Deuteronomio 18 - Kashibo-Kakataibo Biblia

Asaribi ꞌixun ꞌain bana ñuixunti achúshi uni ka Diosan ꞌinánuxun ꞌaia kixun Moisés ká bana

¹⁴ Moisésnën ka Israel unikama bana ñuixunkin ësokin kakëxa: A mekama anumi mitsux kuanti anu ꞌikë unikamaxa usai ka ñu ꞌiti ꞌikë kiax kimainun ka an ñunshinan ꞌamikëxun ñu tankë unikamaxribi kiti ꞌikën; ꞌaínbi ka usakinra a ñukama ꞌanun Diosan mitsu ꞌamitima ꞌikën.

¹⁵ Usa ꞌaínbi ka Nukën ꞌIbu Diosan mitsunuaxa achúshi uni an Dios kikë bana ñuikë ꞌën mitsu ñuixunkësaribi okían ñuixunun ꞌimiti ꞌikën, aka mitsun rëbúnki kaman aín bana tanti ꞌikën.

¹⁶ Ënëx ka asérabi ꞌikën, mitsux kamina anumi aín bashi Sinaí kakë anu timë́xun Dios ñukati kamina ësai kikankën: bërí kananuna amiribishi Nun Diosan kakëxun kuatëkëinsama tanin, ꞌimainun kananuna chaiira ꞌinuan tsi rëkirukësai ꞌikë aribi bamatima kupín istisama tanin kiax kiakën.

¹⁷ Usai mitsux kia okin ka Nukën ꞌIbun ꞌë kakëxa: Asabi ka usaími kikë ax ꞌikën.

¹⁸ ꞌËn kana atunuaxa achúshi uni an ꞌën bana ñuiti uni ꞌimiti ꞌain, min ꞌakësarabi okin an bana ñuixunun ꞌimiti ꞌain, an ka mitsun aintsibi ꞌixun ꞌën kakë banakama mitsu ñuixunti ꞌikën, ꞌimainun ka ꞌën kakë banakama abi mitsu ñuixuntëkënti ꞌikën.

¹⁹ Uikaman kara an ꞌën bana ñuikë unix ꞌën anë ñui kia kuaisamatankin ax kikësa okin ꞌaisama tania a kana ꞌën ꞌatimokin uisa karana oisatani usokin ꞌati ꞌain.

²⁰ ꞌAínbi ka ꞌën bana ñuikë uni ꞌixunmabia an ꞌën kakëxunmabi bana ñuikë, a ꞌimainun bëtsi dios ñuikin uni bana ñuixunkë a unikamax ka ꞌakë ꞌiti ꞌikën.

²¹ Mitsun kamina ësokin sinánti ꞌain: ¿Uisaxun karanuna ax ka Nukën ꞌIbu kikë bana ꞌikë kixun a ꞌunánti ꞌain? ësokin sinánkin kamina mitsun ꞌunánti ꞌain:

²² An bana ñuikë uni axa Nukën ꞌIbun anë ñui kikë ꞌaínbia ax kikësabi oi ꞌitia kikë usai ñu a ꞌikëbëtama kamina mitsun ꞌunánti ꞌain, ax ka Nukën ꞌIbu kikëma bana ꞌiaxa kixun, usa ꞌain kamina an bana ñuixunkë uni ax ka axbi rabiakati kiaxa kixun ꞌunáni, mitsux ami rakuë́tima ꞌain, kixun ka Moisésnën kakëxa.