Deuteronomio 7 - Kashibo-Kakataibo Biblia

Moisésnën Israel kama bëtsi ñukama rabixunma ꞌanun kixun ꞌësëkin ka bana

¹ Nukën ꞌIbu Dios an ka a ꞌinánkatsia kia me anu mitsux bëbai kuankëbëtan, mapai achúshi ꞌimainun rabë́ ëmakama mitsubëtan sënë́nma kushiirabu a mitsun ismainunbi chikínti ꞌikën: Ax ka hititas, gergeseos, amorreos, cananeos, ferezeos, heveos ꞌimainun jebuseos, akama ꞌikën.

² Uinsaran kara Diosan a ëmakama mitsubëa ꞌakananun ꞌimia, anun abë ꞌakanankin ꞌatankëxun kamina atu nuibakin atubëtan añu ñubi ꞌati sinántëkëntima ꞌain.

³ ꞌImainun ka atun aintsisa ꞌinuxun mitsun bakë bëchikënën atun ꞌini bëchikë bimainun uni bënakamanribi atun bëchikë ꞌini chipashkama bitima ꞌikën,

⁴ bikëxunbi ka atun mitsun bakë bëchikëkama Nukën ꞌIbu rabiti ëmikin atun rabikë dioskama rabiti ꞌunánmiti ꞌikën; usokin ꞌunánmikëbë atumi nishkin ka Nukën ꞌIbu unix munuma bëkuishi bëpëkikë usokin bënë́kinshi maëkanun atu ꞌimiti ꞌikën.

⁵ Usa ꞌain kamina mitsun unikamabë mëskúti sinánkinma anuxua atun dios rabikin ñuina xarokëkama a rurupakin ꞌanan maxákama ꞌimainun upíirabu okin i tëakë a këñuanan anuxua bëtsi ñukamaribi rabikë a këñutanun xaroti ꞌain.

⁶ Mitsux kamina ainan ꞌitia Nukën ꞌIbun kaisa a ꞌain; usa ꞌikë ka Nukën ꞌIbu Diosan achúshi ëma upíira ꞌinun mitsu ꞌimiaxa, usa ꞌaish kamina bëtsi menu ꞌikë ëmakamasamaira upíira ꞌinun mitsu ꞌimiaxa.

Diosan ñu ꞌinánkëxun bitsia usai Israel kama ꞌiti Moisésnën ka bana

⁷ Moisésnën ka amiribishi Israel unikama ësokin kakëxa: Nukën ꞌIbun mitsu kaískë ax ka ëma upíira ꞌianan, chaiira ꞌikëa mitsu kaisama ꞌikën. Usa ꞌain kamina a ëmakamasama chukúmara ꞌain.

⁸ Nukën ꞌIbun ka Egipto menuax ꞌaisamaira tëmëraiabi mitsu chikíankëxa, ꞌimainun ka aín kushínbi ꞌapu faraónën ꞌibuaxun ñu mëëmiabi mitsu chikíankëxa, usa ꞌixun ka an mitsu nuibakin nun chaitiokëkama kásabiokin ꞌakëxa.

⁹ Asérabi kamina ꞌunánkanti ꞌain, Nukën ꞌIbu Dios ax ka asérabi Dios ꞌikë kixun, usa ꞌixun ka an aín chaitiokëkama bërí ꞌama ꞌixun aín rëbúnkikamaribi uikaman kara ax kikësabiokin aín bana ꞌaia a unikama nuibatia;

¹⁰ ꞌaínbi ka uikaman kara aín bana kuaisamatania a unikama panákinma bënë́kinshi uisakin kara ꞌaisatania usokin ꞌati ꞌikën.

¹¹ Usa ꞌain kamina ax kikësabi oi ꞌiti bana ꞌimainun a tanti bana ꞌën bërí nëtën mitsu kakë bana ënë tankin ꞌati ꞌain.

Moisésnën ax kikësabiokin ꞌaia ka Diosan mitsu ꞌakinti ꞌikë kixun Israel unibu ka bana

¹² Ësokin ka Moisésnën aín aintsi Israel unikama raíri kakëxa: Asérabi mitsun ꞌën ꞌunánmikë bana ënëkama kikësabiokin ꞌakëbëtan ka Diosan an nun chaitiokëkamabëtan achúshi ñu ꞌakin kásabiokin mitsu ꞌakinti ꞌikën.

¹³ ꞌAkin ka an mitsu nuibakin ꞌuakamë ꞌëoimi bëchipanun ꞌimianan mitsun bakë bëchikëkama upíokin sinánxuanan mitsun ñu ꞌapákë bitsia aribi ꞌanan trigo bimi ꞌimainun, uvas baka ꞌakë, ꞌimainun xëni, akëñunbi, ꞌanan mitsun vaca bakëkama ꞌimainun, ovejakama a kamabi a me ꞌinánnuxua nun chaitiokëkama ka a menua upí ꞌinun ꞌimiti ꞌikën.

¹⁴ Mitsux kamina bëtsi unikama akësamaira okin Diosan ꞌakinkë ꞌiti ꞌain; usa ꞌain ka mitsun xanu achúshirabi tuañuma xanu ꞌimainun bëbu uníxribi achúshirabi bëchikëma uni ꞌitima ꞌikën, ꞌimainun ka mitsun ꞌarakakë ñuinakamaxribi ain xanu tuaima ꞌimainun ain bënëribi bëchima ꞌitima ꞌikën.

¹⁵ ꞌImainun ka Nukën ꞌIbun mitsunua bëtsi bëtsi ꞌinsín ꞌimainun bëtsi bëtsi ñu ꞌaisamakama Egipto menu ꞌia ꞌikëmi ꞌunánkë usakin mitsunu ꞌimitima ꞌikën; usa ꞌaínbi ka a ñu kamanbi ax mitsumi nishkë unikama tëmëramiti ꞌikën.

¹⁶ Usa ꞌain kamina mitsun bëtsi menu ꞌikë unikama Diosan ꞌanun ꞌamikëxun ꞌakin; nuibakinma këñuanan atún diosmabi rabikë a rabitima ꞌain, usakin ꞌakin a rabi kamina mitsúxbi këñuti ꞌain.

¹⁷ Mitsun kamina sinántima ꞌain: Ënë unikamax ka nusamaira ꞌaish ꞌaisamaira ꞌikë kixun. Ësakin sinani kamina ¿Uisaxun karanuna atu chikínti aín? kiax kitima ꞌain.

¹⁸ ¡Usa aín kamina mix atumi rakuë́tima ꞌain! Rakuë́kinma kamina Diosan ka ꞌapu faraón ꞌimainun egipcio unikama ismainunbi ñu chabu ꞌakëxa kixun sinánti ꞌain;

¹⁹ mitsúnbi kamina bëtsi bëtsi ñu chaiirabu ꞌaia isakën, Nukën ꞌIbu Diosan ka ꞌaisamaira tëmëraiabi Egipto menua chikinuxun ain, kushi mitsu ismikin usokin ꞌakëxa, usokin ꞌa ꞌixun ka Nukën ꞌIbun kamabi ëma amimi mitsux rakuëkë akama egipcio unikama ꞌasaribiokin ꞌati ꞌikën.

²⁰ ꞌAnan ka chaiira rakuëtanun atu ꞌimikin Nukën ꞌIbun axa abáti sinanx unë́këkama a ꞌimainun, axa ñukëma aribi këñutanun ꞌimiti ꞌikën.

²¹ Usa ꞌain kamina atumi rakuë́tima ꞌain, nukaman ꞌIbu Dios kushiira ax, mitsubë ꞌain ka atux mimi rakuë́ti ꞌikën.

²² Mitsun a ëmakama ꞌaia ka munu ꞌanun Diosan mitsu ꞌamiti ꞌikën; usa ꞌain kamina a unikama abë ꞌakanankin ꞌabuinkinshi këñutima ꞌain, usakinmi ꞌashibuinxun këñúkëbë ka ñuina raëkëma ꞌuakamë ꞌëoi ꞌaisamaira mitsu rapasubi ukinbi pitima ꞌikën.

²³ ꞌAínbi ka Diosan a menu ꞌikë unikama ꞌanun ꞌamikin kamabi këñukin ꞌanun mitsu ꞌamiti ꞌikën.

²⁴ ꞌAmikëxun ꞌakin kamina atun ꞌapukama kamabi mitsun kakësokin ꞌanun ꞌamiti ꞌain, ꞌimainun ka mitsun usokin ꞌaia an sinánti uni ënë menu ꞌaíma ꞌiti ꞌikën. ꞌIanan ka atun ëma achúshinënbi mitsun ꞌakëxun tënëtima ꞌikën, usakin ꞌakin kamina achúshirabi bërutanuma këñuti ꞌain.

²⁵ ꞌAnan kamina mitsúnbi atun diosmabi rabikë ñukamaribi në́nti ꞌain, ꞌaínbi kamina ami bikë kuri ꞌimainun manë panshian akama bisa tantima ꞌain; usakin ꞌaibi ꞌatima ñu ꞌati sinania ka Nukën ꞌIbun a upí istima ꞌikën.

²⁶ Usa ꞌain kamina Diosan mitsu ꞌaxuma ꞌanun kakë ñukama a mitsun xubunu buántima ꞌain, usokinmi uania ka Diosan mitsu ꞌaisama oti ꞌiti ꞌikën. A ñukamax ka ꞌaisama okë ꞌiti ꞌikën, usa ꞌikë kamina a ñukama ꞌaisama ka kixun isti ꞌain kixun ka Moisésnën kakëxa.