Eclesiastés 3 - Kashibo-Kakataibo Biblia

Kamabi ñux ka anun a ꞌati nëtëñu ꞌikën

¹ Ënë menu ka anun kamabi ñu ꞌiti nëtë ꞌikën; usa ꞌain ka uínsaran kara ꞌia a nëtë ꞌikëbë anun ñukamax ꞌia:

² Anu ka anun bakënti nëtë ꞌikën, ꞌimainun ka anun bamati nëtëribi anu ꞌikën. Anu ka anun ñu ꞌapáti nëtë ꞌikën, ꞌimainun ka anun ñu ꞌapáxun ëchíkin masóti nëtëribi anu ꞌikën.

³ Anu ka anun ñu ꞌati nëtëribi ꞌikën, ꞌimainun ka anun ñu ronti nëtëribi anu ꞌikën. Anu ka anun ñu ꞌatima oti nëtë ꞌikën, ꞌimainun ka anun ñu mëníoti nëtëribi anu ꞌikën.

⁴ Anu ka anun inti nëtë ꞌikën, ꞌimainun ka anun kuaiti nëtëribi anu ꞌikën. Anu ka anun uni ñukëbë masá nuituti nëtë ꞌikën, ꞌimainun ka anun ransai kuëënti nëtëribi anu ꞌikën.

⁵ Anu ka anun maxax abístanun puti nëtë ꞌikën, ꞌimainun ka anun timëkin biti nëtëribi anu ꞌikën. Anu ka anun ꞌikúkananti nëtë ꞌikën, ꞌimainun ka anun ꞌikúkanantima nëtëribi anu ꞌikën.

⁶ Anu ka anun ñu ꞌaisa kara kixun tanti nëtë ꞌikën, ꞌimainun ka anun ñu ꞌakatsikixun ꞌaxunbi sinanatëkënkin ënti nëtëribi anu ꞌikën. Anu ka anun ñu bukunrukin nanti nëtë ꞌikën, ꞌimainun ka anun ñu puti nëtëribi anu ꞌikën.

⁷ Anu ka anun ñu tukapati nëtë ꞌikën, ꞌimainun ka anun këxëti nëtëribi anu ꞌikën. Anu ka anun banaima tsóti nëtë ꞌikën, ꞌimainun ka anun banati nëtëribi anu ꞌikën.

⁸ Anu ka anun nuibananti nëtë ꞌikën, ꞌimainun ka bëtsimi nishti nëtëribi anuꞌikën. Anu ka anun ꞌakánanti nëtë ꞌikën, ꞌimainun ka anun ꞌakananima nuibanani tsóti nëtëribi anu ꞌikën.

⁹ ¿Añu ñuira kara ꞌitsaira ñu mëëkin unin kananti ꞌik?

¹⁰ ꞌËn sinánkëx ka Diosan usakian unin ñu mënun ꞌinan ax chaiira ꞌikën, usa ꞌain ka ax kuëënkësai ꞌitia kia ꞌain, usakinbi unin kushikin mëënu ꞌinan ꞌixun ñu mëëia.

¹¹ Usa ꞌain ka Diosan ënë nëtë uniotankëxun; kamabi ñu upí ꞌitánun uniokëxa; ꞌanan ka uniribi sinánñu ꞌixúan uisai kara ñukama ꞌiakëxa kixun ꞌunánan, uisai kara bërí ñu ꞌia ꞌunánkin uisai kara ꞌinuxun ꞌaia kixun akama ꞌunántiokin ꞌakëxa, usa ꞌaínbi ka unin uisaira ꞌinun kara Diosan ñu ꞌakëxa kixun ꞌunanima ꞌianan uisokin kara ꞌanuxun ꞌaia kixun kamaira ꞌunanima.

¹² ꞌËn ꞌunánkëx ka a ꞌaia uni tsóti ñu upí ꞌaíma ꞌikën, usa ꞌain ka uni ñu ꞌai kuëëni tsókë ax kuni asábi ꞌikën,

¹³ usa ꞌain ka nun pianan ñu xëanan kakë ax ñu ꞌapátankëxun tuaia aín bimi bikë ax, Diosan nu ꞌinánkë ꞌaish asábi ꞌikën.

¹⁴ ꞌIanan kana ꞌunanin kamabi Diosan unio ñukama ax ka uínsaranbi këñutima oi anubi ꞌia. Usa ꞌain ka a ꞌatëkënti ñukama ꞌaíma ꞌimainun ax ka ꞌaisama ꞌikë kixun a rakanti ñu ꞌaíma ꞌikën; usa ꞌain ka unikamax ami sinani upiti tsóti ꞌikën.

¹⁵ Kamabi ñu bërí ꞌikë ax ka bërámabia ꞌia ꞌikën, ꞌimainun ka uisa ñukama kara ꞌinuxun ꞌaia axribi bëríbi anu ꞌikën. Usa ꞌain ka Diosanbi bëráma ꞌia ñukama a ꞌitëkënun ꞌimia.

Upiokin ꞌati ꞌikëbi ꞌatima okin ñu ꞌakë bana

¹⁶ ꞌIanan kana ënë nëtënuaribi ꞌën isan ꞌaisama ñukama ꞌimainun atima ñuribi mënioisa ꞌikëbi ꞌapukaman ꞌakëma akama kana isan.

¹⁷ Ënë nëtënu ka anun kamabi ñu ꞌiti nëtë ꞌikën, usa ꞌain ka Diosan ka kamabi unikama an ñu upí ꞌakë ꞌimainun an ñu ꞌatima ꞌakëkama isti ꞌikën, anu ka anúan kamabi ñu ꞌiti nëtë ꞌimainun kamabi ñu upí ꞌakëkama isti nëtëribi ꞌikën.

¹⁸ ꞌImainun kana ësairibi unikama ñui kin, Diosan ka unikama atúnbi ꞌunánkian nukamax kananuna ñuinasaribi ꞌai kiax sinananun ꞌimia.

¹⁹ Asérabi ka unikama ꞌimainun ñuinakamax bamakiani anu kuanti anu ꞌikën: usa ꞌain ka uni ꞌikësaribiti ñuinakama atúxribi bamaia, ꞌianan ka unix ꞌikësaribiti suñun uíni tsotia: usa ꞌain ka a ñukamax uínbi ꞌunántisama ꞌinun inutia,

²⁰ ꞌianan ka uinu kara kamáxbi bamax ꞌiti ꞌikë anu ꞌiti ꞌikën; me putu unio ka kamabi uni ꞌikën, usa ꞌaish ka me ꞌitëkënti ꞌikën.

²¹ ¿Uin kara unin kaña naínu kuanmainun kara ñuinakaman kaña me ꞌukëmëu kuania kixun ꞌunánti ꞌik? uínbi ka ꞌunanima.

²² ꞌËnbi kana iskin sinan, unían ꞌakë ñukamax ka upí ꞌikën, usa ꞌaínbi ka aín ñu mëëti ꞌai tsókë axira bëtsi ñukamasamaira upíira ꞌikën, usai ꞌitiokin ka uni ꞌakëxa, usa ꞌain ka uni bamakë ꞌikë, uisa ñukama kara ꞌia kixun istëkënun an bëtëkënti ꞌaíma ꞌikën.