Daniel 5 - Kashibo-Kakataibo Biblia

ꞌApu Beltsasarnën mëkën rëbu achúshinën xubu kënëkë mëu kuënëoia isa ñuikë bana

¹ Achúshi fiesta chaiira ꞌakin ka Beltsasar Babilonia menu ꞌapu ꞌixun mil uni chabu a menua ꞌikë kama kuëankëxa, kuënkëx uxun ka pianan ꞌapu ꞌimainun an kuëënkë unikama atun, ꞌitsaira uvas baka vino ꞌakë xëakankëxa.

^2-3 Usai ꞌitsaira uvas baka vino ꞌakë xëax kuëënkin ka ꞌapu Beltsasarnën, an ñu ꞌaxunkë unikama ami xëati manë xampa kuri ꞌanan manë uxua ꞌakëa ꞌain papa Nabucodonosornën, Jerusalénnu ꞌikë anuxun Dios rabiti xubunu nankëbi bitsínkin bëa akama bënun kakëxa. Kakëxun ka tasun ami xëati akama bëxun ami ꞌapu ꞌimainun aín xanukama ꞌimainun an ñu ꞌaxunkë xanukama ꞌimainun anu pi timë́kamë ꞌëokë akaman ami xëakëxa.

⁴ Usakin ꞌakin ka kamaxunbi unínbia a rabinuxun kuri, manë uxua, manë panshian manë tunan, i ꞌimainun maxax ꞌakë akama rabikankëxa.

⁵ Usakin ꞌakëbëbi ka a horabi achúshi unin mëkën rëbu anua tirítan nankëxun pëkakë anu mërakëxa, mërakin ka anua timëkankë ꞌukëmëu kënë uxua anu kuënëokëxa. Kuënëoia mëkën rëbu a isíshi ka ꞌapu,

⁶ ratuti bëpëki bërëi saki ꞌikë anunbi aín xo rabë́ bëtsimi ratíkai aín maxkámibiki ꞌitsaira rakuë́ti bërëakëxa.

⁷ Usai ꞌi munuma kuënkëni ka an ñu tankë uni ꞌimainun an ñu ꞌunánkë unikama ꞌimainun an uisai kara ñu ꞌiti ꞌikë an ꞌunánkë unikama Babilonia anu ꞌikëkama ka uti ꞌikë kiax kiakëxa: —Uin kara kuënëokë a isti ꞌikën, istankëxun uisai kikë, kara a ꞌë ñuixunia a unix ka chupa upíira okin kuënëokë a pañumikë ꞌiti ꞌikën, ꞌianan ka manë risi kuri ꞌakë tëñumikë ꞌaish ꞌësaribi ꞌaish ꞌë kaxú ꞌapu ꞌiti ꞌikën.

⁸ Usai kikëbë utankëx ka an ꞌapu ñu mëëxunkë an ñu ꞌunánkë unikamax anu ꞌapu ꞌikë xubu ꞌukëmëu atsínkankëxa, ꞌaínbi ka uinu ꞌikë atu achúshinanbi uisai kikë kara kënënu kuënëokë ax ꞌikë kixun ꞌapu ñuixuama ꞌikën.

⁹ Usa ꞌain ka atiainra ꞌitsaira ꞌapu Beltsasar rakuë́akëxa, usai ꞌika atian ira aín bëmánankama pëki ꞌiakëxa. Usai ꞌikëbëtan ka uni aín kushibukaman añu karanuna ꞌati ꞌai kixun sinani sinánkasmakëxa,

¹⁰ ꞌaínbi ka aín tita aín tuá ꞌapu ax kuëënmainun abëtan pi bukukë unikama atúxribi kia kuati aín tita anuxun pi bukukë anu atsini kiakëxa: —¡Mix ꞌapu ꞌaish kamina xënibua ꞌaínbi tsóti ꞌain! Usa ꞌain kamina ꞌitsaira sinani min bëmánan pëki ꞌitsaira ratutima ꞌain,

¹¹ mix ꞌapu ꞌain ka achúshi uni dioskaman bëru ñunshinan ꞌakinkë anu ꞌikën. Min papa ꞌapu ꞌain ka a unin upíokin sinánkë ꞌiakëxa, usa ꞌaish ka ax ñu ꞌunáinra ꞌianan an ñu tankë ꞌaish dios kamasaribi ꞌikën, usa ꞌikë ka min papa Nabucodonosornën a uni Daniel kakë an ñu tankë unin ꞌapu ꞌimainun an ñu ñunshinan kushin ñu ꞌakë ꞌianan an ñu ꞌunánkë ꞌimainun uisai kara ñu ꞌia an tankë ënë menu ꞌikë atun kushi ꞌinun anëakëxa,

¹² usa ꞌikë ka Daniel a min papan Beltsasar kakin anëakëxa, ax ka an kikë bana a ꞌinumikin sinánñuira ꞌixun uisakin namákë kara a ꞌimainun ꞌunántisama bana abi kuaisabiokin ñuianan ñu ꞌaisama inuti abi ñuikë ꞌiakëxa. Usa ꞌain kamina Daniel kuëënti ꞌain, an ka uisai kara kënëkënu kuënëokë ax kia kixun mi ñuixunti ꞌikën.

¹³ Usa ꞌain ka Daniel aín unikaman ꞌapunu buánkëxa buankëka ꞌapun ñukákëxa: —¿Mix kaina Daniel, ꞌën papa Nabucodonosornëan ꞌapu ꞌixun ñatanbëtsinkin Judánua bëa a ꞌain?

¹⁴ Mix ismina dioskaman bëru ñunshin upíñu ꞌai kixun ka ꞌë kaxa, ꞌimainun ismina mix upíokin sinánkë ꞌianan, sinánñuira ꞌianan ñu ꞌunáinrakë ꞌai kixun ka ꞌë kaxa.

¹⁵ An ñu ꞌunánkëira unikama ënë menu ꞌikë kana ax ka ënu ꞌiaxa an ka istankëxun uisai kikë kara ënë banakama ꞌë ñuixunti ꞌiaxa, ꞌaínbi ka uisa kara a bana kia kixunbi atun ꞌunanima.

¹⁶ Usa ꞌaínbi kana, ꞌën min ismina bëtsi ñukama ꞌimainun mënioisama tëira ñu mënion kixun ñuia kuan. Usa ꞌain kana minmi a bana istankëxun uisai kara a bana kia ꞌë ñuixunkëxun, mi chupa upíira upí ꞌitánun kuënëokë a mi pañumiti ꞌain, ꞌamianan kana kuri, manë risi, ꞌakë a mi tëñumianan ꞌëx ꞌikësaribitimi ꞌëx ꞌapu ꞌain ꞌapu ꞌinun mi ꞌimiti ꞌain.

¹⁷ Kakëxunbi ka Danielnën ꞌapu kakëxa: —Mix kamina ꞌëmi ꞌinainshikatsi kikë min ñukama abëbi bërúti ꞌain, ꞌimainun kamina uinu ꞌikë bëtsi uni karamina min xubunu ꞌimitisa tani ñukama a ꞌinánti ꞌain. ꞌËn kana mixmi ꞌapu ꞌikë kënënu kuënëokë bana ax kara uisai kia mi ñuixunti ꞌain.

¹⁸ Dios manámi ꞌikë kushiira an ka, min papa Nabucodonosor, axa ꞌapu ꞌaish chaiira ꞌikëa kamabi menu ꞌikë unin uisakinbi kakëma ꞌinun ꞌimiakëxa.

¹⁹ Usa ꞌain ka an kushiira ꞌinun ꞌimiakëxa, ꞌimikë ꞌain ka kamabi ëmanu ꞌikë unikama ꞌimainun bëtsi mekamanu ꞌikë unikama ꞌianan aín bananbi banakë unikaman uisakinbi káma ꞌikën, kaima ka ami rakuë́ti ꞌianan a kuati bërëi ami ꞌikankëxa. ꞌImainun ka ui kara ꞌamikatsia a ꞌamianan ui kara ꞌamitisama tania a ꞌamiama ꞌikën. Usakin ꞌakin ka bëtsi bëtsi cha ꞌimianan; bëtsi bëtsi ñuumarasa ꞌinun ꞌimiakëxa.

²⁰ ꞌAínbi ka ꞌëx kana usaira ꞌai kixun sinani ax chaiira ꞌia iskin, an kuëënkësa okia uni ꞌaia Diosan aín kushi biküankëxa.

²¹ Usakin ꞌatankëxun ka uni ꞌikëbi unikamanua chikinkin achúshi ñuinasa ꞌinun ꞌimiakëxa; usokëx ka ñuina raëkëma ꞌimainun vaca bënëkamabëtan pasto pi nitsia ka, nibítan ꞌibúkin aín nami chabókëxa, usa ꞌain ka Dios manámi ꞌikë an kushiira ꞌixun kamabi menu ꞌikë unikama ꞌakianan, ui kara ꞌapu ꞌimitisa tania a ꞌapu ꞌimia kixuan anun ꞌunánti nëtë ꞌitámainun ꞌakëxa.

²² Usa ꞌaish kamina bërí mix aín bëchikë Belsasar, ꞌaish axa usai ꞌia ꞌunánxi upitax tsókëma ꞌain.

²³ Usa ꞌain kamina mix ꞌapu ꞌaish Nukën ꞌIbu Dios naínu ꞌikë ami kuaikin mesanuxun ami xëakë xampakama anuxun Dios rabiti xubunua ꞌia akama bëan, bëxun kamina min kamikë unikamabëtan ami uvas baka paëokin vino ꞌakë xëakin min dioskama kuri, manë uxua, manë panshian, manë tunan, i ꞌakë ꞌimainun maxá ꞌakë mitsun dioskama rabikin ami xëan; akaman ka isima ꞌimainun kuatima ꞌianan ka añu ñubi ꞌunanima. Usa ꞌaínbi kamina Dios an mix ꞌapu ꞌikë bërúankin tsónun ꞌimikë a rabikëma ꞌain, an ka an kuëënkësa okin mi kamabi ñu min ꞌakë a ꞌanun mi ꞌamiaxa.

²⁴ Usa ꞌixun ka an banakama ësai kikë ënë kuënëoti mëkën xuaxa,

²⁵ MENÉ, MENÉ, TEKEL ꞌimainun PARSÍN,

²⁶ ax ka ësai ki kikë ꞌikën: MENÉ: Diosan ka anúnmi mix ꞌapu ꞌikë nëtëkama a tupuanxa ꞌimainun ka anúnmi mix ꞌapu ꞌikë nëtë sënë́nti aribi nanxa;

²⁷ ꞌimainun ka TEKEL: kikë bana ax ësa ꞌikën: mix ꞌapu ꞌikë ka anun ñu ꞌië tupúnti anun tupuanxa, usa ꞌaínbi kamina anu sënën tupúnti nankë anu sënënima a shimú ꞌian, usaribi ka mix ꞌapu ꞌikë ax ꞌikën;

²⁸ Usa ꞌain ka PARSÍN kikë bana axribi ësaribiti ki kikë ꞌikën: Diosan ka mixmi ꞌapu ꞌikë anua chikínkin mi medos ꞌimainun persianu ꞌikë unikaman ꞌanun mi ꞌinánti ꞌikën. Kixun ka Danielnën kakëxa.

²⁹ Usakin kakëxun ka ꞌapu Beltsasarnën, aín unikama Daniel chupa upíokin kuënëokin ꞌakë pañumianan kuri manë risi tëñuti tëñuminun kakëxa, kanan ka kamabi unikama bënë́kinshi, Danielnëx ka ꞌësaribi ꞌinun ꞌapu ꞌiti ꞌikë kixun kamabi unin kuanun kuakokëxa.

³⁰ A ꞌimë́bi ka Beltsasar caldeo unikaman ꞌapu ꞌikëbi uni itsin ꞌakëx ñuakëxa.

³¹ Bamakë ꞌain ka Darío, Medianu, an ꞌapu ꞌikin pëuakëxa. Anu ka Darío sesenta ꞌimainun rabë́ baritia ꞌirukë ꞌiakëxa.