Eclesiastés 9 - Kashibo-Kakataibo Biblia

⁷ ¡ꞌËn kana mitsu kuëënmikin kain! Usa ꞌain kananuna xëanan pianan kuëënti ꞌain, usakin ꞌaia ka Diosan nun ꞌakë ñukama ꞌupi isia.

⁸ ꞌIanan kamina nëtë kamabi chupa mëníokakin pañuanan, ꞌiníntisa ron ꞌiti ꞌain.

⁹ ꞌIanan kamina ami nuibakin kuëënkë min xanubë kamabi nëtën kuëëni tsóti ꞌain, usaími mix ënë nëtënu tsóti abë ꞌiti ka Diosan mi ꞌinánkëxa; ꞌaínbi ka nun tsóti ax xënibua ꞌaish nun xanubë ꞌupitax tsókë ax asábi ꞌikën.

¹⁰ Usa ꞌain kamina añu kara ꞌaisa ꞌikë a min asérabi ꞌaisatankin kuëënkin ꞌati ꞌain; anua nu bamaia maínkë anuxun kananuna añu ñubi ꞌanan sinanimabi ꞌianan, añu karana ꞌunánti ꞌai kixunbi sinántima ꞌain.

Uisa ñu kara ꞌupiokin ꞌaisa ꞌikëbi unin ꞌakëma ñu ꞌikë ñuikë bana

¹¹ Ënë nëtënua kana bëtsi ñuribi isan: akaman ka kushiira abákë anbi bëtsi kananima, ꞌianan ka ax ꞌakanantimi rakuëma unínbi ꞌakanankin kananima; ꞌimainun ka ax sinan ñuira unikama axi ka pitiñu ꞌima ꞌianan ka an bënë́kinshi ñu ꞌunánkë unikama axi ñuñuira ꞌima, ꞌimainun ka ñu ꞌunáinrakë unibi kamaxunbira unin kuëënima; usa ꞌain ka a ñukama uínsaran kara ax usai ꞌiti nëtë ꞌikëbë pakëtia nëtë anuinshi unin biti ꞌikën.

¹² Usa ꞌain ka uínbi ꞌunanima, uisai kara ꞌiti ꞌikën, anúan usai ꞌiti nëtë ꞌikëbë ꞌiti ꞌikë kixun: usa ꞌaish ka tsatsakama anua këñurutia rika nankë anu këñurukësai ꞌianan ñuina pëchiñu anu nipakëti nankënu nipakëkësa, usaribiti ꞌikin ka unin, uisai karana ñu ꞌatima ꞌinuti ꞌaisama ñunu nipakëti ꞌikë kixun ꞌunanima.

¹³ ꞌImainun kana ënë nëtënua an chaiira ñu ꞌë ꞌunánmiti aribi isan:

¹⁴ achúshi ëma chukúma anua ꞌitsamashi uni ꞌikë, aka ꞌapu kushiira an bëarabuinkin anun ꞌiruti me bukunkin ꞌatankëxun ꞌanuxun bëarabuiankëxa.

¹⁵ Usa ꞌain ka a ëmanu uni achúshi ñuñumara ꞌiakëxa, ꞌaínbi ka a uni sinánñuira ꞌiakëxa, usa ꞌain ka a unin sinánñuira ꞌixun an ëma ië́misa ꞌiakëxa. ¡Usa ꞌaínbi ka a uni uínbi ami sinántisama tankin ñukáma ꞌikën!

Unin ñu ꞌunánkë ax ka kushi unibëtan sënë́nma ꞌikë kikë bana

¹⁶ ꞌAínbi kana ꞌëx kin, sinánñuira ꞌiti ax ka rakuëma unibëtan sënë́nmaira ꞌikën, axa sinánñuira ꞌikëbi ka uni ñuñuma an sinánkë bana upí ꞌikëbi unin kuaisama tanan ax ka asérabi ꞌikë kixunbi sinanima.

¹⁷ Usa ꞌain ka sinánñu unikamaxa upiti banakë ax upíokin kuakë ꞌikën, ꞌaínbi ka an ñu ꞌunántisa ꞌikëbi ꞌunánkëma ꞌapu axa munuma banai kiabi kuakanima.

¹⁸ Ñu ꞌunáinrakë ꞌiti ax ka anun ꞌakánanti ñukamasamaira ꞌikën. Achúshi okin ñu ꞌakin, an ñu ꞌunánkë unibë banaxunma ꞌakëxun ka an ñu ꞌatima oia.