Deuteronomio 8 - Kashibo-Kakataibo Biblia

Ñu piishi ka uni tsótima ꞌikë kixuan Moisésnën ka bana

¹ “Moisésnën ka amiribishi Israel unikama katëkëankëxa, ax kikësabi oi ꞌiti bana ꞌën mitsu kakë ënë kamina tanti ꞌikanin, usakin ax kikësabiokin ꞌai kamina bakë bëchipati achúshi ëma chaiira ꞌixun atu ꞌakin kupitanunma ꞌaxun kamina, a ꞌinánnuxua nun chaitiokëkama Diosan ka me a biti ꞌain.

² Usa ꞌain kamina sinánkanti ꞌain, Diosan ka anu uni ꞌikëma menu cuarenta baritia ꞌimi tëmërai ninun nu ꞌimiakëxa akamina manukinma sinánkanti ꞌain, usakin ka mitsu tankin ꞌanan ami karamina asérabi sinanatëkëni isti ꞌanan ax kikësabiokin aín bana ꞌai ꞌisnuxun mitsu ꞌakëxa.

³ ꞌImainun ka ñu narakamikinma tëmëramikin numin pain ꞌimitankëxunbi maná kakë piti mitsu pimiakëxa, a pitix ka mitsun ꞌunánkëma ꞌimainun nun chaitiokë kamanbi ꞌunánma piti ꞌiakëxa, usokin ꞌakin ka ñu pishi ka uni tsótima ꞌikë Nukën ꞌIbun banaribi ꞌai ka uni ami katamëti tsóti ꞌikë kixun ꞌunánmisatankin Diosan usakin ꞌakëxa.

⁴ Usai pain cuarenta baritia ꞌimi nikëbëbi ka atun chupabi këñutima ꞌianan ꞌitsaira nikëbëbi atun taëbi ꞌuáma ꞌikën.

⁵ Mitsun kamina ꞌunánti ꞌain Diosan ka mitsu ꞌunámikin unían aín bëchikë ñu ꞌatima ꞌaia ꞌunámikin ꞌakësa usaribi okin mitsu ꞌunánmisa tanxa.

⁶ Usa ꞌain kamina, ax kikësabi oi ꞌiti aín bana Diosan nu ꞌinánkë ax kikësabiokin ꞌati ꞌain.

⁷ Usakin ꞌaia ka Nukën ꞌIbun mitsu anua me upí ꞌimainun a xëati xëxá ꞌumpax ꞌimainun me sapan ꞌimainun aín bashinubi ꞌumpax upíira ꞌikë anu mitsu buánti ꞌikën;

⁸ a mex ka anua trigo ꞌimainun cebada, uvas ꞌapákë ꞌitsaira ꞌianan olivos higuera i ꞌapákë, ꞌimainun i bimiñu ꞌaisamaira anu ꞌikë me upí a ꞌikën.

⁹ A menu bëbatankëx kamina mitsux uinua karanuna piti biti ꞌai kixun sinani bënëanan, bëtsi ñukamaribi biti kuëëni bënëtima ꞌain; aín maxánua kamina hierro kakë manë panshian mëranan aín bashinuaribi cobre kakë manë upí akama biti ꞌain.

¹⁰ Usa ꞌain kamina anuxun mitsu ꞌinánkë ñu a piti ꞌitsaira ꞌain kuëënkin anuxun Dios rabiti ꞌikanin, mitsua me upí anbi ꞌinánkë kupí.

Diosmi manuama ꞌinun kixun Moisésnën Israel kama ka bana

¹¹ Usa ꞌain kamina Nukën ꞌIbu Diosmi manútima bërúankakin ax kikësabiokin ꞌati ꞌain. ꞌAkin kamina ax kikësaibi oi ꞌiti aín bana a tanti ꞌain, ꞌën mitsu bërí kakë aín bana ënëx kikësabiokin ꞌakánti ꞌain.

¹² Usakin ꞌakëbëa mitsun a ñu piti ꞌitsaira ꞌia pi puchati kamina xubu upíirabu ꞌatankëx anu ꞌiti ꞌain,

¹³ anu ꞌikin kamina mitsun vaca ꞌimainun ovejakama ꞌaisamaira ꞌinun ꞌuakamë ꞌëomainun ka usaribiti kuri ꞌimainun manë panshian ꞌianan kamabi min ñukamax ꞌitsaira ꞌikëbë,

¹⁴ anun rabiti kamina nux kananuna ñuñuira ꞌai kixun sinánkin Nukën ꞌIbu Dios an Egipto menua tëmërakin ñu mëëiabi mitsu chikían ami manutima sinánti ꞌain;

¹⁵ an ka anu uni ꞌikëma ënën menma kuan ꞌaisama me anua pianankë runu ꞌianan nibanta ꞌëo ꞌimainun ꞌumpax ñuma me anunbi nu bëakëxa, ꞌaínbi ka mapara irunuabi ꞌumpax mitsun xëanun ꞌimiakëxa,

¹⁶ ꞌimianan ka anu uni ꞌikëma menuxun maná kakë piti nun chaitiokë kaman ꞌunánma piti a nu pimiakëxa, usakin ꞌakëx karanuna ami sinani ꞌisnuxun, ka nu tankin usakin ꞌakëxa.

¹⁷ Usa ꞌain kamina mitsun ësokin sinántima ꞌain: Nun kananuna ënë ñukama nun kushínbi bia kixun.

¹⁸ Usa ꞌain kamina mitsun Diosmishi sinánti ꞌain, an ka kushi okin mitsux mi kamabi ñu binux kushinun mitsu ꞌimiaxa, ꞌimikin ka ax kikësabiokin achúshiñu nukën chaitiokë kamabëtan ꞌasaribiokin ꞌaxa.

¹⁹ Aínbi ka Nukën ꞌIbu Diosmi manukuainxun mitsun, bëtsi dioskama rabia ꞌën sinánkëxun mitsu ꞌatima okin këñuti ꞌikën.

²⁰ Usaribi okin ka Nukën ꞌIbu Diosan anumi mitsux kuanti menu tsókë unikama ꞌaíma ꞌitánun maëmiti ꞌikën, usakinribi ka Diosan kakësoi ꞌiama mitsu maënun ꞌimiti ꞌikën, kixun ka Moisésnën kakëxa.