Daniel 9 - Kashibo-Kakataibo Biblia

Danielnën aín aintsikama kupín Dios ñuká bana

¹ “Darío Asuero kakë uni ꞌain bëchikë medos kakë ñakánu ꞌikë, ax ka Babilonia unikamanu ꞌapu ꞌiakëxa.

² Axa ꞌapu ꞌitabakë baritia anun kana ꞌën an Dios kikë bana ñuikë Jeremías an kuënëo banakama a ꞌiskin ꞌakin ꞌunánkën, a ka Diosanbi setenta baritia ꞌimia uisai kara Jerusalén masókë ꞌiti ꞌikë kixun Nukën ꞌIbun ain bana uni ñuixunkë a kakëxa.

³ Usa ꞌain kana añu ñubi pima chupa xëni pañuax chimapunu tsókin ësokin Dios ñukákën.

⁴ Ñukákin kana ësakin Dios kakën: Nukën ꞌIbu Dios chaiira ꞌianan kushiira min kamina mix kikësabiokin ñu ꞌakin, nuibanankë ꞌixun min kikësabiokin kara min unikama ñu ꞌaia isin, a tanti min bana a kara asérabi ꞌaia kixun isin:

⁵ nukamax kananuna ꞌatima ñu ꞌai ꞌuchan; usai ꞌikin kananuna ꞌatima ñuira an; ꞌianan min usai tsóti kuëënkë a ꞌunánimabi ꞌian; usai ꞌikin kananuna a tanti min banakama kikësokin ꞌanan, min sinánmikësoi ꞌisama tan.

⁶ ꞌIanan kananuna an min bana ñuikë min unikama kakëxunbi kuaisamatan, atun ka nun ꞌapukama ꞌimainun nun kushikama ꞌianan nun chaitiokëkama ꞌimainun kamabi Israel unikama min anë ñuikin bana ñuixuankëxa.

⁷ Nukën ꞌIbu Dios mix kamina uisa ñu ꞌatimabi ꞌakëma a ꞌain, ꞌaínbi kananuna judíos unikama nux bërí rabinkësa tanin; Jerusalénnu tsókë ꞌimainun raíri Israel unikama ꞌimainun, ꞌurama ꞌikë ꞌianan ꞌura ꞌikëkama min kakësa okin ꞌaiama, min ꞌamikëxun axa numi nishkë unikaman atun menu buanka akama ꞌikën.

⁸ Nukën ꞌIbu, nukamaxribi kananuna nun ꞌapukama ꞌianan, nun kushibu, nun chaitiokëkama ꞌiásaribiti mimi ꞌuchakë ꞌixun rabinkësa tanin.

⁹ ꞌAínbi kamina mix Dios ꞌixun nu nuibanan usai karanuna ꞌiisa tani uisai ꞌiabi nu nuibakë ax kuni asábi ꞌikën. Nukamax kananuna min kakësoi ꞌikëma ꞌain,

¹⁰ nun kananuna min kakëxun min bana kuakinbi ax kikësokin ꞌakëma ꞌain, Nukën ꞌIbu ꞌimainun nun Dios kananuna min kakëxun min unikama an bana ñuikëkaman ꞌunánmikëxun min bana kuakëma ꞌain.

¹¹ Kamabi Israel unikaman ka min ꞌunanmikëxunbi min bana kuaisama tanxa, usa ꞌain ka nunu ꞌatima ñuira min uni Moisésnën usakin kana ꞌatima oti ꞌai kixun kuënëomia usaibi ꞌiaxa, nux kananuna mimi ꞌuchan usa ꞌain.

¹² Min nunu ñu ꞌatimaira ꞌimikin kamina usokin kana ꞌati ꞌai kiaxmi kia usabi okin nu ꞌimianan ꞌapukamanuribi ꞌimian, usa ꞌain ka uínsaran nëtënbi bëría ꞌikë ësai Jerusalénnu ñu ꞌikëma ꞌikën.

¹³ Kamabi ñu ꞌatimakama nuxnu ꞌinúkë ax ka Moisésnën kuënëo bananu kikësabi oi ꞌia; usa ꞌaínbi kananuna nun mixmi nun Dios ꞌikë mi barikëma ꞌain, ꞌianan kananuna nun ñu ꞌatima ꞌakëkama abi ënkëma ꞌain, ꞌimainun kananuna min bana kikësoibi ꞌikëma ꞌain.

¹⁴ Usa ꞌain kamina mix Dios ꞌixun ënë ñu ꞌatimakama inuti tëmëranun nu ꞌimian, mix kamina nun ꞌIbu ꞌianan Dios ꞌain, usa ꞌain ka min ꞌakë ñukama ꞌupíira ꞌikën, ꞌaínbi kananuna nukaman min bana kuaisatankin min kikësokin ꞌaisama tan.

¹⁵ Nukën ꞌIbu Dios min kamina Egipto menua chikínkin min kushi chaiira min unikama ismiakën, usakin ꞌakin kamina min anë axa bëtsi ñukaman anësamaira ꞌinun ꞌimia ꞌixun bërí ꞌimin, ꞌaínbi kananuna nukaman min kuëënkëma ñu ꞌatima ꞌai ꞌuchakin ꞌatima ñuira ꞌan.

¹⁶ Nukën ꞌIbu nun kananuna ꞌunanin mix kamina axa nuibanairakë a ꞌain. Usa ꞌain kamina Jerusalénnu tsókë unikamami mix nishkë a ënti ꞌain, ax ka min ëma ꞌianan min bashi ꞌupíira kakë a ꞌikën. Kamabi menu ꞌikë unikama atu ꞌurama ꞌikë ax ka Jerusalén ꞌimainun an mi rabikë unikama ami kuaia, nux ꞌuchakë kupí ꞌianan ka nun chaitiokëkama ꞌucha kupín usai ꞌikania.

¹⁷ Usa ꞌain kamina mix Dios ꞌixun min kaisa uni ꞌixun ꞌën mi ñukákëxun ꞌën bana kuati ꞌain; minbi kamina a isi masá nuitukin uisa kara anuxun mi rabikë xubu ax bërúakëxa kixun isin.

¹⁸ ꞌËn kakëxun kamina mix Dios ꞌixun kuati ꞌain; ꞌupiokin nukama isanan kamina, anuxun min anë rabikë ëma ax kara uisa ꞌikë isti ꞌain. Nun kananuna nux upiti tsóti a kupín mi ñukátima, usa ꞌaínbi kananuna mix nuibanairakë ax chaiira ꞌain mimi katamëkin mi ñukatin.

¹⁹ ¡Nukën ꞌIbu, Nukën ꞌIbu! ¡Nun bana kamina kuati ꞌain, nun ꞌakë ñukama kamina nu mëníoxunti ꞌain! ¡ꞌAnan kamina nukamannu mi ñukákëkama nu ꞌakini uti ꞌain! ¡Mixi Dios ꞌixun ꞌanan kamina min ëma ꞌimainun min unikama an min anë rabikë akama ꞌakinti ꞌain kamina basitima ꞌain!

Danielnëan setenta semana ax usai ꞌiti namákësa okin isa ñuikë bana

²⁰ ꞌËn kana ënkinma abi ꞌën ꞌuchakëkama chikinanan ꞌën uni Israel kamananribi ñukaxunkin chikinaxuan, ꞌanan kana ꞌën ꞌIbu Dios ꞌain bashi upíira a kupínribi abë banakin kan.

²¹ Kakëbëbi ka Gabriel kakë ángel ꞌën namákësokin iskëbëa ꞌëmi mërakë ax nuánkësakuatsini anu ꞌëx ꞌikë anu uaxa. Ukë anun ka Dios ñuina xaroxunti hora ꞌiti chukúmara pishinkë ꞌain bari kuabuti ꞌiaxa.

²² Anun ka ukin ꞌë kaxa: Daniel ꞌëx kana bërí Jeremíasnën kuënëo ꞌikëmi kirikanua ꞌiskin ꞌakë a uisai kikë kara kixunmi kuanun mi ñuixuni aín.

²³ Minmi abë banakin kakëxumaishi ka Diosan min bana kuaxa. Usa ꞌain kana ꞌëx uisai kara ax min ñukákëx kiaxa mi kai ain, Diosan ka ꞌitsaira mi kuëënia. Usa ꞌain kamina bërí bëmë́kin uisakin namákë kara min namákësokin iskë a mi ñuixumainun kuati ꞌain:

²⁴ Setenta semana ax ka (cuatrocientos noventa baritia inuti ñui kikë ꞌikën) min unikama ꞌimainun min ëma upí a inuti ꞌikën, inutankëxun ka ax bana kuaisama tani ꞌikëkama ꞌimainun aín ꞌuchakë kamaribi ënti ꞌikën. Usai ꞌia ka Diosan aín ꞌuchakëkama unikama tërënxunti ꞌikën, usakin ꞌakin ka uníxa bëtsibë bëtsibë xënibua ꞌaínbi nuibananti a nanti ꞌikën. Usai ka min namákësokin iskë ꞌimainun an bana ñuikë Jeremías ax kiásabi oi ꞌiti ꞌikën, ꞌianan ka upíira kakë anu ꞌikë ax upíira ꞌitánun mëníokë ꞌiti ꞌikën.

²⁵ Ënë kamina upíokin kuakin min ꞌunánti ꞌain: An kaískë ꞌapu bëbatamainun ka Jerusalén birutëkënkin ꞌatëkënti ꞌikë Dios kiti nëtë ka ꞌiti ꞌikën, siete semana inuti ñui kikë ax ka (cuarenta baritia inuti ñui kikë ꞌikën) ꞌimainun ka Jerusalén ëmanu anun niti baikama ꞌanan anun kënëarakë kënëkama ꞌakë ax sesenta ꞌimainun rabë́ semana ñui kikë ax ka (cuatrocientos treinta y cuatro baritia panáti ñui kikë ꞌikën) ꞌaínbi ka a nëtëkamax anun ꞌitsaira tëmërai masá nuituti ꞌiti ꞌikën.

²⁶ Usai sesenta ꞌimainun rabë́ semana ax ꞌinúkë ꞌain ka Diosanbia kaískë ꞌapu ax ꞌakë ꞌiti ꞌikën. Usa ꞌain ka Jerusalén ꞌimainun anuxun Dios rabikë xubu ax masókë ꞌiti ꞌikën. Achúshi ꞌapun ka aín suntárukamabë uxun ꞌatima okin masóti ꞌikën. Usakin ꞌakëx ka bakan ꞌishi kuatsinkin ñu mapurukë usaribi ꞌiti ꞌikën. Usa ꞌain ka uni ꞌakanankin ñu ꞌatima okin masókë ax usai ka ꞌiti ꞌikë kixun Diosan nankësabi oi ꞌiti ꞌikën.

²⁷ Usa ꞌain ka achúshi semana ꞌitëkënkë anun ꞌitsa uni kamabëtan mëníokin achúshi ñu ꞌati ꞌikën, ꞌaínbi ka achúshi semana ꞌikë a nëbë́tsinuxunshi uínbi ñuina ꞌaímai këñutanun Dios xaroxuanan ñu ꞌinainshitima ꞌikën. Usa ꞌain ka anuxun ñuina Dios xaroxunkë ax ꞌatima tikiti ꞌikën, usa ꞌain ka ꞌami kuaikin usakin an ꞌakë uni a Diosan ꞌatimaira oti ꞌikën, kiax ka kiakëxa.” (Bana ꞌunánkë uni raírinën sinánkëx ka achúshi semana ꞌain ki kikë ax siete baritia ꞌikën.)