Deuteronomio 26 - Kashibo-Kakataibo Biblia

ꞌApákëx tuatabaia ñu bimi bixun Dios ꞌinánti kia bana

¹ Moisésnën ka bëtsiokin Israel unikama katëkëankëxa: Uínsaran kaina Diosan mi ꞌinánkatsi kia me anu bëbatankëx anu ꞌikani anu kamina,

² a menu ñu ꞌapáxun ax pain tsinasati bimikë a bitankëxun pëkëtia kaki achúshi, uinu kara anuxun a rabiti xubusokin ꞌati Diosan kaisaxa a menu ꞌatankëxun anu uanti ꞌikën.

³ Anuxun ka Sacerdotekaman mitsu kati ꞌikën: ꞌËx kana ësai bërí kin a me ꞌinánkatsi kixuan nun chaitiokëkama Nukën ꞌIbun ka me anu kananuna bërí ꞌain kiax ka kiti ꞌikën.

⁴ Ësai kitankëx sënënia kakimi bëkë a ꞌinánkëxun ka Sacerdotenën bitankëxun anuxun Nukën ꞌIbu Dios rabikin ñuina xaroti ꞌakë anu nanti ꞌikën;

⁵ usakin nani ka Nukën ꞌIbu Diosan kuamainun ësai kiti ꞌikën: ꞌËn rarakamax ka ꞌitsamashi ꞌaíshbi arameo ꞌikësa achúshi menushi tsótima kuaínbëkini tsótankëx Egipto menu kuantankëx anu tsóti bërúakëxa, anuax ka ꞌitsa baritia ꞌikëbë achúshi ëma chaiira ꞌianan kushiirabu ꞌimainun ꞌaisamaira ꞌinun ꞌuakamë ꞌëokëxa.

⁶ Usai ꞌikëbë atumi rakuë́kin ka egipcio unikaman ꞌaisamaira ñu mëëmikin ꞌatimaira okin atu tëmëramiakëxa.

⁷ Usa ꞌain kananuna nun chaitiokë kaman Dios a ñukákën, ñukákëxun ka nun bana kuakin egipcio unikaman ꞌaisamaira okin ñu mëëmikëx tëmërai ñutisari ꞌia an nu isakëxa;

⁸ iskian ax kushiira ꞌixun chaiira ñu ꞌakëbëa Egiptonu ꞌikë unikama ami rakuëkëbëtan ka nukama anua chikíankëxa,

⁹ chikinbëtsinkin ka anua piti ñu ꞌaisamaira ꞌikë ënu bëakëxa, bëtankëxun ka anua a xëati ñu buna rëpasa ꞌaisamaira ꞌianan a piti ñuribi ꞌaisamaira ꞌikë ënë menu nu bëakëxa.

¹⁰ Usa ꞌain kana asábi ka kakin ꞌën ñu ꞌapákë aín bimi tsinasakian anpan tuakëkama Nukën ꞌIbun nu ꞌinánkë me anu ꞌapákëxa bimia bixun bëan. Ësai pain kitankëxun kamina kakinuami bëkë min ñu bimi Nukën ꞌIbu Dios nanxunishi rantinpuruni tsóbukin a rabiti ꞌain.

¹¹ Usakin ꞌaxun kamina achúshi fiesta ꞌakin Dios kamabi ñu ꞌakinkë kupí asábi ka kakin min aintsikamabëtanbi timë́xun ꞌanan levitakama ꞌimainun bëtsi menu ꞌikë mitsubë tsókë unikama abë timë́ax kuëënti ꞌain kixun ka Moisésnën atu kakëxa.

Kamabi ñu ꞌapákë bixun kamaira ꞌinankimabi chukúma chukúmashi ꞌinánti ꞌikë kixun ka bana

¹² Usa ꞌain ka Moisésnën Israelkama usaía ꞌiti bana ñuixunkin katëkëankëxa: Achúshi achúshi bari ꞌikëbëtan kamina mitsun ñu ꞌapákë tsinasatia bimikë a bixun kamaira ꞌinankimabi Dios achúshi achúshi unin ami ꞌinánkë këñúkëbëtan ꞌinánti ꞌikën, ꞌaínbi kamina uínsaran kara rabë́ ꞌimainun achúshi baritia ꞌia anun ñuñuma unikama ꞌianan levita, ꞌimainun mitsubë tsókë bëtsi menu ꞌikë uni, papañuma tuá xanu raëmëkë akamabi ꞌinánti ꞌain, ax ka uinu ꞌikë ëmanu kara ꞌia anuxunbia atun piti ꞌiti ꞌikën,

¹³ usakin ꞌatankëx kamina Diosan kuanun ësai kiti ꞌain: ꞌËn kana ꞌapáxun bikë ñu bimi amo ꞌën xubunu mi ꞌinánti buküanan, ax ka ꞌën mi nanxunti a ꞌikën, ꞌimainun kana levita unikama ꞌianan bëtsi menu ꞌikë unikama axa nun menu tsókë ꞌimainun papañuma tuákama xanu raëmëkë akama ꞌinan. Usakin ꞌakin kana manukinma min bana kikësabiokin ꞌan.

¹⁴ ꞌImainun kana a mi nanxunti nankë ñu akama ꞌën aintsi ñukë ꞌain ꞌatima sinani masá nuituti ꞌianan ꞌuchakë ꞌixun pikëma ꞌain, ꞌianan kana bëtsi menu ꞌikë unikaman ꞌakësokin anua uni ñukë maínkë anu uanxun nanxunkësokin nankëma ꞌain. ꞌËn ꞌIbu Dios ꞌën kana uisokin ꞌanun kaina ꞌë ka usakin mix kikësabiokin ꞌan.

¹⁵ Min kamina naíkamë ꞌëo anuxunbi iskin xubu chaiorukin upíira okin ꞌakë aín manánxun iskësokin iskin, uisai kara ënë menuax ñu ꞌia a ꞌunánin, usa ꞌain kamina min unibu Israelkama upíokin sinánxunin, min nu ꞌinánkë me anua, usa ꞌaish ka ënë menu a xëati ñu ꞌimainun a piti ñu ꞌaisamaira ënu ꞌikën, minmi nun chaitiokëkama a ꞌinánuxun kásabiokin.

Israel kama Nukën ꞌIbun aín uni ꞌaish upí ꞌiti sinánmitëkëan bana

¹⁶ Moisésnën ka amiribishi Israel unikama ësokin katëkëankëxa: Nukën ꞌIbu Dios an ka bërí aín bana kuënëo ꞌimainun ax kikësabi oi ꞌiti bana akamami mitsun min nuitunënbi sinánkin ax kuëënkësabi okinshi mitsun ꞌati kuëënia.

¹⁷ Mitsux kamina bërí Dios ax isa mitsun ꞌIbu ꞌikë kiax kian, kianan kamina ax kikësabi oi ꞌiti bana ꞌimainun a tanti bana kuënëo akamax kikësabiokin tanti ꞌai kian.

¹⁸ ꞌImainun ka Nukën ꞌIbu ësai kiaxa Israel unibu mitsux kamina achúshi ëma asérabi bërí ꞌën unibu ꞌiti ꞌain, ꞌëx kiásabiokin kana ꞌën mitsu kaisakën, usa ꞌain kamina ax kikësabira oi ꞌiti bana a tanti ꞌain.

¹⁹ Nukën ꞌIbu Diosan ka kamabi menu ꞌikë ëmakama ꞌakëxa, ꞌaínbi ka an mitsúxmi ëma achúshi kushiira ꞌaish ainan ꞌikë ñuikania kuati bëtsi ëmakama mitsumi rakuënun Dios kikësabi oi ꞌikanti aín.