Efesios 4 - Kashibo-Kakataibo Biblia

II. ËSAI CA NUCËN PAPA DIOSAN UNI ꞌITI ꞌICË QUIXUN PABLONËN CA (4-6) Aín Bëru Ñunshin Upitan ꞌimicëxun Nucën Papa Diosan unicaman bëtsin sináncësaribi oquin sinánti bana

¹ Usa ꞌain cana ꞌëx ainan ꞌixun Nucën ꞌIbu Jesucristo ñuiquin bana ñuixuncë cupí sipuacë ꞌixun mitsu cain, an caíscë aín unicamaxa usai ꞌiti oquian Nucën Papa Diosan mënóisabi oi camina ax cuëëncësabi oíshi ꞌiti ꞌain.

² Cuamiananima camina upí sinánñu ꞌaish upiti banati ꞌain. Bënëtishi nishíma camina bëtsibë nuibanani ꞌaquiananti ꞌain.

³ Nucën Papa Diosan Bëru Ñunshin Upitan ꞌaquincëx camina bëtsin sináncësaribi oquin sinani achúshi sinánsa ꞌaish, ëníma bëtsibë bëtsibë nuibananti ꞌain. Usai ꞌiti sinani camina usaíbi ꞌiti ꞌain.

⁴ Jesucristonan ꞌaish ca aín unicama achúshisaishi ꞌicën. An atu ꞌaquincë Nucën Papa Diosan Bëru Ñunshin Upí ax ca achúshishi ꞌicën. Usa áin ca bëtsin ꞌunáncësaribi oquin aín unicaman ꞌunania, Nucën Papa Diosan ca aín nëtënu abë ꞌinun nu caísacëxa quixun.

⁵ Nucën ꞌIbu Jesucristo axëshi ca aín unicaman ꞌIbu ꞌicën. Ax ca achúshi ꞌicën, amishi catamëti cananuna camáxbi nun ꞌucha tërë́ncë ꞌaish ainan ꞌain. Jesucristomishi catamëcë cupí cananuna nashimicë ꞌain.

⁶ Nucën Papa Dios axëshi ca aín unicaman Dios ꞌianan aín unicaman ꞌIbu ꞌicën. Usa ꞌixun ca ax cuëëncësabi oquian ñu ꞌanun aín unicama ꞌaquinia. Ax ca aín unicamabë ꞌicën.

⁷ Usa ꞌain ca axa ami catamëcë unicama bëtsin sináncësaribi oquin sináncë ꞌicëbi ax cuëëncësa oquian bëtsi bëtsi ñu mëëti ꞌanun Cristonën nu ꞌimiaxa.

⁸ Usai ca ꞌiti ꞌicë quiax ca Nucën Papa Diosan bana cuënëo ësai quia: Capitanëan abë ꞌacánanquin axa ami nishcë unicama ñusmoxun cuëënquin aín unicama an bicë ñu ꞌináncësabi oquin ca Cristonën bamax baísquitancëx naínu cuantëcëntancëxun cuëënquin aín unicama an ꞌati ñu ꞌinánquin bëtsi bëtsi ñu ꞌanun ꞌimiaxa.

⁹ ¿Usa ꞌain cara Cristo naínu cuantëcëan quicë bana uisai quicë ꞌic? Ax ca ësai quia, aín Papan nëtënuax ënë menu utancëx ca anu cuantëcëancëxa, quiax.

¹⁰ Axa ënë nëtënu uá, axbi ca anuxun aín unicama camabi aín cushi anúan aín cuëëncësa oquin ꞌati a ꞌinánux abë ꞌApu ꞌi aín Papan nëtënu cuantëcëancëxa.

¹¹ An ca ax cuëëncësa oquían bëtsi bëtsi ñu ꞌanun aín unicama ꞌimia. Bëtsi bëtsi unix ca aín bana ñuixunuan ꞌimicë ꞌicën. Raírinën ca Nucën Papa Dios quicë bana unicama ñuixunia. Raírinën ca axa Jesucristomi catamëcëma unicama amia catamënun upí oquin ꞌaquinia. Raírinën ca axa ami catamëcë unicama upiti Jesucristo cuëëncësabi oi ínun áquinia. Raírinën ca uisai cara Nucën Papa Diosan bana cuënëocama quia quixun uni ꞌunánmia.

¹² Axa ami catamëcë unicaman upí oquin sinánan ax cuëëncësabi oquin ñu upíshi ꞌati ꞌaquinun ca Cristonën aín unicama bëtsi bëtsi ñu ꞌanun ꞌimia.

¹³ Usai ꞌaquianani cananuna nishánanima nuibanani uisa ñu cara ꞌicëbëbi asérabi ami catamëti ꞌain. Ainan ꞌixun Nucën Papa Diosan Bëchicë a asérabi ꞌunani cananuna an ꞌimicëx aín sinánsaribi ꞌiti ꞌain. Usa ꞌaish cananuna camáxbi nun sinan upíira upí ꞌaish ax cuëëncësabi oi ꞌiti ꞌain.

¹⁴ Usai ꞌi cananuna bërámanu ꞌiásaribiti bërí ꞌitima ꞌain. Bërí cananuna tuáxunratsunën unín paráncëxun sinánbëquincësa ꞌaish unín bëtsi bëtsi bana ñuixunquin paráncëxun amanua amanua sinani usaribi ꞌitima ꞌain. An uni paráncë unicaman cëmëquin nu paránquin ñu ꞌatima ꞌanun quixun ꞌimicëx usai ꞌiá ꞌaíshbi cananuna bërí usai ꞌitëcëntima ꞌain.

¹⁵ Nuxnu ainan ꞌaían aín unicaman ꞌIbu, Cristo, ax nubë ꞌain cananuna nëtë camabi an nu ꞌunánmicësabi oquin ꞌai, aín sinánsaribi ꞌiti ꞌain. Usa ꞌaish cananuna bëtsibë bëtsibë nuibananquin, cëmëquin uni itsi paranima, Cristo cuëëncësabi oíshi ꞌiti ꞌain.

¹⁶ Nun namicama amanu amanu ꞌaish nun mëcën, nun taë, nun pëñan, nun bëru, acama upiti tacáshquiama ꞌaish cananuna unima ꞌitsían. Usa ꞌaíshbi ca uni camabi aín namia upiti unia ꞌain, asábi ꞌicën. Usaribiti ca axa Jesucristomi catamëcë unicamax amanu amanu sinánquinma Cristonën ꞌaquincëx camaxunbi bëtsin sináncësa oquin sináncë ꞌiti ꞌicën. Usai ꞌi ca Cristonëx cuëëncësabi oi bëtsibë bëtsibë nuibanani, an sináncësaribi oquin sinani Cristosaribi ꞌia.

Cristonan ꞌaísha uni bëtsi ꞌiti bana

¹⁷ Nucën ꞌIbu Jesucristonën ꞌë sinánmicësabi oquin cana mitsu cain, axa Nucën Papa Diosmi sináncëma uníxa ꞌicësaribiti ꞌiá ꞌaíshbi camina usai ꞌitëcëntima ꞌain. A unicamax ca Nucën Papa Dios cuëëncësa oíma atúnbia sináncësa oíshi ꞌi bucuia.

¹⁸ Usa ꞌaish ca bëánquibucë ꞌain mancasmatia uni bënë́cësaribi oi ꞌia. Cristo ñui quicë bana cuaisama tancë ꞌixun ca ainan ꞌiti ꞌunáncëma ꞌaish Nucën Papa Diosnan ꞌitsianxbi ainanma ꞌicën.

¹⁹ A ꞌai ñunshíncë ꞌixun ca rabínquinma uisa ñu ꞌatima cara ꞌaisa tania a ꞌaia. Aín xanuma ꞌaínbi xanubë ꞌiti, xanúxmabi uni itsibë ꞌiti, usa ñucama ꞌati cuëënia.

²⁰ Usaía atux ꞌicëbëtanbi ca Cristonën usaími ꞌinun mitsu sinánmicëma ꞌicën.

²¹ Mitsúxmi a rabi timë́cë ꞌain cara Jesús uisai mitsux ꞌiti cuëënia quixun ꞌunánmicë ꞌixun camina ꞌunanin, Jesusax ca mitsúxmi a unicama ꞌicësaribiti ꞌiti cuëënima quixun.

²² Usaribiti ꞌiquin camina bëráma mitsux cuëëncësabi oquin ñunshínquin ñu ꞌatima ꞌacën. Usaquin ꞌaquin camina mitsun sinan upíma ꞌixun ñu ꞌatima ꞌaquinbi, ax ca ꞌaisama ꞌicë quixun sinani rabíanma ꞌain. Usai ꞌiá ꞌixunbi camina ñu ꞌatimami ꞌá, acama ënti ꞌain.

²³ A ëni camina Nucën Papa Diosan ꞌimicëx bëtsi sinánñu ꞌiti ꞌain.

²⁴ Bëtsi sinánñu ꞌimicëx camina an iscëx asérabi upí ꞌianan unínribia iscëx upí nuituñu ꞌiti ꞌain, Nucën Papa Dios cuëëncësabi oi.

²⁵ Usai ꞌiquin camina cëmëquin uni parántima ꞌain. Camáxbi cananuna Cristonan ꞌain. Usa ꞌain camina abë banaquin min aintsicama asérabi banáinshi caquin parántima ꞌain.

²⁶ Unibë nishanantancëxbi camina ꞌuchati rabanan xënibutíma a nëtë́nbi bënëtishi manúti ꞌain.

²⁷ Nishtancëxunbimi manuiama ca ñunshin ꞌatimanën mitsu masá sinánmiquin mitsun nuitu upíma ꞌimiti ꞌicën. Usaquian ꞌatin rabanan camina mitsun nishcë bënë́nquinshi manuti ꞌain.

²⁸ An ñu mëcamacë uni an ca usaquin ꞌatëcëntima ꞌicën. Usaquin ꞌatëcënquinma ca chiquíshquinma aín mëcënanbi upí oquin ñu mëëti ꞌicën, cupí bixun anun ñuñuma uniribi ꞌaquinti sinánquin.

²⁹ ꞌAtimati banaima upitishi banaquin camina uni Jesucristomia upiti catamënun ꞌaquinti ꞌain. Mitsúxmi usai banaia cuati Jesucristomi upiti catamëtia Nucën Papa Diosan nuibaquin ꞌaquincëx ca cuëënti ꞌicën.

³⁰ ꞌAtimati banaquin camina Nucën Papa Diosan Bëru Ñunshin Upí masá nuitumiquin rabínmitima ꞌain. Axa mibë ꞌinun ꞌinánquin ca Nucën Papa Diosan mitsu ainan ꞌinun ꞌunántioxa, Jesucristo utëcëncëbëmi aín nëtënu abë ꞌiti oquin.

³¹ Usa ꞌain camina uinu ꞌicë unibëbi nishanantima ꞌain, uni itsimi camina xuamati nishtima ꞌain, unibë camina ñu canantima ꞌain, uni ñui camina ꞌatimati banatima ꞌain, uisa ñu cara ꞌatima ꞌicë a camina ꞌatima ꞌain.

³² Usai ꞌima camina abë nuibanani uni itsibë ꞌaquiananti ꞌain. Mitsumi nishquian unin ꞌatimocëxbi camina abë tanánantima ꞌain. Usai ꞌima camina uisa cara mi ocëxbi a manui abë upí ꞌiti ꞌain. Mitsun ñu ꞌaisama ꞌacëcama manuia, Nucën Papa Dios Cristo cupí mitsubë upí ꞌain, camina usaribiti uni itsibë ꞌiti ꞌain.