Daniel 4 - Kashibo-Kakataibo Biblia

ꞌApu Nabucodonosor aín sinan bëtsi ꞌatima ñuikë bana

¹ Ësai ka ꞌapu Nabucodonosor kiakëxa: ꞌëx kana kamabi ëmanu ꞌikë unikama ꞌimainun bëtsi menu ꞌikë unikama ꞌianan bëtsi banan banakë unikama atun menu ꞌikë akamaxa upiti ñuñu ꞌi bukukanti kuëënin kixun ka ꞌapun kirika kuënëomiakëxa.

² ꞌËn kana mitsunmi Dios kamabi kushiñu an ꞌë ꞌaxunkë ñukama mitsun ꞌunánti kuëënin.

³ An ꞌakë ñux ka chaiirabu ꞌimainun upíira ꞌikën, usa ꞌain ka ax xënibua ꞌaínbi ꞌiti ꞌikën, ꞌimainun ka aín kushi ax xënibua ꞌaínbi këñutima ꞌiti ꞌikën.

⁴ ꞌËx ꞌApu Nabucodonosor ꞌaish kana, ꞌën xubunu upitax tsóti ñuñuira ꞌaish ꞌitsaira kuëëni Babilonia ëmanu tsoóakën.

⁵ ꞌAínbi kana achúshi imë́ ꞌuxi ꞌibúxunbi ꞌatimakin namán, namáxun ꞌën bëtsiokin sinánkëkama anunbi ꞌitsaira rakuëan.

⁶ Usai ꞌikin kana ꞌë isia ukanun kamabi an ñu ꞌunánkë unikama Babilonia ënu ikë unikama kamian, atua uisakin namákë kara ꞌën namákë ax ꞌikë kixun ꞌë ñuixuni unun kamian.

⁷ Usakin kamikëx ka an ñunshinan ꞌamikëxun ñu ꞌakë ꞌimainun, an ñu tankë ꞌianan, an ñu ꞌunánkë ꞌimainun, uisai kara ñu ꞌinuxun ꞌaia kixun an tankë, Babilonianu ꞌikëkama atux uaxa, aia kana ꞌën namákë a ñuixuan, ꞌaínbi ka atun uisakin namákë kara ax ꞌikë kixun ꞌë ñuixunkëma ꞌikën.

⁸ Usai atux pain uan ka Daniel kakin anëkë ꞌikëbi Beltsasar kakinribi anëkë axribi ꞌën dios rabi ukësa kuatsini uakëxa, ꞌaíshbi ka ax Dios upíira aín bëru ñunshinan aín tsóti ꞌakinkë ꞌiakëxa, usa ꞌikë kana ꞌën namákë ñuixunkin ësokin kan:

⁹ Beltsasar an ñu tankë unikaman kushi ꞌën kana ꞌunanin Dios upíira aín bëru ñunshin an ka mi ꞌakinia, usa ꞌixun kamina min kamabi ꞌunántisama ñu abi ꞌunanin kixun kan. Usa ꞌain kamina ꞌën namákin iskë a mi ñuixunkin kamainun kuati ꞌain, kuakin kamina uisakin namákë kara ꞌën namákin iskë ax ꞌikë ꞌë ñuixunti ꞌain.

¹⁰ Ësokin kana ꞌën ꞌuxun namákin isan: Me nëbëtsi i achúshi chaxkë́ira nikë kana namákin isan.

¹¹ Usa ꞌain ka a i kani chaiira ꞌiaxa; usai ꞌikin ka aín pëñanën naíkamë ꞌëo tikakë ꞌiaxa, usa ꞌaish ka ax uinu kara me kuainakëakëxa anuxunbi iskë ꞌiaxa.

¹² Ax ka aín pëchikama upíira ꞌianan, ꞌaisamaira ꞌinun bimikë ꞌiaxa, usa ꞌaish ka kamaxunbi pitibëtan sënën aín bimi ꞌiaxa. Kamabi ñuinanëx ka aín tupëonkënu ꞌiaxa, ꞌimainun ka aín pëñan kamanu ñuina pëchiu kaman nóopa buinkë ꞌiaxa, usa ꞌain ka kamabi menu ꞌikë unikama ꞌimainun ñuinakamaribi a imi katamëti tsókë ꞌiaxa.

¹³ Usa ꞌain kana usokin namánux ꞌuxunmabi achúshi ángel an bërúanti nankë namákin naínuax ubutia isan,

¹⁴ ax ka kushin banai ësai kiaxa: i akamina menu nipakëtanun rëti ꞌain ꞌaxun kamina aín pëñankama tëakëbëa, aín pëchikama tákikëbë aín bimikama abístanun tëati ꞌain. Usokin ꞌakëbë ka an tupë́onkë tëmú bukukë ñuinakama ꞌimainun ñuina pëchiu aín pëñanu ꞌikë akamaxribi kuani nëtë́ti ꞌikën.

¹⁵ ꞌAínbi ka aín buru ꞌimainun aín tapunkama ax menu ënkë ꞌiti ꞌikën; a kamina manë tunan këñun manë panshian ꞌakë risi anun tëkërëkati ꞌain, ꞌatankëxun kamina ninu ꞌikë basinua ꞌinun ënti ꞌain. Usokin ꞌakë ꞌain ka anu nibí ꞌibúti ꞌikën, ꞌimainun ka an basi pikë ñuinakamabëtan basi pi niti ꞌikën.

¹⁶ ꞌImainun ka unin sinánkësa okían sinánkë a nëtë́ti ñuinanën sinánkësoi achúshi ñuinasaribi ꞌiti ꞌikën, usaía ꞌatimakë ax ka mapai achúshi ꞌimainun rabë́ baritia pain basiti ꞌikën.

¹⁷ Ënëx ka usai ka ꞌiti ꞌikë kiaxa an bërúanti nankë ángelkama ax kikë ꞌikën, usa ꞌikë ka kamabi unikaman ꞌunánti ꞌikë, ax ka manámi ꞌikë Dios kamabi kushiñu a ꞌikën, an ka uikara ꞌapu ꞌimitisatania a ꞌapu ꞌimianan uix kara ñuumasara ꞌikë a unikamaribi aín kushia aín menubi ꞌinun ꞌimia.

¹⁸ Ënëx ka ꞌapu Nabucodonosor ꞌixun ꞌën namákë ꞌikën. Usa ꞌain kamina mix Beltsasar ꞌixun bërí uisokin namákë kara ꞌën namákë ax ꞌikë kixun ꞌë ñuixunti ꞌain, uinu ꞌikë unínbi ka ꞌëx ꞌapu ꞌain, an ñu ꞌunánkëkama achúshinënbi ka ꞌën uisakin namákë kara ax ꞌikë kixun ꞌunánkëma ꞌikën, usa ꞌaínbi kamina Dios upíira ꞌain bëru ñunshinan ꞌakinkëxun min kuni ꞌë ñuixunti ꞌain kixun kaxa.

¹⁹ Usa ꞌain ka Daniel kakin anëkë ꞌikëbi Beltsasar kakinribi anëkë ax ꞌëorapain ain sinánkë rakarakëtamainun sinani niaxa. Usai ꞌiabi kana ꞌëx ꞌapu ꞌixun kan: Beltsasar ꞌitsaira sinánkinma kamina uisakin namákë kara ꞌën namákë ax ꞌikë ꞌë ñuixunti ꞌain kixun kan. Kakëxun ka Beltsasarnën ꞌë kakëxa: Min namákë ax ka uin kara mi ꞌaisama oisatania a unikamanubi pakëti ꞌikën.

²⁰ I chaxkë́ ꞌianan chaira ꞌikëmi min, naíbëtan sënën ꞌikëa unin uranxunbi istisa namákin iskë,

²¹ ax ka pëi upíirabu ꞌianan, aín bimi ꞌaisamaira ꞌikë kamabi ñuinakan piti ꞌiaxa, ꞌimainun an tupë́onkë tëmú ꞌitsaira ñuina ninu ꞌikë anu tupëni bukukë ꞌiaxa, ꞌimainun ka ain pëñankama anu ñuina pëchiñu kaman atun na ꞌakë ꞌiaxa,

²² a iásaribi kamina mix ꞌapu ꞌaish chaiira ꞌianan kushiira ꞌain. Usai ꞌimi mix chaiira ꞌikë ax ka naíbëtan sënë́nsa ꞌikën, usa ꞌain kamina min kamabi menu ꞌikë unikama minan ꞌinun ꞌimia.

²³ ꞌImainun kamina min namákin ꞌapu ꞌixun achúshi ángel an bërúankë unisa ꞌaish upíira naínuax ubuti ësai kia kuan: I chaiira ax ka rëratankëxun masókë ꞌiti ꞌikën, ꞌaínbi ka ꞌain buru menu ꞌikë a ꞌimainun ꞌain tapunkama ax anubi ënkë ꞌiti ꞌikën, usakin ꞌaxun ka manë risi tunan ꞌimainun panshian mëskukin ꞌakë anun tëkërëkatanxun ninu ꞌikë xubi kamanu ꞌinun ënti ꞌikën. Usokin ꞌakëx ka ami nibí ꞌibúmainun ñuinakamabëtan ninu nikin basi pi mapai achúshi ꞌimainun rabë́ baritia niti ꞌikë kiax ka kiakëxa.

²⁴ Ënëkamax ka ësai kikë ꞌikën, Dios kushiira manámi ꞌikë an ka usokin mi ꞌapu ꞌikëbi ꞌatima oti ꞌikë kixun sinánxun nanxa.

²⁵ ꞌImainun kamina mix ꞌapu ꞌaíshbi chikiti unikamabë ënanantankëx chikítankëx ñuina kamabë niti ꞌain; usai ꞌikin kamina vaca bënëkamasa ꞌixun pasto pinuxun ꞌain, usai ꞌia ka pëkarakuatsínkëbëtan nibí ꞌibúkin min nami chabóti ꞌikën. Usai kamina mix ꞌapu ꞌaish mapai achúshi ꞌimainun rabë́ baritia anúnmi Dios an ka kamabi kushiñu ꞌixun axa aín kushi ꞌiti unikama ax kuëënxun aín kushi ꞌinun ꞌimia, kixun ꞌunánti nëtë ꞌitámainun niti ꞌain, an ka uikara ꞌapu ꞌimitisatania a ꞌapu ꞌimia.

²⁶ Aín buru ꞌimainun aín tapunkama ñui kikë ax ka ësaimi ꞌiti ñui kikë ꞌikën, mix kamina amiribishi ꞌapu ꞌitëkënti ꞌain, mix ꞌapu ꞌixun Dios ax ka asérabi kushiñu ꞌikë kixun ꞌunanin.

²⁷ Usa ꞌain kamina ꞌën mi kakësokinbi ꞌati ꞌain, ꞌai kamina amiribishi ꞌuchatëkënkinma ꞌupiokin ñu ꞌati ꞌain, ꞌakin kamina ꞌatima okinmi ñu ꞌakë ënkin uni ñuñumakama ꞌakinti ꞌain, usokin ꞌai kamina ꞌapu ꞌaish uínbi uisabi okëma kuëëni tsóti ꞌain kixun ka Danielnën ꞌapu kakëxa.

²⁸ Usa ꞌain ka ënë ñukama ñuikin Danielnën kakësabi oi ꞌapu Nabucodonosor inúakëxa.

²⁹ Usa ꞌain ka achúshi baritia an namákë ñukama a inúkëbë ꞌapu ain xubu Babilonianu ꞌikë a manámi tëëkitsi anu kuaruax,

³⁰ nitsax ësai kiakëxa: ¡Ka kuat, chaiira cha ka Babilonia ëma ꞌikën! ꞌËx kushiira ꞌixun kana anu ꞌëx ꞌapu ꞌia ꞌikëa unin ax kushiira ꞌixun ka usakin ꞌamiakëxa kixuan unin ꞌunánun kana ꞌamia kiakëxa.

³¹ Usai banai sënë́nxumabi ka ꞌapun naínuaxa ësai achúshi bana kia kuakëxa: Ënë bana kamina kuati ꞌain ꞌapu Nabucodonosor anumi ꞌapu ꞌikë ëma ax ka minama ꞌikën;

³² ꞌën kana unikamabë ꞌimami ñuinakamabë ꞌinun mi ꞌimiti ꞌain; anuxun kamina pasto vaca bënëkaman ꞌakësaribi okin mapai achúshi ꞌimainun rabë́ baritia anúnmi, Dios ax ka ënë menu ꞌikë ëmakama aín kushi ꞌianan ui kara aín kushi ꞌimitisatania a aín kushi ꞌimia kixun min ꞌunánti nëtë sënë́ntamainun ꞌiti ꞌain.

³³ Usai ka ꞌiti ꞌikë Daniel kikësabi oi ka a bana kuatishi Nabucodonosor unikamanuax chikíakëxa; chikínxua vaca bënëkaman ꞌakësaribi okin pasto pi nitsia nibítan aín nami chabókëx ka aín rani ꞌimainun aín ꞌuntsiskamaribi uruakëxa, usai ꞌika tëtëkamë ꞌëo aín rani uruanan ꞌuntsis urukë usaribi ꞌiakëxa.

Diosan Nabucodonosor usai tëmëranun ꞌimitankëxun mëníotëkëa ñuikë bana

³⁴ Anun ꞌëx usai ꞌiti nëtë a sënë́nkëbëtan kana ꞌëx Nabucodonosor ꞌixun naímiu bësukin isan, iskin kana ꞌën sinan bëtsikë a mëníokakin asábi tan; usai ꞌikin kana Dios manámi ꞌikë a asabika kixun sinánxunkin rabian, ax ka nëtë́tima oi tsotia, aín kushix ka këñutima oi ꞌiti ꞌikën, ax ka kamabi nëtën xënibua ꞌaínbi ꞌiti ꞌikën.

³⁵ An iskëx ka kamabi menu tsókë unikama ñuumara ꞌikën. An ka uisakin kara ꞌaisatania usakin naínu ꞌanan menuribi ñu ꞌaia. Usa ꞌain ka an usakin kamina min kushi ñu ꞌatima ꞌai kixun kanan, uisa kupín kaina usakin ñu ꞌai kixun an kati uni ꞌaíma ꞌikën.

³⁶ Ësai banai sënënishi kana a nëtënbi ꞌën ꞌatimakin sinánkë a mëniokatëkëni pëxkúti amiribishi upíokin sinánkën. Usai ꞌia ka ꞌëx ꞌapu ꞌaia aín kushikama ꞌixun an bana mëníokë unikama ꞌimainun an uni bana ñuixunkin ꞌësëkë akama ꞌënu utëkëankëxa, uxun ka amiribishi ënë menubi ꞌapu ꞌinun ꞌë ꞌimiakëxa, ꞌimikëx kana bëráma ꞌiásamaira ꞌinun ꞌapu ꞌitëkëni chaiira ꞌapu ꞌianan kushiira ꞌapu ꞌiakën, usai ꞌi mënin sinánñushi ꞌia ka usa ka a ꞌapu ꞌikë kixun unin ꞌunánkë ꞌiakën.

³⁷ Usa ꞌain kana ꞌëx Nabucodonosor ꞌixun bërí Dios naínua ꞌapu ꞌikë a rabin, an ꞌakë ñukama ax ka asérabi ꞌianan upíira ꞌikën, an ka ax isa usaira ꞌikë kixun sinani rabiakakë unikama aín kuëënkësa okin ꞌati ꞌikën.