Deuteronomio 10 - Kashibo-Kakataibo Biblia

Amiribishi Diosan ꞌatabakin kuënëo ꞌikëbi achúshi bana këñutima okin ꞌakë a kuënëotëan bana

¹ Nukën ꞌIbun ka ësokin ꞌë kakëxa: Minbi kamina maxá pará rabë́ a pain mi ꞌinánkë usabi okin ꞌati ꞌain, ꞌanan kamina achúshi ñu bunántisa okin i ꞌati ꞌain, ꞌabiankin abi buani kamina aín bashinu ꞌëbë banai mapërakëti ꞌain.

² ꞌËn a pain mi ꞌinánkë maxá pará anu kuënëokë ꞌikëbimi tukakë banakama abi kana anu kuënëotëkënti ꞌain, a kamina bunántisa anu nanti ꞌai kixun ka Diosan ꞌë kakëxa.

³ Kakëxun kana bunántisa okin i acacia kakë a ꞌakën, ꞌanan kana maxáx rabë́ pará okin ꞌakën, ꞌaxun a buani kana aín bashi mapërakëakën.

⁴ Anuxun ka Nukën ꞌIbun maxá pará rabë́ anu mapai rabë́ axa kikësabi oi ꞌiti aín bana kuënëokëxa, a paian aín bashinuxun nukamax timë́kë ꞌain tsi rëkirukësa mëuxun ꞌa usabi ꞌitánun. Kuënëoxun ꞌë ꞌinánkëxa,

⁵ ꞌinánkëx kana ꞌëx aín bashinuax taramëkëbuakën; usai taramëbutankëxun kana bunántisa okin ꞌakë anu maxá parókin ꞌakë rabë́ anu ꞌaruakën Nukën ꞌIbun ꞌë kakësabiokin, ax ka anu nan ꞌaish bëríbi anubi ꞌikën.”

¹⁰ ꞌËx kana cuarenta imë́ ꞌimainun cuarenta nëtë bërámabi ꞌitabati ꞌikësabi aín bashinu ꞌiakën, ꞌimainun ka amiribishi ꞌën kakëxun kuakin Diosan mitsu këñutisa tankinbi ꞌama ꞌikën,

¹¹ ꞌakima ka ꞌë ësokin kakëxa: Kuantankëxun kamina min aintsikama mëníokanun kai kuanti ꞌain ꞌën a ñuikin aín chaitiokëkama, aín rëbúnki ꞌinánuxun ka me a bitsi kuanuxa mëníokanun kixun kamina kai kuanti ꞌain.

Usai Israel kama ꞌitia kia Diosan bana

¹² Usa ꞌain ka Moisésnën israel unikama kakëxa: ¿añumi mitsun ꞌati kara Diosan kuëënin? An ka kuëënia ax kikësabiokin aín bana kuakin, nun nuitu upí ꞌixun nuibakin ami sinánkin rabiti,

¹³ ꞌimainun ka axa kikësaibira oi ꞌiti bana ꞌimainun a tanti bana ꞌai kamina mitsux upítax bukuti ꞌain.

¹⁴ ꞌAínbi kamina mitsun sinánti ꞌain Nukën ꞌIbu Diosnan ka naíkamë ꞌëo ꞌimainun a ꞌurira ꞌikë ñukama ꞌimainun menu ꞌikë ñukamaxribi ka ainan ꞌikën.

¹⁵ Usa ꞌain ka Nukën ꞌIbu nun chaitiokëkama nuibakëxa, nuibakin ka aín rëbúnkikama kaisakëxa, a kananuna nux ꞌain, usa ꞌaish kamina bëtsi ëmanu ꞌikë uni kamasama ënu nux bërí ꞌain.

¹⁶ Usa ꞌain kamina achúshi ñu ꞌakë kikë bana manukin mitsun nuitu iruakinma sinánti ꞌain,

¹⁷ Nukën ꞌIbu Dios ax ka achúshi ꞌaish dios kamasamaira ꞌianan, ꞌibukaman ꞌIbu samaira ꞌikën; ax ka Dios kamabi ñu manámi ꞌikë ainan ꞌianan ꞌApuira ꞌaish kushiira ꞌikën, usa ꞌain kamina ami rakuë́ti ꞌain, an ka bëtsi unikama upionan bëtsi unikamaribi ꞌatima oíma, ꞌimainun ka upiokinshi ñu ꞌaxúnti kuëënia;

¹⁸ an ka tuá papañuma ꞌimainun xanu kasunamëkë nuibakin aín piti ñu ꞌinánan aín pañuti chupa bëtsi menu ꞌikë unikama mitsubë tsókë akama këñunbi ꞌinania.

¹⁹ Mitsun kamina bëtsi menu tsókë unikama nuibati ꞌain, mitsux pain kamina bëtsi menu tsókë uni ꞌaíshbi Egipto kakë ëmanu tsókankën.

²⁰ Usa ꞌain kamina Nukën ꞌIbu Dios ashi rabianan ënkinma ax kuëënkësabi okinshi ꞌakánti ꞌain, ꞌimainun kamina sinántëkëntima asérabi aín anën ishi kana ñu ꞌati ꞌai kiti ꞌain.

²¹ Ax ka mitsun ashi rabiti Dios a ꞌikën; usa ꞌixun ka ax Dios ꞌixun mitsu kupí ñu chaiirabu mitsun ismainunbi ꞌakëxa.

²² Usa ꞌain ka mitsun chaitiokëkama Egipto menu bëbakë atux setenta unishi ꞌiakëxa, ꞌaínbi ka bërí Nukën ꞌIbu Diosan atúxa ꞌuakamë ꞌëonun ꞌimikin ꞌispa naínua imë́ iskësaira ꞌinun ꞌimiakëxa kixun ka Moisésnën kakëxa.