Esdras 1 - Kashibo-Kakataibo Biblia

ꞌApu Ciro Judíos unibu ka aín menubi kuantëkënti ꞌikë kiá ñuikë bana

¹ Anúan Ciro kakë uni Persia menu ꞌikë ax ꞌapu ꞌikin pëutabakë anun ka usai ꞌitia Dios kia bana ꞌikëa Jeremías kiásabi oia a bana sënë́nkëbëtan, Ciro kakë an Diosanbi sinánmikëxun, banan kananbi kirikanu kuënëoxun ënë bana buámiakëxa:

² Persia menu ꞌikë ꞌapu Ciro ax ësai kiakëxa: Nukën ꞌIbu Dios naínu ꞌikë, an ka ꞌapu ꞌixun kamabi menu ꞌikë unikama ꞌakinnun ꞌë ꞌimiaxa, ꞌimainun ka ꞌën achúshi anuxun a rabiti xubu Jerusalén Judá menua ꞌikë anu ꞌaminun ꞌë sinánmiaxa.

³ Usa ꞌain kamina uikamax kara Diosan uni ꞌikë akaman an ꞌakinmainun, kuantakëxun Jerusalén Judá menua ꞌikë anu, anuxun Israel kaman Dios rabiti xubu ꞌai kuanti ꞌain, ax ka Jerusalénnu ꞌikë unikaman Dios ꞌiti ꞌikën.

⁴ Usa ꞌain ka bëtsi menuax ubá ꞌaish atubë tsókë akaman uin kara ꞌakinsa tania an anua ꞌikë anuxunbi kuania atu ꞌakinkin, manë uxua, kuri, atun ñukama, vaca ꞌimainun aín ñu akama ꞌinánan, anuxun Dios rabiti xubu Jerusalénnu ꞌikë anua nanti ñukamararibi ꞌinánkanti ꞌikën.

Israel unikama amiribishi Jerusalén ëmanu kuantëkëan ñuikë bana

⁵ Usa ꞌain ka Judá ꞌimainun Benjamínën rëbúnkinën unikaman kushibu akama ꞌimainun sacerdotekama ꞌianan, levita unikama Diosanbia sinánmikëxua ꞌapun bana ñuikë kuati Jerusalénnua ꞌikë anuxun Nukën ꞌIbu rabiti xubu birukin ꞌatëkëni kuanux kuëëni mëníokakankëxa.

⁶ Mëníokatia ka kamabi a ꞌurama ꞌikë unikaman kuania atu ꞌakinkin manë uxua, kuri atun ñukama, vaca ꞌimainun atun ñu kupíirakëkama a ꞌinánan, bëtsi bëtsi ñu uin kara ꞌinántisa tania an aín ñu ꞌinánkëxa.

⁷ Usakian unikaman ꞌamainun ka ꞌapu Ciro an anuxun Dios rabiti xubu Jerusalénnu ꞌikë anua Nabucodonosornën bibiankin buánxun anuxun atun dioskama rabiti xubunu nan ñukama a ꞌinánun ꞌinámiakëxa.

⁸ ꞌInánmikin ka Persia menu ꞌikë ꞌapu Ciro an, kuríki bërúankë. Mitrídates kakë uni an uiti ꞌitsa kara tupuanxa a Sesbasar kakë Judánu ꞌikë ꞌapu a ꞌinánun ꞌinámiakëxa.

⁹ Ñukama tupunkë ax ka ënë ñukama ꞌiakëxa: treinta manë xampa kuribi ꞌa, mil xampa manë uxua ꞌakë, veintinueve manë paná kuënukë,

¹⁰ treinta xampa chukúmara kuribia ꞌakë, cuatrocientas diez xampa chamaratsubu manë uxuanën upíbu ꞌitánun rokin ꞌakë, a ꞌimainun mil bëtsi ñukama aribi ꞌiakëxa.

¹¹ Usakian timë́xun kuri ꞌimainun manë uxua kuríki ꞌakë akama ꞌinánkëx ka cinco mil cuatrocientos ñu ꞌiakëxa. Usakin ꞌinánkëxun ka Sesbasar kakë an Babilonianuax Jerusalénnu kuantëkënkin raíri anuaxa kuan unikamabëtan buánkëxa.