Deuteronomio 4 - Kashibo-Kakataibo Biblia

Moisésnën Israel unikama usaía ꞌiti ñuixunkin ꞌësëkin ká bana

¹ Bërí kamina Israel unikama mitsun kuati ꞌain, ax kikësaibi ꞌiti bana ꞌën mitsu ꞌunánmikë ami kuanxun ax kikësabiokin ꞌakëbëtan ka a ꞌinánnuxua Diosan nun chaitiokëkama ka a me mitsu ꞌinántankëxun anuax upitax tsónun mitsu ꞌimiti ꞌikën.

² Kamina ënë banakama iskinbi ax kikësama okin bëtsi banakëñun mëskukima ꞌanan achúshi banarabi bikuankima ax kikësabiokin ꞌakin ëntima ꞌain, ꞌën mitsu kakësabiokin; ꞌanan kamina ax kikësaibi oí ꞌiti Dios kia bana usaibi a menu tsókanti ꞌain.

³ Mitsúnbi kamina uisakin kara Israel unikama Nukën ꞌIbun ꞌamikëxun Baal-peor anuxun anua ꞌikë unikama këñunbi atun rabikë dios akama këñunbi këñuia isakën;

⁴ ꞌaínbi ka uikamax kara asérabi ami katamëaxa akamax kuni bamakëma bëríbi tsotia.

⁵ ꞌËn kana mitsu usai ꞌiti ꞌimainun ax kikësai ꞌiti bana Diosan mitsu kanun ꞌë kakë banakama a ñuixuan, usa ꞌain kamina a menu tsóxun ax kikësokinbi ꞌakánti ꞌain.

⁶ Usakin mitsun a banakama kikësokin ꞌai sinánñuirabu ꞌianan ñu ꞌati ꞌunáinrabu ꞌinun mitsu ꞌimikëbë ka bëtsi menu tsókë unikamax kiti ꞌikën: Israel unikamax ka ëma chaiira ꞌianan sinánñuira unibu ꞌikë kiax kiti ꞌikën

⁷ ¿Uinu ꞌikë bëtsi menu ꞌikë unikamax kara kushiira diosñu nu ꞌakësaribi okin an atu ꞌakintiñu ꞌiti ꞌik?

⁸ ¿Bëtsi menu ꞌikë unikamax kara asérabi ax kikësabi oi ꞌiti bana ꞌën mitsu bërí ꞌunánmikë ësaribi banañu ꞌiti ꞌik?

⁹ Usa ꞌain kamina mitsu ꞌakinkia Diosan ꞌaia iskë ñukama, uinsaranbi manukinma abi sinánkin; mitsun bakë bëchikë ꞌimainun mitsun babakamaribi ñuixunti ꞌain.

Moisésnën ꞌain bashi Sinaí anuxun unikama Dios kikë bana sinánmikin katëkëan bana

¹⁰ A nëtë kamami mitsux aín bashi Sinaí kakë anu ꞌain ka Nukën ꞌIbu Diosan ësokin ꞌë kakëxa: Kamabi unikama kamina ꞌën bana kuakin ꞌunánkian uisakinra kara kamabi nëtën ënë menu tsókin ꞌain bakë bëchikamanribi atun ꞌakësaribi okin ꞌanun ꞌunánmiti ꞌikën.

¹¹ Mitsúxmi aín bashi Sinaí kakë a ꞌurama ꞌain ka anuax tsi rëkiruia iskësa ꞌinun a manámi kuarui anuax kuin xapu ꞌunënkësa ꞌianan tunan ꞌinun ꞌiakëxa;

¹² usaía ꞌikëbë ka Nukën ꞌIbu tsi rëkirukësa a mëuküax mitsu kai banakëxa. Mitsúnbi kamina ax banaia kuakën, aín bana kuakinbi kamina, aín nami isanan a ñu ñubi mëratia iskanma ꞌain.

¹³ Nukën ꞌIbunbi ka mitsu ꞌunánmiakëxa achúshi ñu ꞌakin ax ka mapai rabë́ bana maxá paránu kuënëokë ax kikësaibi oi ꞌikin mitsun a tanti bana ꞌiakëxa.

¹⁴ ꞌAnan ka ꞌë a tanti bana ꞌimainun ax kikësoi ꞌiti bana anumi kuanti me anu kuantankëxun mitsu anuxun ax kikësabiokin ꞌati ꞌunánminun ꞌë kakëxa.

Moisésnën Israel unikama Dios isa kixun bëtsi ñu uniotankëxun rabixuma ꞌanun kixun katëkëan bana

¹⁵ Amiribishi ka Moisésnën Israel unikama katëkëankëxa: A nëtë́an nukamabë Dios tsi rëkirukësa nëbëtsinuax banai aín bashi Sinaí kakë anuax kikëbëtan kamina a ñu ñubi iskanma ꞌain. Usa ꞌain kamina bëruinra okanti ꞌain,

¹⁶ bërúankanan kamina uisa ñubi uniokin uni tankin ꞌanan xanu tankinribi uniotima ꞌain,

¹⁷ ꞌanan kamina ñuina tankin unionan ñuina pëchiu tankinribi ꞌatima ꞌain,

¹⁸ axa pukun niríkë ñuinakama tankin ꞌanan kamina bakanu ꞌikë ñuina tankinribi ꞌatima ꞌain.

¹⁹ ꞌImainun kamina manámi bësukin naínua iskin bari, ꞌuxë ꞌispakama, ꞌimainun uisa ñukama kara anu ꞌikë akama iskin a ñukama rabiti sinántima ꞌain, Diosan ka uisa ñu kara anu ꞌikë abi kamabi uninan ꞌinun uniokëxa.

²⁰ Usokin a ñukama unio ꞌixun ka Nukën ꞌIbun mitsu Egipto menuax ꞌaisamaira ñu mëëi anuxun manë xaroti ꞌakë anuax ꞌikësai tëmëraiabi Diosan chikínxun ain uni ꞌinun mitsu ꞌimiakëxa, usa ꞌikë ka ain uni ꞌinun nu ꞌimiaxa.

²¹ ꞌAínbi ka Nukën ꞌIbun mitsun ꞌucha kupí ꞌëmi nishkin ꞌëx isana Jordán kakë baka a sikatima ꞌianan a ꞌinánuxun ka me upí anu bëbatima ꞌai kixun ꞌë kakëxa.

²² Usa ꞌain kana ënë me Moab kakë ënuaxbi ñui Jordán kakë baka a mitsubë sikarakëkiani kuantima ꞌain, usa ꞌain kamina mitsuxëshi kuantankëxun me upíirakama a bitsi kuanti ꞌain.

²³ ꞌAínbi kamina anu kuantankëxun Diosan mitsubëtan achúshi ñu ꞌakë a manutima ꞌain. Manukin kamina a rabinuxun ñu unionan uisa ñubi tankin Diosan a ꞌaxuma ꞌanun mitsu kakë a ꞌatima ꞌain,

²⁴ mitsun ꞌIbu Dios ax ka achúshi Dios an aín unikaman ñu ꞌatima ꞌati kuëënxunkëma a ꞌikën, ¡an ka mitsun ñu ꞌatima ꞌaia iskin tsi rëkirukënëan ñu nënkin këñukësa usaribi okin ꞌati ꞌikën!

²⁵ ꞌItsa baritia a menu tsókin mitsun bakë bëchikënën bëchikë mitsun baba atúnribi Dios rabiti ënkin bëtsi ñubi uniotankëxun a rabitima ꞌikën, usokin ꞌai ami ꞌuchaia isi ka Dios mitsun ꞌakë ñu kuëënima nishti ꞌikën,

²⁶ ꞌën kana bërí mitsu naíkamë ꞌëo ꞌimainun men unin kuakësa ꞌitanua kuamainun kain, ꞌaínbi kamina mitsux ꞌën kakë bana kikësabiokin ꞌaíma anumi tsókankë me Jordán kakë baka ꞌukëmanan ꞌitsama baritia tsókanti ꞌain. Anuax ka ꞌitsama baritiashi tsótankëx raírinëx ñuti ꞌikën.

²⁷ Nukën ꞌIbun ka anumi ꞌikankë me anua bëtsi bëtsi menu ꞌikë unibë mëskutimi abístanun mitsu ꞌimiti ꞌikën, ꞌimikëbë ka ꞌitsamashi mitsun aintsi a menubi tsóti bërúti ꞌikën.

²⁸ Usai anuax abístankëxun kamina unínbia ꞌakë i ꞌimainun maxax ꞌakë a rabinuxun ꞌain, a ñukaman ka isanan, kuanan pianan kaima ꞌianan ka uínima.

²⁹ ꞌAínbi kamina anua usa ñukama ꞌaínbi anuxun Dios kuëënkësabi oi ami katamëkin min nuitunënbi sinánkin ax kuënkësabi okinshi ꞌaia, ka mitsu ꞌakinti ꞌikën.

³⁰ Uínsaran kaina mitsux bëtsi ñu rabi tëmëratankëxbi amiribishi a ëni Nukën ꞌIbumi sinanatëkënkani anun ka

³¹ an ka nuibanairakë ꞌixun nuibakin, ꞌatima otankëxunbi mitsu ëntima ꞌikën, usa ꞌixun ka manukima nun chaitiokëkama sinántëkëntima okin kásabiokin asérabi ax kiásabiokin ꞌati ꞌikën.

³² Mitsun kamina ësokin sinánti ꞌain, bërámabi nëtë ióñu ꞌia ꞌimainun, Diosan ënë nëtënu uni uniotabakin unio; a kamina mitsun kamabi menu ꞌikë unikama atunuribi kara Israel menu ꞌikësaribiti Diosan ꞌakinkëx ñu ꞌiakëxa kixun ñukáti ꞌain.

³³ ¿Anu kara bëtsi menu ꞌikë ëma an mitsun kuakësa okin, Diosan tsi rëkirukësa nëbë́tsinuxun kakëxun kuatíbi nux ꞌikësai bamakëma ꞌiti ꞌik?

³⁴ ¿Anu kara bëtsi dios an ëma achúshi kaískin bëtsi ëmakama nëbë́tsinuxun, ꞌitsaira ñu ꞌanan atun iskëma, bëtsi bëtsi ñu ꞌakin atu rakuëmikin aín kushínbi Egipto menuxun nukama chikínbëtsinkin Diosan bëa usaribi okin ꞌakë ꞌiti ꞌik?

³⁵ Ax ka mitsun unánun usakin Nukën ꞌIbu Diosan ꞌa ꞌikën, ꞌimainun ka bëtsi Dios asérabi asaribi ꞌaíma ꞌikën.

³⁶ Ax ka mitsu naínuxunbi usaími ꞌiti banakama ꞌunánmi kiakëxa, ꞌimainun ka menuxunbi aín kushi ismikin tsi rëkirukësa ꞌinun mëramiakëxa, mërami anuax kia kananuna tsi rëkirukësa nëbë́tsinua aín bana kuakën.

³⁷ An ka nun chaitiokëkama nuibakëxa, ꞌimainun ka aín rëbúnkikamaribi ainan ꞌinun kaískin, aín kushínbi Egipto menua chikíankëxa.

³⁸ Chikínkin ka mitsun ismainunbi a menu ꞌikë unikamaxa ꞌaisamaira ꞌianan mitsusama nun titikaisama kushiirabu ꞌaínbi, anu kuantankëxun atun me binun kiakëxa, usa ꞌain kamina bërí a me mitsunan ꞌinun anu kuantankëxun bitsi kuanti ꞌain.

³⁹ Usa ꞌain kamina a banakama upíokin ꞌunánkin manukima sinánti ꞌain, naínu ꞌianan ka menuribi, asaribi bëtsi Dios ꞌaíma ꞌikën.

⁴⁰ Mitsun kamina a tanti bana ꞌimainun ax kikësabi oi ꞌiti ꞌën bërí mitsu ñuixunkë bana ënë tanti ꞌain, tani kamina min rëbúnki kamabëbi ꞌitsa baritia Diosan mitsu ꞌinánti me anu xënibua ꞌaínbi tsóti ꞌain, kixun ka Moisésnën atu kakëxa.