Efesios 2 - Kashibo-Kakataibo Biblia

An nuibacë cupí ca uni Nucën Papa Diosnan ꞌia quicë bana

¹ Mitsun ñu ꞌatima ꞌacë cupí ainanma ꞌaíshmi uni bamacësa ꞌicëbi ca Nucën Papa Diosan mitsu xënibua ꞌaínbi abë ꞌinun ainan ꞌimiaxa.

² Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

³ Nunribi cananuna camaxunbi nun sináncësa oquinshi sinánan nun sinan ꞌatima ꞌixun nux cuëëncësabi oquin ꞌacën. Usai ꞌicë ꞌaish cananuna raíri unicamasaribi ꞌaish numi nishquian Nucën Papa Diosan castícanti ꞌiacën.

⁴ Usai ꞌiá ꞌicëbi ca Nucën Papa Diosan nu ꞌaisamaira nuibaquin,

⁵ nux nun ꞌucha cupínu ainanma ꞌaish bamacësa ꞌiá ꞌicëbi ainan ꞌaish upiti tsónun nu ꞌimiaxa, nuxribi bama ꞌaíshbi Cristobë baísquicësa ꞌinun.

⁶ Nux Cristo Jesúsbë baísquicësa ꞌinun ꞌimianan ca Nucën Papa Diosan nuxribi ënë nëtënuaxbi Cristo Jesúsbë, aín nëtënuribi abë ꞌinun nu ꞌimiaxa.

⁷ Jesucristonan ꞌaíshnu usai ꞌicë isquían camabi unin uisaira oquin cara an nu nuibatia quixun nëtë xënibucëbëtanbi isnun ca Nucën Papa Diosan usaínu ꞌinun mëníocëxa.

⁸ Nuibaquin ca asérabi cuëënquin mitsúxmi Cristomi catamëti cupíshi mitsu ainan ꞌinun ië́miaxa. Mitsúnmi ñu upí ꞌacë cupíma ca Jesucristo bama cupíshi Nucën Papa Diosan ax cuëënquinshi mitsu ainan ꞌinun ië́miaxa.

⁹ An ca an ñu upí ꞌacë cupí ainan ꞌinun uni ië́mima. Usa ꞌain ca uinu ꞌicë unínbi —ꞌën upí ñu ꞌacë cupí cana ië́a —quixun rabíquin sinántima ꞌicën.

¹⁰ Cristo Jesús nubë ꞌinúan an ꞌimicëxun ñu upíshi ꞌanan nun sinan bëtsi ꞌinun ca an mëníosabi oquin nu ꞌimiaxa.

Cristo cupía judíos unicama ꞌicësaribiti judíosma unicamaribi Nucën Papa Diosnan ꞌiti

¹¹ Usa ꞌain camina manútima ꞌain, mitsux judíos unima, uni itsi ꞌaish camina axa ꞌunántioracacë judíos unicaman —a unibunëx ca ꞌunántioracacëma ꞌicë —quixun ñuicë ꞌiacën.

¹² Judíos unima ꞌaish camina Cristo ñui quicë bana cuacëma ꞌiacën. Judíos unicaman ꞌunan ꞌaínbi camina mitsun Nucën Papa Diosan bana ꞌunáncëma ꞌianan an Cristo ñuiquin Abraham cá bana a ꞌunáncëma ꞌiacën. Usa ꞌixun camina Nucën Papa Diosan ca nuibaquin uni ꞌaquianan ainan ꞌimiti ꞌicë quixun ꞌunáncëma ꞌaish mitsux cuëëncësa oíshi tsóti sináncën.

¹³ Usai ꞌiá ꞌaíshbi camina camabi unin ꞌucha cupía Cristo bama ꞌain, ami catamëcë ꞌaish ainan ꞌain. Usa ꞌaish camina Nucën Papa Dios ꞌunáncëma ꞌiá ꞌaíshbi bërí a ꞌunani ainan ꞌain.

¹⁴ Cristonën ca judíos uni ꞌicësaribitia judíosma uniribi Nucën Papa Diosnan ꞌinun ꞌimiaxa, camáxbia raíri unisaribi ꞌinun. Judíos unicamaxa judíosma unicamabë nuibanancëma ꞌaish nishanancësa ꞌiá ꞌicë ca bërí Cristonën judíos uni ꞌimainun judíosma uniribia ainan ꞌaish camáxbi bëtsibë nuibananun ꞌimiaxa.

¹⁵ Ax camabi unin ꞌucha cupí bamaquin ca Cristonën nux judíos uni ꞌixun Moisésnën cuënëo bana quicësabi oquin ꞌacë cupíma ami catamëcë cupíshi Nucën Papa Diosnan ꞌiti mëníocëxa. Usouni ꞌicësaribitia judíosma uniquin ca nux judíos uni ꞌaish ꞌicësaribitimi mitsúxribi ami catamëcë cupí ainan ꞌinun ꞌimiaxa. Usa ꞌain cananuna camáxbi ainan ꞌaish sënën ꞌain.

¹⁶ Ax camabi unin ꞌucha tërë́ncë ꞌiti cupí i curúsocënuax bamax baísquiquin ca Cristonën judíos unicama Nucën Papa Diosnan ꞌinun mëníocëxa. Usoquian ꞌacë cupí ca axa ami catamëcëcamax Nucën Papa Diosnan ꞌaish, judíosma unibë judíos uni nishánantëcëntima ꞌicën.

¹⁷ Ax ënë nëtënu utancëxun ca Cristonën bana ñuixunquin, camabi unix ca ami catamëti Nuncën Papa Diosan iscëx upí ꞌiti ꞌicë quixun cacëxa. Usa ꞌain ca judíosma uni, an Nucën Papa Diosan bana ꞌunáncëma, ꞌimainun judíos uni, an Nucën Papa Diosan bana ꞌunáncë ꞌixun a ñuia quicë bana cuati, Cristomi catamëti Nucën Papa Diosnan ꞌia.

¹⁸ Usai Cristomi catamëti Nucën Papa Diosan Bëru Ñunshin Upíñu ꞌaish cananuna camáxbi, judíos uni ucën Papa Diosnan ꞌiti mëníocëxa. Usoquin ca nux judíos unꞌimainun judíosma uníxribi, Nucën Papa Diosbë banati ꞌain.

¹⁹ Usa ꞌain camina judíosma uni ꞌaíshmi Nucën Papa Dios ꞌunáncëma ꞌaish ꞌiásaribima ꞌain. A ñuiquian Nucën Papa Diosan Abraham cá, Cristo, a camina mitsun bërí ꞌunanin. Usa ꞌain cananuna mitsúxmi judíosma uni ꞌimainun nuxribi judíos uni ꞌaish, ainan cupí aín nëtënu abë ꞌiti ꞌain.

²⁰ Mitsux camina an aín bana uni ñuixunun Jesusan caíscë unicama ꞌimainun an Nucën Papa Dios quicë bana uni ñuixuncë unicaman ñuiasabi oi, Jesucristomi catamëti ami cushicë ꞌain. Usa ꞌaish camina unin maxax xubu oquin ami cushiti pain nantancëxun raíriribi bucúnrucësaribi ꞌain, Cristo a pain nancë maxáxsa ꞌain.

²¹ Amia catamëtia ca Nucën ꞌIbu Jesucristonën aín unicama ax cuëëncësabi oía ꞌinun ꞌimia. Usaquin ꞌimicë́xa, asérabi ami catamëcë aín unicama abë ca Nucën Papa Dios ꞌia.

²² Mitsun ëmanu ꞌicë axa Jesucristomi catamëcë unicamabëribi ca aín uni raíribëa ꞌicësaribiti Nucën Papa Dios ꞌia, aín Bëru Ñunshin Upía aín unicamabë ꞌain.