Esdras 6 - Kashibo-Kakataibo Biblia

¹ Usa ꞌain ka ꞌapu Daríonën anua Ciro kakë ꞌapun anuxun Diosan xubu ꞌatëkënti bana ꞌakin kuënëo kirika a Babilonianu ꞌikë ꞌapun xubunua barinun ꞌamiakëxa;

² ꞌamikëxun ka Ecbatana kakë ëma anua ꞌikë ꞌapun xubunua kirika achúshi ësokin kuënëoxun nan ꞌikë mërakëxa:

³ Anúan ax ꞌitabati ꞌapu ꞌikë baritia anun ka Ciron ësokian ënë bana kikësabiokin ꞌanun ꞌamiakëxa: Anuxun Dios rabiti xubu a ka amiribishi Jerusalénnu ꞌatëkënti ꞌikën. Usakin ꞌakin ka ami birukin ꞌati akama pain nantankëxun ꞌatënkënkin xubu a sënë́onxun ka anuxun ñuina xarokanti ꞌikën. A xubu ka veintisiete metro chaxkë́ ꞌianan veintisiete metro aín naxba ꞌiti ꞌikën, ꞌianan ka aín manámi trece metro ꞌimainun medio aín buarukë ꞌiti ꞌikën;

⁴ ꞌanan ka rabë́ ꞌimainun achúshi maxá chaiirabu nankë anu i bërí tukakë nanti ꞌikën. Akamax ka ꞌapun kupíokë ꞌiti ꞌikën.

⁵ Usokin ꞌanan ka anuxun Dios rabiti xubu Jerusalénnu ꞌikë anu nankë ꞌikëbia ꞌapu Nabucodonosornën Babilonianu buan manë uxua ꞌakë ꞌimainun kuri ꞌakë ñukama ax amiribishi Jerusalénnu uantankëxun anuxun Dios rabiti xubu anu uanxun uinu kara anu nanti ꞌakë ꞌikë anu nankë ꞌiti ꞌikën.

⁶ Usa ꞌain ka ꞌapu Daríonën an pain bëmikëxun Tatenai kakë ꞌapu an bana mëníokë Éufrates kakë baka ꞌukëmanan ꞌikë a ꞌimainun Setar-boznai akëñun abëtan ñu mëëkë a ëmanu ꞌikë ꞌapukamakëñunbi bana buámiakëxa: Jerusalén ëmanuax kamina mitsux rikianti ꞌain,

⁷ ꞌimainun kamina Judíos ꞌapukama aín unikamabëtan anuxun Dios rabiti xubu ꞌatëkënun ënkanti ꞌain kixun ka kakëxa.

⁸ ꞌËn kana ësokinmi an anuxun Dios rabiti xubu ꞌatëkënia ꞌakinun an ꞌakinkë unikama mitsu kain: Usa ꞌain kamina auküaxa bari urukë Éufrates kakë baka amia ꞌikë ëma anuxua ꞌapu kupíokë kuríki anunbi ꞌakinbima tëoxun rakania usa ꞌain, anun kupíoti nëtë ꞌikëbë ꞌikëbëtainshi basi okinma kupíoti ꞌain.

⁹ ꞌIanan ka kamabi nëtën ënkinma Jerusalénnu ꞌikë sacerdotekama atu, añu kara kuëënia a kamabi ꞌinánkin, vaca bënë bërí kanikë këñun, carnerokamaribi ꞌinánan; trigo, tashi ꞌianan, uvas baka bikë vino ꞌimainun, xëni akama Dios naínu ꞌikë a xaroxunun ꞌinánkanti ꞌikën,

¹⁰ ꞌinánkëxun ka ax kuëëntisabi okin akama Dios xaroxunkin ꞌë ñukáxuanan ꞌën bakë chikëkamaribi Dios ñukáxunti ꞌikën.

¹¹ ꞌImainun kana ësokinribia ꞌakánti bana ñuikin, uin kara ënë bana kikësabiokin ꞌaisama tania ax ka aín xubu ꞌakin purukë imaxu abi bixun xëtóxun anun tarókin ꞌakëx bamakë ꞌiti ꞌikën; usakin aín ꞌibu ꞌakë ꞌain ka aín xubu aribi rurukubutanun raskapakë ꞌiti ꞌikën.

¹² ¡ꞌImainun ka Diosan Jerusalénnu ꞌikë unikama atunbia aín anë rabinun kaisa anbi uinu ꞌikë ꞌapun kara axa kikë bana a kuaisamatankin ax kikësabiokin ꞌaisama tankin anuxun Dios rabiti xubu Jerusalénnu ꞌaiabi ꞌatima okin ëmitisa tania ax ꞌatimokë ꞌiti ꞌikën! ꞌËx ꞌapu Darío ꞌaish kikë bana ax ka anuxun ꞌën pëukë anuxunbi upíira okin unin tankë ꞌiti ꞌikën.

Amuxun Dios rabiti xubu ꞌatëkënkin taëoxun sënë́onkin ꞌa ñuikë bana

¹³ Usa ꞌain ka Tatenai an bana mëníokë ꞌapu axa Éufrates kakë baka au ꞌikë ëma chukúma anu ꞌikë a ꞌimainun, Setar-boznai a ꞌimainun raíri abëa ꞌikë kamabëtan ꞌapu Daríonën bana nankësabi okin bërúanxun ꞌakëxa.

¹⁴ ꞌAkin ka Judíos unibu an ñu mëia ꞌakinkë akaman anuxun Dios rabiti xubu a ënkinma an Dios kikë bana uni ñuixunkë Hageo ꞌimainun Zacarías Idó kakë uni aín bakë bëchikënën kakësabiokin ꞌakëxa. Usakin ꞌaxun ka Israel unibunën Diosan kásabiokin ꞌakin, ꞌapu Ciro, Darío ꞌimainun Artajerjes Persianu ꞌikë ꞌapu ax kikësabiokin ꞌakëxa.

¹⁵ Usakin ꞌaxun ka anuxun Dios rabiti xubu këñuakëxa, ꞌapu Darío Persianu ꞌikë axa mapai achúshi ꞌimainun achúshi baritia ꞌapu ꞌikë anúan febrero ꞌuxë këñuti marzo ꞌuxë ꞌirukë axa rabë́ ꞌimainun achúshi nëtë ꞌikë anun sënëonkëxa.

¹⁶ Usakin ꞌaxun këñukin sënë́on ka Israel kama ꞌimainun sacerdotekama ꞌianan levita unibu ꞌimainun raíri unikama axa Babilonianu buánkan ꞌaish utëkënkë akaman anuxun Dios rabiti xubu sënë́onkë ꞌain, ꞌitsaira kuëënkin anuxun nëtë inúkin fiesta ꞌakankëxa.

¹⁷ ꞌAkin ka a nëtën Dios xaroxunkin cien vaca bërí kanikë, ꞌianan doscientos carnero ꞌimainun cuatrocientos carnero bërí kanikë ꞌianan doce chibu, a kamaribi Israel unikama ñakátibi a, achúshi achúshi, ꞌaxuanan kamabi Israel unikaman ꞌucha kupín ꞌakëxa.

¹⁸ Usokin ꞌatankëxun ka sacerdotekamaribi anúan ꞌati nëtë ꞌikëbëtan an ꞌati anëanan, levitakamaribi anuxun Dios rabiti xubu Jerusalénnu ꞌikë anua ꞌinun Moisésnën kuënëo bana kikësabiokin ꞌakëxa.

¹⁹ Usokin ꞌakin ka axa buánkan ꞌaish rikuatsintëkënkë unikama atun Pascua nëtëribi inúkin ꞌuxë ꞌirutabakë axa catorce nëtë ꞌikë anun ꞌakankëxa.

²⁰ Usa ꞌain ka sacerdotekama ꞌimainun levita unikama atux pain atun ñu ꞌatima ꞌakë mëníokakëxa, usai ꞌika kamaxi upiti usai ꞌiti bana kikësabi oí atun ñu ꞌatima ꞌakë mëníokankë ꞌiakëxa. Usai ꞌixun ka Pascua nëtë inúkin abë sacerdotekamabia Babilonia menu uan ꞌimainunbia atuxi kuan ꞌaish utëkënkë akaman kamáxbi timë́xun ꞌakankëxa.

²¹ ꞌImainun ka kamabi Israel unikaman axa Babilonianu buánkankë ꞌaínbi utëkënkë akama ꞌimainun an bëtsi bëtsi menu ꞌikë unikaman ꞌakë ñukama ꞌakinbi ënkë atúnribi Pascua nëtë inúkin ꞌakë, piti aribi pikankëxa, usakin ꞌai atubëbi timëkamë ꞌëoxun ka anuxun Israel unikaman atun Dios rabikankëxa.

²² Usakin rabikin ka mapai achúshi ꞌimainun rabë́ nëtë fiesta ꞌai kuëënkin anun chamiti ñukëñunma ꞌakë pán pikankëxa, usakin ꞌai ka uinsaranbia ꞌikësamairai kuëënkin Diosanbia sinánmikëxua Persianu ꞌikë ꞌapun atu nuibakin ꞌakinkëxua anuxun Dios rabiti xubu ꞌatëkënxun sënë́on ka usai ꞌikankëxa.