Esdras 3 - Kashibo-Kakataibo Biblia

Dios anuxun rabikin ñuina xaroti ꞌatëkëan ñuikë bana

¹ Anua mapai achúshi ꞌimainun rabë́ ꞌuxë ꞌikë anun ka kamabi Israel unikama Jerusalén ëmanu timëkamë ꞌëokëxa.

² Usa ꞌain ka Josué kakë uni Josadac aín bakë bëchikë ꞌimainun abëtan ñu mëëkë sacerdotekaman, Zorobabel Salatielnën bakë bëchikë ꞌimainun aín aintsikama timë́xun anuxun Israel kaman Dios rabikin ñuina xaroti ꞌakë ꞌikëbi rurupakin masókan, ꞌikëbi amiribishi a tanti bana Moisés Diosan uni ax kiásabiokin ꞌatëkëankëxa.

³ Usokin ka anuxun ñuina xaroti a upí ꞌitánun, a menu ꞌikë unikamami rakuë́kin ꞌakëxa, ꞌatankëxun ka anuxun pëkarakëbëtan ꞌapunkin ñantabukëbëtan anuxun Dios achúshi achúshi nëtë ñuina xaroxuankëxa.

⁴ ꞌAnan ka anun ꞌuta ꞌati fiesta nëtë aribi rabi timë́xun anun ñuina xaroti nëtë ꞌikëbëtan nëtë́tibi a tanti bana kuënëo ax kikësabiokin atun ꞌakësabi okin, ñuina xarokin, uiti ꞌitsa achúshi nëtën ꞌati kara atibi ꞌakëxa,

⁵ usakin ꞌakin ka ꞌuxë ió ꞌain fiesta nëtë inúti aribi usaribi okin ꞌakëxa ꞌakin ka kamabi nëtë́n Dios ñuina xaroxuankëxa, usokin ꞌamainun ka uin kara kuëënia anribi anbi kuëënxun Dios ꞌaxuankëxa.

⁶ Anuan mapai achúshi ꞌimainun rabë́ ꞌuxë ꞌirutabakë nëtë anun ka anuxun Dios rabiti xubu ꞌatëkënkin pëukëma ꞌaínbi ka Israel kaman Dios ñuina atun ꞌucha kupí xaroxuankëxa.

⁷ Usokin ꞌakin sënë́ontankëxun ka an xubuati ꞌunánkë unikama ꞌimainun carpinterokama kuríki ꞌinánkëxa, ꞌinánan ka atun piti ꞌimainun xëati, xëni akamaribi Tiro ꞌimainun Sidónu ꞌikë unikama Líbano menuxunbia parúmpapa bakan uanxuan kunxan tukapakë Jopenubi uanun ꞌapu Ciro kakë Persia menu ꞌikë an kirika ꞌaxun ꞌinánkëxa, ꞌinánkëxun ka usabi okin ꞌakëxa.

Dios anuxun rabiti xubu masókin rurupa ꞌikëbi ꞌatëkëan ñuikë bana

⁸ Anuxun Dios rabiti xubu ꞌatëkënkin ka Zorobabel Salatielnën bakë bëchikë ꞌimainun Josadacnën bakë bëchikë Josué an abëtan ñu mëëkë sacerdotekama, ꞌimainun Levitas ꞌianan unikama axa Jerusalénnu rikuatsinkëtëkënkë akamabëtan anuxun Dios rabiti xubu ꞌatëkënkin taëokëxa, anua Jerusalénnu atux rikuatsintëkënkë rabë́ bari ꞌitankëx rabë́ ꞌuxë ꞌirukë anun ka levita unikama veinte baritiañukama ashia atun ꞌaminun anëakëxa.

⁹ Usa ꞌain ka Josué ꞌimainun aín bakë bëchikë ꞌianan aín xukë́n akamax achúshisa ꞌinun timë́ti Cadmiel ꞌimainun aín bakë bëchikë Judánën rëbúnki ꞌimainun Henadad aín rëbúnkinën bakë bëchikë ꞌimainun aín xukë́n akamax ka Levitas ꞌiakëxa, usa ꞌixun ka anuxun Dios rabiti xubu ꞌatëkënia atun ꞌamiakëxa.

¹⁰ An xubu ꞌati ꞌunánkë unikaman ami birukian anuxun Dios rabiti xubu ꞌati aín tapunkama a ꞌakëbë ka sacerdote unikama, bërámashi atun chupa pañukë ꞌaish atun pakon banonux sëtë́rakëkë ꞌiakëxa. Usai ꞌimainun ka Levitas Asafnën rëbúnkikama atúnribi manë parókin ꞌakë a Israel unikama ꞌapu David ax kiásabiokin ꞌanux sëtë́rakëkankëxa.

¹¹ Usa ꞌain ka raírinëxa kuëëni kantamainun, rairinëxribi ësai Diosan kuanun kikankëxa: Usaia kuëëni kamabi uni kantamainun ka raírinëxribi ꞌitsaira kuëëni nëtë́misamai sharákë ax kantakë abë mëskuti ꞌuranxubi kuakë ꞌiakëxa. Usakin anuxun Dios rabiti xubu ꞌakin pëukëbë ka ꞌitsaira kuëëni usai ꞌikankëxa.

¹² Usai ꞌikëbë ka sacerdotekama ꞌimainun levitakamabë achúshi achúshi ñakánu ꞌikë uni apanbu an anuxun Dios rabiti xubu bërámabi ꞌatabakin ꞌaia isa akamaxribi anuxun Dios rabiti xubu ꞌatëkënia isi munuma nëtë́misamai kuënkëni ꞌinkankëxa. Usai ꞌia isi ka rairinëxribi kuëëni munuma kuëënkëni sharákankëxa.

¹³ Usaia ꞌikë a ka uínbi munuma nëtë́misamai kuëëni sharámainun rairinëx ini munuma sharákë axribi uisai ꞌi kara atux usaira ꞌia kixun ꞌunántisama ꞌitánun ꞌikë ënuxunmabi kuakëx ꞌiakëxa.