Efesios 6 - Kashibo-Kakataibo Biblia

¹ Papañu titañu tuácama, ësaquin cana mitsu cain, min papan bana, min titan bana cuaquin camina an mi cacësabi oquin ꞌati ꞌain, Nucën ꞌIbu Jesucristo cuëëncësabi oquin. Mitsux usai ꞌiti ca asábi ꞌicën.

^2-3 Ax quicësabi oquin ꞌatia Nucën Papa Diosan ꞌinan bana achúshinëx ca ësai quia: “Chuámarua ꞌaish xënibuti ënë menu tsónuxun camina min papan bana, min titan bana upí oquin cuaquin, an mi cacësabi oquin ꞌati ꞌain”. Bëtsi bëtsi bana ax quicësabi oquin ꞌati ꞌaínbi ca ënë banaxëshi ësai quia: Usai ꞌi ca uni chuámarua ꞌaish xënibuti ënë menu tsóti ꞌicën.

⁴ Bëchicëñu unicama, mitsuribi cana cain, min bëchicë camina nishmitima ꞌain. Min bana parë́quinma min cacësabi oquin ꞌanun camina canioti ꞌain. Usoquin canioquin camina a ñuixunquin Nucën ꞌIbu Jesucristo cuëëncësabi oquian ꞌanun ꞌunánmiti ꞌain.

⁵ An uni itsi ñu mëëxuncë unicama, mitsun camina upí oquin sinánquin an mi ñu mëëmicë unia cuëëntanun paránquinma an cacësabi oquin ꞌati ꞌain, Cristoribimi ꞌaxuncësa ꞌitánun.

⁶ An mi iscëxuinshi camina axa cuëëntanun quixun uni ñu mëëxuntima ꞌain. Usoquin ꞌaxunquinma camina an iscëxunmabi Cristonën uni ꞌixun chiquíshquinma cuëënquin upí oquin uni ñu mëëxunti ꞌain, Nucën Papa Dios cuëëncësabi oquin.

⁷ —Ënë ñu cana unishi ꞌaxunima, Nucën ꞌIbu Jesucristoribi cana ꞌaxuni —quixun upí oquin sinánquin camina an mi ñu mëëmicë uni ñu mëëxunti ꞌain.

⁸ Camina ꞌunanin, an upí oquin ñu ꞌacë uni a ca Nucën ꞌIbu Jesucristonën, uisa ñu upí cara ꞌaxa, usaribi oquin cupíoti ꞌicën, an uni ñu mëëxuncë uni ꞌimainun an uni ñu mëëmicë uniribi.

⁹ An uni itsi ñu mëëmicë unicama, mitsun camina an mi upí oquin ñu ꞌaxuncësaribi oquin uni upí sinánñu ꞌixun ami nishquin ñu caquínma ñu mëëmiti ꞌain. Camina ꞌunanin, Nucën ꞌIbu Jesucristo aín nëtënu ꞌicë, ax ca mitsun ꞌIbu ꞌianan ami ñu mëëmicë unicaman ꞌIburibi ꞌicën. An ca aín unicama bëtsibë sënën isia.

Ñunshin ꞌatimanëan ñu ꞌatima ꞌanun sinánmicëxbia uni Cristomi catamëti bana

¹⁰ ꞌËn xucë́antu, ënë banaribi cana mitsu ñuixunin. Ax mibë ꞌixúan mi sinánmicësabi oquin ꞌai camina Nucën ꞌIbu Jesucristomi asérabi catamëti ꞌain. Usaími ꞌia ca aín cushínbi mitsu cushioti ꞌicën.

¹¹ Ñunshin ꞌatimanëan paránquin mitsu ñu ꞌatima ꞌamitisa tancëxbi camina an mitsu ꞌibuati rabanan uisoquinra cara an mitsu cushioti ꞌicë, usaquin Nucën Papa Diosan cushiocë ꞌinux upí oquin sinani ami catamëti ꞌain.

¹² Nux cananuna suntárunëxa ꞌacanancësaribiti ꞌin. Usai ꞌibi cananuna unibë ꞌacananiman. Nun nuitu mëúishi cananuna ꞌacanáncësa ꞌain, ñunshin ꞌatimanën nu ꞌibuati rabanan. Aín ꞌapubë cushiquin ca ñunshin ꞌatimacaman nu ñu ꞌatima ꞌanun nu ꞌamitisa tania. Atun an ënë menuxun ñu atima ꞌacë unicama ꞌibuacë ꞌixun ca nuribi ñu ꞌatima ꞌamitisa tania.

¹³ Ñu ꞌatima ꞌanun an sinánmicëxunbi ꞌaquinma ñunshin ꞌatima abáminux cushi ꞌiti cupí camina manutima, uisoquinra cara an mitsu cushioti ꞌicë usaquian Nucën Papa Diosan cushiocë ꞌinux upí oquin sinani ami catamëti ꞌain. Usai cushicë ꞌixúnmi abámicëxuan ñunshin ꞌatimanën mitsu tantëcëncëxbi usabi Nucën Papa Diosmi catamëcë ꞌaish camina uisaíbi ꞌitima ꞌain.

¹⁴ Ñunshin ꞌatima nun nuitu mëúnu abë ꞌacanancë an tanquinbi uisabi otima cupí camina Nucën Papa Diosmi catamëcë ꞌaish Romanu ꞌicë suntárunëan amia catamëti aín manë chupa pañucësa ꞌiti ꞌain. Aín manë chupa pañuquin ca anúan tsitëcërëquiti anun tsitëcërëquianan, aín shican bëpánti manë chupánribi shimápucüanan, aín taxacaribi tañuanan, aín manë mañuti mañuanan, aín manë pará tuíanan aín manë xëtocëribi tuinia. Suntáru aín manë chupami catamëcë ꞌaínbi camina mitsúxribi mitsun nuitu mëu upiti ꞌacananux manë chupa ami catamëti pañucësa ꞌiti ꞌain. Uni paráncëma ꞌianan cëmëima asérabi banan banacë ꞌaish camina suntáru aín manë chupa pañuax upiti tsitëcërëquicësa ꞌiti ꞌain. Ñu ꞌatima ꞌati ëncë ꞌixun upí ñuishi ꞌati sináncë ꞌaish camina suntáru aín shican bëpánti manë chupan shimapucucësa ꞌiti ꞌain.

¹⁵ —Cristo cupí nun ꞌucha tërë́ncë ꞌaish cananuna Nucën Papa Diosbë upí ꞌai —quixun uni ñuixunux mëníocacë ꞌaish camina suntárunëan aín taxaca tañucësa ꞌiti ꞌain.

¹⁶ Ñunshin ꞌatimanëan uisashi oquin cara tanquinbi mitsu uisabi otima cupí camina Jesucristomi sinani, an ca ꞌë bërúanquin ꞌë ꞌaquinia quixun ꞌunani, ami catamëti ꞌain. Usa ꞌaish camina suntárunëan ꞌacánanquin anua pia atsínti rabanan, aín manë pará ami catamëti tuíncësaribi ꞌiti ꞌain.

¹⁷ Mitsun camina asérabi ꞌunánti ꞌain, Jesucristo cupí mitsun ꞌuchacama tërë́ncë ꞌaish camina Nucën Papa Diosan iscëx upí ꞌaish ainan ꞌai quixun. Usaquin ꞌunani camina suntáru manë mañutinën mapucësa ꞌiti ꞌain. Aín Bëru Ñunshin Upitan ꞌunánmicëxun Nucën Papa Diosan bana cuënëo upí oquin ꞌunani camina ñunshin ꞌatimami racuë́tima ꞌain. A banami catamëti camina suntárunëan aín manë xëtocë ami catamëquin tuíncësa ꞌiti ꞌain.

¹⁸ Usai ꞌiquin camina aín Bëru Ñunshin Upitan sinánmicësabi oquin añu caramina ꞌai a ñu ꞌai Nucën Papa Diosbë bananan an mitsu ꞌaquinun ñucáti ꞌain. Usai abë bananux camina atsanima ami manúaxma ꞌianan axa Jesucristomi catamëcë unicamaribi Nucën Papa Dios ñucáxunti ꞌain.

¹⁹ Ñucáxuanan camina aín bana unicama racuë́quinma ñuixunuan uisoquin carana ñuixunti ꞌai quixun ꞌë sinánminun Nucën Papa Dios ꞌë ñucáxunti ꞌain, Cristo ñui quicë bana a bëráma unin upí oquin ꞌunánma ꞌicëbi bërí unin ꞌunánun.

²⁰ Cristo ñuiquin bana ñuixunuan Nucën Papa Diosan ꞌimicë ꞌaish cana a ñuiquin uni bana ñuixuncë cupí sipuacë ꞌain. Sipuacë ꞌixunbi an ꞌë cacësabi oquin racuë́quinma a bana upí oquin ñuixunun camina ꞌë Nucën Papa Dios ñucáxunti ꞌain.

Bërúanx ꞌinúan Pablonën Efesonu ꞌicë unicama ca

²¹ Mitsúnmi uisai carana ꞌëx ꞌi quixun ꞌunánun ca Tíquiconën minu cuanxun mitsu ñuixunti ꞌicën. Axribi ainan ꞌaish nun nuibacë xucën ꞌixun ca Nucën ꞌIbu Jesucristo ñuiquin upí oquin uni bana ñuixunun ꞌë ꞌaquianxa.

²² An uisai caranuna ꞌi quixun nu ñuia cuatími masá nuitutíma cuëënun quixun cana a mitsunu cuanun xutin.

²³ Nucën Papa Diosbëtan Nucën ꞌIbu Jesucristonën ꞌimicë́xmi mitsux ꞌëx ꞌicësaribiti ami catamëcë ꞌaish ami sinánan bëtsibë bëtsibë nuibanani chuámarua ꞌaish upitax bucuti cana cuëënin.

²⁴ Mitsúxmi a manutëcëntimoi Nucën ꞌIbu Jesucristomi catamëcë ꞌicëa, Nucën Papa Diosan nuibaquin mitsu ꞌaquinti cana cuëënin. Ashi, Pablo.