Deuteronomio 13 - Kashibo-Kakataibo Biblia

¹ Anumi mitsux ꞌikë anuaxa achúshi uni an bëtsi dios ñuikin bana ñuikë ꞌimainun an unin namákin iskë ñuikë uni këmënux mëraxun usai ka ñu ꞌiti ꞌikë kixun ñuikëbëa,

² ax kikësabi oí asérabi ñu ꞌikëbëtan ka mitsu kati ꞌikën: ¡Asabi ka, bërí kananuna anu kuanxun nun ꞌunánkëma; bëtsi dios rabi kuanti ꞌain!

³ kixuan kakëxunbi kamina mitsun aín bana kuatima ꞌain. Nukën ꞌIbu Diosan ka asérabi karamina mitsun a nuibati ax kikësabiokin ꞌai ami sinani isnuxun mitsu tankin usakin ꞌati ꞌikën.

⁴ Usa ꞌain kamina Nukën ꞌIbu Dios ashi an kakësabiokin ꞌakin; ax kikësaibi oi ꞌikin a bana kuakin ashi rabikanti ꞌain.

⁵ ꞌImainun kamina an bana ñuixunkë uni ꞌimainun an namákin isun usaika ꞌiti ꞌikë kixun bana ñuikë uni a mitsunu mëratia ꞌati ꞌain, a unin ka Dios an Egipto menuxun tëmërakin ñu mëëiabi mitsu chikían ax kikësa okin ꞌanun ꞌën kakë usakin ꞌaxuma ꞌanun kixun mitsu ꞌunánmiti ꞌikën. Usakinmi ꞌakëx ka mitsunuax uni ꞌatima sinánñukama ꞌaíma ꞌiti ꞌikën.

⁶ Bërí kana achúshi achúshi mitsu kain, min xukë́n apan ꞌianan ꞌanáka, mitsun bëchikë bëbu ꞌianan xanu ꞌianan ami kuëënkë min xanu, ꞌimainun abëmi nuibanairakë uni, ꞌianan mitsun papanbi bëtsin kuanumashi kakëxunbi kamina ꞌatima ꞌain,

⁷ a dios kamax ka mitsu ꞌurama ꞌikë ëma kamanuxun rabikë a ꞌikën, usa ꞌaish ka mitsu ꞌurama ꞌianan mitsu ꞌura ꞌixun, mekamanuxun amo amoxun mikama bëararati ꞌikën,

⁸ usa ꞌain kamina atux ꞌikësai ꞌima ꞌianan atun kakëxun aín bana kuatima ꞌain; ꞌianan kamina atu nuibatima ꞌain; nuibakin kamina tëmëraiabi atu ꞌakintima ꞌain, ꞌanan kamina atún ꞌakë ñu unëi atubë nitima ꞌain;

⁹ unëkima kamina a unikama rëti ꞌain. Rëkin kamina min pain atún ꞌakëxumaishi mitsun pain, ꞌaia iskin ka raíri unikamanribi usaribikin ꞌati ꞌikën.

¹⁰ ꞌAkin kamina maxaxan bamatanun ꞌati aín, ax aín kuëënkësa okin ꞌakin Nukën ꞌIbu Dios an nu Egipto menuax tëmëraia chikían a ënti sinánmikë kupí kamina usakin a unikama ꞌati aín.

¹¹ Ësokin mitsun a unikama ꞌaia isí ka Israel unikama bëtsi ñu atún ꞌakësokin ꞌatimi rakuë́ti ꞌikë kixun ka Moisésnën kakëxa.