹⁸ ꞌAnan kamina kuri ꞌimainun kuríki tëxëkëbëtan anun añu kaina ꞌaisatani a mitsun abëtami ñu ꞌakë kamabëtan sinántankëxun Dios kuëënkësabi okin ꞌati ꞌain.

¹⁹ Usokin ꞌanan kamina ami xëanan ami piti tasunkama aribi an bërúankë unikama anuxun Dios rabiti xubu Jerusalénnu, ꞌikë anua nanun ꞌinánti ꞌain.

²⁰ Bëtsi ñukamaribi anuxun min Dios rabiti xubunu nanti kuëënkin, kamina anua ꞌapun ñukama bukunmikë anuashi biti ꞌain.

²¹ ꞌËx ꞌapu Artajerjes, ꞌixun kana kamabi an kuríki bërúankë Éufrates baka ꞌukëmanan ꞌikë a unikama ësokin kamin Esdras sacerdote asérabi an ñu ꞌunankëira uni ꞌimainun an Dios naínu ꞌikë ax kia bana ꞌunánkëira an ñukákëxun ka añu kara ñukatia a asérabi ꞌinánti ꞌikën,

²² ꞌinánkin ka tres mil trescientos ꞌëñë tupunkë kuríki këñun, veintidós mil litro trigo a këñun, dos mil doscientos litro vino, aribi ꞌinánan dos mil doscientos litro xëni a ꞌimainun tashi akamabi ñukákëxun ꞌinánkanti ꞌikën.

²³ ꞌInánan ka kamabi Dios naínu ꞌikë a anuxun rabiti xubunu nankan ñukama ñukákëxun aribi bënë́kinshi ꞌinánti ꞌikën, usokëbëtan ka Diosan anu ꞌëx ꞌapu ꞌikë me ënë ꞌatimonan ꞌën bakë bëchikëkamaribi tëmëramitima ꞌikën.

²⁴ ꞌImainun ka ënëribi ꞌunánkanti ꞌikën, uisaxunbi ka sacerdote, Levitas ꞌimainun axa kantati ꞌunánkë unikama ꞌianan, an xëkuë bërúankë a ꞌimainun an anuxun Dios rabiti xubunuxun ñu mëëkë unikama atúxribi ka kupíonun kixun ꞌapun kakë ꞌitima ꞌikën.

²⁵ Esdras min kamina min Diosan ꞌunánmikëxun aín bana ꞌunánkësabi okin anëti ꞌain, uni manánkëxua an bana mëníoti kamina ꞌapukama an upíokin ñu ꞌakë, axa amia bari kuabúkë Éufrates kakë baka ꞌukëmanan ꞌikë ëma chukúma anu bukukë an Diosan bana kuënëo ꞌunánkë akama kamina anëti ꞌain; anëkëxun ka an a ꞌunánkëma unikama aribi ꞌunánmiti ꞌikën.

²⁶ Usakin ꞌunánmikëxunbia min Diosan bana kikësabiokin ꞌaisamatanan ꞌëx kikësabi okinribi ꞌaisamatankë a unikama kamina, anu ꞌimikinma bënë́kinshi anua chikíanan, sipuananbi bënë́kinshia basikinma kupíonun ꞌamiti ꞌain, ꞌamikin kamina uin kara kupíoisama tania a bënë́kinshi ꞌamiti ꞌain.

Esdrasnën Dios ñuká bana

²⁷ Usakin kirika uamikë a isi banatankëxun ka Esdrasnën Dios ñukákin kakëxa: Nukën ꞌIbu Dios nun rarakaman rabia mix kamina upíokin rabikë ꞌiti ꞌain, min kamina ꞌapu anuxun mi rabiti xubu amiribishi Jerusalénnu ꞌamitëkënun sinánmia,

²⁸ ꞌimainun ka ꞌëribia ꞌapun aín unikamabëtanbi nuibamainun uni aín kushibu ñu ꞌunánkë, an sipu bërúankë atúnribi nuibanun ꞌamiaxa, usakin ꞌakinkëx kuëënkin kana Israel unikaman kushibu Jerusalénnu ꞌëbë kuanuxa timë́kanun ꞌimia.