Daniel 7 - Kashibo-Kakataibo Biblia

Danielnën namákësa okin rabë́ ꞌimainun rabë́ ñuinakan ꞌëo isa ñuikë bana

¹ Achúshi imë́ kana anua Beltsasar Babilonia menu ꞌapu ꞌikin pëukë a bari anun namákësa okin ꞌëx Daniel ꞌixun isakën. Isun kana raíri a ꞌaisa akamaishi kuënëokën. Kuënëo aka ënëx ꞌikën.

² ꞌËn kana namákin suñúan kushiira ain rëbumiax ꞌianan, ain tsipúmiax ꞌimainun, ami bari kuabúkë amiax ꞌianan amiax bari urukë amiax bëkikëbë parúmpapa ꞌumpax bëchunia isan.

³ Usai ꞌikëbëshi ka ꞌën usakin sinánkë ꞌaímabi rabë́ ꞌimainun rabë́ribi ñuinakan ꞌëo ꞌën iskëx raíri iskësamabu ꞌaish parúmpapanuax chikíaxa.

⁴ Usai ꞌi ka anpan chikíkë ax paru ꞌinúansa ꞌiaxa, ꞌaíshbi ka tëtëkamë ꞌëon pëchisa ꞌiaxa. Usa ꞌaíshbi ka aín pëchikama ëchikicëbë, menuax nirui aín taë kaxú ꞌikëkama ami tatíki niruaxa, usai ꞌikëbë ka aín sinánkëkama ax unin sinánsaribi ꞌiaxa.

⁵ Usai ꞌikëbë ka bëtsi axribi xaëónsa ꞌiaxa, usa ꞌaish ka amo chairukësa ꞌianan, aín putu rabë́ ꞌimainun achúshiribi ax ka aín xëtakama anu ꞌikë anuribi ꞌiaxa; usa ꞌain kana ësai kia ꞌën kuan: ¡Nirukin kamina uiti nami kaina ꞌaisatani anu sënën nami piti ꞌain kiax ka kiaxa!

⁶ Usai ꞌikëbë ka bëtsiribi aín rani panshian ꞌimainun tunanën tsaka tsaka ꞌinu iskësa axribi mëraxa, ꞌaínbi ka rabë́ ꞌimainun rabë́ pëchiu aín naminu ꞌiaxa; ꞌianan kana rabë́ ꞌimainun rabë́ maxkáñuribi isan, an ka ꞌunánkëma uni aín kushi ꞌinánxa.

⁷ ꞌImainun ka ashiti sënë́nkin ꞌën namákësokin iskë ñuinakan ꞌëo ax ꞌaisama ꞌianan rakuë́mianankë ꞌaish kushiirabu ꞌiaxa. Aín xëta ax ka chaiira ꞌaish manë iruira usa ꞌiaxa; usa ꞌixun ka kamabi ñu pianan masókin ꞌanan axa tëxëkëkama aribi chakakin amáxa. Usa ꞌaish ka achúshi ñuinakan ꞌëo ꞌën namákësokin iskë usama ꞌiaxa, ꞌimainun ka mapai rabë́ manchanñu aín maxkánu ꞌiaxa.

⁸ Usa ꞌain ka ꞌën aín manchankama a iskëbë aín manchan anubi chukúma manchan achúshi chikíaxa, usai ꞌikëbëtan ka mapai rabë́ manchan anpan urukë ꞌën iskë anua rabë́ ꞌimainun achúshi manchan ëchiaxa, anu ka axa bërí urukë unin bërusa ax uruaxa ax ka kuëbíñu ꞌaish ꞌëx kana usaira ꞌai kiax rabiakati banaxa.

Diosan ñuinakan ꞌëo uisa kara okatsia usakin ꞌa ñuikë bana

⁹ Usai ꞌikëbëtan abi ꞌën iskëxun ka anu tsótikama nanxa, nankëbë ka anu achúshi uni apan tsóbuaxa. Aín chupax ka matsi uxua iskësa uxuira ꞌiaxa, ꞌimainun ka aín bu axribi xapu uxua upíira iskësa ꞌiaxa. Usa ꞌain ka anua tsókë anun mañakë ax tsi ërë́rukë iskësa usaribi ꞌiaxa,

¹⁰ usa ꞌain ka tsi ërë́rukë ax ka achúshi baka iskësa ꞌaish a bëtánain chikíaxa. Usa ꞌain ka miles ꞌimainun miles unikaman ñu mëëxumainun, millones ꞌimainun millones unikama a bëtánain sëtë́kë ꞌiaxa, anuxun ka a bana usai anu sëtë́kankë ꞌain bana ñuikin pëukin kirika, anua usai uni ꞌikë kuënëokë akamaribi bakakë ꞌiaxa.

¹¹ ꞌËn iskëx ka manchan chukúma ax ꞌatimatira anun rakuë́tisa ꞌinun banai ësai kiaxa; ꞌimainun ka ꞌën iskëxun ñuina chaiira a ꞌatankëxun aín nami chánkapaxa, usotankëxun ka uni ꞌunánkëma an tsi rëkirukënu aín nami xarátia këñutanun puruaxa.

¹² ꞌImainun ka raíri ñuinakan ꞌëo aribi aín kushi bikuanxa, ꞌaínbi ka anúan ꞌati aín hora ꞌitámainun tsópainun ëanxa.

¹³ ꞌËn kana ënë ñukama namákësokin imë́ isan: Iskëbëshi ka nëtë kuin mëu unin bëchikësa ꞌaish uaxa, aia anua tsókë ami kikiani kuania ka uni apan an a ꞌurama onun ꞌamiaxa.

¹⁴ ꞌAmitankëxun ka uni apan an aín kushi ꞌinánkin axa ꞌapu chaiira ꞌi kushiira ꞌinun ꞌimianan, kamabi menu ꞌikë ꞌimainun bëtsi banan banakë unikaman ñu mëëxunkin rabinun ꞌimiaxa. Usa ꞌaish ka aín kushi ax ꞌiásabi kushiira ꞌiti ꞌikën, ꞌimainun ka uínbi ax ꞌapu ꞌikë uínsaranbi masókë ꞌitima ꞌikën.

¹⁵ “ꞌËx Daniel ꞌaish kana namákësokin iskë anun ꞌitsaira rakuëan; usai ꞌi kana ꞌën iskë ñukama ami ꞌitsaira sinan,

¹⁶ usai kana axa nikë unikama achúshi uisai kikë kara akama ꞌikë an ꞌë ñuixunun kixun ñukan. Ñukákëxun ka mi kana akama ñuixunti ꞌai kixun ꞌë kaxa:

¹⁷ A ñuinakan ꞌëo rabë́ ꞌimainun rabë́ ax ka rabë́ ꞌimainun rabë́ ꞌapu an ënë menu ꞌapu kushiirabu ꞌixun atun kuëënkësokin unikama ꞌati a ꞌikën.

¹⁸ Usokin ꞌakë ꞌaínbi ka Dios manámi ꞌikë an kaískë unikama atúxa xënibua ꞌaínbi ꞌapu ꞌinun ꞌinánkë ꞌiti ꞌikën.

¹⁹ Usa ꞌain kana ꞌën ñuinakan ꞌëo rabë́ ꞌimainun rabë́ribi a uisa kara bëtsi iskësa iskësama ꞌaísha ꞌatimaira a ꞌunánkatsi ꞌian: ax ka aín xëtakama manë iruira ꞌianan aín ꞌuntsisribi manë panshian ꞌakësa ꞌiaxa; usa ꞌixun ka kamabi ñu pianan raíri masókin atima onan axa tëxëkëkamaribi aín taën amákin ꞌatima oxa.

²⁰ ꞌImainun kana ꞌën uisaira kara mapai rabë́ manchan kamañu ꞌimainun manchan chukúmañu ꞌaish bëruñu ꞌianan, kuëbíñu ꞌaísha rabiakati banakë a ꞌunánkatsi ꞌian, usa ꞌaish ka ax raíri manchan kamasama kushi ꞌiaxa, ꞌimainun ka rabë́ ꞌimainun achúshi manchan ax anu xabankë ꞌinun ëchikiaxa.

²¹ Usa ꞌain kana a manchankaman abë ꞌakanankin Diosan unikama kanania isan,

²² usakin ꞌakëbëbi ukin ka uni apan ax bëbakin an ira Diosan kaískë uni ꞌakë unikama ꞌanun ꞌamiaxa, usakin ꞌatankëxun ka anuan ꞌati nëtë sënë́nkë ꞌain atúxa ꞌapu ꞌinun ꞌimiaxa.

²³ Usa ꞌain ka ësai kiaxa: A ñuinakan ꞌëo achúshinëx ka raíripan ꞌia ꞌain, axribi ënë menu ꞌapu ꞌiti ꞌikën, ax ka bëtsi ꞌapukama ꞌiásama ꞌiti ꞌikën. Usa ꞌixun ka an kamabi menu ꞌikë ꞌapukama uisa kara okatsia usakin ꞌain taën amákësokin masókin këñuti ꞌikën.

²⁴ Mapai rabë́ manchankama ax ka mapai rabë́ ꞌapu axa bëtsix ꞌikëbë ꞌikëbë ënë menu ꞌapu ꞌikanti a ꞌikën. Usai atux pain ꞌapu ꞌian ka bëtsiribi, ꞌapu ꞌiti ꞌikën, ax ka ax pain ꞌapu ꞌikë usamaira ꞌiti ꞌikën, ax ka manchan chukúma a ꞌiti ꞌikën. Usa ꞌixun ka an rabë́ ꞌimainun achúshi ꞌapu atu meu ꞌinun ꞌimiti ꞌikën,

²⁵ Usa ꞌixun ka an Dios manámi ꞌikë kushiira ꞌatimakin ñuianan an rabikë unikama këñukin pëuti ꞌikën; ꞌanan ka Dios kia bana aribi bëtsiokin nainsa tanan usakin unikaman fiesta ꞌatia Dios kia aribi bëtsiokin nainsa tanti ꞌikën, usa ꞌain ka an Dios rabikë unikaman ꞌapu an kakësokinshi ꞌati ꞌikën, rabë́ ꞌimainun achúshi baritia ꞌirukë anua mapai achúshi ꞌimainun achúshi ꞌuxë sënë́mi kiti ꞌikën.

²⁶ ꞌAínbi ka anuxun bana mëníokë anuxun a ꞌapu aín kushi bikuankin a meu ꞌimikin, ñankáishi bërutanun kamabi këñúkë ꞌiti ꞌikën.

²⁷ Usa ꞌain ka Dios manámi ꞌikë an a rabikë unikama atux kushiira ꞌixúan, xënibua ꞌaínbi bëtsi bëtsi menu ꞌikë ꞌapukama ꞌakinun ꞌimiti ꞌikën. Usokin ꞌakinkëxun ka kamabi menu ꞌikë unikaman ain bana tankin ax kikësabiokin ꞌakánti ꞌikën.

²⁸ Ënëx ka anu sënë́nkin namákësa okin iskë ñuikë a ꞌikën. ꞌËx Daniel ꞌaish kana ꞌitsaira anun masá nuitukin sinani, ꞌën bëmánanbi pëki ꞌian; usai ꞌikinbi kana uibi a ñukama ñuixunkëma ꞌain.”