Daniel 1 - Kashibo-Kakataibo Biblia

Daniel ꞌimainun abëa ꞌikë uni bënákama Babilonia menu ꞌia ñuikë bana

¹ Rabë́ ꞌimainun achúshi baritia Joaquím ax Judá menu ꞌapu ꞌikë ꞌain ka ꞌapu Nabucodonosor ax Babilonianuax Jerusalén ëmanu bëbakëxa, bëbakin ka aín suntárukamabëtan a ëma bëarabuiankëxa.

² Usa ꞌain ka Diosanbi Nabucodonosornën ꞌapu Joaquím ñatankin binun ꞌamiakëxa, ꞌamikëxun bianan ka anuxun Dios rabiti xubunua ꞌikë ami xëatia ꞌakë ñukama kamaira bikinmabia binun bimiakëxa. Bimianan ka Nabucodonosornën aín suntárukamabëtan ñatankia bikë unikama aín me Babilonianu buánkëxa, ꞌimainun ka ami xëatia ꞌakë upibu anuxun Dios rabiti xubunua bikë akamaribi anuxun atun dioskama rabiti xubunu nankëxa;

³ usakin ꞌamianan ka an ꞌapun xubu bërúankë unikaman kushi Aspenaz a kakëxa, ꞌapun bakë bëchikëkama ꞌimainun kamina uni ñu ꞌunanbu atun bakë bëchikë,

⁴ bënábu usa ka a uni ꞌikë kixun unin kakëma, ꞌianan uisaibi aín namimi ñukin tankëma, sinan ñuira ꞌixun kamabi ñu ꞌunántisabi, ꞌixun an ꞌapun xubunuxun ñu mëëtisabi. A uni bënákama ka caldeo bana ꞌunámianan kirika kuënëoti ꞌunánmiti ꞌiti ꞌikën.

⁵ ꞌImainun ka Nabucodonosornën uni bënákama a aín pikë piti a ꞌimainun an xëakë xëati abi nëtë́tibi ꞌinánun kakëxa, kanan ka rabë́ ꞌimainun achúshi baritia ꞌimikin kirika ꞌamikëxun ꞌunántankëxa a ñu mëëxuni anu ꞌinun ꞌiminun kakëxa.

Daniel ꞌimainun abëa ꞌikë unikama ꞌapun xubunu ꞌia

⁶ A uni bënákamabë ka Daniel, Ananías, Misael ꞌimainun Azarías, Judá menu ꞌikë ñakánu ꞌikë ꞌiakëxa,

⁷ anuxun ka an ꞌapun xubu bërúankë aín kushi an atu aín anë bëtsiokin anëakëxa: Anëkin ka Daniel Beltsasar kakin anëanan; Ananías, Sadrac kakin anëanan; Misael, Mesac kakin anëanan; Azarías aribi Abed-negó; kakin anëakëxa.

⁸ Usa ꞌaínbi ka Danielnën ꞌën kana ꞌapun pikë piti a ꞌimainun an xëakë a xëatima ꞌai kixun sinánkëxa, sinánkin ka an ꞌapun xubu bërúankë aín kushi, a pitikama pinun kixun ubioxuma ꞌanun kakëxa.

⁹ Diosan ꞌamikëxun ka an ꞌapun xubu bërúankë aín kushi an Daniel upí sinánñu ꞌikë isakëxa,

¹⁰ ꞌaínbi ka aín kushi an Daniel kakëxa: —ꞌËx kana ꞌën ꞌIbu ꞌianan ꞌën ꞌapumi rakuë́tin. An ka mitsunmi pianan xëati a ñuikin ꞌë kaxa, usa ꞌain ka an mitsu uni bënábu raírinën ꞌakësa okin pima chumínbutia iskin mitsu kupín ꞌapun ꞌuchoxun bamanun ꞌë ꞌimiti ꞌikën.

¹¹ Usa ꞌain ka an ꞌapun xubu bërúankë aín kushi an atu bëruánti nankë abë Daniel, Ananías, Misael ꞌimainun Azarías akama anu ꞌain: abë Daniel banakëxa, banakin ka ësokin kakëxa:

¹² —ꞌËn kana an mi ñu mëëxunkë nukama tankin ësokin ꞌanun mi kain: mapai rabë́ nëtë ꞌimikin paxa piti ñuishi pimianan ꞌumpax xëshi nukama xëaminun mi kain.

¹³ Usakin ꞌatankëxun kamina a nëtëkama inúkëbëtan, min nukama uisa karanuna an ꞌapun piti pikë bënákama abë ꞌai kixun isti ꞌain, usakin istankëxun kamina nukama uisa kaina oisa tani usakin ꞌati ꞌain.

¹⁴ Usakin kakëx ka an bërúankë uni ax asábi ka kana mitsu usakin ꞌati ꞌai kiakëxa, kitankëxun ka mapai rabë́ nëtë ꞌimikin atu tankëxa.

¹⁵ Usokin ꞌakëbëa mapai rabë́ nëtë inúkëbë a bëná unikamax, kushiirabu asábi ꞌapun piti an pikë bëná unikama asamaira ꞌiakëxa.

¹⁶ Usa ꞌain ka an bërúankë ꞌapun piti ꞌinánan xëati ꞌinánkinma ëankëxa, ëanan ka paxa piti an pikë ashi buánxuankëxa.

¹⁷ A bëná unikama rabë́ ꞌimainun rabë́ a ka Diosan sinánñuira ꞌixun bëtsi bëtsi kirika ꞌunánun ꞌunámianan uisa kara ñu ꞌiti ꞌikë abi ꞌunánun ꞌunánmiakëxa. Usa ꞌain ka Danielnën namákësa okin iskë a ꞌimainun, namákin iskë akamabi uisai ñu ꞌiti namákë kara ax ꞌikë abi ꞌunánkë ꞌiakëxa.

¹⁸ Usa ꞌain ka rabë́ ꞌimainun achúshi baritia ꞌapu kikë a sënë́nkëbëtan, a bëná unikama ꞌapun xubu ꞌikë anu buánkëxa.

¹⁹ Anuax ka a uni bënákamabë ꞌapu banakëxa, ꞌaínbi ka a uni bënákamanu achúshi uni bënábi axa Daniel, Ananías, Misael ꞌimainun Azarías akamabë sënë́nkë ꞌaíma ꞌiakëxa, usa ꞌain ka akamax ꞌapu ñu mëëxuni anubi bërúakëxa.

²⁰ Anuxun ka kamabi ñu ꞌunánkëira ꞌiti bana ꞌimainun, sinánñuira ꞌiti banakama a ꞌapun ñukákëxa, ñukákinbi ka an ñu ꞌunánkëira mërakëxa, usa ꞌaish, a menu ꞌikë an ñu tankë ꞌimainun an ñu ꞌunánkë unikamabëtan sënë́nmaira ꞌikë mërakëxa.

²¹ Usa ꞌain ka Daniel Ciro kakë uni axa persianu ꞌapu ꞌikë achúshi bari ꞌain anu bërúakëxa.