Deuteronomio 1 - Kashibo-Kakataibo Biblia

Moisésnën ashikin Israel unibu usai bëráma ꞌikan bana ñuixuntëkëan

¹ Ënë banakama ka Moisésnën kamabi Israel kama anu uni ꞌikëma me amiaxa bari urukë Jordán kakë baka anuxun ñuixuankëxa, ax ka anua uni ꞌikëma me Arabá kakë Suf kakë a ꞌukëmanan anu ꞌiakëxa, ax ka Parán, Tófel, Haserot ꞌimainun Dizahab kakë anu ꞌiakëxa.

² Aín bashi Sinaí anuax kuantankëx Cadés-barnea kakë anu bëbai kuani kuanti ka mapai rabë́ ꞌimainun achúshi nëtë niti ꞌiakëxa, ax ka anun Seír kakë me ꞌikëbia Edom kakinribi anëkë me anu kuanti bai a ꞌiakëxa.

^3-4 Treinta ꞌimainun nueve baritia ꞌitankëxa cuarenta baritia ꞌirukë anua atux nitsi në́a a sënë́nkëbëa mapai rabë́ ꞌimainun achúshi ꞌuxë ꞌirutabakëbëtan ka Israel unikama kakëxa, Moisésnën ka ënë banakama kaisama pain ꞌixun abë ꞌakanankin Sihón kakë amorreo unikaman ꞌapu axa Hesbón menu tsókë a ꞌimainun, Og kakë axa Bazán menu ꞌianan Astarot kakë ëmanu tsókë ax ka Edrei kakë me anu ꞌiakëxa. Usa ꞌikë ka Moisésnën Israel unikama Nukën ꞌIbu usai atux ꞌitia kanun kakë a banakama kakëxa.

⁵ Moisésnën ka amiaxa bari urukë Jordán kakë baka anu ꞌikë Moab kakë me anuxun Israel unikama usaía ꞌiti banakama ñuixunkin kakin pëuakëxa:

⁶ Nukën ꞌIbu Diosan ka aín bashi Sinaí kakë anuxun ësokin nu kakëxa: Mitsux kamina ꞌitsa baritia ꞌimi aín bashi tanain ënu ꞌian.

⁷ Usa ꞌain kamina mitsun ñu mëniobiani anua amorreo unikama ꞌimainun a ꞌurama ꞌikë unikaman me anuribi kuanti ꞌain: Ax ka Arabá kakë me ꞌimainun bashiñu me ꞌimainun, me sapankama ꞌianan Négueb kakë me ꞌimainun parúmpapa chá aín kuëbí anua cananeokama ꞌikë a këñunbi Líbano, anuxunbi chaiira baka Éufrates kakë akamabi bitsiküanti ꞌain.

⁸ ꞌËn kana a mekama mitsu ꞌinánuxun sinánkën; usa ꞌain kamina kuantankëxun a mekama biti ꞌain bikëkana ꞌën mitsun bikë kuati ꞌain, ax ka mitsun chaitiokëkama sinanatëkëntima okin ꞌinánuxun ꞌën ka a ꞌikën, akamax ka Abraham Isaac ꞌimainun Jacob aín rëbúnkikama ꞌinánuxun ka me a ꞌikën.