Daniel 2 - Kashibo-Kakataibo Biblia

ꞌApu Nabucodonosornën namá ñuikë bana

¹ Anúan ax ꞌapu ꞌikë rabë́ baritia ꞌirukë anun ka Nabucodonosornën ꞌitsokin namákëxa, namákin iskëkama a ꞌitsaira sinani ka ꞌuxtisama tankëxa.

² Usai ꞌikin ka ñu tankë, ꞌimainun uisai kara ñu ꞌia kixun an tankë, a ꞌianan ñubë́ unikama ꞌimainun ñu ꞌunánkë unikama uisokin namákë kara ñuixuni unun an kati uni xuakëxa. Usakin kamikëx ka a unikama ꞌapunu uankëxa,

³ ukë ka akama ꞌapun kakëxa: —ꞌËn kana achúshiokin namán, usa ꞌain kana uisakin namákë kara ax ꞌikë ꞌunántisa tani ꞌitsaira anun masánuitutin.

⁴ Kixun kakëxun ka an ñu ꞌunánkë uni achúshinën anúan banakë arameo bana anunbi banakin ꞌapu kakëxa: —¡Mix ꞌapu ꞌaish kamina xënibuti tsóti ꞌain! Mix ꞌapu ꞌixun kamina an mi ñu mëëxunti nukama min namákë a ñuixunti ꞌain, nun kananuna uisakin namákë kara ax ꞌikë a mi ñuixunti ꞌain.

⁵ Kixun kakëxun ka ꞌapun ꞌën kana ësokin namá kixun atu ñuixuankëxa: —Mitsunmi ꞌën namákë apain ꞌunántankëxun uisakin namákë kara ax ꞌikë kixun ꞌë ñuixunkëxuma kana, an mitsun xubukama ëchíkin chankakëx aín ikama bukukiankë ꞌitánun ꞌati uni xuti ꞌain.

⁶ Usa ꞌain kana mitsunmi ꞌën namákë uisakin namákë kara ax ꞌikë kixun a pain ñuixunti kuëënin, usokëxun kana ꞌën mitsu ꞌinaínshianan, ꞌitsaira ñu chabu ꞌinánti ꞌain. Usa ꞌain kamina, ꞌën namákë a ñuixunkin uisakin namákë kara ax ꞌikë kixun ꞌë kati ꞌain.

⁷ Ësakian kakëxun ka an ñu ꞌunánkë unikaman amiribishi ꞌapu katëkëankëxa: —Nukama kamina mix ꞌapu ꞌixun min namákë ñuixunti ꞌain, nun kananuna uisakin namákë kara ax ꞌikë kixun mi kati ꞌain.

⁸ —ꞌËn kana upíokin ꞌunanin kixun —ka ꞌapun kakëxa —mitsun kamina uisokin mitsu ꞌanux karana kia a bana kuan, usa ꞌixun kamina uisokin karamina ꞌë basioti ꞌai kixun barikanin.

⁹ Usa ꞌain kamina ꞌën namákë uisai kara kia a ꞌë ñuixunima, mitsux ꞌëx kikësabi oi tëmërati ꞌain, usakin ꞌë paránuxun sinanx kanankë kupí kamina usai tëmëramikë ꞌikanti ꞌain, usa ꞌain kana ꞌën usakin sinánkë usabi okin mitsu ꞌati ꞌain. ꞌË kamina ꞌën namákë a uisakin namákë kara ax ꞌikë kixun ꞌunánun ꞌë ñuixunkanti ꞌain.

¹⁰ Kixun kakëxun ka an ñu ꞌunánkë unikaman kakëxa —uinu ꞌikë menubi ka an ꞌunántisa tankë ñu ꞌapu ꞌikë mi ñuixunti uni ꞌaíma ꞌikë —kixun ka an ñu ꞌunánkë unikaman kakëxa—. Uinsaranbi ka uinu ꞌikë ꞌapunbi ax chaiira ꞌianan kushiira ꞌixunbi, min namákë ñu ꞌësaribi an ñunshinan ꞌamikëxun ñu ꞌakë ꞌimainun an ñu tankë ꞌimainun an ñu ꞌunairakë unikama ñuixunu kixun ñukákëma ꞌikën.

¹¹ Usa ꞌain ka min ꞌapu ꞌixun nu ñukákë ënëx tëira ꞌikën, usa ꞌain ka uínbi min namákë a ñuikin uisakin kaina namá kixun mi katima ꞌikën, anu sapi ka dioskama achúshi ꞌiti ꞌikën; ¡ꞌaínbi ka anu uni ꞌikë anu ꞌima!

¹² Ësokin kakëxun kuati xuamati nishi ka ꞌapu, Babilonianu ꞌikë an ñu ꞌunánkë unikama ka ꞌati ꞌikë kiax kiakëxa.

¹³ Kixun unikaman kuanun chaniokëbëtan ka aín suntárunën kushikaman Daniel ꞌimainun abëa ꞌikë akamaribi ꞌamiti bariakëxa.

Daniel kakë unin aín namákë ñuixunkin ꞌapu ka bana

¹⁴ Usa ꞌain ka suntárunën kushi ax Arioc kakë ꞌiakëxa, ax ka an ñu ꞌunánkë unikama ꞌati ꞌapun kakë ꞌiakëxa, usa ꞌain ka abë Daniel an sinánñuira ꞌixun abë upiti banakin kakëxa.

¹⁵ Kakin ka ñukákëxa: —¿Uisa kupí kara ꞌapun bënë́kinshi an ñu ꞌunánkë unikama ꞌamiti bana nanx? Kakëxun ka Ariocnën Daniel uisa kupín kara usakin ꞌaxa kixun ñuixuankëxa.

¹⁶ Usa ꞌain ka Daniel abë banai kuankëxa, kuanxun ka uisakin namákë kara ax ꞌikë kixun an ñuixunun kara ëorapaín kaintima ꞌikë kixun ꞌapu kakëxa.

¹⁷ Usakin kabiani aín xubunu kuanxun ka usaía ñu ꞌikëkama abëa ꞌikë uni Ananías, Misael ꞌimainun Azarías, akama ñuixuankëxa,

¹⁸ ñuixuntankëxun ka Dios naínu ꞌikë a kamina uisakin kara ꞌapun namáxa a ñuixunua nu ꞌakinun ñukati ꞌai kixun kakëxa, usakin ñukákëxuan nu ꞌakinia ka an ñu ꞌunánkë unikama Babilonianu ꞌikë akama këñun nuribi ꞌatima ꞌikën.

¹⁹ A ꞌimë́bi ka ꞌunátisama ñu a Daniel Diosan uisokin namákë ꞌianan uisai ꞌiti kara ax ꞌikë kixun kakëxa, usakia kakëxun ka Danielnën Dios naínu ꞌikë a ꞌupiokin sinánxunkin,

²⁰ ësai banakin kakëxa: ꞌËn ꞌIbu Dios minan ka ñu ꞌunáirakë ꞌiti ax ꞌianan kushiira ꞌiti ax ꞌikën, usa ꞌain ka Diosan anë ax xënibua ꞌaínbi këñutima ꞌikën.

²¹ An ka nëtëkama bëtsionan, usai ꞌiti ñukama aribi usai ꞌitiokin nania, usaribiokin ka ꞌapukamaribi ꞌapu ꞌimiananbi ꞌapu ꞌimima, ꞌianan sinánñu unikama a sinánñuira ꞌinun ꞌimianan, uisakin ka ñu ꞌati ꞌikë kixun ꞌunánun uni ꞌimikë a ꞌain.

²² Min kamina unían ain sinan ꞌukëmëu unántisama okin sinánkë abi ꞌunánan; bëánkibukënu ꞌikë ñu abi ꞌunánan, kamina mix an ñu pëkakë tirí usaribi ꞌain.

²³ ꞌËn chaitiokëkaman rabia Dios mi kana, ꞌën asabika kakin rabin, min kamina sinánñuira ꞌimianan kushi ꞌinun ë ꞌimia; usa ꞌixun kamina bërí nun mi ñukákëkama nu ꞌunánmian: usa ꞌixun kamina a sinania ꞌapu masá nuitukë akama ꞌunánun nu ꞌunánmian.

²⁴ Usai Diosbë banakiani ka Daniel Arioc kakë uni ꞌapuan sinánñuira unikama Babilonia menu ꞌaminun kakë abë banai kuanxun ësokin kakëxa: —Sinánñuira unikama a kamina ꞌamitima ꞌain, ꞌë kamina uinu kara ꞌapu ꞌia anu buánti ꞌain, ꞌën kana an namákëkama a uisakin namákë kara ax ꞌikë kixun ñuixunti ꞌain.

²⁵ Ësokian kakëxunshi ka Ariocnën Daniel uinu kara ꞌapu Nabucodonosor ꞌia anu buánkëxa, buánxun ka ꞌapu kakëxa: —Ënu kana judíos uni aín menua ñatanbëtsinkin bëkë achúshi, an ka uisakin namákë kara min namákë ax ꞌikë kixun mi ñuixunti ꞌikën.

²⁶ Kixuan kakëxun ka ꞌapun Daniel ꞌikëbi, Beltsasar kakinribi anëkë a kakëxa: —¿Min kaina ꞌën namákë ñuixunkin uisokin namákë kara ax ꞌikë kixun ꞌë katima ꞌain?

²⁷ Ësakian kakëxun ka Danielnën kakëxa: —Uinubi ka sinánñuira ꞌimainun an ñu tankë, ꞌianan ñunshinan ꞌamikëxun ñu ꞌakë ꞌimainun uisa kara ñu ꞌinuxun ꞌaia kixun ꞌunánkë uni min ꞌunántisama ñubi an mi ñuixunti ꞌaíma ꞌikën.

²⁸ Usa ꞌaínbi ka naínu achúshi Dios an ꞌunántisama ꞌikëbi ñu ꞌunánkëira anu ꞌikën, an ka mi ꞌapu ꞌikë uisai karamina ꞌinuxun ꞌain mi ꞌunánmiaxa. Usa ꞌain kana ꞌën ꞌapu ꞌixunmi ꞌuxun namákë akama mi ñuixunti ꞌain:

²⁹ Mix ꞌapu ꞌaish anu ꞌuxkë anu rakaxunmi sinánkë ax ka uisai kara ñu ꞌiti ꞌikë a ꞌiaxa, usa ꞌain ka an ꞌunántisama ñu ꞌunánkë an mi ꞌunánmiaxa.

³⁰ Usaribi okin ka ꞌunántisama ꞌikëbi ꞌëribi a ñu ꞌunánmiaxa, ꞌaínbi ka ꞌëx an bana sinánkë bëtsi unikamasaira ꞌikëmabi, uisakin namákë kara min namákë ax ꞌikë mix ꞌapu ꞌikë, ꞌën mi ñuixunun ꞌë ꞌunánmiaxa, usa ꞌain kamina mix ꞌapu ꞌixun min sinánkëkama uisai kikë kara ax ꞌikë kixun ꞌunánti ꞌain.

³¹ Mix ꞌapu ꞌixun kamina namákin anumi ꞌikë anuax achúshi ñu chaiira ꞌaish ichukë rakuëmianankë niruia isan.

³² A ñux ka ain maxká bëtsi ñukëñun mëskukin ꞌakëma kurishi ꞌakë ꞌiaxa; aín shikan ꞌimainun aín pëñan rabë́ ax ka manë uxuashi ꞌakë ꞌiaxa; ꞌimainun ka aín pukubë ain kisi rabë́ manë panshian ꞌakë ꞌiaxa;

³³ ꞌimainun ka aín ipuku rabë́ axribi manë ꞌakë ꞌimainun ka aín taë rëbu rabë́ axribi bëtsi manë ꞌakë ꞌianan bëtsiribi me tëi ꞌakë ꞌiaxa.

³⁴ Mix ꞌapu ꞌixun namákin iskëx ka ain bashinuax uínbi tarankëmaxi ukin achúshi maxá chaiira an anua unisa okin ꞌakë ñu nikë a ami taramëkuatsini ukin ain taëmixun nipakin chakakëx ka tukibuaxa.

³⁵ Usakian ꞌakëx ka bënëtishi, manë tunan, me tëi, manë panshian, manë uxua a ꞌimainun kuri akamaxi baritiañu me kupúkë iskësaribiti ꞌiaxa, ꞌianan ka baritiañu barionkin tákaia trigonën chua aín bëru a bërutamainun suñun aín chua chamarabi bërutanuma buánkë usaribiti ꞌiaxa. ꞌAínbi ka an ñu nitsínkë chakakë maxá chaiira ax aín bashi chaiira ꞌinun unikin mekama tsitsiruaxa.

³⁶ Ësakin kamina namán. Usa ꞌain kana bërí ꞌapu ꞌixunmi namákë ax kara uisakin namákë ꞌikë mi ñuixunti ꞌain.

³⁷ Mix kamina chaiira ꞌaish bëtsi ꞌapukama samaira ꞌain, usa ꞌikë ka Nukën ꞌIbu Dios naínu ꞌikë an ka mixmi kamabi unikaman ꞌapu ꞌianan mix kushiira ꞌixunmi, min unikama ꞌakinun mi ꞌimiaxa

³⁸ ꞌimianan ka minmi kamabi menu tsókë unikamaribi isanan, ñuinakama ꞌimainun pëchiu ñuinakamaribi isti mi ꞌimiaxa; usa ꞌain ka an mix ꞌapu ꞌikë kamabi kushi mi ꞌinánxa, usa ꞌain kamina mix aín maxká kuri ꞌakëmi iskë usa ꞌain.

³⁹ Usa ꞌain ka mix painmi ꞌapu ꞌikë ꞌain, an min ꞌakësama okin ñu ꞌati axribi ꞌapu ꞌiti ꞌikën, ꞌimainun ka bëtsi ꞌapuribi manë panshian ꞌakëmi iskë ax ꞌixun ꞌën unikama aín kuëënkësokin ꞌati ꞌikën.

⁴⁰ Usakin an pain ꞌan ka bëtsi ꞌapuribi manë tunanën kushisa ꞌixun, anribi manë tunanën ꞌakësa ꞌinun aín suntárukamabëtan bëtsi ꞌapukaman ꞌakin masókin ꞌati ꞌikën.

⁴¹ ꞌImainun ka mix ꞌapu ꞌixunmi aín taë rëbu raíri iskë ax me tëi ꞌakë ꞌiaxa ꞌimainun ka raírinëxribi manë tunan ꞌakë mix ꞌapu ꞌixunmi iskë ax ꞌiaxa; ax ka ësa ꞌiti ꞌikën ꞌapukamax ka bëtsibë ënanankë ꞌiti ꞌikën, usa ꞌaish ka an kushioti manëkëñun mëskukësa ꞌikë kamina namákin isan, ax ka manë an kushiotikëñun me tëi mëskukëmi iskë ꞌikën.

⁴² ꞌImainun ka aín taë rëbukama raíri manë tunan ꞌakë ꞌianan, raírinëxribi me tëi ꞌakë ꞌiaxa, ax ka ësa ꞌiti ꞌikën ꞌapu ax ka kushiira ꞌaíshbi amiribishi ñusmatëkënti ꞌikën.

⁴³ Minmi ꞌapu ꞌixun manë tunankëñun me tëi mëskukë namákin iskë, usaribikin ka upiti bëtsibë tsóti sinánxun bëtsi menu ꞌikë xanu biti ꞌikën ꞌaínbi ka; achúshishi ꞌinun atux bëtsibë timë́tima ꞌikën, usaribiti ka manë tunan ax me tëibë mëskutima.

⁴⁴ Usa ꞌain ka ënë ꞌapukaman, tsókëpan aín unikama ꞌapu ꞌixun ꞌakinkëbëtan Dios naínu ꞌikë an achúshi me anu ꞌapu ꞌikë uinsaranbia bëtsi menu ꞌikë ꞌapukaman masókin atun sinánkësa okin ꞌanun ꞌimitima ꞌikën, usa ꞌixun ka ainra kamabi këñukin bëtsi menu ꞌikë ꞌapukama ꞌatankëx axira uínsarabi këñútimoi ꞌapu ꞌiti ꞌikën.

⁴⁵ Usa ka minmi namákin aín bashinuaxa uínbi tarankëmaxi ukian me putusa ꞌitánun manë tunan, ꞌianan manë uxua, manë panshian, me tëi, ꞌimainun kuri, akama chakabëtsini aín bashinuax ꞌia iskë ax ꞌikën. Dios chaiira ꞌaish kushiira an ka usaía ꞌiti ñukama mi ismiaxa. Usa ꞌain ka minmi namákë ax asérabi ꞌimainun ꞌën mi ñuixunkë axribi asérabi ꞌikën.

⁴⁶ Usakin kakëx ka ꞌapu Nabucodonosor Daniel bëtánain, rantinpuruni tëtúbuti memi bëtiki ꞌiakëxa, usai ꞌitankëxun ka ñu bëtankëxun xaronan sanuira ñuribi bëtankëxun xaroxunun ꞌamiakëxa.

⁴⁷ Usokin ꞌamitankëxun ka Daniel kakëxa: —Asérabi ka mitsun Dios ax chaiira ꞌaish bëtsi dios kamasamaira ꞌikën; ax ka ꞌapukaman ꞌIbuira ꞌimainun, an ꞌunántisama ñukama abi ꞌunania, usa ꞌain kamina ꞌunántisama ënë ñu uisai ꞌiti kara ax ꞌikë kixun min ꞌunanin.

⁴⁸ Usa ꞌain ka ꞌapun Daniel axira ꞌapu ꞌinun ꞌimikin ꞌitsaira ñu kupíkëkama ꞌinaínshianan; Babilonia ëmanu ꞌapu ꞌinun anëakëxa, anëanan ka a menu ꞌikë ëmakanu ikë an ñu ꞌunánkë unikaman kushi ꞌimiakëxa.

⁴⁹ Usakin ꞌimikëxun ka Danielnën abëa ꞌikë unikama ñuikin kakëxa, kakëxun ka ꞌapun Sadrac, Mesac, ꞌimainun Abed-negó akama Babilonianu ꞌikë ëma cha anu ꞌikë ñukama an bërúanti anëakëxa. Usakin ꞌamainun ka Danielnëx anua ꞌapu ꞌikë aín xubu anubi tikiakëxa.