Daniel 6 - Kashibo-Kakataibo Biblia

Paru ꞌinúan bukukënua Daniel ꞌia ñuikë bana

¹ Daríonën ka ciento veinte aín kushikama kamabi ëmakamanu anëti sinánkëxa, sinánxun ka Media ꞌimainun persia mekamanu ꞌikë ëmakamanu ꞌikë unikama an bërúanti ꞌapu anëti sinánkëxa.

² Sinánxun anëanan ka rabë́ ꞌimainun achúshi uni an, uisakin kara aín kushikama anëkë atun ñu ꞌaia an isti anëakëxa, atux ka ꞌapun akë ñukamaxa upí ꞌitánun an bërúanti anëkama ꞌiakëxa. Achúshinëx ka Daniel anribia ñu ꞌaia iskë ꞌiakëxa,

³ usa ꞌaish ka an ñu ꞌaia isti raíri unikamasamaira ꞌianan bënëtishi ꞌapukamasamaira ꞌixun ainra upíokin ñu ꞌakëxa; usa ꞌain ka ꞌapun axira a menu ꞌapu ꞌinun anëti sinánkëxa.

⁴ Usa ꞌain ka abëtan ñu ꞌaia iskë raíri ꞌimainun ꞌapukaman uisakin karaisa ꞌatimakin a menu ñu ꞌaia kixun bariakëxa, ꞌaínbi ka Daniel ax upí uni ꞌain an ꞌakë ꞌatima ñu achúshirabi mërama ꞌikën; usa ꞌain ka Danielnën ka ñu ꞌatima ꞌaia kiax ami këmëi manánti ꞌatima ñubi ꞌaíma ꞌiakëxa.

⁵ Usa ꞌaínbi ka, uisai kara ami manánti ꞌikë kiax atuxi kanankëxa. Kánani ka uisari Danielmi manánti kara kananuna mëraima kiax kiakëxa, ki ka Danielnën ꞌapun iskëxun aín Diosan bana kikësa okin ꞌatima ꞌikën, an ka aín Dios rabia usa ꞌain.

⁶ Usai kanantankëx ka an ñu ꞌaia bërúankë ꞌimainun aín kushikama atux ꞌapu Daríobë kananuna banai kuanti ꞌai kixun sinani kanankëxa. Kanankiani kuanxun ka anua ꞌikë aín xubunu bëbakin ꞌapu kakëxa: —Mix ꞌapu ꞌaish kamina xënibuax ꞌiti ꞌai kixun kakëxa.

⁷ Kamabi ꞌapukama ëma kamanua ꞌikë atún ka timë́xun ësokin sinánxun bana nanxa, uínbi ka achúshi ꞌuxë sënë́mi atún dios ñukatima ꞌikën, usai ika uibi ñukatima mix kikësoishi ꞌikanti ꞌikën. Usa ꞌain ka uin kara a bana kikësokinbi ꞌaima ax ka anua paru ꞌinúan bukukë kini anu nikë ꞌiti ꞌikë kixun ka sinánkanxa.

⁸ Usa ꞌain kamina min ënë bana mix ꞌapu ꞌixun a tantiokin, uínbi a bëtsiokin nainsama okin min anë nankin kuënëoti ꞌain. Usa ꞌikë ka uínbi medos ꞌimainun persanu ꞌikë bana kikësokin ꞌakë ꞌikë uínbi a bana tërëkatima ꞌikën.

⁹ Usakin kakëxun ka ꞌapu Daríonën ain anë nankin a bana kuënëokëxa.

¹⁰ Usokin a bana kuënëokë ka Danielnën kuakëxa, kuabiani ka aín xubunu kuankëxa, kuanx atsínxun ka anua uxkë anua ꞌikë ain xëputi chukúmakama Jerusalénmi okin xësunkin ꞌakë a xëókatankëx rantinpuruni tsóbukin Dios ñukákin rabiakëxa. Usokin ka rabë́ ꞌimainun achúshi okin achúshi nëtën nëtën an ꞌakësabiokin ꞌakëxa.

¹¹ Usa ꞌain ka a unikama kuantankëx anua Daniel ꞌikë xubu anu atsíankëxa, ꞌatsínkinbi ka abë banakin Dios rabia mërakankëxa.

¹² Usakin mërabianishi ka a unikamax an usai ꞌiti nankë bana a ñuikin ꞌapu kai kuankëxa, kuanxun ka ësokin kakëxa: —Mix ꞌapu ꞌixun kamina achúshi bana ësokin nan uin kara achúshi ꞌuxë anun uinu ꞌikë diosbi ñukánan, uibi ñukatima ꞌikën, uix kara mix ꞌapu ꞌaínbi mibë banaima ax ka anua paru ꞌinúankama ꞌikë kini anu bixun nikë ꞌiti ꞌikë kian, ¿asérabi kara usama ꞌik? kixun ka atun kakëxa. Kakëxun ka asérabi —ka usa ꞌikën —kixun ꞌapun kakëxa, usa ꞌain ka a bana kikësabiokin ꞌakin medos ꞌimainun persanu ꞌikësaribi ꞌikë uínbi tërëkatima ꞌikën.

¹³ Usa ꞌain ka a unikaman karaishikin ꞌapu kakëxa: —Achúshi uni ñatanbëtsinkin bëa Daniel kakë judíos uni an ka mix ꞌapu ꞌixunmi usai ꞌiti nankë bana a tanima, nun kananuna isan rabë́ ꞌimainun achúshi okían nëtë́tibi ꞌain Dios ñukatia mëran kixun ka ax ami manánkin unikaman kakëxa.

¹⁴ Usokin kakëxun a bana kuati ka ꞌapu ꞌitsaira masá nuituakëxa, masá nuitukin ka uisakin kara Daniel ië́miti ꞌikë kixun bariakëxa. Barikin ka bari xupibutamainun uisakin kara ië́miti ꞌikë kixun sinánkëxa,

¹⁵ usa ꞌain ka a unikama amiribishi anu rikiantëkënxun ꞌapu ësokin katëkëankëxa: —Mix ꞌapu ꞌixun kamina ꞌupiokin ꞌunan, medos ꞌimainun persanu ꞌikë unikaman ꞌapun ax kikësama oi ꞌitima nankë bana aka uínbi bëtsiokin nantima ꞌikën.

¹⁶ Usa ꞌain ka ꞌapun bëtankëxuan Daniel anua paru ꞌinúankama ꞌikë kini anu ninun kixun ain unikama kakëxa. ꞌAínbi ka usakin ꞌakëma pan ꞌain ꞌapun Daniel kakëxa: —¡Min Dios ax kikësabi okinmi aín bana tankin ꞌaxunkë an ka mi ië́miti ꞌikën!

¹⁷ Usa ꞌain ka Daniel anua paru ꞌinúan ꞌikë kini anu ꞌain, mapara pará chaiira bëxun anun kini xëkuë a xëpúakëxa, usakin ꞌaiaka ꞌapun anun kirika sellakë anun sellakëxa, ꞌanan ka ꞌapu chabu ax ꞌapu aín anun kirika sellakë anúnribi ꞌakëxa, usakin ka axa kikë bana ax kikësabi oia Daniel ꞌinun ꞌakëxa.

¹⁸ Usokin ꞌabiani ka ꞌapu aín xubunu kuankëxa, kuantankëx ka xupinbukëbëtanbi pianan ax ꞌikësabi kuaianan, ꞌima ꞌuxi rakabuakëxa usai rakabuaxi ka a imë́ uxima ꞌinëakëxa.

¹⁹ Usai ꞌinëti ka pëkarakëma ꞌaínshi bënëtishi nirukiani kuantankëx anua paru ꞌinúankama ꞌikë kini anu bëbakëxa.

²⁰ Bëbakin ka ꞌurama okin ꞌapun Daniel masá nuitukëishi aín bana ꞌixun ësokin kakëxa: —Daniel Dios këñutima oi tsókë aín uni, ¿ami ax kikësabiokin min ꞌaxunkë an kara paru ꞌinúan kamanua mi ëñëmiax?

²¹ Kakëxun ka Danielnën kakëxa: —¡Mix ꞌapu ꞌaish kamina xënibua ꞌaínbi tsóti ꞌain!

²² ꞌËn Diosan ka ꞌë uisabi oima paru ꞌinúankama kuëëtsë́kinun an ꞌimiti ain ángel xuaxa, Diosan ka ꞌëx kana uisa ñu ꞌatimabi ꞌakëma ꞌai kixun ꞌunánan ꞌën kana uisa ñu ꞌatimabi mix ꞌapu ꞌikë ꞌaxunkëma ꞌai kixun ꞌunánxa.

²³ Usa ꞌain ka ꞌitsaira kuëënkin ꞌapun anua paru ꞌinúan ꞌikë kini anua Daniel binun kixun aín unikama kakëxa. Kakëxuan bitsia iskëxbi ka Diosmi katamëkë ꞌikëa paru ꞌinúanën uisabi aín namikama okëma isakëxa.

²⁴ Usokin ꞌan ka an Daniel ñankaíshibi ꞌuchokë unikama ꞌapun bana kikësabiokin atun xanu ꞌimainun atun bakë bëchikëkama këñunbi bëakëxa, bëkë ka anua paru ꞌinúankama ꞌikë kini anu nikankëxa, nia ka paru ꞌinúankaman anua atux bukukë anu pakëkëmaishi atunu ꞌirukin bikin xoñuma rakankin piakëxa.

²⁵ Usa ꞌain ka ꞌapu Daríonën kamabi menu ꞌikë unikama ꞌimainun bëtsi menu ꞌikë unikama aín banan banakë akama ësakin kakin achúshi kirika kuënëokëxa: ꞌËx kana mitsúxmi ꞌupitax bukuti kuëënin,

²⁶ ꞌimainun ka ësokinribi unikama kanun kakëxa, kamabi uni ꞌëx ꞌapu ꞌaían tsókë unikaman ka Danielnën rabikë Dios ꞌashi rabikanti ꞌikën. Ax ka uínsaranbi nëtë́tima oia tsókë a ꞌikën, usa ꞌaish ka Dios xënibua ꞌaínbi tsotia. ꞌImainun ka uínsarabi ꞌatima okë ꞌianan ka uínsarabi aín kushi këñutima ꞌikën.

²⁷ Ax ka an uni ië́mianan upiti tsónun ꞌakinkë a ꞌikën; an ka unin iskëma ñu chaiirabu naínu ꞌanan menuribi ꞌaia. An ka Daniel paru ꞌinúankaman aín ꞌuntsisan ꞌati ꞌikëbi ië́miaxa.

²⁸ Usa ꞌain ka Daniel ax achúshi uni chaiira Darío ax ꞌapu ꞌain ꞌiakëxa, ꞌianan ka Siro kakë uni axribi persia menu ꞌapu ꞌain ꞌiakëxa.