Efesios 1 - Kashibo-Kakataibo Biblia

Efeso ëmanuax ax Jesucristomi catamëcë unicama Pablonën quirica cuënëoxuan

¹ ꞌËx cana Pablo, Nucën Papa Dios cuëëncësabi oquin aín bana ñuixunun Jesucristonën caísa ꞌain. Usa ꞌixun cana Efeso ëmanuaxmi Cristo Jesúsmi sinani ami catamëti Nucën Papa Diosnan ꞌicë ënë quirica mitsu buánmin.

² Nucën Papa Diosbëtan Nucën ꞌIbu Jesucristonën mitsu nuibaquin ꞌaquincëxmi chuámarua ꞌaish bucucanti cana cuëënin.

I. AIN UNICAMAX CA CRISTOBË ACHUSHISA ꞌICË QUIXUN PABLONËN CA (1.3-3.21) Cristonan cupía Nucën Papa Diosan uni nuibaquin ꞌaquinti

³ Nucën Papa Dios ax ca Nucën ꞌIbu Jesucristo aín Dios ꞌianan aín Papa ꞌicën. A rabinun ca ꞌacan. Aín nëtënuxun nu sinánxunquin ca nuxnu Cristonan cupí nuibaquin ꞌaisamaira ñu nu ꞌaquinquin upí oquin sinánmianan nu cuëënmia.

⁴ Mecama uniocëma ꞌixunbi ca Nucën Papa Diosan Cristo cupínu an iscëx ꞌuchañuma ꞌianan ainanshi ꞌinun nu caísacëxa.

⁵ Axa cuëëncësabi oquin ca nu nuibaquin Jesucristo cupí aín bëchicë ꞌinun nu caísacëxa.

⁶ Usaquin ainan ꞌinun caístancëxun an nu nuibaquin, aín nuibacë Bëchicë nubë ꞌaínu ainan ꞌaish upí ꞌinun nu ꞌimicë ꞌixun cananuna ami catamëquin, xënibua ꞌaínbi a rabin.

⁷ An ca nun ꞌucha cupínu ainanma ꞌicëbi Cristo bama ꞌain, nun ñu ꞌaisama ꞌacëcama tërë́nquin ainan ꞌinun nu ië́miaxa, an nu nuibaquin.

⁸ Usa ꞌixun ca nuibaíraquin uisairai cara uni ainan ꞌiti ꞌicë quixun upí oquin ꞌunánun nu ꞌimiaxa.

⁹ Unin ꞌunánma ꞌicëbi ca nu ꞌunánmiaxa, uisa cupí cara ax cuëëansabi oquin Cristo ënë nëtënuaxa bamanun xuacëxa quixun.

¹⁰ Ësaquin ca nu ꞌunánmiaxa: An ca anúan ax utëcënti nëtëa sënë́ncëbëtan Cristo xuti ꞌicën, an unio ñucama, naínu ꞌicë ꞌimainun menu ꞌicë aín ꞌibua ꞌinun.

¹¹ Nux Cristonan cupí aín uni raíri ꞌacësaribi oquin nu axa cuëëncësabi oi ꞌianan aín nëtënu abë ꞌiti nu ꞌiminuxun ca Nucën Papa Diosan ainan ꞌinun nu caísacëxa. Usai nux ꞌinun ca Nucën Papa Diosan camabi ñu ax cuëëncësabi oquin ꞌaquin mëníocëxa.

¹² Nun nu an sinánmicëxun upí oquin ñu ꞌaia isquian uni raírinënribi a rabinun ca nux pain Cristomi catamëcë ꞌaíshnu ax cuëëncësabi oi ꞌinun nu caísacëxa.

¹³ Mitsúxribi camina —Jesucristo cupí ca uni aín ꞌucha tërë́ncë ꞌaish Nucën Papa Diosnan ꞌiti ꞌicë —quixun ñuicë bana cuati Cristomi catamëacën. Cristomi catamëtia ca Nucën Papa Diosan ax quicësabi oquin aín Bëru Ñunshin Upí mibëa ꞌinun mitsu ꞌináncëxa, mitsúxmi asérabi ainan ꞌicë ꞌunánti oquin.

¹⁴ Aín Bëru Ñunshin Upí axa nubë ꞌain cananuna ꞌunanin, anúan Nucën Papa Diosan an caíscë aín unicama biti nëtë sënë́ncëbë cananuna aín nëtënu abë ꞌiti ꞌain, ax quiásabi oi. Ax cushiira ꞌixuan nuibaquin ꞌimicëxunu a rabinun ca usai ꞌiti ꞌicën.

Efesonu ꞌicë axa Jesucristomi catamëcë unicama Pablonën Nucën Papa Dios ñucáxuan

¹⁵ Usoquin Nucën Papa Diosan ꞌaquincëxmi mitsux asérabi Nucën ꞌIbu Jesúsmi catamëanan axa ami sináncë unicamabë nuibanania ñuicania cana cuan.

¹⁶ Usa ꞌain cana ënquinma —asábi ca —quixun caquin rabianan abë banaquin Nucën Papa Dios mitsu ñucáxunin.

¹⁷ Nucën ꞌIbu Jesucristonën Dios ꞌianan ꞌApuira, Nucën Papa Dios, a cana an ꞌunánmicëxunmi upí oquin sinánquin a ꞌunáncanun quixun mitsu ñucáxunin.

¹⁸ ꞌImainun cana mitsu ñucáxunin, an ꞌimicëx caramina uisairai ënë nëtënuax Jesucristosaribi ꞌaish upí sinánñu ꞌiti ꞌai quixunmi mitsun ꞌunánun. Ñucánan cana uisairai caramina aín nëtënu abë ꞌaish, axa ami catamëcë unicamabë ꞌiti ꞌai quixunmi ꞌunánun mitsu ñucáxunin.

^19-20 Usaribi oquin cana mitsu ñucáxunin, uisaira cara aín cushi anúan axa ami catamëcë unicama ꞌaquinti a ꞌicë quixunmi mitsun ꞌunánun. A cushínbi ca bamacëbi baísquimixun Cristo aín nëtënu aín mëqueu ꞌaish abë ꞌApu ꞌinun ꞌimiacëxa. A cushíinra ca Nucën Papa Diosan nu ꞌaquinia.

²¹ Usai ꞌinúan ꞌimicëx ca Cristo ax, a unin iscë ꞌapu ꞌimainun a unin iscëma ꞌapuribi ꞌimainun uisa cushi cara, ꞌimainun uisa ꞌapu cara, uisaquin caquin anëcë cara, acamabë sënë́nmaira ꞌicën. Usa bërí ꞌaish ca ënë nëtë cëñúcëbëribi usai ꞌiti ꞌicën.

²² Nucën Papa Diosan ca camabi ñu, uni, ángel, acaman ꞌibu ꞌinun Cristo ꞌimiacëxa. ꞌImianan ca axa ami catamëcë unicaman ꞌiburibi ꞌinun ꞌimiacëxa.

²³ Axa ami catamëcë unicamax ca ꞌitsa ꞌaíshbi camáxbi Cristonan ꞌicën. Usa ꞌain ca an abë ꞌixun an sináncësaribi oquian sinánun aín unicama ꞌimia. Ax ca uinubi ꞌaímama ꞌicën. Abë ꞌixun ca Cristonën aín unicama an iscëx aín nuitu upí ꞌixuan ax cuëëncësa oquinshi ꞌanun aín cushi ꞌinania.