Deuteronomio 9 - Kashibo-Kakataibo Biblia

An ka nu ꞌakinia kixun sinaniamabi Nukën ꞌIbun Israel kama ꞌakian bana

¹ Amiribishi ka Moisésnën Israel unikama ësokin kakëxa: ꞌën mitsu kamainun kamina kuakanti ꞌain, Israel unikama anúnmi Jordán kakë baka sikarakëti kuani kuanti nëtë ka ꞌurama ꞌikën, anu ꞌikë ëmakamax ka chaiirabu ꞌimainun ka anu tsókë unikamaxribi mitsubë sënë́mabuira kushiira ꞌaish nun titikaisamabu ꞌikën, ꞌimainun ka atun ëmakama axribi chaiorukin kënëabu ꞌikën;

² anu tsókë unikamax ka chaiira ꞌimainun chaxkë́irabu ꞌaish, Anac kakë uni aín rëbúnki ꞌiásaribi ꞌikën, ꞌimainun kamina mitsun ësai uni kikë bana ꞌunan: ¿Uin kara kuainxuinshi Anac axa chaxkë́ira chaiirabu ꞌiá ꞌain aín rëbúnkikama ꞌakanankinti ꞌik?

³ Bërí kamina mitsun ꞌunánti ꞌain, Nukën ꞌIbu ka bërí mitsubë ꞌikë kixun, usa ꞌixun ka tsi rëkirukënëan ñu këñubiankin xarokësa usa okinshi an ꞌakëxa a ëmakamax mitsumi rakuë́tia kamina këñuti ꞌain. Usakin mitsun aín ëmanubi bëbarukin ꞌakin këñukëx ka, unix munuma bëkui bënëtishi bëpëkikë usaribi okin Diosan aín kushínbi këñuti ꞌikën.

⁴ Usokin ꞌanuan Diosan ꞌamikëxun atu chikíntankëx kamina mitsux kitima ꞌain: Asérabi kananuna nun kushínbi ꞌa kixun sinánkantima ꞌain, min ënë me anu ꞌinun nu ꞌinan; usakin Nukën ꞌIbun ꞌakëx ka aín ꞌucha kupínbi atu chikínkë ꞌiti ꞌikën.

⁵ Usa ꞌain ka mitsun upí ꞌixun biti kupíma a memi binun; atun ꞌucha kupín mitsun ismainunbi atun menua a unikama Nukën ꞌIbun chikínti ꞌikën, ꞌimainun ka anbia nun chaitiokë Abraham Isaac ꞌimainun Jacob akama kásabiokin ꞌati ꞌikën.

⁶ Mitsun kamina ꞌunánti ꞌain, Diosan ka mitsu upí unibu ꞌikëmabi a me ꞌinania kixun, usa ꞌaínbi kamina bana kuaisama tankin mitsun nuitu iruarakë unibu ꞌain.

Israel kama Horeb kakë aín bashinuxun bëtsi ñu unioxun rabikin Dios rabitisama tan bana

⁷ Mitsun kamina uínsaranbi anu uni ꞌikëma menuxua Nukën ꞌIbu Diosan kakëxunbi kuaisama tan bana a manutima ꞌain. ꞌIanan kamina Egipto menuax chikíkin ꞌásabiokin ënë menu bëbakinbi, an kakësabiokin ꞌaisama tankanin.

⁸ Aín bashi Horeb kakë anuxun ka an kakësabiokin ꞌakinma kamina ꞌitsaira Nukën ꞌIbu nishmiakën, usakin ꞌitsaira nishmikëxun ka Diosan këñutisatankinbi mitsu këñuama ꞌikën.

⁹ Usai ꞌikëbë kana ꞌëx maxáx pará rabë́ anua achúshi ñu mitsu ꞌaxunkin Nukën ꞌIbun aín bana kuënëokë a bitsi aín bashinu mapërakëakën, mapërakëax kana anu cuarenta nëtë ꞌimainun cuarenta imë́ ñu pima ꞌianan xëaimabi ꞌiakën.

¹⁰ Usai mapërakëax anu ꞌikë ka Nukën ꞌIbu maxá pará rabë́ anu aín banakama kuënëokë a ꞌë ꞌinánkëxa, ax ka nuxnu aín bashi Sinaí anu timë́kë ꞌain ka a nëtën tsi rëkirukësa a mëuxun nukama kakë bana a ꞌiakëxa.

¹¹ Cuarenta nëtë ꞌimainun cuarenta imë́ ax inúkëbëtan ka Nukën ꞌIbu maxá pará rabë́ a ꞌë ꞌinánkëxa, ax ka anua achúshi ñu mëníokë kikë a bana kuënëokë ꞌiakëxa,

¹² ꞌimainun ka ësokinribi ꞌë kakëxa: Ënuax kamina bënëtishi taramëkëbukiani kuanti ꞌain. Egipto menuami chikínbëtsinkin bëkë unikaman ka ꞌatima ñu ꞌai ënananxa. Bënëkinshi ka ꞌën usakia ꞌati kakë bana manuaxa, usa ꞌixun ka a banakama parëkin bëtsi ñu tankin manë charóxun achúshi ñu unioxa kixun.

¹³ Kanan ka ësokinribi Nukën ꞌIbun ꞌë kakëxa: ꞌËnbi kana ënë unikama ꞌunan usa ꞌixun ka aín nuitu iruarakin ꞌatima ñu ꞌaxa.

¹⁴ Usa ꞌain kamina ꞌën a sinánxuma ꞌanun ꞌëmi bana kantima ꞌain, ꞌën kana menua a unikama uínbia atumi sinántima okin atu maë rakátanun këñuti ꞌain, ꞌaínbi kana min rëbúnki kamaxa atux ꞌiásamaira ꞌaish kushiirabu ꞌianan ꞌaisamaira ꞌinun ꞌuákamë ꞌëonun ꞌimiti ꞌai kixun ka ꞌë kakëxa.

¹⁵ Kakëx aín bashi anuaxa tsi rëkirukësa ꞌikë anuax taramëbukuatsini ukin kana ꞌën maxá pará rabë́ anua achúshi ñu a tanti bana kuënëokë a ꞌën mëkënanbi tuinbëtsikin bëakën.

¹⁶ Bëkinbi kana mitsúxmi Nukën ꞌIbumi ꞌuchakin manë charóxun vaca bakë tankin ꞌaxun rabikin Nukën ꞌIbun kakësabiokin ꞌati ënxun ꞌaia mërakën,

¹⁷ mërakin kana anua aín banakama kuënëokë maxáx pará rabë́ tuínxun bëkinbi mitsun ismainunbi a tukibutanun niakën.

¹⁸ Usokin ꞌatankëx kana Nukën ꞌIbu ismainunbi menu rantipuruni ꞌëx bëráma ꞌikësaibi ꞌiakën, ꞌi kana cuarenta nëtë ꞌimainun cuarenta imë́ añubi pima ꞌianan xëaima ꞌiakën, mitsux ñu ꞌatima ꞌai ꞌuchakin Nukën ꞌIbu nishmikë kupí kana usai ꞌiakën.

¹⁹ Usai Nukën ꞌIbu xuamati mitsu këñutisatani nishkëbë kana ꞌëxribi ratuakën; ꞌaínbi ka Nukën ꞌIbun mitsu këñukatsi kiax kiabi ꞌën kakëxun kuakëxa.

²⁰ ꞌIanan ka Aarón xuamati ami nishkin bamamisa tankëxa, taniabi kana ꞌën anun rabanan në́kin Nukën ꞌIbu kakën;

²¹ katankëxun kana vaca bakë tankin a rabimi ꞌuchakankë a bitankëxun tsinu ꞌaruakën, ꞌarukëxa ꞌaímai xarátia kana bitankëxun upíokin putuakin rënxun, aín bashimiaxa ukë xëxá ꞌumpaxmi sakakin puakën.

²² Usonan kamina Taberá, Masá anuxun ꞌanan Quibrot-hataavá anuxunribi Nukën ꞌIbu kikësabi oi ꞌikinma mitsun nishmiakën.

²³ ꞌImainun kamina Nukën ꞌIbun mitsu Cadés-barnea anuax kuanxumi an mitsu ꞌinánti me a bitánun kakëxbi kana biti ꞌain kixun sinanima, mitsux ꞌikësabi ꞌitëkënkin an kakësabiokin ꞌama ꞌain.

²⁴ ¡A nëtën ꞌën mitsun uankë, anubi kamina Nukën ꞌIbun bana kuaisama tankën!

²⁵ ꞌËn mitsu ñuixunkë usokian Nukën ꞌIbun mitsu këñutisa tankëbë kana, ꞌëx rabuxunën menu rantipuruni tsóbutankëx cuarenta nëtë ꞌimainun cuarenta imë́ ꞌiakën,

²⁶ ꞌikin kana anuxun munuma banakin kakën: ꞌËn ꞌIbu Dios ënë unikama kamina usakin ꞌatima aín, atux ka min uni ꞌikëmi Egipto menuxun tëmërakin ñu mëëiabi mix kushiira ꞌixun chikínbëtsinkin bëa a ꞌikën.

²⁷ Usa aín kamina min unikama Abraham, Isaac ꞌimainun Jacob akaman ka min kakësabiokin ꞌakëxa kixun sinánkin. Ënë unikama ñu ꞌatima ꞌai ꞌuchaiabi a sinánkin ꞌaisamaira otima ꞌain,

²⁸ ënë unikamami usakin ꞌakëbë ka aín menuami chikínbëtsinkin bëkë Egiptonu ꞌikë unikama kiti ꞌikën: Nukën ꞌIbun ka Israel unikama a ꞌinánkatsia kia me a ꞌinánkima ami nishkin, ënu upitax tsótiabi anu uni ꞌikëma menuxun këñuminuxun chikínbiankin buánxa kiax kiti ꞌikën.

²⁹ Usa ꞌain ka atux min unibu ꞌaish min unibubi ꞌikën; min kamina Egipto menua min kushínbi atu chikiankën kixun ka Moisésnën Dios kakëxa.