Deuteronomio 32 - Kashibo-Kakataibo Biblia

¹ Ësai ka Moisés kantai kiakëxa, naíkamë ꞌëo ꞌëx kia kamina unin kuakësokin kuati ꞌain, ꞌimainun ka ꞌëx banamainun menribi unin kuakësokin kuati ꞌikën.

² ꞌËn ꞌunánmikë banakamax ka ꞌuí ꞌibúkësaribi ꞌikën, ꞌimainun ka ꞌëx kikë bana ënëx ꞌuí ꞌibúti sainkësaribi ꞌikën, ꞌimainun ka kuénkuru bërí ꞌibúkin ñu ꞌapákë chabókë usaribi ꞌiti ꞌikën, ꞌianan ka ꞌumpax tus kikin anu ꞌibúkin basi chabokësaribi ꞌiti ꞌikën.

³ ꞌËx kana Nukën ꞌIbun anë ñui kiti ꞌain: ¡Nukën ꞌIbu Dios ax ka chaiira ꞌianan upí ꞌikë kixun ka unikaman ꞌunánti ꞌikën!

⁴ Ax ka an nu bërúankë ꞌikën; an ꞌakë ñux ka upíira upí ꞌikën, an ꞌakë ñux ka asérabi upí ꞌikën. Ax ka Dios ꞌaish këmëima asérabi banaia, ¡an ka uínsaranbi an ñu ꞌatima ꞌakë uni abi ꞌatima oima ꞌaínbi ka ënkinma a unikama ꞌatima onuxun ꞌaia!

⁵ Israel unikama ꞌimainun kamabi unin bakë bëchikëma upíokin sinanima ñu ꞌatima ꞌai Diosmi banai kia, usai banai ka aín bëchikë ꞌisama ꞌikania:

⁶ ¿Mitsun kaina usakin Nukën ꞌIbu ꞌati ꞌain? Mitsux kamina ñu ꞌunánkëma ꞌain, usa ꞌaish kamina ñu ꞌunánkëmabu ꞌain. ¿Ax kara min papa ꞌianan an mitsu unio ama ꞌik? ¡An ka mi uniotankëxun mi anun tsóti ꞌinánkëxa!

⁷ Bëráma ꞌia ñukama kamina amiribishi sinántëkënti ꞌain, sinánkin kamina uisai kara nëtë ióñu ñu ꞌiakëxa kixun; min papa ꞌianan min tita ñukánan kamina an bana ñuia kua uni apankama mi ñuixunun ñukáti ꞌain:

⁸ Achúshi okin ka Diosan ax kushiira ꞌixun unikama amanu amanu kuani bëtsi bëtsi menu tsóti kuanun ꞌimiakëxa, ꞌimianan ka uinu kara atun me sënë́nti ꞌikë aribi kamabi menu ꞌikë unikama ꞌunánmiakëxa. ꞌAínbi ka usakin atu ꞌanan Israel unibu aín uni ꞌiti kaisakëxa,

⁹ usakin ka Nukën ꞌIbu Jacobnën rëbúnkikama, aín uni ꞌiti kaisakëxa.

¹⁰ Usa ꞌixun ka anu uni ꞌikëma menua ꞌunánkëxa, a mex ka ꞌumpaxñuma ꞌianan suñun bëkikin ꞌatimokë me ꞌiakëxa; anbi ka nu bërúankin uisai karanuna ꞌiti ꞌai akama nu ꞌunánmikin unían ꞌain bëru napu bërúankësaribi okin nu bërúankëxa.

¹¹ Nukën ꞌIbun ka tëtëkamë ꞌëon aín nánua aín tuá usaía nuanti a tamikin aín pëchi shaíkakin bërúankësa usaribiokin, nu bërúankin ꞌaisama ñu inútisama okin nu ꞌakiankëxa.

¹² Nukën ꞌIbun ka aín unikama ꞌakiankëxa uínbi ka ꞌakianma ꞌikën; ¡Uinu ꞌikë bëtsi diosanbi ka ꞌakianma ꞌikën!

¹³ Anbi ka bëtsi bëtsi bashi ꞌamibiankin me upíira anúnribi nu buánkëxa, buánkin ka menuaxia kookë ñu aín bimi pimianan, maparanu ꞌikë buna rëpa nu xëamiakëxa xëamianan ka ꞌaisamaira maxá anu kóa olivos aín biminu ꞌikë aín xëni nu ꞌinánkëxa;

¹⁴ ꞌianan ka vaca xuma ꞌimainun sëruakin ꞌakë, akama ꞌimainun carnero aín upíirabu kaísun pinun ꞌamiakëxa, ꞌanan ka Basán kakë menu ꞌikë carnero ꞌimainun cabra aín bënëkama aín upíirabu aribi piakën; pianan kananuna trigo aín bimi upíbu pianan, uvas baka chëxëokin vino ꞌakë aribi xëakën.

¹⁵ ꞌAínbi ka Jacobnën rëbúnki, an pitishi sinánkëkama, ꞌaisamaira pi xuati ñuina rërakati aín rani nibánibákikë usai ꞌikinbi, ñuinanëa aín ꞌibu aín taën ꞌakësokin, an unio ꞌixunbi Diosan kakëxun kuaisama tankëxa; usai ꞌikin ka an kakëxunbi kuaisamatankin Dios ënkankëxa.

¹⁶ Usai ꞌikin ka Dios ꞌaisamaira nishmikin bëtsi ñukama rabikin ax kuëënkëma ñuira ꞌakankëxa;

¹⁷ ꞌanan ka Diosmabi bëtsi ñunshin ꞌatima ñuina ꞌaxun këñutanun xaroxuankëxa, a ka uinsaranbia ꞌunánma ꞌixunbi bëríra ꞌunánkinbi; aín papakaman rabia ꞌikëmabi rabiakëxa,

¹⁸ Israel unibu mitsun kamina min papasa ꞌixuan mi ꞌakinkëxunbi manuakën; Dios an mitsu anumi tsóti ꞌinánkë a kamina manukankën.

¹⁹ Usokëxun isi ka Dios ꞌitsaira nishakëxa, nishkin ka mitsun bakë bëchikë bëbu ꞌimainun xanukama ꞌakinkima ëankëxa;

²⁰ ëni ka ësai kiakëxa: Bërí kana ami kasuakëkin ꞌën atu, ¡uisai kara ꞌia isnuxun ënin! Asérabi ka a unikamax ꞌaisama unibu ꞌaish, ami ꞌunánmakin ꞌakinsama ꞌikën.

²¹ ꞌË kamina diosmabi bëtsi dios rabikin nishmian, usa ꞌain kana ꞌënribi mitsu nishmikin ꞌën uni ꞌikëmabi bëtsi uni ꞌën uni ꞌimiti ꞌain, ꞌimikëbë ka atux ꞌatima okin sinani nishti ꞌikën, ¡usa ꞌain kana ꞌën bana kuaisama tankë unikama ꞌën uni ꞌimiti ꞌain, ꞌimikëbë ka ꞌën unikama atumi nishti ꞌikën!

²² ꞌËx xuamati nishkë ax ka tsi rëkiruia iskësa ꞌiaxa, usai ꞌikin ka kamabi ꞌain bashi chairukë; a menu kookë ñu bimiñu xaronan; ꞌain bashi chairukë a tanain ꞌikë me anubi tsi rëkirukënën ñu këñukësa usa aín nishkë ꞌiti ꞌikën,

²³ atunu kana ꞌaisama ñukama atux inúnun ꞌimiti ꞌain, ꞌimikin kana unían aín pia ñuina ꞌakin nikësa usaribi okin ꞌati ꞌain;

²⁴ usakin ꞌakëbë ka ꞌitsisan ꞌianan numinribi këñuti ꞌikën; ꞌianan ka ꞌaisamaira ꞌinsín anun këñuti ꞌikën; usonan kana ñuina raëkëma pianankë ꞌimainun runu ax ꞌakanankë akama an pikëxa këñutanun ꞌimiti ꞌain.

²⁵ ꞌImianan ka atun bëchikëkama ëma nëbë́tsibia manë xëtokën ꞌakëx bamanun ꞌimiti aín, usai ꞌikëbë ka xubunuax unikama ꞌitsaira rakuë́ti ꞌikën; usakëbë ka tuá atun bakë bëchikë ꞌimainun xanu chipashkama, uni xëni ꞌimainun tuá xúma akamabëbi rakuë́ti bërëi këñuti ꞌikën.

²⁶ ꞌËnbi kana ꞌura kuani amami amami abístanun ꞌimiti sinan, ꞌaínbi kana usakin ꞌatima sinántëkëan,

²⁷ ꞌaínbi kana atumi nishkë unikamaxa ꞌëmi kuai kiti ꞌikë kixun sinánkin ꞌakëma ꞌain; ꞌakinma kana atúxa ꞌëmi kuai kánani: Nukën ꞌIbun ka atu ësokin ꞌakëma ꞌikën; nun kushínbi kananuna ësokin ꞌa kiax kiti ꞌikën.

²⁸ Israel ax ka achúshinu ñaká upiti tsóti kuëënkë unibuma ꞌikën; ¡usa ꞌixun upíokin ꞌësëkë ꞌixunbi bana parëkë unibu ꞌikën!

²⁹ Bana kuakë ꞌixun ka, atun kuatsianxa; ꞌianan ka uisai kara atux ꞌiti ꞌikë kixun unántsianxa.

³⁰ ¿Uisaxun kara achúshi unira ꞌixunbi mil uni abámiakëx? ¿ꞌIanan kara rabë́ratsu ꞌixunbi diez mil uni abámiakëx? ¡Nukën ꞌIbun ꞌakinkinbi ënkëka usakin mitsu ꞌakëxa!

³¹ Axa numi nishkë unikamanbi ka upíokin ꞌunánxa, Nukën ꞌIbu Dios ax ka atun dios sama ꞌaish kushiira kushi ꞌikë kixun.

³² Atux ka ñu ꞌapákë ꞌatimanën ꞌatimokin tuákësa ꞌikën, usa ꞌaish ka Sodoma ꞌimainun Gomorra ëmanu tsóa unikaman rëbúnkinëan uvas muka ꞌimainun a pi këñuti ꞌapákë usaribi ꞌikën;

³³ atun uvas baka bikë ax ka runu ꞌakanankë aín paësa ꞌikën, ¡usa ꞌaish ka runun ꞌakëxa aín paënbi uni ñukë ꞌusaribi ꞌikën!

³⁴ Usa ꞌaínbi kana uisakin kara ꞌën unikama ꞌatima oia kixun manukinma sinanin; sinánkin kana ñu kupíira kupíkë ꞌakësaribi okin a manuaxma ꞌinuxun atu bërúain,

³⁵ Anun usakin ꞌati nëtë ꞌikëbëtan kana anun uisakin karana ꞌaisatani usakin ꞌati ꞌain, anun ka a nëtë sënë́nkëbë ꞌatima okë ꞌiti ꞌikën. Anun usakin ꞌati nëtë ka ꞌurama ꞌikën, ¡ꞌIanan ka basimashi usai ꞌiti ꞌikën!

³⁶ Usai ka Nukën ꞌIbu an kaisa unikama bëtsi bëtsi okin ñu mëëmikëxa kushiñumasa ꞌia iskin ꞌakinti ꞌikën; usakin ka Nukën ꞌIbun uniñumasa ꞌinua atubë ꞌikë unikama ꞌimainun aín kushibu akama nëtë́ti ꞌaisamai ꞌiabi atu ꞌakinti ꞌikën.

³⁷ Usai ꞌia iskin ka dioskama ꞌimainun Israel unikama Diosan an kati ꞌikën: ¿Uinu kara mitsun dios amimi katamëanan atun ꞌakinun kixun ñukánan,

³⁸ a rabikin ñuina xarokin aín nami mitsun ñuina xaroxunkin aín xëni pimianan uvas baka vino ꞌakë xëanun ꞌinan atux ꞌik? Kixun ka Diosan kakëxa. An ka ꞌaia ꞌakini niruti ꞌikë. An ka mitsu bërúanan ꞌakinti ꞌikën.

³⁹ ꞌËx kana asérabi Dios ira a ꞌain; usa ꞌain ka ꞌësaribi bëtsi Dioskama ꞌaíma ꞌikën. ꞌËn kana kamabi uni aín tsóti ꞌunanin, ꞌimainun kana anua ñuti nëtë aribi ꞌunanin; ꞌën kana uni ꞌaisama okin ꞌatima oxunbi aín ꞌatimakë a mëníoxunin. Uinu ꞌikë uníxbi ka ꞌëx kushiira ꞌain ꞌën ꞌatima okaskëx ënuax abáti ꞌaíma ꞌikën.

⁴⁰ ꞌËn kana naími okin ꞌën mëkën chaioruin, usa ꞌaish kana asérabi ësai kin: ꞌëx kana uínsaran nëtënbi këñútimoi tsotin usa ꞌaish kana asérabi kin

⁴¹ usa ꞌixun kana ꞌën manë nibánibakikë ꞌitanun kuënuira okin xëtokë anun bëtsi ꞌanux mëníokakësari ꞌiti ꞌain. ¡Atankëxun kana axa ꞌëmi nishkë unikama uisakin karana ꞌaisatani usakin ꞌati ꞌain!

⁴² ꞌAkin kana ꞌën manë paka pia ꞌimainun manë xëtokë anun atu ꞌakin aín imin xëpukan kapabuinti ꞌain; ¡usakin kana atu këñuti ꞌain, usokin ꞌakëx achirabi abátima ꞌikën! ¡usakin kana a ramiokë ꞌimainun ñatankin bikë suntáru aín bu chaxkë́irabu ꞌimainun ꞌapu akamabi ꞌati ꞌain!

⁴³ Usa ꞌain ka Moisés Nukën ꞌIbu rabi kantatankëx sënënishi ësai ki kantakëxa: ¡Kamabi menu ꞌikë unikamaxribi ka Diosan kaískë ꞌaíshmabi aín unikamabë a rabi kantai kuëënti ꞌikën! ¡Usa ꞌain ka Diosan aín unikama an ꞌakë uni a ꞌanan, ain ëmanubi tsókë aín uni Israelkama nuibakin ꞌakinti ꞌikën usakin ꞌakin ka axa aín unikamami nishkë unikamaribi ꞌati ꞌikën!

Moisésnën ashikin Israel unikama usaía ꞌiti ñuixunkin katëkëan bana

^44-45 Usa ꞌain ka Moisés ꞌimainun Josué Nunnën bëchikë ax anua kamabi Israel unikama timë́kamë ꞌëokë anu kuantankëx kantai, aín taëokë anuxunbi pëutankëx, aín sënë́nkë anubi sënëoín kantakëxa.

⁴⁶ Usai kantai sënë́nxun ka Israel unikama kakëxa: Bërí kamina ꞌën mitsu kakë banakama upíokin sinánkin mitsun bakë bëchikëkama ꞌunánmikin ñuixunti ꞌain, atúnribia a tanti banakama kikësaibi ꞌiti ꞌunánun.

⁴⁷ ꞌAínbi ka ënëx bëtsi ñu ꞌakësokin mitsun bënë́kinshi ꞌaisama upíokin sinánxun ꞌati ꞌikën; usa ꞌain kamina a tanti bana ënëx kikësabi oi ꞌi tsóti ꞌitsa baritia ꞌimi Jordán kakë baka a sikarakëtankëxun a me bitankëx anu tsókanti ꞌain.

Anua Israel unikama bëbai kuanti me Diosan Moisés ismia bana

⁴⁸ A nëtënbi ka Nukën ꞌIbun Moisés ësokin kakëxa:

⁴⁹ Anuxun kamina Abarim kakë me anu pain bëbatankëx aín bashi Nebo kakë moabitakaman me Jericó ꞌukëmanan ꞌikë anuxun, kamina israel unikama ꞌën ꞌinánti Canaán kakë me a isi kuanti ꞌain.

⁵⁰ Anuax kamina aín bashi mapërakëtankëx anu rakati ñuti ꞌain, anuax ñui kamina min raran raraitsi kamabë min bëru ñunshin birananti ꞌikën, min xukë́n Aarón aín bashi Hor kakë anuxun ñuia maínkëx aín bëru ñunshin ꞌiásaribiti.

⁵¹ Mi rabëtan kamina ꞌën kakëxun min xukë́n Aarónbëtan Israelkaman ismainun, anua ꞌumpax Meribá-cadés, ꞌikë anu uni ꞌikëma me Sin kakë anuxun, ꞌën kakësokin ꞌaisama tankën.

⁵² Usa ꞌain kamina ꞌuranxunshi usa ka kixun ꞌën Israel unikama ꞌinánti me a isti ꞌain, ꞌaínbi kamina a menu mix bëbatima ꞌain kixun ka Diosan Moisés kakëxa.