Deuteronomio 30 - Kashibo-Kakataibo Biblia

Israelnën rëbúnkikama an kakëxun kuaisama tanxbi ami sinanatëkënia Diosan ꞌakian bana

¹ Uínsaran kara: ꞌËn mitsu ñuixunkësabi oi upí ñu ꞌianan ꞌaisama ñu ꞌia Dios kikësabi oí ꞌia, anun kamina uinu ꞌikë menu kara mitsumi nishkë unikaman mitsu buania a menuxun kamina ënë banakama sinánti ꞌain,

² sinánkin atun dios mitsu rabikë a ënkin kamina min nuitubëtanbi sinánkin ax kuëënkësa okinshi ꞌaia ka Nukën ꞌIbun mitsun bakë bëchikë këñunbi ꞌën bërí mitsu kakë ësokinbi ꞌakinti ꞌikën,

³ usokinmi ꞌaia ka Diosan mitsu ꞌatima oxunbi mëníokin nuibati ꞌikën. Nuibakin ka amiribishi anua bëtsi menu ꞌikë unikaman bëa me anubi mitsu buántëkënti ꞌikën,

⁴ ꞌimainun ka ami nishkë unikaman uinu ꞌikë menubi kara uankëx amanu amanu kuankë ꞌikëbi anuabi Nukën ꞌIbu Diosan mitsun aintsikama ꞌain menubi unun ꞌimiti ꞌikën.

⁵ Usakin ꞌakin ka amiribishi Nukën ꞌIbun anua nun chaitiokëkama tsóa me abia atunan ꞌinun bitëkënun anu buánti ꞌikën; anuxun ka upitax bukukin ꞌain chaitiokë kaman anuxun ꞌasamaira okin ꞌaisamaira bakë bëchipanun ꞌimiti ꞌikë kixun ka kakëxa.

⁶ Usa ꞌain ka Diosan mitsun nuitu mëníokin sinánmianan mitsun bakë bëchikëkamaribi ꞌati ꞌikën, an ka aín bana ꞌunámianan uisakin karamina mitsun a asérabi nuibati ꞌai kixun ꞌunánmiti ꞌikën usa ꞌain ka a aín nuitubëtanbi sinánkin a menu atux upitax ꞌitsa bari ꞌimi tsóti ꞌikën.

⁷ Usa ꞌain ka Diosan mitsun rëbúnki kamami nishkë unikamaxa tëmërai ꞌinun ꞌën bërí mitsu kakë ësai tsónun ꞌimiti ꞌikën,

⁸ usai atux tëmërai tsómainun kamina mitsun Nukën ꞌIbumi sinánkin ax kikësabiokin ꞌanan, ax kikësabira oi ꞌiti bana ꞌën bërí mitsu kakë ënë tanti ꞌain.

⁹ Usakin ꞌaia ka Nukën ꞌIbu kamabi ñuñuira ꞌinun mitsu ꞌimianan, mitsun bakë bëchikëkama ꞌianan atun ꞌarakakë ñuinanën tuákama ꞌimainun atun ꞌapákë ñukama ꞌitsaira ꞌinun ꞌimiti ꞌikën; usakin ꞌaia isi kuëënkin ka mitsun chaitiokëkama asaribi okin Diosan mitsu ꞌakinti ꞌikën,

¹⁰ ꞌaínbi ka asérabi Dios kikësabira oi ꞌiti bana ꞌimainun a tanti bana anbia kuënëonun ꞌamikëxun ꞌën kuënëo ënë tankin, ax kikësabiokin aín nuitubëtanbi sinánkin ꞌati ꞌikën.

¹¹ ꞌËn bërí mitsu ñuixunkë ax kikësabira oi ꞌiti bana ënëx ka mitsunan, tëirama ꞌianan ax kikësabiokin mitsun ꞌaisabi ꞌikën.

¹² Ënë banax ka naínuma ꞌikën, mitsúxmi ësokin sinani ësai kinuma: ¿Uin kara naínu kuantankëx uxun ënë bana kikësabiokin kananuna ꞌati ꞌai kixun ꞌunámikin nu kati ꞌik?

¹³ ꞌImainun ka a banax parúmpapa ꞌukëmanan ꞌikën, mitsux ësai kinuma: ¿Uin kara parúmpapa sikarakëtankëxun ꞌunánbëtsini uxun ënë bana kikësabiokin kananuna ꞌati ꞌai kixun ꞌunánmikin nu kati ꞌik?

¹⁴ Usamaka ax kikësabira oí ꞌiti bana a kamina mitsun upíira okin ꞌunanin, usa ꞌaish ka a banax ax kikësabiokin mitsun ꞌati asábi ꞌikën.

¹⁵ Ka kuat, bërí kamina kuati ꞌain, ꞌën kana añu karamina ꞌati ꞌai kixun mitsu kaiman, ꞌaínbi kamina uisai kaina bukuti ꞌai kixun isanan, uisa upí ñu ꞌai kaina upiti tsóti ꞌai isanan uisa ñu ꞌai kaina mitsúxbi ñuti ꞌain kixun ꞌunánti ꞌain.

¹⁶ ꞌËn bërí mitsu kakë ësokin ꞌakinmi a nuibati ami katamëkin ax kikësabira oi ꞌiti bana ꞌianan a tanti bana kikësabi ꞌia ka Diosan bakë bëchipatimi tsónun mitsu ꞌimiti ꞌikën, ꞌimainun ka anumi mitsux tsóti me anu tsotia mitsu upíokin sinánxunti ꞌikën.

¹⁷ ꞌAínbi kamina mitsun ꞌën kakë banakama ënë kuatima, bëtsi dioskama rabi rantinpuruni ami ꞌikin rabiti sinántima ꞌain,

¹⁸ bëríbi kana ꞌën mitsu ësokin kain ax mimi nishkë unikaman ka asérabi mitsu ꞌati ꞌikën, ꞌakëx kamina ꞌitsa baritiaira tsótima Jordán kakë baka shitátankëxunmi bikë me anu tsókantima ꞌain.

¹⁹ Ënë nëtën kana bërí mitsu kain naí ꞌimainun men ka unin kuankësa okin ꞌën mitsu kaia kuanti ꞌikën, ꞌaínbi ka a menu tsókë unikamax këñuti ꞌikën, usa ꞌain ka upíokin sinánxunkë ꞌimainun ꞌatima okin sinánxunkë ꞌiti ꞌikën, usa ꞌain kamina uisai kaina mitsux tsóti ꞌai isanan uisa ñu ꞌai kara mitsun rëbúnkikama tsóti ꞌikë kixun kati ꞌain;

²⁰ usa ꞌain kamina Nukën ꞌIbu Dios nuibati ami katamëkin ax kikësabiokin ꞌati ꞌain, usakin ꞌai kamina ꞌitsa baritia a me ꞌinánnuxua sinanatëkëntima okin Nukën ꞌIbun nun chaitiokë Abraham Isaac ꞌimainun Jacob ka a menu ꞌiti ꞌain kixun ka Moisésnën kakëxa.