Colosenses 4 - Kashibo-Kakataibo Biblia

¹ Mitsux an uni ñu mëëmicë uni ꞌixun camina an mi ñu mëëxuncë unibë upí ꞌianan upí oquin cupíoti ꞌain. Usa ꞌixun camina uni ñu mëëmiquin sinánti ꞌain, —ꞌëxribi cana Nucën Papa Dios naínu ꞌicë an ñu mëëmicë ꞌai —quixun.

² Ami manúquinma ábi sinani camina atsánquin ëníma Nucën Papa Diosbë banati ꞌain. —Asábi ca —quixun cai camina abë banati ꞌain.

³ Abë banaquin camina nun unían ꞌunánma bana Cristo ñui quicë ñuixunuan ꞌaquinun Nucën ꞌIbu Dios ñucáti ꞌain. A bana uni ñuixuncë cupí cana sipuacë ꞌain.

⁴ Atúan cuaisabi oquin, unicama aín bana ñuixunquin ꞌunánminun camina ꞌë Nucën Papa Dios ñucáxunti ꞌain, ꞌën ax cuëëncësabi oquin ꞌanun.

⁵ Uisa nëtën caramina axa Cristomi sináncëma unibë ꞌain, a nëtë ñancáishi inúmima camina upí oquin sinani abë banati ꞌain.

⁶ Unibë banai camina upí oquian sinánun upí sinánñu ꞌaish upitishi banati ꞌain. Usa ꞌixun camina mia ñucácëxun caramina uisoquin cati ꞌain quixun ꞌunánti ꞌain.

III. BËRUANX ꞌINUAN PABLONËN CA (4.7-18) Bërúanxa ꞌinuan Pablonën Colosasnu ꞌicë unicama ca

⁷ Nun nuibacë xucën Tíquico, an upí oquin ꞌë ꞌaquianan ꞌëbëtan Nucën ꞌIbu Jesús ñuiquin uni bana ñuixuncë, an ca mitsu isi cuanxun nun ꞌacë ꞌimainun ꞌëx usai ꞌicëcamaribi mitsu ñuixunti ꞌicën.

⁸ ꞌËx cana usa ꞌai quixun caquian mitsu upí oquin sinánminun cana a mitsu isi cuanun xutin.

⁹ ꞌImainun cana mitsubëa Colosasnu ꞌicë uni Onésimo, axribia Jesucristomi catamëcë ꞌaish nubë nuibanancë, aribi xutin. Usa ꞌain ca a uni rabëtan ënuxun nun ꞌacë ꞌimainun ënuaxnu ꞌicëcama mitsu upí oquin ñuixunti ꞌicën.

¹⁰ Acëñun ꞌë sipuacancë Aristarco, ꞌimainun Bernabénën sëcë́nanë, Marcos, anribi ca bërúanx ꞌinun mitsu camia. A ñuiquin ꞌën cacë ꞌixun camina Marcos mitsu isi cuania upí oquin bicanti ꞌain.

¹¹ ꞌImainun ca Jesús, Justo caquinribi anëcë, anribi mitsu bërúanx ꞌinun camía. Cristomi catamëcë judíos unicamama, rabë́ ꞌimainun achúshi ënë́inshi ca ꞌëbëtan Nucën Papa Diosnan ꞌiti bana ñuixuanxa. Atun ca ꞌë upí oquin sinánmiaxa.

¹² Axribia Colosasnu ꞌicë uni, Epafras, anribi ca bërúanxmi ꞌinun quixun mitsu camía. An ca Cristo cuëëncësabi oquin ꞌanan camabi nëtën Nucën Papa Dios mitsu ñucáxunia, ami sinánti ënquinmami ax cuëëncësabi oquinshi upí oquin ꞌanun.

¹³ Cana mitsu cain, ꞌënbi cana ꞌunanin, Epafrasnën ca mitsu ꞌimainun axa Laodicea ꞌimainun Hierápolis ëmanuax Jesúsmi sináncë unicama ꞌitsaira sinánquin, camabi nëtën ënquinma Nucën Papa Dios ñucáxunia.

¹⁴ Lucas an uni roncë, axa nubë nuibanancë, abëtan ca Demasnënribi bërúanxmi ꞌinun quixun mitsu camía.

¹⁵ Laodiceanuaxa ax Jesúsmi catamëcë unicama ꞌimainun camina Ninfascëñun aín xubunua ꞌicë axa Jesúsmi catamëcëcamaribi bërúanxa ꞌinun ꞌë caxunti ꞌain.

¹⁶ Mitsun pain timë́xun istancëxun camina ënë quirica Laodiceanuaxa Jesúsmi catamëcëcamanribia isnun atu buánmiti ꞌain. ꞌImainun camina Laodiceanu ꞌicë unicaman isnun ꞌën buánmicë quirica itsi aribi mitsúnribi bixun isti ꞌain.

¹⁷ Arquipo aribi camina Nucën ꞌIbu Diosan ꞌináncë ñu mëëti a ënquinma upí oquin ꞌaxunun cati ꞌain.

¹⁸ ꞌËx Pablo ꞌixun cana ꞌën mëcënanbi cuënëoquin bërúanxmi ꞌicánun quixun mitsu cain. Usa ꞌain camina ꞌëx cana unin sipuacë ꞌai quixun manúquinma sináncanti ꞌain. Nucën Papa Diosan nuibacëxmi chuámashirua ꞌaish cuëëni upitax bucucanti cana cuëënin. Ashi, Pablo.