Deuteronomio 6 - Kashibo-Kakataibo Biblia

Nukën ꞌIbu Diosan bana kikësaibiira ꞌiti Moisés kia

¹ Ënëx ka ax kikësabi oi ꞌiti bana, ꞌimainun a tanti bana, Diosan ꞌën mitsu ꞌunánminun ꞌinánkë ꞌikën, usa aín kamina anumi kuankanti me anuxunbi manukinma, a banakama mitsun tanti ꞌain.

² Usokin kamina mitsun Nukën ꞌIbu Dios ami rabikanti ax kikësabiokin ꞌakánti ꞌain, ꞌai tsókin kamina, a tanti bana ꞌimainun ax kikësabi oí ꞌiti bana, ꞌën ꞌunánmikë ënë mitsun bakë bëchikë ꞌimainun mitsun babakama ꞌunánmiti ꞌain; usakin ꞌai kamina ꞌitsa baritia a menu tsókanti ꞌain.

³ Usa aín kamina, ꞌën aintsi Israelkama mitsun, a bana tankin ax kikësabiokin ꞌati ꞌain. Usakin ꞌakëbë a mitsun ꞌati ñukama upí kuankëbë kamina achúshi ëma ꞌai ënë menu ꞌuakamë ꞌëoti ꞌain, anua a xëati ñu buna rëpasa ꞌaisamaira ꞌianan a piti ñuribi ꞌaisamaira ꞌikë kixuan Diosan mitsun chaitiokëkama ká anu kuanti ꞌain.

⁴ Israel unikama mitsun kamina ꞌën kakëxun kuati ꞌain, Nun ꞌIbu Dios ax ka Nukën ꞌIbu achúshishi ꞌaish ashi ꞌikën.

⁵ Min ꞌIbu Diosmi kamina asérabi kuëëni këmëima sinánti ꞌain, usai ꞌi kamina ami katamëti ax kuëënkësabi ꞌoíshi ꞌiti ꞌain.

⁶ ꞌËn mitsu bërí kakë banakama ënë kamina manukinma upíokin sinánkanti ꞌain,

⁷ ꞌimainun kamina mitsun bakë bëchikëkama ënkinma ꞌunamiti ꞌain; a kamina uinu kara min xubu ꞌikë anuxun ꞌanan uinu kaina kuani anuxunbi ñuixuanan uinu kaina uxi anuxun ꞌanan anumi ꞌuxonkë anuax pëkarakuatsinkëbë nirunuxun ñuixunti ꞌain.

⁸ Ënë banakama, ax kikësabi oi ꞌiti, ënë upíokin ꞌunánkin sinani kamina anun mëtëkërëkikësa ꞌianan anun ꞌunántiorakati min bëmánanu anun bëtëkërëkikësa ꞌiti ꞌain,

⁹ ꞌimainun kamina ꞌitánun ꞌanan mitsun xubu xëkuënuribi ënë bana kuënëoti ꞌain.

Moisésnën a bana kuati usai ꞌiti ñuikin israel unibu ꞌësëa bana

¹⁰ Nukën ꞌIbu Dios an ka mitsu a me ꞌinánuxuan nukën chaitiokë Abraham, Isaac, Jacob akama sinanatëkëntima okin ka a asérabi mitsu ꞌinánti ꞌikën. A ëmakamax ka chaiirabu ꞌaish upíirabu ëma ꞌikën, usa ꞌaish ka mitsun ꞌama a ëmakama ꞌikën;

¹¹ a xubukamanu ka kamabi ñu upíirabu mitsumi buákakin náanma ꞌikën; anua ꞌumpax biti me kini a kamina mitsun naëama ꞌain, ꞌimainun ka anu ꞌikë uvas ꞌapákë ꞌimainun olivos anu ꞌikëkama aribi mitsun ꞌapáma ꞌikën, usa ꞌaínbi kamina anu kuantankëxun mitsun a ñukama panankima puchákin piti ꞌain.

¹² Usakin ꞌaínbi kamina mitsun ꞌIbu ami manútima ꞌain, an ka Egipto menuxun, ñu mëëi ꞌaisamaira tëmëraiabi mitsu chikíankëxa.

¹³ Usa ꞌain kamina Nukën ꞌIbu ashi rabianan ax kuëënkësa okinshi ñu ꞌaxúnti ꞌain, ꞌimainun kamina sinanatëkënkinma asérabi aín anëinshi ñu ꞌati ꞌain.

¹⁴ ꞌAnan kamina mitsu rapasu ꞌikë unikaman dios isa kixun rabikë ñu rabitima ꞌain.

¹⁵ Nukën ꞌIbu Dios an mitsu ꞌakinkë, ax ka ñu ꞌatima ꞌati kuëënima, usa ꞌixun ka mitsun ñu ꞌatima ꞌaia isi nishkin mitsúxmi ñankáishi ꞌi maë rakátanun mitsu ꞌimiti ꞌikën.

¹⁶ Nukën ꞌIbu Dios kamina uisa kara mi oia iskatsi kixun, Masá kakë me anuxun ꞌakansa okin tantima ꞌain.

¹⁷ Usa ꞌain kamina asérabi bëtsi ñu ꞌatimi bërúankakin ax kikësabi oi ꞌiti bana ꞌimainun a tanti bana Dios kikësabiokin ꞌati ꞌain.

¹⁸ Mitsun kamina ax kuëëntisabi okin upí ñuishi Nukën ꞌIbun ismainun ꞌati ꞌain, usakin ꞌakëbëtan ka a ꞌinánnuxua Nukën ꞌIbun mitsun chaitiokëkama ka me upí a mitsu ꞌinánti ꞌikën,

¹⁹ usokinmi ꞌakëbëtan ka Nukën ꞌIbun axa mitsubë ꞌakanainsa tankë unikamaribi ax kikësabiokin abámiti ꞌikën.

²⁰ Uínsaran kara mitsun bakë bëchikëkaman mitsu ñukatia: ¿Uisa kikë kara Diosan ax kikësai ꞌiti bana ꞌimainun a tanti banakama Nukën ꞌIbu Dios kia bana ax ꞌik?

²¹ kixun ñukákëxun kamina mitsun ñuixunti ꞌain: Nukën ꞌIbu Dios an kamabi ñu nu ꞌakinkë ka faraónën Egipto menuxun tëmëramikin ñu mëëmiabi aín kushinbi nukama anua chikíankëxa.

²² Nukaman kananuna isakën bëtsi bëtsi ñu chaiirabu ꞌakian Nukën ꞌIbun Egipto menu ꞌikë ꞌapu aín xubunubi bëtsi bëtsi ñu ꞌaia isakën;

²³ usakin atunu ꞌaia ꞌisia ka Diosan anuabi nu chikínbëtsinkin a ꞌinánnuxua nun chaitiokëkama ka me a binun nu bëakëxa.

²⁴ Usokin bëtankëxun ka Nukën ꞌIbu Diosan nukamanu ax kikësabi oi ꞌiti bana a ꞌunáni ami sinania iskin nu ꞌakinkëx kananuna upí ꞌiti ꞌain, ꞌimainun ka bërí ꞌakësaribi okin anbi nu bërúanuxun ꞌaia.

²⁵ Usokin aín bana kikësokinbi ꞌakëbë ka nun ꞌati ñukamax upí ꞌiti ꞌikën, usa ꞌain kananuna ax kikësabiokin aín bana bëruanxun ꞌati ꞌain, Nukën ꞌIbu Diosan usakin ꞌanun ꞌën mitsu kanun kakësabiokin, kixun ka Moisésnën atu kakëxa.