Efesios 5 - Kashibo-Kakataibo Biblia

Uisai cara Nucën Papa Diosan unicama ꞌiti ꞌicë quicë bana

¹ Mitsux aín bëchicë ꞌicë an nuibacë ꞌaish camina usai ꞌiti sinani Nucën Papa Dios ꞌicësaribiti ꞌiti ꞌain.

² Nucën Papa Dios cuëëncësabi oquin judíos unin aín ꞌucha cupí rëcë́xa carnero ꞌiásaribiti ca bamatsianxmabi Cristo nu nuibati nun ꞌucha cupí bamacëxa, ami catamëtíshinu ië́nun. Cristonëan nu usoquin nuibacë ꞌain camina mitsúxribi usaribiti bëtsibë bëtsibë nuibananti ꞌain.

³ Nucën Papa Diosnan ꞌixun camina mitsun uisa ñux cara ꞌatima ꞌicë a ꞌati sinántima ꞌain. Mitsun xanuma ꞌaínbi xanubë ꞌiti, xanúxmabi uni itsibë ꞌiti, minanmabi uni itsin xanu ꞌimainun ñu cuëënti, usa ñu ꞌati sinanima ꞌianan camina usa ñu ñui banatima ꞌain.

⁴ Anun tupuananti ꞌatima banan camina banatima ꞌain, uni ꞌimainun xanu rabínmi camina ꞌusánani banatima ꞌain, cuaíntapun ꞌaish camina ꞌatimati banatima ꞌain. Usai ꞌiquinma camina a rabiquin Nucën Papa Dios —asábi ca —quixun cati ꞌain.

⁵ Camina asérabi ꞌunánti ꞌain, axa aín xanuma ꞌaínbi xanubë ꞌicë uni, axa xanúxmabi unibë ꞌicë uni, an ainanma uni itsin ñu cuëëncë uni, a unicamax ca Nucën Papa Diosmabi, unínbi ꞌacë ñuishi rabicësa ꞌicën. Usa unicamax ca Nucën Papa Diosan nëtë anua Cristoribi ꞌicë anu abë ꞌitima ꞌicën.

⁶ Uni raírinëan —ñu ꞌatima ꞌacë ꞌaíshbi camina Nucën Papa Diosan nëtënu ꞌiti ꞌai —quixun cacëxunbi camina mitsun, —cëmëi ca quia —quixun sinánti ꞌain. An aín bana cuaisama tanquin usa ñu ꞌacë unicama a ca ami nishquin Nucën Papa Diosan castícanti ꞌicën.

⁷ Usaribi ꞌitin rabanan camina an usa ñu ꞌacë unicamabë ꞌitima ꞌain.

⁸ Bëráma Nucën Papa Diosan bana ꞌunáncëma ꞌaish unían bëánquibucënuxun ñu ꞌatima ꞌacësa ꞌiá ꞌixúnbi camina bërí Nucën ꞌIbu Jesucristonan ꞌixun ax cuëëncësabi oquin ñu upíshi ꞌain. Usa ꞌaish camina bërí xabánu nicësa ꞌiti ꞌain.

⁹ Nucën ꞌIbu Jesucristonan ꞌaish ca uni upí sinánñu ꞌianan asérabi banáinshi bananan ñu upíshi ꞌaia. Usaribi camina mitsux ꞌiti ꞌain.

¹⁰ Añumi ꞌati cara Nucën ꞌIbu Jesucristo cuëënia a camina upí oquinra ꞌunánti sinánti ꞌain.

¹¹ Ax bëánquibucënu nicësa uni an ca axa cuëëncësa oquinshi ñu ꞌaquin, Nucën Papa Diosmi sinánquinma uni itsiribi ami sinánun ꞌaquinti sinanima. Usaía ax ꞌicë unicama camina atun ꞌacësaribi oquin ꞌaquinma, —usaquin ñu ꞌati ca ꞌaisama ꞌicë —quixun upí oquin ꞌunánmiquin ꞌësëti ꞌain.

¹² Usa ñua a unicaman unë́xun ꞌacë, ax ca a cuati rabínti ꞌaish ñuitisama ꞌicën.

¹³ Usa ñu ꞌati ca ꞌaisama ꞌicë quixun unë́quinma cacëxun ca camabi unin —asérabi ca usaquin ꞌati ꞌaisama ꞌicë —quixun ꞌunánti ꞌicën.

¹⁴ Usa ꞌain ca ësai Nucën Papa Diosan bana cuënëo quia: ꞌUxcësa ꞌaíshbi bësucësa ꞌinux ca Cristomi catamët. Ainanma ꞌaish min ꞌucha cupí bamacësa ꞌaíshbi ca Cristomi catamëti ië́t. Usa ꞌicë ca min ñu ꞌaisama ꞌacëcama ëmianan mix asaribi upí ꞌinun ꞌimiti ꞌicën.

¹⁵ Sinánñuma unisa ꞌima an Nucën Papa Diosan bana ꞌunáncë unisa ꞌixun camina ax quicësabi oquin ñu upíshi ꞌati ꞌain.

¹⁶ Ax cuëëncësa oquinshia unin ñu ꞌatima ꞌacëbëtanbi camina mitsun ñancáishi nëtë inúmi ꞌiquinma Jesucristomi sináncë ꞌixun, ax cuëëncësabi oquinshi ꞌati ꞌain.

¹⁷ Sinánñuma camina ꞌitima ꞌain. Uisa ñumi ꞌati cara Nucën ꞌIbu Jesucristo cuëënia, a camina ꞌunánti ꞌain.

¹⁸ Mitsux camina paë́ntima ꞌain. Paë́ncë uni ax ca uisai cara banatisa tania usai bananan, añu cara ꞌaisa tania a ꞌaia. Usai ꞌima camina Nucën Papa Diosan Bëru Ñunshin Upitan mitsubë ꞌixun anbi upí oquin cushiocë ꞌaish upiti bananan upí ñuishi ꞌati ꞌain.

¹⁹ Usa ꞌaish camina mitsun nuitu mëu Nucën ꞌIbu Jesucristo rabianan Nucën Papa Diosan bana sinani, bëtsibë bëtsibë bananan cantati ꞌain.

²⁰ Nucën ꞌIbu Jesucristonan ꞌixun camina usoquian ꞌaquianan, an nu ꞌimicëcama, a sinánquin, Nucën Papa Dios —asábi ca —quixun caquin rabiti ꞌain.

²¹ Nucën Papa Diosnan ꞌaish camina bëtsibë nishananima an cacëxun aín bana cuati, uni raíribë nuibananti ꞌain.

Ësai ca uni aín xanubë nuibananti ꞌicë quicë bana

²² Xanun aín bënënan ꞌixun aín bana cuati ꞌicën, Nucën ꞌIbu Jesucristo cuëëncësabi oquin.

²³ Cristo ax ca an aín unicama aín ꞌucha tërë́nquin Nucën Papa Diosnan ꞌinun ië́micë a ꞌicën. An ië́micë ꞌixun ca aín unicaman aín bana cuatia.

²⁴ Aín unicaman Cristo cuëëncësabi oquin ñu ꞌacësaribi oquin ca xanun aín bana cuaquin aín bënë cuëëncësabi oquin ꞌati ꞌicën.

²⁵ Ainan ꞌinun unicama nuibati ca Cristo bamatsianxmabi bamacëxa. Usoquin ca an aín unicama nuibatia. Usaribi oquin ca bëbuxun xanuñu ꞌixun aín xanu nuibati ꞌicën.

²⁶ Aín unicama aín nuitu upí ꞌimiquin ca Cristonën ax aín sinan ꞌaisama ꞌicëbi bëtsi oquin aín sinan upí ꞌimia. Usoquin ca ax quicësabi oquían ꞌanun aín bana ꞌunánmiquin aín unicama aín nuitu upí ꞌaísha chucacësa ꞌinun ꞌimia.

²⁷ Usoquin ꞌimitancëx utëcënxun ca aín unicama uisa ꞌuchañumabi ꞌianan Nucën Papa Diosan iscëx atun ñu ꞌatima ꞌacë ëni upí ꞌicë isti ꞌicën.

²⁸ Cristonëan aín unicama nuibaquin bërúancësaribi oquin ca unin aín xanu nuibati ꞌicën. Uinu ꞌicë uníxbi ca aín namimi nishima. Usaribi oquin ca unin ami nishquinma aín xanu nuibati ꞌicën. An aín xanu nuibaquin bërúancë uni ax ca axbi bërúancacësa ꞌicën.

²⁹ Uinu ꞌicë uníxbi ca aín namimi nishima. Aín nami upí ꞌaish cushi ꞌiti cupí ca chupa pañuanan ñu upí oquin pianan axbi aín nami bërúanracati upitax tsotia. Usaribi oquin ca Cristonën aín unicama bërúanquin upitax tsónun ꞌimia.

³⁰ Nux asérabi ainan ꞌaish ax cuëëncësabi oi ꞌianan ami catamëti abë achúshisa ꞌicë ca usoquin nu bërúanquin ꞌaquinia.

³¹ Nucën Papa Diosan bana cuënëo ca ësai quia: “Usa ꞌain ca unin aín papacëñun aín tita ënquin abë ënanantimoquin aín xanu bitsia. Usa ꞌaish ca a rabëtaxbi achúshisa ꞌia”.

³² A bana bëráma cuënëo ax ca unin cuaisamasa ꞌicën. Usa ꞌaíshbi ca ꞌën sináncëx a bana uníxa usai aín xanubë ꞌiti ñui quicë ꞌaíshbi Cristonëx ca usaribiti aín unicamabë achúshisa ꞌicë quicë ꞌicën.

³³ Usa ꞌaínbi cana mitsu cain, min namimi bërúancësaribi oquin camina mitsun xanuribi nuibaquin bërúanti ꞌain. Usaribi oquin ca xanúnribi ami sinánquin aín bënën bana cuati ꞌicën.