Deuteronomio 24 - Kashibo-Kakataibo Biblia

Uisakin kara unin ain xanu ënti ꞌikën kixun Moisésnën Israel kama ka bana

¹ Moisésnën ka amiribishi Israel kama ësokin katëkëankëxa: Uin kara aín xanu kuëënkin aín xanu ꞌiti biti ꞌikën, ꞌaínbi ka aín xanun ꞌixunbi anuxun ñu ꞌatima ꞌaia ax ꞌatima uni ꞌixun kuëënkima, achúshi kirika anbi kuënëoxun ënë xanux ka bërí ꞌën xanuma ꞌikë kixun ꞌatankëxun aín mëkënubi ꞌinánti ꞌikën ꞌinánkin ka aín xubunuaxa chikínun kati ꞌikën.

² Usakian ꞌakëx aín bënëbë ënanani ka aín xubunuax chikíkëa bëtsi unin anun kuënkin bikëxbi ka asábi ꞌiti ꞌikën;

³ ꞌaínbi ka anribia bitëkënkë ain bënëitsi, anribi a xanu anuxun ꞌatima ñu ꞌatëkënia iskin a kuëënkima achúshi kirika abi ꞌatankëxun ꞌinánkin aín xubunua chikínti ꞌikën, ꞌaínbi ka an bikë uni ax ñukëbëtan,

⁴ ax pain aín bënë ꞌia anbi aín xanu ꞌiti bitëkëinsatankibi, bëtsi unin bikëxun ñu ꞌatima ꞌakë a mëníokakëma ꞌikë bitima ꞌikën; ax ka achúshi ñu usai uni ꞌiti Nukën ꞌIbu kuëënkëma ꞌikën, usa ꞌain kamina Nukën ꞌIbu Diosan ꞌinánti me anuax mitsux usai ꞌi kuankantima ꞌain.

Usai ax kikësabi bëtsibë ꞌiti banakama ñuikin Moisésnën ka bana

⁵ Uin kara bërí xanu biaxa a unix ka ꞌakanani kuankëbë kuantima ꞌikën, ꞌimainun ka aín ꞌapun uisa ñu mëëtibi ꞌanun achúshi baritia sënë́ntamainun katima ꞌikën; usakia ꞌakëx ka a unix añu ñubi mëima aín xubunu achúshi baritia sënë́mi aín xanubë upitax ꞌi kuëëni ꞌiti ꞌikën.

⁶ Uibi kamina ꞌën ñu mi ꞌinámainun kamina min anun mëkënan ñu rënkë maxá ꞌë ënxunti ꞌain kixun katima ꞌain, usakin mi ꞌakëx ka a unix anúan aín ñu rënxun piti ꞌaíma ꞌiti ꞌikën.

⁷ ꞌIanan ka uin kara aín aintsi ꞌikëbi Israel uni achúshi anbi ñu mëëmikatsi kixun ꞌanan maruti sinánxun maruti ꞌikëbi mërakë uni ax ka ꞌakë ꞌiti ꞌikën, usokin ꞌakëx ka an ñu ꞌatima ꞌakë unikamax mitsubë ꞌikë ꞌaíma ꞌiti ꞌikën.

⁸ ꞌImainun ka uix kara an nami shurunmikë ꞌinsínan ꞌia an añu ñubi mëima ꞌiti ꞌikën Levitas sacerdote kaman kakësabi oi ꞌiti ꞌikën. Usakin ꞌanun ꞌën kakësabiokin atun ꞌati ꞌikën.

⁹ Mitsun kamina sinánti ꞌain, uisakin kara Diosan Egipto menuax mitsux chikíküatsini ukëbëtan María ami ꞌatimati banaia ꞌakëxa kixun.

¹⁰ Uin kara bëtsi uni ꞌinantëkënuxua ñukákëxun aín kuríki ꞌinánan aín ñu ꞌinania ax ka aín xubunu atsínxun aín ñu bitëkënkinma anbia aín ñu ꞌinántëkënun kaínti ꞌikën.

¹¹ Usai ꞌikinma ka anbia, añu kara ꞌinántisatania a ꞌinánuxun bimainun ëmánxun bëtsi uni kaínti ꞌikën.

¹² ꞌImainun ka uni ñuñuma anu ꞌiti ꞌikën, a kamina aín ñu ñukákëxia chupa anuan mapukë chupañushi ꞌikë a ñukáxun achúshi imë́ anun ꞌiti tíkatankëxun ꞌinántëkënti ꞌain, ax ka anuan rakukë aín chupa achira ꞌikën;

¹³ usa ꞌain ka aín chupa bari xupinbukëbëtainshi anúan imë́ ꞌuxi rakunun ꞌinánkë ꞌiti ꞌikën. Usakin mi ꞌinánkëxuan uni an upíokin sinánxunia ka Diosan min ꞌakë ñu upí isti ꞌikë.

¹⁴ Ñuñuma uni kamina ꞌitsaira tëmixunbi kupíosama tankin tënanpatima ꞌain, ꞌanan kamina mitsun ꞌaintsikama ꞌimainun bëtsi menu ꞌikë uni mitsun ëmanu tsókë ꞌikëbi usokin ꞌatima ꞌain.

¹⁵ Usokin ꞌakinma kamina ñu mëbaitiaishi a nëtënbi kupíoti ꞌain, an ka ñuñuma ꞌixun anun aín piti maruti a kuríki kuëënia. Usokin bënë́kin kupíokëxuma ami tëmikë ñuñuma uni an ñukákëxun ka Nukën ꞌIbun mitsúxmi ꞌuchakë ꞌikë isti ꞌikën.

¹⁶ Uinu ꞌikë papaxbi ka aín bëchikënën ꞌatima ñu ꞌai ꞌuchakë kupín ꞌatima okë ꞌitima ꞌikën, ꞌimainun ka aín bëchikënëxribi aín papan ꞌuchakë kupínribi atima okë ꞌitima ꞌikën, usa ꞌain ka achúshi achúshi unix ñu ꞌatima ꞌaia ꞌuchakë kupí ñukë ꞌiti ꞌikën.

¹⁷ ꞌIanan kamina axa mitsubë tsókë bëtsi menu ꞌikë unikama ꞌatima onan papañuma tuákamaribi ꞌatima otima ꞌain. ꞌImainun ka xanu raëmëkë ñu ꞌinánkin anun rakukë aín chupa a bikuantima ꞌain.

¹⁸ Usa ꞌain kamina manúkantima ꞌain, Egipto menuxun tëmërakin ñu mëëiabi ka anua Diosan mitsu chikíankëxa; usa ꞌain kamina ꞌën mitsu kakë ënë banakama kikësokinshi a tankin ꞌakánti ꞌain.

¹⁹ Mitsun ꞌapákë ñu aín bimi bixunmi manuxun ëbiankë a bitsi kamina anu kuantëkëntima ꞌain; a kamina axa mitsubë tsókë bëtsi menu ꞌikë unikama a ꞌimainun papañuma tuá ꞌianan xanu raëmëkë kaman barikin binun ënti ꞌain, usakinmi ñuñuma unikaman binun ꞌaia ka Nukën ꞌIbu Diosan mitsun ꞌakë ñukama upí ꞌinun ꞌimiti ꞌikën.

²⁰ Uínsaran karamina olivos kakë i aín bimi aceituna a bitsi anun kamina amiribishi aín pëñankama baritëkënbiankin aín bimi bikin tëokë a bitima ꞌain, axa aín pëñanu bërúkë aceituna a ka bëtsi menu ꞌikë uni mitsubë tsókë a ꞌimainun tuá papañuma abëtan raëmëkë xanukaman biti ꞌikën.

²¹ Uínsaran karamina mitsun uvas ꞌapákë bimia aín bimi bitsi anun kamina amiribishi bikin tëxëokëkama barikin bitëkëntima ꞌain; akamina bëtsi menu axa mitsubë tsókë a ꞌimainun tuá papañuma xanu raëmëkë atuan binun ënti ꞌain.

²² Kamina sinánkanti aín mitsux pain kamina Egipto menu tëmëramikin ñumëmikë ꞌiakën; usa ꞌain kamina ꞌën mi kakë banakama ënëx kikësabiokin ꞌati ꞌain, kixun ka Moisésnën Israel unikama kakëxa.