Deuteronomio 12 - Kashibo-Kakataibo Biblia

Anuxun Dios rabiti upira okin ꞌa bana

¹ Moisésnën ka Israel unikama ësokin kakëxa: Ënë banakamax ka mitsun chaitiokëkama Diosan ꞌinánti me anuxunbi ꞌati ax kikësabi oi ꞌikanti a ꞌikën.

² Usa ꞌain kamina a menu ꞌikë unikama abë ꞌakanankin këñutankëxun anuxuan atun dios a rabikë, ain bashi, matá me ꞌimainun in papa pëñanakëkë a tëmúxuan atun, dios rabikë akama këñuti ꞌain.

³ Këñuanan kamina a rabinuxun ñu tankin ꞌakë, maxá akama tukapanan, imo chakama xaronan anuxuan ain dios rabikë, akamabi këñuti ꞌain, usakin ꞌan ka uinu ꞌikë uníxbi ami sinántëkëntima ꞌikën.

⁴ Usa ꞌain kamina mitsun Nukën ꞌIbu Dios, atúan aín dioskama rabikësa okin rabitima ꞌain.

⁵ ꞌAínbi kamina mitsun aintsi ñaká achúshi anu tsókë me a Nukën ꞌIbun kaísa anu xubusa okin chupa ꞌatankëxun anuxun ashi rabi kuanti ꞌain.

⁶ Anuxun kamina ami sinánkian raírinën ain ñuina rëtankëxun ꞌaímai xarátanun xaromainun kamina mitsun ñukama raíri ꞌinánan, a ꞌinánti manë panshian ꞌinánan, a ꞌinánti nankë ꞌimainun, a ꞌinánti kuëënxun ꞌinánkëkama këñunbi, ain ñuinakaman tuatabakë aín upí akamaribi ꞌinánti ꞌain.

⁷ ꞌInánkin kamina xubusa okin chupa ꞌakë anuxun mitsun aintsikamabëtanbi xara okëxa tëxëkëkama kuëënkin piiti ꞌain, ax ka ñu mëia Diosan mitsun ñu ꞌapákë ain bimi ꞌimainun mitsun ñuinakamaribi ꞌaisamaira ꞌinun ꞌimikë ꞌikën.

⁸ Usa ꞌain kamina mitsun a menuxun ënuxunmi ꞌakësa okin, mitsun ñuina amanuxun xarotima ꞌain.

⁹ Usa ꞌaínbi kamina anu mitsux upitax bukukanti Nukën ꞌIbu Diosan mitsu ꞌinánti me anu bëbakëmapain ꞌikanin.

¹⁰ Usa ꞌain kamina Jordán kakë baka shitákiani kuantankëxun a me anu tsónuxun, binux abë ꞌakanankin anu ꞌikë unikama maëmitankëxun an mitsu ubioti uni ꞌaíma ꞌaimi upitax anu bukukanun bitsi kuanti ꞌain,

¹¹ usa ꞌain kamina mitsun uinu kara Diosan anuxun a rabiti me kaisia anuxun xubusa okin chupa ꞌakë a nantëkëni anuxun kamina Dios ꞌaxunkin ñuina xaroti ꞌain, raírinëan ꞌaímai këñutanun ꞌamainun ka, raírinënribi ꞌaimairai këñutanuma xuiti ꞌikën, ꞌimainun ka atun ñu ꞌapákë kamaira ꞌinankima uiti ꞌitsa kara ꞌinánti ꞌikë atishi ꞌinánti ꞌikën, ꞌinámainun ka uin kara manë panshíanën kupíoia an kupíomainun, ka uin kara a ꞌinánti nanxa akamaribi ꞌinánti ꞌikën.

¹² ꞌImainun kamina anuxun Nukën ꞌIbu Diosan isnun fiesta ꞌakin, mitsun bakë bëchikëkama ꞌimainun an mi ñu mëëxunkë unikama ꞌimainun axa mitsubë ꞌikë, levita unikama mitsún biti me a bitima ꞌikën.

¹³ ꞌImainun kamina Nukën ꞌIbumina bëtsi menuxunbi ñuina rëxun raroxuni bërúankati ꞌain;

¹⁴ usakin ꞌakin kamina uinu ꞌikë menuxun ꞌanun kara Diosan kaisakëxa, anuxuinshi ꞌakin anua bëtsi unikama tsóa me anuxun ꞌati ꞌain, anuxun kamina ꞌën mi kakësabiokin ꞌati ꞌain.

¹⁵ ꞌAínbi kamina mitsun ñuina ꞌarakakë ꞌanan ꞌarakakëma aribi piisatankin uinu karamina ꞌi anuxunbi Nukën ꞌIbu Diosan mi ꞌinánkëxun piti ꞌain. A nami ka kamaxunbi uix kara mëníokakë ꞌimainun mëníokakëma ꞌikë akamanbi chaxu nami ꞌakësokin piti ꞌikën.

¹⁶ ꞌAínbi kamina a ñuinakama aín imikëñun pikinma ain imi ꞌaimakin ꞌibumitankëxun xuixun piti ꞌain.

¹⁷ Usa ꞌain kamina anumi ꞌikankë ëma anu xubusa okin ꞌakënuxun rabiti ꞌakë anuxun mitsun trigo ꞌapáxun kamaira ꞌinánkimabi ꞌinánkë a ꞌianan uvas baka, xëni ꞌimainun tuatabakian mitsun ñuinanën tuákë akama ꞌimainun Nukën ꞌIbu ꞌinánuxun nankë ꞌianan a ꞌinánti sinánxun nankë akama pitima ꞌain.

¹⁸ ꞌImainun kamina Nukën ꞌIbu Diosan isnun ꞌakin mitsun uinu kara an kaisia, anuxun Diosan ismainun ꞌakin mitsun bakë bëchikëkama ꞌimainun an ñu mitsu mëëxunkë ꞌimainun mitsun aintsi levita unikama atubëbi timë́xun mitsun ñu ꞌapákë ꞌain bimi bixun pi kuëënti ꞌain.

¹⁹ ꞌIanan kamina a menu tsókin mitsun aintsi levita unikama uínsaranbi manutima ꞌain.

²⁰ Uínsaran kara Diosan anumi mitsux ꞌikankë me a cha ꞌinun ax kiásabiokin ꞌinántëkënia anuxun kamina uínsaran kaina, nami písa tani anun mitsun kuëënkësa okin nami piti ꞌain.

²¹ Anuxun a rabiti xubu ꞌatia Nukën ꞌIbu Diosan mitsu ꞌura kaisa me anu ꞌaínbi kamina a ꞌura ꞌixunbi anuxun mitsun ꞌarakakë, vaca ꞌimainun ovejakama Nukën ꞌIbu ꞌinánkëkama a rëxun piti ꞌain, anumi mitsux ꞌikë me anuxunbi, usakin ꞌai kamina xubusa okin chupa ꞌakë anu kuantima ꞌain.

²² Usakin ꞌakin kamina chaxu nami mëníokaxumabi kamaxunbi mitsun pikësa usakinbi ꞌati ꞌain.

²³ ꞌAínbi kamina uisaxunbi ñuinanën imi pitima ꞌain, aín imi kupí ka ñuina nitsia, usa ꞌain kamina ñuina ain imikama këñunbi pitima ꞌain.

²⁴ Usa ꞌain kamina piti ꞌanuxun pain aín imi ꞌaimakin ꞌibúmiti ꞌain.

²⁵ Usakin mitsun ñuina imi pikëbëma ka mitsun ꞌati ñukamax upí ꞌimainun, mitsun bakë bëchikë kamanribia ꞌakë ñukamax Nukën ꞌIbun iskëx upí ꞌiti ꞌikën.

²⁶ ꞌAnan kamina Dios ꞌinaishiti sinánxun nankë ñukama a ꞌimainun Nukën ꞌIbu ꞌinánuxun sinánkë akamabi uinu kara anuxun a rabiti xubusa okin ꞌati an kaisia anu atankëxun nanti ꞌain,

²⁷ anuxun kamina mitsun Dios ñuina rëxun xaroxunti ꞌakë anuxun xaroti ꞌain. ꞌAnan kamina ñuina a rabikin ꞌakin min aín imi bikë a anuxun Dios ñuina xaroxunti ꞌakë anu chikuti ꞌain, ꞌanan kamina aín nami piti ꞌain.

²⁸ Usa ꞌain kamina ꞌën mitsu kakë banakama ënë kuakin mitsun ꞌën kakësabiokin ꞌati ꞌain, usakin ꞌai kamina mitsun bakë bëchikëkamabëbi upí tsóti ꞌain, usakin ꞌaia ka Diosan upí ꞌikë isti ꞌikën.

Moisésnën Israel kama bëtsi ñu rabixuma ꞌanun kixun ꞌësëkin ka bana

^29-30 Uínsaran kaina Diosan ꞌakinkëxun ꞌakin a menu tsókë unikama abë ꞌakanankin këñutankëx a me ꞌibuai mitsux anu tsóti, anun kamina a unikaman ꞌakësaribi okinmina atúnbi ꞌaxun rabikë dios atun ꞌakësaribi okin rabiti sinani bërúankati ꞌikanin.

³¹ Usakin kamina atun akësokin Nukën ꞌIbu Dios rabitima ꞌain, atun ka aín dioskama rabikin atun bakë bëchikëbi xaroxunkin rabia, usakian atun ꞌakë a kamina min kuëënima.

³² Usa ꞌain kamina mitsun ꞌën kakë banakama ënëx kikësabiokin ꞌanan; uisaxunbi mëskukin ꞌën nankë banakama nantima ꞌain, kixun ka atu Moisésnën kakëxa.