Eclesiastés 12 - Kashibo-Kakataibo Biblia

Nukën ꞌIbu Dios an nu unio a kananuna nëtë xënibuamashi i sinánti ꞌain

¹ An kamabi ñu unio min ꞌIbu Dios a kamina mix bëná ꞌixuinshi sinánti ꞌain, anun tëmërati nëtë ka ꞌinuxun ꞌaia usa ꞌain; ꞌianan ka anunmi ësai ki banati baritiaribi ꞌiti ꞌikën: “ꞌËn ënë nëtënu tsókin ꞌakë ñukama anbi ka ꞌë kuëënmitima ꞌikën.”

² Usa ꞌain kamina barin pëkakë ꞌianan ꞌuxë ꞌispa akaman pëkakë ꞌaínshi ꞌanan ꞌuñe ꞌibúkë ꞌaia kuinribi ꞌibúkë ꞌaínshi min ꞌIbu Diosmi sinánti ꞌain.

³ Usa ꞌain ka mix kaniakëkë ꞌikëbë min pëñankama ami katamëti bëruankakë ax bërëkimainun anun mi nikë min xokama axribi bamai kushima ꞌiti ꞌikën; usai ꞌimainun ka min xëtakamax achúshi achúshi ëchikimainun kamina min bërukamaribi kurukëbëtan bëxuñu ꞌixun anun iskasmati ꞌain.

⁴ Usai ꞌianan kamina ëmanxun ñu mëëkë abi kuatima ꞌain; ꞌimainun ka mixmi banakëxi rakuë́ti banai tërubëntsinan banakësa ꞌiti ꞌikën, ꞌianan kamina pëkarakëma ꞌaínshi ꞌisá banatabakë anu aín bana kuatimabi bësuti ꞌain;

⁵ ꞌianan ka matá mapërakëti rakuë́ti ꞌianan, bairibi anun nisama ꞌiti ꞌikën. ꞌImainun ka amukutanën uábukin taëoti ꞌikën, ꞌimainun ka champu ꞌimainun muxañu i ax ñu achúshi tsamankësa ꞌiti ꞌikën. Usa ꞌain ka unikaman ñuia uanxun anu bamaia maínti anu xënibua ꞌaínbi anu ꞌinun uni maínti ꞌikën, usa ꞌain ka ñukë uni a bënini inia anun ëmanu niti bainuxunbi kuakë ꞌiti ꞌikën.

⁶ An kamabi ñu unio ami kamina bamakëma pain ꞌaish bërí sinánti ꞌain, unin bamati ax ka manë risi tëkimainua ñamikënti kuri ꞌakë ax tukibukësa usaribi ꞌianan ka ami ꞌumpax biti chumu anuaxa ꞌumpax chikíkë aín kuëbími ꞌi tukibumainua anua ꞌumpax biti kini manámi bëntankë manë mañakë tukikë usashi ka unin ñuti ꞌikën.

⁷ Usa ꞌain ka a nëtë ꞌikëbë uni me putu unio ꞌaish mebi ꞌitëkënti ꞌikën, ꞌimainun ka aín bëru ñunshin ax Diosnubi kuantëkënti ꞌikën.

⁸ ꞌËx an bana ñuikë uni ꞌaish kana ësai kitëkënin: ¡Ënë menu tsókin unin ꞌakë ñu ax ka ñankáishi ꞌakë ꞌikën! ¡Usa ꞌain ka kamabi ñu ax uínbi ꞌunántisama ꞌinun ꞌikë ꞌikën!