Deuteronomio 34 - Kashibo-Kakataibo Biblia

Moisés ñukë mainkan bana

¹ Ësokin pain atu kakin sënë́ontankëx ka Moisés, anu uni ꞌikëma me Moab kakë anua ꞌikë Nebo kakë aín bashi rëbu, Pisgá Jericó ëma ꞌukëmanan ꞌikë anu mapërakëakëxa. Anuxun ka Nukën ꞌIbun anu sënënia Galaad kakë me a këñunbia anua Dannën rëbúnki kaman me ꞌiti aribia isnun ismiakëxa,

² ismianan ka anua Neftalí, Efraín, ꞌimainun Manasés a kaman rëbúnkinën me ꞌiti a ꞌimainun kamabi Judánën rëbúnki kaman me ꞌiti anubi sënë́onkin parúmpapa Mediterráneo kakë a këñunbi ismiakëxa,

³ ismianan ka Négueb, ꞌianan Jordán kakë baka, ꞌimainun Jericó ëman bëararakë me sapan anua xëbin ꞌapákësa kian sënënakëkë Sóar ëma ꞌikë akamabi isnun ismiakëxa.

⁴ Ismikin ka Nukën ꞌIbun ësokin kakëxa: Ënë mekama ñuikin kana ꞌën min chaitiokë Abraham, Isaac ꞌimainun Jacob akama kakën, a me kama kana min rëbúnki ꞌinánuxun ꞌain kixun. Usa ꞌain kana anu bëbanuxumabi min bërúnbi isti ꞌën kuëëan.

⁵ Usa ꞌain ka Moisés Diosan uni ax Moab kakë me anuax Nukën ꞌIbun kakësabi oi ñuakëxa.

⁶ Ñuia ka a menubi Nukën ꞌIbu Diosanbi Moab kakë me ꞌukëmanan ꞌikë Bet-peor anu maíankëxa, usa ꞌikë ka bërí nëtënbi uinu ꞌikë unínbi anua maían me a ꞌunánkëma ꞌikën.

⁷ Moisésnëx ka ciento veinte baritiañu ꞌaish ñuakëxa; usa ꞌaish ka aín ñuti nëtë sënë́ntamainun kaniakëtibi ꞌinsínkëma ꞌixun aín nami paë tanima ꞌianan aín bërumi ñukëma ꞌixun upíokin iskë pain ꞌiakëxa.

⁸ Usai ꞌian ka israel unikama Moisés bënini ini achúshi ꞌuxë ꞌimi anu uni ꞌikëma me Moab kakë anuax rarumakëxa, usai ꞌi ka a nëtëkama sënë́mi Moisés ñukë ꞌain masá nuituti nitë́xëti inkankëxa.

⁹ ꞌImainun ka Diosan Moisés kakësabi oi Nunnën bëchikë Josué a ain maxkánu aín mëkën nankin Moisésnën aín sinan ꞌinánkë ꞌiakëxa. Usa ꞌikë ka Israel unibunën aín bana kuakin Moisés Nukën ꞌIbun kásabiokin Israel unikaman Josuénën bana tankëxa.

¹⁰ Usa ꞌaínbi ka uínsaranbi Israel menu bëtsi an Nukën ꞌIbu kikë bana uni ñuixunkë axa Moisés ꞌikësaribiti aín ꞌIbubë aín ꞌunánkë unibë uni banakësai ꞌikë ꞌaíma ꞌiakëxa,

¹¹ ꞌianan ka Nukën ꞌIbun ꞌamikëxun an Egipto menuxun unin ꞌakëma ñu ꞌakin faraón ꞌimainun, an ñu ꞌaxunkë aín unikama ꞌimainun kamabi a menu ꞌikë unikama isnun Moisésnën ꞌasaribiokin ꞌakë uni ꞌaíma ꞌiakëxa,

¹² ꞌimainun ka Diosan aín kushin ꞌamikëxun Moisésnën ꞌasaribiokin an kamabi Israel unibunën ismainunbi ñu chabuira ꞌakin an atu ismikë uni ꞌaíma ꞌiakëxa.