Deuteronomio 19 - Kashibo-Kakataibo Biblia

Moisésnën Israel kama usakin ax këmëi banakëkama ꞌati ñuixua bana

¹⁵ Ësokin ka Moisésnën Israel unikama katëkëankëxa: Achúshi uníxa këmëi banai a unin ka ꞌatima ñuira ꞌakin a tanti bana kikësokin ꞌakinma uni ꞌaxa kikëbëtan kamina asérabi ka ax ꞌikë kixun sinántima ꞌain. Usa ꞌaínbi kamina rabë́ ꞌimainun achúshi uni an usai ka asérabi ꞌiaxa kixun bana ñuiti bëkë axa asérabi ka usakin ꞌaxa kikëbëtan usa ka kixun kati ꞌain.

¹⁶ Usa ꞌaínbi ka an ñu ꞌatima ꞌakë uníxa bëtsi uni ñui a unix ka ñu ꞌatima ꞌai ꞌuchaxa kikëxbi ax këmëia kikë ꞌiti ꞌikën,

¹⁷ usa ꞌain ka axa nishanankë uni rabë́ ax ꞌapunu kuanan Nukën ꞌIbunu ꞌimainun sacerdotekama an bana mëníokë akamanu a nëtën ñu mëkëbë anu kuanti ꞌikën.

¹⁸ Anuxun ka an bana mëníokë aín ꞌapukaman uni rabë́ bëruinra oxun uisai kara ꞌiaxa kixun upíokin ñukati ꞌikën, ñukákëxia, ax bëtsi unimi manánkë ax këmëkë ꞌain ka,

¹⁹ bëtsi uni ꞌatima oti sinanx ami këmëi manánkë uni axbi ꞌatima okë ꞌiti ꞌikën. Usakin ꞌakëbë ka an ñu ꞌatima ꞌatishi sinánkë uni raíri ax mitsunu ꞌaíma ꞌiti ꞌikën.

²⁰ Usakin ꞌaia isi rakuë́kin ka aín patsan kamax ñu ꞌatimaira ꞌati sinanima rakuë́ti ꞌikën.

²¹ Usa ꞌain kamina uin kara bëtsi uni ꞌaia a nuibakinma ꞌaxun rankanti ꞌain, uin kara bëtsi unin bëru ꞌatima oia ax ka usaribi okin ain bëru ꞌatima okë ꞌiti ꞌikën. ꞌImainun ka uin kara bëtsi unin xëta ꞌatima oia aín xëtaribi ꞌatima okë ꞌiti ꞌikën, ꞌanan ka uin kara bëtsi unin mëkën ꞌatima onan aín taëribi ꞌatima oia a uninanribi ka bëtsi unin aribi ꞌakë ꞌiti ꞌikën kixun ka Moisésnën kakëxa.