Daniel 3 - Kashibo-Kakataibo Biblia

ꞌApu Nabucodonosornëx kuri mëskukin ꞌamixun nitsimitankëx unikaman a rabinun kia ñuikë bana

¹ ꞌApu Nabucodonosornën ka achúshi ñu tankian kuri ꞌanun ꞌamiakëxa. Aín chaxkë́ ka treinta metro manan ꞌinun ꞌakë ꞌiakëxa ꞌimainun ka rabë́ ꞌimainun achúshi metro aín naxba ꞌinun ꞌamiakëxa, ꞌamitankëxun ka Dura kakë me sapan anua achúshi ëma cha Babilonianu ꞌikë anu nitsínun aín unikama kakëxa.

² Usokin ꞌamitankëxun ka aín me kamanu ꞌikë ꞌapukama ꞌianan suntárunën kushikama ꞌimainun ëmakamanua ꞌikë ꞌapukama, ꞌianan usakin kamina ñu ꞌati ꞌai kixun an uni kakëkama, ꞌimainun an kuríki bërúanan ñukamaribi bërúankë ꞌianan an bana mëníokë unikama, ꞌianan aín kushibu ꞌimainun raíri ëmanu ꞌikë ꞌapukamaribi, an ñu tankin ꞌamikë a anuxun ashi rabiti anu ꞌaxun nitsinmikë a isia anu rikuatsinkanun kixun kamiakëxa.

³ Usokin kamikëx uax ka uni ñu ꞌunanbu ꞌimainun aín kushibu ꞌianan raíri uni chabukama atux anuxun ñu tankin ꞌamixun nitsinmikë a bëtánain, ënëx ka bërí mitsun rabikë ꞌiti ꞌikë kixun ꞌapun kanun anu nirakëkankëxa.

⁴ Usa ꞌain ka unikama timë́kë ꞌain an pëuti anëkë an munuma banakin unikama kakëxa: Kamabi ëmanu ꞌikë unikama axa bëtsi bëtsi menuax ukë ꞌimainun aín bananbi banakë unikaman mitsun kamina kuati ꞌain:

⁵ Mitsun an manë banañu banoti an banomainun an xunkati ꞌakë a ꞌamainun bëtsi ñukama a banamiti a ꞌaia kuatishi kamina mitsux, ꞌapu Nabucodonosornën ꞌamikë kuri ꞌakë ñu nitsínkë ënë rantinpuruni ꞌikin rabikanti ꞌain.

⁶ Usa ꞌain ka kamabi unikama an rantinpuruni ꞌikin ënë ñu rabikëmakama ax bënë́kinshi suntárunën bitankëxun kini anu tsi tíkakëx ënxaira ꞌitánun ërë́kë anu nikë ꞌiti ꞌikën.

⁷ Usa ꞌain ka anua timëkamë ꞌëokë unikama atun kuatanun an manë banañu banokëkama an ꞌamainun an ñukama mëëti ꞌunánkë akamanribi ꞌaia kuati kamabi unikama rantinpuruni tsóbukin kuri ꞌaxun nitsínkë ñu a rabikankëxa.

⁸ Usokin ꞌamainun ka, uiti Babilonianu ꞌikë unikama atun judíos uni bënákama ax ꞌapu kikësoi ꞌima kixun ꞌapu Nabucodonosor kai kuanuxun isakëxa,

⁹ isbiani kuanxun ka ësokin kakëxa: —¡Nux kananuna mix ꞌapu ꞌaish tsókëpan ꞌikëa unin ꞌitsa baritia ꞌimikin min kakësokin ꞌati kuëënin!

¹⁰ Mix ꞌapu ꞌixun kamina kamabi menu ꞌikë unikaman ka rantinpuruni ꞌikin kuri ꞌaxun nitsínkë a kamabi ñu a banamiti a banamia kuakinshi rabiti ꞌikë kixun bana nan,

¹¹ usa ꞌain kamina mix uix kara usai ꞌima ax ka tsi rëkirukë ënxaira anu nikë ꞌiti ꞌikë kian.

¹² Usaími kikë ax ka asábi ꞌikën, usa ꞌaínbi ka uiti judíos karamina mix ꞌapu ꞌixun Babilonia ëmanu ꞌikë ñukama an bërúanti anëa akaman mix kikë banakama tainsama tania, usa ꞌixun ka a rabiti ñukama rabianan mix ꞌapu ꞌixun kuri amixun nitsinmikë aribi rabitisama tania. Akamax ka Sadrac, Mesac ꞌimainun Abed-negó akama ꞌikën.

¹³ Usokin kakëxun kuati ka Nabucodonosor xuamati nishakëxa, nishkin ka aín suntáru raíri anua ꞌikë anua bitsinkian Sadrac, Mesac ꞌimainun Abed-negó. Anu bënun kixun xuakëxa, xukëx kuanxuan bëkë ka

¹⁴ ësokin ñukákëxa: —¿Asérabi kaina mitsun ꞌën dios rabianan a rabiti kuri ꞌamikë aribi rabikaniman?

¹⁵ ¿Mitsun kaina ñukama banamia kuakinshi ꞌën ꞌamikë ñu ami ñanati ꞌikin rabikantishi ꞌain? Usakin ꞌaíma kamina bëríbi mitsux tsi rëkirukë a ꞌukëmëu nikë ꞌiti ꞌain; ¿usakin ꞌaia kara uinu ꞌikë diosan mitsu ië́miti ꞌit?

¹⁶ Usakian ñukákëxun ka uni bëna rabë́ ꞌimainun achúshi akaman kakëxa: —Nukamax kananuna ënë ñu rabanan mibë kuëbikanani banatima ꞌain.

¹⁷ Nukamanu rabikë Dios an ka numi tsi rëkirukë mëu nianan uisa kaina mix ꞌapu ꞌixun nu oisatani, usakin min ꞌaiabi nu ië́miti ꞌikën.

¹⁸ ꞌAínbi kamina nun ꞌakëbëtanmabi mix ꞌapu ꞌixun upíokin ꞌunánti ꞌain, nun kananuna min rabikë dioskama rabianan kurimi ñu tankin ꞌamixun nitsínkë aribi ami rantipuruni tsóbukin rabitima ꞌain.

Rabë́ ꞌimainun achúshi bëná unikama tsi rëkirukë mëu ꞌikëbi Diosan ië́mia ñuikë bana

¹⁹ Usokian rabë́ ꞌimainun achúshi uni bënákama an kakëxun kuati ka ꞌapu Nabucodonosor aín bëmánanbi panshínkuatsini ꞌitsaira nishakëxa. Usai ꞌikin ka an ñu mëëxunkë unikama anba tsi rëkarukin anu sënën xanatanua tikakë a inumikian ꞌaisamaira xana ꞌitanuan ꞌanun ꞌamiakëxa;

²⁰ usokin ꞌamitankëxun ka aín suntárunën kushi raíri Sadrac, Mesac ꞌimainun Abed-negó akama nëatankëxun kininua tsi ënxaira rëkirukë a mëu ninun kakëxa.

²¹ Usa ꞌain ka rabë́ ꞌimainun achúshi bëná uni akama aín kushibunëa pañukë chupa, akëñunbi nëatankëxun tsi ënxaira ꞌinun rëkirukë anu niakëxa.

²² Usa ꞌain ka ꞌapux ax kikësabi okían bënë́kinshi ꞌanun kikë ꞌiakëxa, usa ꞌain ka tsi rëkirukë ax ënxaira ꞌaish rëkikianxun an tsinu rabë́ ꞌimainun achúshi uni bëná nikë suntárukama aturibi xarokëxa,

²³ a uni bënákama nikian ꞌurama okëxunbi ami rëkikin ꞌukëmëu nipakëtia xarokëxa.

²⁴ Usa ꞌain ka ꞌapu Nabucodonosornën anua tsókë anuax ratuti bënëtishi nirukin aín kushibu a munuma banakin kakëxa: —¿Rabë́ ꞌimainun achúshi uni bënákama a karanuna nëaxun tsinu nikëma ꞌain? —Kixun kakëxun —ka usa ka —kixun atun kakëxa.

²⁵ —ꞌËn kana rabë́ ꞌimainun rabë́ uni tëkërëkakëma ꞌaish tsi rëkirukë nëbë́tsi uisaibi ꞌima nitsia isin, usa ꞌaish ka atu achúshinëx achúshi ángel iskësa ꞌikën.

²⁶ Ësai kiküatsini aí ka ꞌapu Nabucodonosor tsi rëkirukë xëkuë a ꞌurama oi munuma banai kiakëxa: —¡Sadrac, Mesac ꞌimainun Abed-negó, Dios kushiira naínu ꞌikë aín unikama anuax chikíküatsini ka ënu ukan! Usakin kakëx ka uni bënákama ax tsi rëkirukë anuax chikíküatsini uakëxa,

²⁷ usai ꞌikëbë ka a menu ꞌikë ꞌapukama anua timë́kë ax uisa karaisa a unikama tsin oxa iskatsi kiax atu ꞌurama rikuatsiankëxa, rikuatsinxun iskinbi ka tsi rëkirukënëan atun nami uisabi okëma iskankëxa, usa ꞌikë ka aín bu achúshirabi tsin sarakakëma ꞌianan atun pañukë chupabi tsin uisabi okëma ꞌaish tsin mënukë ꞌishakëbi xëkëma ꞌiakëxa.

²⁸ Usa ꞌikë iskëbëshi ka Nabucodonosor munuma banai kiakëxa: “¡Sadrac, Mesac ꞌimainun Abed-negó akaman Dios ax ka rabikë ꞌiti ꞌikën, an ka aín unikama an ënkinma rabikin ꞌapux kikë bana tani aín diosma ꞌain ami rantinpuruni ꞌikëma ꞌikëa bamamiti ꞌaínbi an ië́miti aín ángel xuaxa!

²⁹ Usa ꞌain kana bërí ꞌëx ësai kin, uinu ꞌikë unikamax kara ënë bëná unikaman rabikë Dios ñui ꞌatimati banaia ax ka tëapakëx ain tëmërakë anunbi bamakë ꞌiti ꞌikën, ꞌianan aín xuburibi ꞌatima okin rurupakë ꞌianan, uisa ëmanu ꞌikë kara ꞌimainun uisa banan banakë kara ꞌikëbi usakin ꞌati ꞌikën, an usakin uni ië́miti bëtsi Dios usaribi ka ꞌaíma ikë kiax ꞌapu kiakëxa.”

³⁰ Usakin ꞌatankëxun ka ꞌapun rabë́ ꞌimainun achúshi uni bënákama a Babilonia menu ꞌikë ëmanua atux raíri ꞌapu kamasamaira ꞌinun anëakëxa.